O bau wilika vinaka na itabataba ni Vale ni Vakatawa ni yabaki qo? Raica mada ke o rawa ni sauma e vica na taro qo:

Eda na raici ira vakacava na lotu vaKarisito lumuti?

Eda qoroya nodra vakabauta; ia eda na sega ni qoroya vakasivia e dua. Eda na sega ni “veicavilaki.” (Juta 16) Eda na sega ni taroga na sala era lumuti kina.—w20.01, t. 29.

Eda vakadeitaka vakacava ni kauaitaki keda yadua o Jiova?

E kaya na iVolatabu ni kilai iko o Jiova ni bera ni o sucu. E dau rogoca nomu masu. E kila nomu vakanananu kei na ka e tu e lomamu. Na nomu itovo ena vakamarautaki koya se vakararawataki koya. (1 Vei. 28:9; Vkai. 27:11) E vagolei iko mai o Jiova.—w20.02, t. 12.

Na gauna cava meda vosa kina kei na gauna meda tikolo kina?

Eda marau meda tukuna na veika e baleti Jiova. Meda vosa vakadodonu vua e dua ke da raica ni cakava tiko na ka ena rawa ni valavala ca bibi kina. E bibi mera veivakasalataki na qase ni ivavakoso ena gauna veiganiti. Eda na sega ni vakataroga (se vakacila) na itukutuku ni noda cakacaka ena vanua e vakatabui tu. Eda na sega ni vakatakila na itukutuku vuni.—w20.03, t. 20-21.

E duidui vakacava na vodre ena Joeli wase 2 kei na Vakatakila wase 9?

E tukuni ena Joeli 2:20-29, na Kalou e cemuri ira na vodre, ia e yalataka me solia tale na ka e vakacacani. Oti ya, e sovaraka na Kalou na yalona. E vakayacori qori ni ravuti Isireli o Papiloni qai vakayacori tale ena dua na gauna e muri. Ena Vakatakila 9:1-11, e vakamacalataki ira na lumuti era vaka na vodre ena noda gauna, nira kacivaka na lewa ena tauca o Jiova ena vuravura ca qo, qori e votivoti sara ga vei ira na veitokani kei vuravura.—w20.04, t. 3-6.

O cei na tui ni vualiku ena gauna qo?

O Rusia kei na nona ito. Era saqati ira na tamata ni Kalou nira vakatabuya na cakacaka vakavunau, e laurai ena ka era cakava nira cati keda na iVakadinadina i Jiova. E saga na tui ni vualiku me qaqa vua na tui ni ceva.—w20.05, t. 13.

Era okati ga me “vua ni yalo tabu” na ciwa na itovo e cavuti ena Kalatia 5:22, 23?

Sega. E vukei keda na yalo tabu meda vakaraitaka e levu tale na itovo vinaka me vaka na yalododonu. (Efeso 5:8, 9)—w20.06, t. 17.

Na cava e rerevaki kina ni o biuta na kemu itukutuku ena Internet?

E rawa ni kilai kina ni o tukutukuni iko, o sega ni yalomalumalumu.—w20.07, t. 6-7.

Na cava era vulica na dautukutuku lotu vaKarisito vei ira na gonedau?

Era qoli na gonedau ena gauna kei na vanua e rairai levu kina na ika. Era kila vinaka na iyaya ni qoli me vakayagataki. Era yaloqaqa ni veisau na draki. Eda rawa ni vakatotomuria qori ena noda cakacaka vakaitalatala.—w20.09, t. 5.

Na cava eso na sala eda na vukea kina na vuli iVolatabu me lomani Jiova vakalevu?

Meda uqeti ira mera wilika e veisiga na iVolatabu, mera vakasamataka tale ga vakatitobu na ka era wilika. Meda vakavulici ira tale ga mera masu.—w20.11, t. 4.

O cei e okati ena ka e tukuni qo: “Ena bula vaka kina na tamata kece ena vuku i Karisito”?—1 Kor. 15:22.

E sega ni tukuna na yapositolo o Paula nida na vakaturi kece na tamata. E vakamacalataki ira tiko na lotu vaKarisito lumuti, o ira sa “vakasavasavataki [mera] tisaipeli i Karisito Jisu.” (1 Kor. 1:2; 15:18)—w20.12, t. 5-6.

Na cava era na cakava na lumuti era vakaturi “me vaka na sauriva ni mata, ni tagi tiko na iotioti ni biukila”?—1 Kor. 15:51-53.

Era na tomani Karisito mera vakatawai ira na lewenivanua ena ititoko kaukamea. (Vkta. 2:26, 27)—w20.12, t. 12-13.