1. Na cava e dua na vuna e vakatauvatani ira kina na nona imuri o Jisu kei na sipi?

O JISU e vakatauvatana nona veivolekati kei ira na nona imuri, kei na nona veivolekati na ivakatawa kei na nona sipi. (Joni 10:14) Na cava e veiganiti kina na ivakatautauvata qori? E kila na sipi na kena ivakatawa qai muria na ka e tukuna. Qori na ka e vakadinadinataka e dua na dausaravanua. E kaya: “Keitou via tabaka eso na sipi, keitou saga mera toso voleka mai. Ia era sega ni via muri keitou nira sega ni kila na domo i keitou. Oti sa qai lako mai na kedra ivakatawa, e dua na gonetagane lailai. Ni kaci ga sa ra muri koya sara.”

2-3. (a) Era na vakaraitaka vakacava na imuri i Jisu nira muria na domona? (b) Na cava eda na veivosakitaka ena ulutaga qo kei na kena e tarava?

² Na ka e tukuna na dausaravanua qori eda nanuma kina na ka e tukuna o Jisu me baleta na nona sipi, ya o ira na nona tisaipeli. E kaya: “Era na rogoca na domoqu.” (Joni 10:16) Ia e tiko mai lomalagi o Jisu, eda na vakaraitaka vakacava nida rogoci koya tiko? Dua na sala bibi eda rogoca kina na domona, ya nida muria sara ga na ka e vakavulica.—Maciu 7:24, 25.

³ Eda na veivosakitaka ena ulutaga qo kei na kena e tarava eso na ka e vakavulica o Jisu. Me vaka eda na qai raica, e tukuna o Jisu eso na ka meda kua ni cakava, kei na ka meda cakava. Eda na veivosakitaka e liu e rua na ka e tukuna na ivakatawa vinaka meda kua ni cakava.

4. Me vaka e tukuni ena Luke 12:29, na cava e rawa ni vakavuna na “lomaocaoca”?

⁴ Wilika Luke 12:29. E uqeti ira na nona imuri o Jisu mera ‘kua ni lomaocaocataka’ na ka vakayago mera bula  kina. Eda kila ni dau donu tu ga na ivakasala i Jisu, e yaga tale ga. Eda vinakata meda muria qori, ia ena sega toka ni rawarawa ena so na gauna. Na vuna?

5. Na cava era na rairai lomaocaocataka eso?

 ⁵ Eso era na rairai lomaocaocataka na ka mera bula kina, me vaka na kakana, isulu, kei na vale. De dua era tiko ena vanua dravudravua, e dredre kina na vaqara cakacaka. Ena dredre toka me rawati na ilavo me qaravi kina nodra vuvale. Se rairai sa takali o koya e dau rawailavo tiko ena vuvale, sa sega na ilavo me ratou bula kina na vo ni vuvale. Levu era rairai cegu mai na nodra cakacaka ena vuku ni matedewa na COVID-19, e sega tale ga na ilavo era rawata. (Dauv. 9:11) Ke da sotava tiko na ituvaki qori se so tale na leqa, eda na muria vakacava na ivakasala i Jisu meda kua ni lomaocaoca?

6. Vakamacalataka na ka e yacovi Pita ena dua na gauna.

⁶ Dua na gauna, e vodo tiko ena dua na waqa na yapositolo o Pita kei ratou na vo ni yapositolo ena Wasa o Kalili. E kaukaua sara na cagi, eratou qai raici Jisu ni taubale tiko e delaniwai. E kaya o Pita: “Turaga, ke o kemuni dina, ni vakarota meu lako yani vei kemuni e delaniwai.” E kaya vei Pita o Jisu: “Lako mai!” E sobu mai waqa o Pita qai “taubale yani vei Jisu e delaniwai.” Rogoca na ka e qai yaco tarava. “E rere ni raica na bula ni cagi. Ni tekivu dromu vakamalua, e kacivaka yani: ‘Turaga, vakabulai au!’” E dodoka yani na ligana o Jisu qai vakabulai koya. E bibi meda nanuma ni taubale rawa o Pita ena delaniwai voravora ni raici Jisu matua tiko. Ia ni raica se kauaitaka na bula ni cagi, e tuburi koya na rere kei  na vakatitiqa, mani tekivu dromu vakamalua.—Maciu 14:24-31.

