1-2. (a) Na cava na jupili? (Raica na kato “ Na Cava na Jupili?”) (b) Na cava e tukuna tiko o Jisu ena Luke 4:16-18?

ESO na vanua era dau marautaka na ika50 ni yabaki ni nona veiliutaki e dua na tui se ranadi. E dau kilai na ika50 ni yabaki me nodra jupili na iliuliu. E rawa ni marautaki tu me dua na siga, dua na macawa, se balavu sara. Toso na gauna mai oti yani, guilecavi tale ga.

² Eda na veivosakitaka tiko e dua na jupili e vinaka sara mai na soqo e dau marautaki me dua taucoko na yabaki e Isireli makawa, ena ika50 kece ni yabaki. Era marautaka ena gauna qori na nodra galala. Ia e yaga vakacava vei keda ena gauna qo? Nida vulica na nodra Jupili na Isireli, eda na vakasamataka e dua na ituvatuva totoka e vakarautaka vei keda o Jiova eda marautaka kina na galala se veisereki e tawamudu, na veisereki e tukuna o Jisu.—Wilika Luke 4:16-18.

3. Me vaka e tukuni ena Vunau ni Soro 25:8-12, e yaga vakacava vei ira na Isireli na Jupili?

³ Eda na kila vinaka na veisereki e vakamacalataka o Jisu nida dikeva na Jupili e vakarautaka na Kalou vei ira na nona tamata ena gauna makawa. E kaya o Jiova vei ira na Isireli: “Moni vakatabuya na ika50 ni yabaki qai kacivaka ena vanua na veisereki vei ira kece na lewenivanua. Qori me yabaki ni Jupili vei kemuni, moni dui taura lesu na nomuni iyau, ni qai dui lesu vei ira na wekamuni.” (Wilika Vunau ni Soro 25:8-12.) Eda vulica ena ulutaga sa oti na sala e yaga kina vei ira na Isireli na Siga ni Vakacecegu e veimacawa. Ia e  yaga vakacava vei ira na Jupili? Kaya mada ke sega ni sauma rawa e dua na Jiu na nona dinau, e mani volitaka na nona qele me saumi kina. Ena vakasukai vua na qele qori ena yabaki ni Jupili. Ena ‘taura lesu na nona iyau,’ ena sega gona ni vakaleqa na nodratou ivotavota na luvena ena gauna se bera mai. Ena dua tale na ituvaki, e sega ni sauma rawa e dua na tagane na nona dinau, e mani volitaki koya se o luvena me bobula me saumi kina na dinau qori. Ena yabaki ni Jupili, ena ‘lesu na bobula vei ira na wekana.’ Ena sega gona ni dua me bobula tu ena nona bula taucoko! Eda raica ga kina nona kauaitaki ira na nona tamata o Jiova!

4-5. Na cava meda vulica kina na Jupili ena gauna makawa?

⁴ Na cava e dua tale na yaga ni Jupili? E vakamacalataka o Jiova: “Me kua ni dua e dravudravua ena kemuni maliwa, ni na vakalougatataki iko dina o Jiova ena vanua e solia tiko vei iko o Jiova na nomu Kalou mo taukena me ivotavota.” (Vkru. 15:4) Qori e duidui sara mai na veika e yaco tu nikua e vuravura. Era sa vutuniyau ga na vutuniyau, era dravudravua ga na dravudravua!

⁵ Eda sega ni vauci na lotu vaKarisito ena Lawa e soli vei Mosese. Eda sega gona ni muria na ituvatuva makawa ni Jupili mera sereki kina na bobula, boko na dinau, vakasukai tale ga na ivotavota ni qele. (Roma 7:4; 10:4; Efeso 2:15) Ia ena yaga noda vulica na ituvatuva ni Jupili. Na vuna? Nida na marautaka tale ga na veisereki, se galala e vaka na Jupili e vakarautaka o Jiova vei ira na Isireli.

6. Na cava e bibi kina meda sereki na kawatamata?

⁶ E bibi meda sereki kece nida bobula tu ena dua na ituvaki vakaloloma oya na ivalavala ca. Qori na vuna eda qase kina, tauvimate, da qai mate. Levu era vakadinata qori nira rai ena iloilo se nira lako i valenibula nira tauvimate. Eda dau yalolailai  tale ga nida cakacala. E tukuna kina na yapositolo o Paula ni “vakabobulataki . . . ina lawa ni ivalavala ca e tiko e yagona.” E kaya tale ga: “Au sa vakaloloma dina! O cei ena vakabulai au mai na yago e vakavuna tiko na noqu mate?”—Roma 7:23, 24.

