1. Na cava nodra rai e levu me baleta na cakacaka?

NA CAVA nodra rai e levu ena nomu itikotiko me baleta na cakacaka? E laurai ena levu na vanua nira sa qai cakacaka ga vakaukaua na lewenivanua, era cakacaka tale ga vakabalavu. Levu era cakacaka vakasivia era sega ni dau vakacegu vinaka, sega ni veimaliwai kei na nodra vuvale se mera vulica na veika me baleta na Kalou. (Dauv. 2:23) Ia eso era sega sara ga ni via cakacaka, e levu ga nodra iulubale.—Vkai. 26:13, 14.

2-3. Erau ivakaraitaki vinaka vakacava o Jiova kei Jisu ena cakacaka?

² E duidui na nodra rai e levu me baleta na cakacaka, ia dikeva mada nodrau rai o Jiova kei Jisu. E macala ga ni dau cakacaka o Jiova. E vakamatatataka qori o Jisu ni tukuna: “E cakacaka tiko ga o Tamaqu me yacova mai qo, au cakacaka tale tiko ga o yau.” (Joni 5:17) Vakasamataka nona ogaoga voli na Kalou ni buli ira na iwiliwili levu ni agilosi kei na kalokalo e lomalagi. Eda raica tale ga na cakacaka vakatubuqoroqoro ni Kalou ena vuravura totoka qo. Sa rauta me tukuna na daunisame: “Sa levu sara ga na nomuni cakacaka i Jiova! Oni sa cakava kece vakavuku. Sa sinai na vuravura ena ka oni cakava.”—Same 104:24.

³ E vakatotomuri Tamana tale ga o Jisu. E vakatokai ena iVolatabu me vuku, e veivuke ena gauna e “vakarautaka” kina na Kalou “na lomalagi.” Io, e “matai ligamaqosa” i Jiova. (Vkai. 8:27-31) Ni mai bula e vuravura o Jisu, e totoka vakaoti na nona cakacaka. E raica na cakacaka qori me kena kakana, e laurai tale ga ena ka kece e cakava ni talai koya mai na Kalou.—Joni 4:34; 5:36; 14:10.

4. Na cava eda vulica vei Jiova kei Jisu me baleta na vakacegu?

 ⁴ Erau dau cakacaka vakaukaua o Jiova kei Jisu, ia vakacava e kena ibalebale ni sega ni bibi meda vakacegu? Sega. O Jiova ena sega vakadua ni oca, e sega gona ni vinakati me vakacegu. Ia ni bulia oti na lomalagi kei na vuravura, e kaya na iVolatabu ni “cava . . . nona cakacaka qai vakacegu.” (Lako 31:17) Kena ibalebale qori ni a cegu o Jiova me marautaka na veika sa cakava. O Jisu tale ga e cakacaka vakaukaua ni bula e vuravura, ia e tiko na gauna me cegu kina, me kana vata kei ira na nona itokani.—Maciu 14:13; Luke 7:34.

5. Na ituvaki dredre cava era sotava e levu na dauveiqaravi i Jiova?

⁵ E uqeti keda na iVolatabu meda dau cakacaka. Meda kilai tani na tamata ni Kalou nida mamakutu, meda kua ni vucesa. (Vkai. 15:19) De dua o cakacaka saumi mo qarava nomu vuvale. E noda itavi tale ga na imuri kece i Jisu meda vakaitavi ena cakacaka vakavunau. Ia e bibi me tiko noda gauna ni vakacegu. Vakacava e dau dredre mo veiraurautaka nomu cakacaka, nomu cakacaka vakaitalatala kei na gauna ni vakacegu? Eda na kila vakacava na levu ni gauna meda cakacaka kina kei na gauna ni vakacegu?

6. E kilai vakacava ena Marika 6:30-34 ni dau veiraurautaka o Jisu na cakacaka kei na vakacegu?

⁶ E bibi meda veiraurautaka noda cakacaka. E uqeti vakalou o Tui Solomoni me vola: “E vagauna na . . . ka kece.” Sa qai cavuta na teitei, tara vale, tagi, meke, kei na so tale. (Dauv. 3:1-8) E macala gona ni rua na ka e bibi ena noda bula, na cakacaka kei na vakacegu. E donu na rai nei Jisu me baleta na cakacaka. Dua na gauna eratou osooso sara na yapositolo ena dua na ilakolako ni cakacaka vakavunau, “e sega [mada ga] na gauna galala me ratou kana kina.” E mani kaya vei ratou o Jisu: “Mai, datou lai vakacegu mada vakalailai ena dua na vanua lala.” (Wilika Marika 6:30-34.) E ka ni sasaga me vakacegu vinaka o Jisu kei ratou nona tisaipeli, ia e kila ni bibi me ratou dau vakacegu.