7. Na cava eda vulica vei Pita?

⁷ Eda rawa ni vuli ena ivakaraitaki i Pita. Ni sobu mai waqa me taubale ena delaniwai, a sega ni bau vakasamataka me lomaleqataka na cagi qai dromu vakamalua. E vinakata ga me taubale me yaco yani vua na nona Turaga. Ia e qai sega ni yaco na ka e namaka. Eda sega ni rawa ni taubale e delaniwai, ia eda sotava na ituvaki e vakatovolei kina na noda vakabauta. Ke da sega ni nuitaki Jiova kei na ka e yalataka, eda na tekivu dromu vakayalo. Ke da sotava mada ga na veika dredre e vaka na cagi kaukaua, e bibi tiko ga meda nuitaki Jiova kei na kaukaua e tu vua me vukei keda. Eda na cakava vakacava qori?

8. Na cava meda kua ni lomaocaoca kina?

⁸ Ena yaga vei keda na noda nuitaki Jiova meda kua kina ni lomaocaoca. Meda nanuma tiko ni yalataka na Tamada dauloloma o Jiova, ni na vakarautaka na ka vakayago meda bula kina ke da vakaliuca na veika vakayalo. (Maciu 6:32, 33) E dau dina ena ka e yalataka. (Vkru. 8:4, 15, 16; Same 37:25) Ke vakarautaka o Jiova na ka mera bula kina na manumanuvuka kei na senikau, na cava meda lomaocaocataka kina na kakana kei na isulu? (Maciu 6:26-30; Fpai. 4:6, 7) Kena ivakaraitaki, na loloma ena uqeti rau na itubutubu dauloloma me vakarautaka na ka mera bula kina na luvedrau. Na loloma tale ga e uqeta na Tamada vakalomalagi me vakarautaka na ka era gadreva na nona tamata. Io, eda nuidei ni na vakarautaka o Jiova na ka meda bula kina!

9. Na cava o vulica ena ka e sotava e dua na veiwatini?

⁹ Dikeva mada e dua na irogo e vakaraitaka ni dau vakarautaka o Jiova na ka meda bula kina. Rau veiqaravi vakatabakidua e dua na veiwatini. Rau draivataka nodrau motoka makawa me sivia ni dua na aua me rau lai vakavodoka e vica na tacida yalewa ena nodra itikotiko na isenivalu me ratou lako ena soqoni. E tukuna na tacida tagane: “Oti na soqoni, keirau sureti ratou sara na tacida yalewa qori me keitou lai kana, ia keirau qai liaca ni sega na kakana me keirau vakarautaka vei ratou.” Cava rau qai cakava? E kaya na tacida tagane: “Ni keitou yaco i vale, sa toka ena mata ni katuba e rua na taga kakana. Keirau sega ni kila o cei e kauta mai. E kila sara ga o Jiova na ka keirau gadreva.” Dua tale na gauna, e leqa na nodrau motoka na veiwatini. Rau dau vakayagataka qori ena cakacaka vakaitalatala, ia e sega vei rau na ilavo me vakavinakataki kina. Rau mani kauta na motoka ina dua na qarati voleka, e lako yani e dua na turaga qai taroga: “O cei e nona na motoka?” E tukuna na tacida tagane ni nona, e mai vakavinakataki. E tukuna na turaga qori: “Kua ni leqa. Dau vinakata o watiqu na motoka va qori kei na roka sara ga qori. E vica na kena isau?” E mani volitaka na tacida tagane na motoka mani rawa kina na ilavo me voli tale kina e dua na ka vou. E kaya: “Dua na ka na neirau marau ena siga qori. Keirau kila ni sega ni vakacalaka qo. O Jiova ga e vukei keirau.”