7. Na cava e parofisaitaka o Aisea me baleta na veisereki?

⁷ Eda marau ni vakarautaka na Kalou na sala meda vakabulai kina se sereki mai na ivalavala ca. E dua na itavi bibi e qarava o Jisu ena ituvatuva qori. Ni se vo tu e sivia ni 700 na yabaki me sucu o Jisu, e parofisaitaka o Aisea e dua na veisereki e levu sara. E uasivi na veisereki qori ni vakatauvatani kei na nodra yabaki ni Jupili na Isireli. E vola: “E sobuti au na yalo ni Turaga Cecere Duadua o Jiova, ni lumuti au o Jiova meu tukuna na itukutuku vinaka vei ira na yalomalumalumu. E talai au meu vakabulai ira na vusolo na lomadra, meu tukuna na veisereki vei ira na bobula.” (Aisea 61:1) E tukuni cei tiko na parofisai qo?

8. E tukuni cei tiko na parofisai i Aisea me baleta na veisereki?

⁸ E qai vakayacori na parofisai ni veisereki qori ni tekivu na cakacaka vakaitalatala i Jisu. Ni lako ena valenilotu ena nona koro e Nasareci, e wilika na parofisai qori i Aisea vei ira na Jiu era soqoni yani. E kaya o Jisu ni baleti koya sara ga. E kaya: “Sa tu vei au na yalo i Jiova, e lumuti au meu vunautaka na itukutuku vinaka vei ira na dravudravua. E talai au meu kacivaka na veisereki vei ira na vesu tu, mera rai na mataboko, mera sereki na vakaloloma, meu vunautaka tale ga na yabaki vinaka i Jiova.” (Luke 4:16-19) E vakayacora vakacava o Jisu na parofisai qori?

9. Na veisereki cava era nuitaka tu e levu ena gauna i Jisu?

⁹ E tekivu vakilai ena imatai ni senitiuri na galala se na veisereki e wilika o Jisu ena parofisai i Aisea. E vakadeitaka qori o Jisu ni tukuna: “Sa vakayacori nikua na tikinivolatabu oni se qai rogoca.” (Luke 4:21) Levu vei ira na rogoci Jisu era vakanuinui tiko me dua na veisau ena veika vakapolitiki, oya mera sereki mai na matanitu o Roma. De dua era vakataki rau na tagane erau tukuna: “Keimami a nuitaka ni na vakabulai Isireli o koya.” (Luke 24:13, 21) Ia eda kila ni sega ni uqeti ira na nona imuri o Jisu mera saqata na veiliutaki voravora  ni matanitu o Roma. E kaya ga mera solia vei “Sisa na ka e nei Sisa.” (Maciu 22:21) E veisereki gona vakacava o Jisu ena gauna ya?

10. E veisereki mai na cava o Jisu?

¹⁰ E vukei ira na lewenivanua na Luve ni Kalou mera sereki se galala ena rua na sala. Kena imatai, mera sereki mai na nodra ivakavuvuli lasu na iliuliu ni lotu. E levu na Jiu ena gauna ya era bobula tu ena ivakarau kei na ivakavuvuli lasu. (Maciu 5:31-37; 15:1-11) E nanumi nira veituberi vakayalo na iliuliu ni lotu, ia era mataboko. Era na tu ga ena butobuto, ena sega tale ga ni vosoti na nodra ivalavala ca nira cata na Mesaia kei na ka dina e vakavulica. (Joni 9:1, 14-16, 35-41) Era sereki gona vakayalo na yalomalua ena ka dina e vakavulica o Jisu kei na nona ivakaraitaki vinaka.—Mari. 1:22; 2:23–3:5.

11. Na cava na ikarua ni sala e sereki keda kina o Jisu?

¹¹ Na ikarua ni sala e vukei keda kina o Jisu meda galala oya ni sereki keda ena veivakabobulataki ni ivalavala ca. Ni mate vakaisoro o Jisu, e rawa kina vua na Kalou me vosoti ira na vakaraitaka nodra vakabauta na ivoli ni veisereki, era vakaraitaka qori ena ka era cakava. (Iper. 10:12-18) E tukuna o Jisu: “Ke sa sereki kemuni na Luvena, oni sa qai sereki dina.” (Joni 8:36) E uasivi na veisereki qori mai na ka e rawati ena nodra yabaki ni Jupili na Isireli! Kena ivakaraitaki, ena rawa ni bobula tale e dua e sereki ena Jupili, ena mate tale ga ni toso na gauna. Ia na veisereki i Jisu e tawamudu na kena yaga.