7. Ena yaga vakacava noda vulica na lawa ni Siga ni Vakacecegu?

⁷ Ena so na gauna e vinakati sara ga meda vakacegu se me veisau na noda ituvatuva ena veisiga. Qori na ka eda vulica ena ituvatuva ni Siga ni Vakacecegu e veimacawa e vakarautaka o Jiova vei ira na Isireli. Eda sega ni vauci ena Lawa e soli vei Mosese, ia e yaga noda dikeva na Siga ni Vakacecegu e tukuni kina. E yaga na veika eda vulica kina meda vakalewa na noda rai me baleta na cakacaka kei na vakacegu.

8. Me vaka e tukuni ena Lako Yani 31:12-15, e gauna ni cava na Siga ni Vakacecegu?

⁸ E tukuni ena iVolatabu ni a cegu na Kalou ni oti e ono na “siga” nona bulia na veika e vuravura. (Vkte. 2:2) Ia e dau cakacaka o Jiova, “e cakacaka tiko ga” ni qarava eso tale na ka. (Joni 5:17) Na ituvatuva ni Siga ni Vakacecegu e vaka ga na siga e cegu kina o Jiova me vaka e tukuni ena Vakatekivu. E kaya na Kalou ni Siga ni Vakacecegu e ivakatakilakila vei koya kei ira na Isireli. Na siga qori e “gauna sara ga ni cegu. E ka tabu vei Jiova.” (Wilika Lako Yani 31:12-15.) E vakatabui mera cakacaka kece, wili kina na gone, bobula, kei na manumanu. (Lako 20:10) Qori na gauna mera kauaitaka kina vakalevu na nodra veika vakayalo.

9. Na rai cala cava me baleta na Siga ni Vakacecegu e basika ena gauna i Jisu?

⁹ E yaga dina na Siga ni Vakacecegu vei ira  na Isireli, ia e levu na iliuliu ni lotu ena gauna i Jisu era bulia tale eso na lawa kaukaua me baleta na Siga ni Vakacecegu. Era kaya ni tabu mada ga ena Siga ni Vakacecegu na vaqara witi se mera vakabulai na tauvimate. (Mari. 2:23-27; 3:2-5) Ia e duatani na rai nei Jiova, e vakamatatataka qori o Jisu vei ira na rogoci koya.

10. Na cava eda vulica ena Maciu 12:9-12 ena rai nei Jisu me baleta na Siga ni Vakacecegu?

¹⁰ E muria o Jisu kei ratou nona imuri Jiu na Siga ni Vakacecegu ni ratou vauci ena Lawa e soli vei Mosese. * Ia e vakaraitaka o Jisu ena ka e tukuna kei na ka e cakava ni sega ni cala ke dua e veivuke se caka vinaka ena Siga ni Vakacecegu. E tukuna vakamatata: “E tara me caka na ka vinaka ena Siga ni Vakacecegu.” (Wilika Maciu 12:9-12.) Ena nona rai, e sega ni beci na Siga ni Vakacecegu ke dua e veivuke se caka vinaka. E laurai ena ivakarau ni bula i Jisu ni kila na kena inaki. Nira cegu na tamata ni Kalou ena nodra cakacaka, era kauaitaka vakalevu nodra veika vakayalo. E macala ni a tuberi o Jisu ena vuvale e kauaitaka na veika vakayalo ena Siga ni Vakacegu. Eda kila qori ena ka e tukuni me baleti koya ni tiko ena nona koro o Nasareci, e volai: “E curu ina valenilotu [o Jisu] ena Siga ni Vakacecegu me vaka na nona ivakarau, qai tucake me wilivola.”—Luke 4:15-19.

11. E vulica vei cei o Jisu me dau cakacaka?

¹¹ E macala ni muria o Josefa na rai ni Kalou me baleta na cakacaka ni a vakavulici Jisu na luvena vakacabecabe me matai. (Maciu 13:55, 56) E dau raici Josefa tale ga e veisiga o Jisu ni cakacaka vakaukaua me qarava nona vuvale levu. Sa rauta me tukuna vei ratou nona tisaipeli: “Ni dodonu ga me saumi na tamata cakacaka.” (Luke 10:7) E macala gona ni dau cakacaka tale ga vakaukaua o Jisu.

12. Na veitikinivolatabu cava e vakaraitaka na rai ni iVolatabu me baleta na cakacaka vakaukaua?

¹² E dau cakacaka tale ga vakaukaua na yapositolo o Paula. Dua na itavi levu e qarava oya me wasea na itukutuku kei Jisu kei na ka e vakavulica. E cakacaka tale ga vakaukaua me qaravi koya. Era kila vinaka e Cesalonaika nona “buno” kei na “oga” ni “cakacaka” ena “bogi kei na siga” me kua ni “vakacolata” e dua ena “levu na ka vakailavo.” (2 Ces. 3:8; Caka. 20:34, 35) E rairai tukuna tiko o Paula nona daucula valelaca. Ni lako i Korinica, e lai tiko vei rau o Akuila kei Pirisila “me ratou cakacaka vata, ni ratou daucula valelaca kece.” Ni tukuni ni cakacaka ena “bogi kei na siga,” e sega ni kena ibalebale ni sa cakava tu ga qori. E dau cegu tale ga ena so na gauna ena cula valelaca, me vaka ena Siga ni Vakacecegu. E dau vunau vei ira na Jiu nira sega ni cakacaka ena siga qori.—Caka. 13:14-16, 42-44; 16:13; 18:1-4.