10. E uqeti keda vakacava na Same 37:5 meda kua ni lomaocaocataka na ka vakayago?

¹⁰ Nida vakarorogo vua na ivakatawa vinaka meda kua ni lomaocaocataka  vakasivia na ka vakayago, eda nuidei ni na vakarautaka o Jiova na ka meda bula kina. (Wilika Same 37:5; 1 Pita 5:7) Vakasamataka mada eso na ituvaki e tukuni ena  parakaravu e 5. Me yacova mai qo ena rairai vakayagataka o Jiova e dua na ulunivuvale se boso ni cakacaka me vukei keda ena ka meda bula kina. Ke sa sega ni cakava rawa qori o ulunivuvale, se da vakacegui mai na noda cakacaka, o Jiova ena raica eso tale na sala me vakarautaka kina na ka meda bula kina. Eda nuidei ni na cakava qori. Meda dikeva sara qo e dua tale na ka e uqeti keda kina na ivakatawa vinaka meda kua ni cakava.

11. Na cava e tukuna o Jisu ena Maciu 7:1, 2 meda kua ni cakava? Cava e sega ni rawarawa kina qori?

¹¹ Wilika Maciu 7:1, 2. E kila o Jisu nida sega ni uasivi, e noda ivakarau tale ga meda dau vakalelewa. Oya na vuna e tukuna kina: “Dou kua ni dau vakalelewa.” De dua eda na saga meda kua ni vakalewai ira na tacida. Ia eso na gauna e dredre nida sega ni uasivi. Na cava meda cakava ke da dau vakalelewa ena so na gauna? Vakarorogo vei Jisu qai saga tiko ga mo kua ni vakalelewa.

12-13. Ena yaga vakacava nida vakasamataka vakatitobu na rai i Jiova me baleti Tui Tevita?

¹² Ena yaga vei keda nida vakasamataka vakatitobu na ivakaraitaki i Jiova. E dau kauaitaka ga na noda itovo vinaka. Eda vakadinadinataka qori ena ka e cakava vei Tui Tevita ni valavala ca bibi. Kena ivakaraitaki, e veibutakoci kei Pacisepa o Tevita, e tuvanaka tale ga me vakamatei o watina. (2 Sam. 11:2-4, 14, 15, 24) Na ka e cakava qori, e vakararawataki koya, nona vuvale, kei ratou na vo ni watina. (2 Sam. 12:10, 11) Dua tale na gauna a sega ni nuitaki Jiova vakaoti o Tevita, ni vakarota me wiliki na lewe ni mataivalu ni Isireli. Qori na ka e sega ni vakarota o Jiova. De dua e cakava qori ena nona dokadoka, e nuitaka tale ga na nona mataivalu levu. Cava e yaco? Era mani mate e 70,000 na Isireli ena matedewa!—2 Sam. 24:1-4, 10-15.

¹³ Na cava nomu rai me baleti Tevita ke o tiko e Isireli ena gauna ya? O na vakalewai koya ni sega ni dodonu me vosoti koya o Jiova? E duatani na rai nei Jiova. E kauaitaka nona yalodina tu o Tevita me dua na gauna balavu kei na nona veivutuni dina. Oya na vuna e vosoti kina. E kila o Jiova ni lomani koya vakalevu o Tevita, e vinakata tale ga me cakava na ka dodonu. Vakacava o keda? Eda vakavinavinaka ni dau kauaitaka ga o Jiova na noda itovo vinaka.—1 Tui 9:4; 1 Vei. 29:10, 17.

14. Na cava ena uqeti keda na lotu vaKarisito meda kua ni vakalelewa?

¹⁴ E sega ni namaka o Jiova meda uasivi. Eda na sega tale ga ni namaka mera uasivi na tacida, ia eda na raica ga na nodra itovo vinaka. Dau rawarawa sara meda kauaitaka na nodra malumalumu eso tale qai vakalewai ira. Ia o koya e tiko vua na rai i Jiova, ena rairai kila na nodra malumalumu na tacina, ena saga tiko ga me cakacaka veivolekati kei ira. Me vaka ga na daimani se bera ni masiraki, de dua ena varovaroa, ia e kila o koya e yalomatua ni na rairai vinaka sara ni sa masiraki oti. Koya gona meda vakatotomuri Jiova mada ga kei Jisu nida kauaitaka ga na nodra itovo  vinaka na tacida, meda kua ni kauaitaka tiko ga na nodra malumalumu.