12. O cei era marautaka e liu na veisereki e kacivaka o Jisu?

¹² Ena siga ni Penitiko 33 G.V., o Jiova e lumuti ratou na yapositolo ena yalo tabu kei na so tale na tagane kei na yalewa yalodina. E ciqomi ira mera luvena me rawa nira vakaturi ena dua na gauna mera lai veiliutaki kei Jisu i lomalagi. (Roma 8:2, 15-17) Qo sara ga o ira na marautaka e liu na veisereki e kacivaka o Jisu ena valenilotu e Nasareci. Era sega tale ni bobula na tagane kei na yalewa qori ena nodra ivakarau na iliuliu ni lotu Jiu kei na nodra ivakavuvuli lasu. Ena rai ni Kalou, era sa galala tale ga mai na ivalavala ca e vakavuna tiko na mate. E tauyavu na Jupili vakaivakatakarakara nira lumuti na imuri i Karisito ena 33 G.V., ena qai oti ni cava na Duanaudolu na Yabaki ni  Veiliutaki i Jisu. Na cava ena rawati ena gauna qori?

13-14. Me vakataki ira na lumuti, o cei tale ga ena marautaka na veisereki e kacivaka o Jisu?

¹³ Ena noda gauna, e levu na tamata yalodina mai na veimatanitu era lewe ni ‘so tale na sipi.’ (Joni 10:16) E sega ni digitaki ira na Kalou mera lai veiliutaki kei Jisu i lomalagi. E kaya ga na iVolatabu ni rawa nira bula tawamudu e vuravura. Vakacava e nomu inuinui qori?

¹⁴ E yaga tale ga vei iko nikua eso na ka era marautaka tiko o ira na lai veiliutaki ena Matanitu ni Kalou i lomalagi. Kena ivakaraitaki, ni o vakabauta na dra i Jisu, o rawa ni kerea me vosoti na nomu ivalavala ca. Ena vakadonui iko kina na Kalou, e savasava tale ga na nomu lewaeloma e matana. (Efeso 1:7; Vkta. 7:14, 15) Vakasamataka tale ga na levu ni veivakalougatataki ni o sereki mai na ivakavuvuli lasu o dau vakabauta tu. E kaya o Jisu: “Oni na kila na ka dina, na ka dina ena qai sereki kemuni.” (Joni 8:32) Eda marautaka dina na noda sereki!

15. Na galala kei na veivakalougatataki cava meda namaka ena gauna se bera mai?

¹⁵ Eda namaka meda na qai galala vakalevu ena gauna se bera mai. Sa vakarau vakawabokotaka o Jisu na lotu lasu kei na veiliutaki ca e vuravura. Na Kalou ena  taqomaka na “isoqosoqo levu” era qaravi koya, mera marautaka na veivakalougatataki ena vuravura parataisi. (Vkta. 7:9, 14) Dua na iwiliwili levu era na vakaturi mera sereki mai na revurevu ni ivalavala ca i Atama.—Caka. 24:15.

16. Na cava ena marautaka na kawatamata?

¹⁶ Ena loma ni Duanaudolu na Yabaki, ena duavata o Jisu kei ira na veiliutaki kei koya mera vukea na kawatamata mera bula uasivi, me taucoko tale ga nodra qaravi Jiova. Sa na vinaka tale na ituvaki, era sa na galala. Ena marautaki me vaka ga na nodra soqo ni Jupili na Isireli. Era na uasivi kece na qaravi Jiova ena yalodina e vuravura, era sa galala mai na ivalavala ca.

17. Na cava e parofisaitaki ena Aisea 65:21-23 me baleti ira na dauveiqaravi ni Kalou? (Raica na iyaloyalo ena waqana.)

¹⁷ Na parofisai ena Aisea 65:21-23, (Wilika.) e vakamacalataka na bula e vuravura ena gauna se bera mai. Ena sega ni vakavucesa. E kaya na iVolatabu ni na yaga qai vakainaki na nodra cakacaka na dauveiqaravi ni Kalou ena gauna ya. Ni cava na Duanaudolu na Yabaki, eda nuidei nira na ‘sereki na kabuli mai na nodra bobula tu ina ca, mera qai vakila na galala lagilagi era vakila tu na luve ni Kalou.’—Roma 8:21.

18. Na cava eda nuidei kina ni na marautaki na gauna se bera mai?

¹⁸ Me vaka e tuvanaka o Jiova vei ira na Isireli, ena raica tale ga me tiko na nodra gauna ni cakacaka kei na vakacegu na nona dauveiqaravi ena Duanaudolu na Yabaki ni Veiliutaki i Karisito. Io, ena tiko tale ga na gauna mera na sokalou kina. Na noda marau nikua e vakatau ena noda qarava na Kalou, ena sega ni dua na ka ena tarova noda cakava qori ena vuravura vou. Era na marau na dausokalou yalodina ena Duanaudolu na Yabaki ni Veiliutaki i Karisito ni vakainaki na nodra cakacaka, era qaravi Jiova tale ga ena duavata.