Ena vinaka me rau dikeva ga na veiwatini na veika e vauca na itatarovi qori kei na ivakavuvuli vakaivolatabu. Oti me rau vakatulewa, ia me vinaka tiko ga na nodrau lewaeloma ena mata ni Kalou.

Ena gauna makawa ni rau se le rua ga na bula e vuravura (ni oti na Waluvu sa le walu), e vakarota o Jiova: “Drau vakawa, mera le levu mai.” (Vkte. 1:28; 9:1) E sega ni tukuni ena iVolatabu ni baleti keda na lotu vaKarisito na ivakaro qori. Ena vakatau gona vei rau na veiwatini me rau vakayagataka na itatarovi, ena inaki me vakalailaitaki kina na vuvale se na gauna vinaka me rau vakaluveni kina. Na cava me rau vakasamataka ena vakatulewa qori?

Mera vakasamataka vinaka na lotu vaKarisito na itatarovi mera vakayagataka salavata kei na ivakavuvuli vakaivolatabu. Era na sega ni raica na vakalutu me itatarovi. Na vakalutu e veisaqasaqa kei na ka e kaya na iVolatabu me baleta na dokai ni bula. Era na sega ni tinia koso na lotu vaKarisito na bula e kunekunetaki me sucu kina e dua na gone. (Lako 20:13; 21:22, 23; Same 139:16; Jere. 1:5) Ia vakacava na kena vakayagataki na lupu?

A vakamacalataki qori ena Vale ni Vakatawa ni ika15 ni Me 1979, tabana e 30-31. E rapa na itatarovi qo, e biu ena katonigone me tarova na vakaluveni. E sega ni vakamatatataki ena Vale ni Vakatawa qori na ka ena cakava na itatarovi qo. Ia era kaya e levu na kenadau ni yavalata na katonigone me kua ni curu yani na wainitagane me lai vakamau kei na yaloka ni yalewa. Ke rau sega ni vakamau ena dredre ni buli e dua na gone.

Ia e tukuni ena so na ivakadinadina ni se rawa tiko ga ni kunekunetaki kina na gone. Ena rawa ni tubu tiko ena wa ni katonigone se yaco sara ina katonigone. Na itatarovi gona qori ena sega ni dabe vinaka kina na gone ena lalaga ni kena kato. Ni tini dole na nona tubu sa rawa ni wili me vakalutu. E tinia na ulutaga qori: “Na lotu vaKarisito yalodina e via vakayagataka na lupu, me vakasamataka sara vakabibi salavata kei na ivakavuvuli vakaivolatabu ni kena dokai na bula.”—Same 36:9.

Vakacava sa laurai eso tale na ka vou ena vakadidike vakasaenisi se vakavuniwai mai na gauna e volai kina na ulutaga qori ena 1979?

E rua na kena mataqali e laurai. Dua e vivi ena kopa, e vakayagataki vakalevu e Merika ena 1988. E dua tale e volitaki ena 2001 e vakawainimate. Erau cakacaka vakacava?

Kena e vivi ena kopa: Me vaka sa vakamacalataki oti na itatarovi qo e tarova na nodrau vakamau na wainitagane kei na yaloka ni yalewa. Na kena e vivi ena kopa e vakamatea na wainitagane. * Kena ikuri e dau veisautaka na lalaga ni katonigone.

Kena e vakawainimate: E duidui tu na kena mataqali e vakawainimate, via tautauvata ga kei na vuanikau ni itatarovi. Ena drodro na wainimate ina katonigone, rawa ni tarova na biu mai ni yaloka ni yalewa. Ke sega ni yaco qori, ena dredre me kunekune rawa o yalewa. Na wainimate gona qo e vakamamaretaka na lalaga ni katonigone. * Ia ena vavaku kina na wai weliwelia e dau tiko ena mataniwai nei yalewa, e vakadredretaka na curu ni wainitagane me yaco ina katonigone. Na ka kece qori e cakava na itatarovi qo.

Me vaka sa tukuni mai, na rua na mataqali itatarovi qo e vakamamaretaka na lalaga ni katonigone. Ia cava ena yaco ke sa kunekunetaki na gone? Ena curu ena katonigone, ena sega ga ni dabe vinaka ena kena lalaga. Rawa gona ni lutudole. E tutu yadua me kunekune e dua na yalewa, me vaka ga e dau yaco vua e gunu vuanikau ni itatarovi.

Ena sega gona ni rawa ni tukuni ni na tarova na nodrau vakamau na wainitagane kei na yaloka ni yalewa na lupu. Ia e laurai ena vakadidike vakasaenisi, ni tutu yadua me bukete e dua na yalewa ni vakayagataka na rua na itatarovi qori.

Ke rau via vakayagataka na veiwatini lotu vaKarisito na lupu, bibi me rau veitalanoa sara kina vakavinaka kei na dua e kenadau, vaka kina na kena yaga kei na leqa e rawa ni yacovi yalewa. Me kua tale ni dua e vakatulewa kina, kua mada ga ni dua na vuniwai. (Roma 14:12; Kala. 6:4, 5) Qori me nodrau ga, ni yavutaki nodrau vakatulewa ena nodrau vakamarautaka na Kalou, me vinaka tale ga nodrau lewaeloma.—Vakatauvatana 1 Timoci 1:18, 19; 2 Timoci 1:3.