15. Na cava ena uqeti keda meda kua ni dau vakalewai ira na tacida?

¹⁵ Na cava tale ena uqeti keda meda kua ni vakalewai ira na tacida? Oya mo kila na kedra ituvaki. Kena ivakaraitaki. Dua na siga ni tiko o Jisu ena valenisoro, e raica e dua na yada dravudravua ni biuta e rua na ilavo lailai sara ena katonicau. A sega ni taroga o Jisu: “Na cava e lailai kina na ka e solia?” E sega ni kauaitaka o Jisu na levu ni ilavo e solia na yada, e kauaitaka ga na nona inaki kei na kena ituvaki qai vakacaucautaki koya ena ka e rawa ni solia.—Luke 21:1-4.

16. Na cava o vulica ena ivakaraitaki nei Veronica?

¹⁶ Nida vakasamataka na yaga ni noda kila na kedra ituvaki na tacida, meda dikeva mada na ivakaraitaki ni tacida o Veronica. E tiko ena nona ivavakoso e dua na tacida yalewa itubutubu le dua kei na luvena tagane. E kaya o Veronica: “Vaka vei au rau sega ni dau vakaitavi vakalevu ena ivavakoso. Au dau vakalewai rau sara ga. Ia au qai veitomani kei na tacida yalewa qori ena cakacaka vakaitalatala. E tukuna ni sega ni rawarawa nona qarava tiko na luvena tagane e malumalumu nona vakasama. E cakacaka gona vakaukaua me qaravi rau vakayago, vakayalo tale ga. Eso na gauna e lai soqoni  ena dua tale na ivavakoso ena vuku ni ituvaki kei luvena.” E tukuna o Veronica: “Au sega sara ga ni kila na ituvaki dredre e sotava tiko na tacida qori. Ena gauna qo, au lomani koya vakalevu, au dokai koya tale ga ena nona sasaga me qaravi Jiova.”

17. Na cava e tukuni ena Jemesa 2:8 meda cakava? Eda na muria vakacava?

¹⁷ Na cava meda cakava ke da liaca nida vakalewa e dua na tacida? Meda nanuma tiko ni dodonu meda lomani ira. (Wilika Jemesa 2:8.) E dodonu tale ga meda masuti Jiova, meda cikevi koya me vukei keda meda kua ni dau vakalelewa. Oti meda muria sara na ka eda masulaka nida vakaliuliu meda vosa se veimaliwai kei na tacida eda vakalewa. Qori eda na rawa ni veikilai vinaka kina. De dua meda kerei koya meda veitomani ena vunau se meda mai kana vata. Nida saga meda kila vinaka na tacida qori, eda rawa ni vakatotomuri Jiova kei Jisu nida kauaitaka ga nona itovo vinaka. Nida cakava qori, eda vakaraitaka nida rogoca tiko na ka e vakarota na ivakatawa vinaka meda kua ni vakalelewa.

18. Eda na vakaraitaka vakacava nida rogoca tiko ga na domona na ivakatawa vinaka?

¹⁸ Me vaka ga na sipi e rogoca na domo i kena ivakatawa, o ira tale ga na imuri i Jisu era rogoca na domona. Ke da saga meda kua ni lomaocaocataka na ka vakayago meda bula kina, meda kua tale ga ni dau vakalelewa, ena vakalougatataka o Jiova kei Jisu na noda sasaga. Ke da lewe ni “qelenisipi lailai” se ‘so tale na sipi,’ meda vakarorogo tiko ga vua na ivakatawa vinaka qai muria na ka e tukuna. (Luke 12:32; Joni 10:11, 14, 16) Eda na veivosakitaka ena ulutaga tarava e rua na ka e tukuna o Jisu mera cakava na nona imuri.