13. Na cava eda vulica vei Paula?

¹³ E ivakaraitaki vinaka na yapositolo o Paula. E cakacaka me rawailavo, ia e vakaitavi wasoma “ena cakacaka bibi ni kena tukuni na itukutuku vinaka ni Kalou.” (Roma 15:16; 2 Kor. 11:23) E vakavulica tale ga qori mera muria eso tale. Erau “dau cakacaka vata” kei Paula o Akuila kei Pirisila “ena veika e baleti Karisito Jisu.” (Roma 12:11; 16:3) E uqeti ira e Korinica o Paula mera “dau vakaitavi vakalevu ena cakacaka ni Turaga.” (1 Kor. 15:58; 2 Kor. 9:8) E uqeti koya mada ga o Jiova me vola: “O koya e sega ni via cakacaka me kua ni kana.”—2 Ces. 3:10.

14. Na cava na ibalebale ni ka e tukuna o Jisu ena Joni 14:12?

¹⁴ Na vunau kei na veivakatisaipelitaki e cakacaka bibi duadua ena iotioti ni veisiga qo. E parofisaitaka mada ga o Jisu ni na levu sara na ka era cakava na nona imuri ni vakatauvatani kei koya! (Wilika Joni 14:12.) E sega ni kaya tiko nira na cakamana me vakataki koya. Ia era na vunau qai veivakavulici ena levu sara na yalava, levu na lewenivanua, ena balavu tale ga na gauna era vunau kina.

15. Na cava meda taroga? Na vuna?

¹⁵ Ke o cakacaka saumi, mo taroga: ‘Au kilai e valenicakacaka niu dau cakacaka vakaukaua? Au dau vakaotia noqu cakacaka ena kena gauna, au cakava tale ga ena noqu vinaka taucoko?’ Ke dina qori, ena rairai nuitaki iko o nomu boso. Era na taleitaka tale ga o ira oni cakacaka vata na itukutuku ni Matanitu ni Kalou. Me baleta noda cakacaka vakaitalatala, e vinaka mo taroga: ‘Au kilai niu dau gumatua ena cakacaka vakaitalatala? Au dau vakavakarau vinaka ena imatai ni veisiko? Au dau lesuvi ira totolo na tataleitaki? Au vakaitavi wasoma tale ga ena so tale na iwalewale ni vunau?’ Ke dina qori, o na marautaka nomu cakacaka.

16. E duidui vakacava na rai nei Jisu kei ratou na yapositolo ni vakatauvatani kei na levu nikua?

¹⁶ E kila o Jisu ni na vinakati me vakacegu ena so na gauna kei ratou na nona  yapositolo. Ia e levu ena gauna ya kei na gauna qo era vaka na turaga vutuniyau ena vosa vakatautauvata i Jisu. E tukuna ena nuidei na turaga qori: “Meu se tei vakacegu mada, meu kana, meu gunu, meu marau.” (Luke 12:19; 2 Tim. 3:4) E nanuma na turaga qori ni bibi duadua na qarai ni vakacegu kei na marau. Ia e duatani na ka e cakava o Jisu kei ratou na yapositolo, eratou sega ni vakaliuca na marau.

17. Meda vakayagataka vakacava na gauna eda cegu kina mai na cakacaka?

¹⁷ Eda na vakatotomuri Jisu vakacava nikua? Nida lako vagade, eda se rawa tiko ga ni caka vinaka nida vunau, eda tiko tale ga ena soqoni. Nida raica vakabibi qori, eda na gumatua ena veivakatisaipelitaki, eda na tiko wasoma tale ga ena soqoni. (Iper. 10:24, 25) Ke da gade mada ga, eda na dei ena noda ituvatuva vakayalo nida sasaga ina soqoni ena vanua eda tiko kina, eda qara tale ga na sala meda vunau vei ira eda sotava.—2 Tim. 4:2.

18. Na cava e vinakata na noda Tui o Jisu Karisito?

¹⁸ Eda marau ni sega ni namaka vakasivia vei keda na ka na noda Tui o Jisu Karisito, ia e vukei keda meda veiraurautaka noda rai me baleta na cakacaka kei na vakacegu! (Iper. 4:15) E vinakata meda dau vakacegu vinaka. E vinakata tale ga meda cakacaka vakaukaua meda qaravi keda, da qai gumatua ena cakacaka marautaki na veivakatisaipelitaki. Ena ulutaga tarava, eda na vulica na ka e cakava o Jisu me sereki keda mai na ituvaki vakaloloma eda bobula tu kina.