E sega ni inaki ni ka e tukuni ena Vakarua 22:25-27 me vakadeitaki ni cala o tagane, ni sa matata tu qori. Na inaki ni lawa qo me vakadeitaka ga ke cala o yalewa se sega. Dikeva na tikina wavolita.

E tukuni ena tikina e 23 kei na 24 na tagane e veiyacovi ena “koro” kei na dua na yalewa sa veimusumusuki oti. Ena beitaki ena veibutakoci, nira okati mera vakawati na yalewa era sa veimusumusuki tu. Ia vakacava o yalewa? A “sega ni qoqolou” se kaila ena “koro.” Ke cakava qori, era na rogoca eso tale ra qai vukei koya. Ia ni sega ni kaila, ena beitaki tale ga ena veibutakoci, erau cala ruarua.—Vkru. 22:23, 24.

Sa qai tukuni ena Lawa e dua tale na ituvaki, e kaya: “Ia ke mani dua na tagane e sotava ena lomanivanua na yalewa sa musuki oti tu, e vesuki koya o tagane qai kucuva, me mate duadua ga na tagane e kucuvi koya, mo kua ni cakava vei yalewa e dua na ka. E sega ni dua na nona cala o yalewa me vakamatei kina. Na kisi qo e tautauvata ga na nona ciciva e dua na tagane na wekana qai labati koya. Ni a sotavi goneyalewa o koya ena lomanivanua, a qoqolou tale ga na goneyalewa sa veimusumusuki tu, ia e sega ni dua e vakabulai koya.”—Vkru. 22:25-27.

Ena ituvaki qori, ena vakabauti ga o yalewa. Na vuna? Ni a “qoqolou” se kaila “ia e sega ni dua e vakabulai koya.” E sega gona ni veibutakoci. Ena beitaki ga o tagane ena kucu kei na veibutakoci, ni a ‘vesuka’ na yalewa sa musuki tu “qai kucuva.”

Na inaki gona ni lawa qo me vakadeitaka ke cala o yalewa se sega, ia sa matata tu ni kucu o tagane, e veibutakoci tale ga. Eda nuidei nira na “vaqaqa vinaka sara” na turaganilewa na ituvaki qo ra qai vakatulewa ni yavutaki ena ivakatagedegede ni Kalou e dau vakamatatataki wasoma.—Vkru. 13:14; 17:4; Lako 20:14.