Kena irairai ni sega. Ni tukuna vei Ivi na Tevoro ni na sega ni mate ke kania na vuanikau e vakatabuya na Kalou, e sega ni kaya ni na bula tale tiko e dua na ka (me vaka era kaya eso ni yalodra na mate) e tawamate rawa. E vakayagataka na gata o Setani me tukuna vei Ivi ni na ‘sega dina ni mate’ ke kana mai na vunikau qori. E kaya tiko ni na bula tu ga o Ivi me marautaka na bula totoka e vuravura, e sega ni vinakati me lewai koya na Kalou.—Vkte. 2:17; 3:3-5.

Ke sega ni vu mai Iteni na ivakavuvuli lasu sa takalevu tu nikua me baleta na tawamate ni yalo, e vu ga mai vei? Eda sega ni vakadeitaka. Na ka ga eda kila ni a vakarusai kece na sokalou lasu ena Waluvu ena siga i Noa. E kawaboko na sokalou lasu ena Waluvu ni a bula ga o Noa kei na nona vuvale, eratou dau sokalou dina.

Kena ibalebale e rairai basika na ivakavuvuli ni tawamate ni yalo ni oti na Waluvu. Ena gauna e vakasesea kina na Kalou na vosa mai Pepeli, era talabusese na lewenivanua e “dela i vuravura taucoko.” E macala gona nira vakatetea na ivakavuvuli me baleta na tawamate ni yalo. (Vkte. 11:8, 9) Se mani gauna cava e tekivu mai kina na ivakavuvuli lasu qo, eda vakadeitaka ga ni vakavuna o Setani na Tevoro na “tama ni lasu.” E marautaka tale ga ni sa takalevu tu. —Joni 8:44.