E uqeti ira na Isireli o Jiova mera savasava. E kaya vei ira: “Kua ni vakaucaca voli ena kedra maliwa na kainomu. Kua ni vakaleqa na nona bula na wekamu. O yau o Jiova.”—Vunau 19:2, 16.

Na cava na ibalebale ni iyatuvosa “Kua ni vakaleqa na nona bula na wekamu”? E tukuni ena dua nodra ivola na Jiu me baleta na ivakamacala ni Vunau ni Soro: “Na matavosa qori ena tikinivolatabu qo. . . e dredre me vakadewataki ni sega ni kilai na kena ibalebale vakaIperiu, ke vakadewataki mada ga vakadodonu ena tukuni va qo ‘kua ni duri tu eke, e yasana qo, se voleka.’”

Eso na vuku era sema na matavosa qori kei na tikina e liu: “Ni oni vakataulewa, moni raica me tau vakadodonu na lewa. Mo kua ni vakaduiduitaka na dravudravua se tovaka na vutuniyau. Me dodonu na lewa o tauca vua na wekamu.” (Vunau 19:15) O koya gona, na ivakaro ena tikina e 16 mo kua ni duri tu eke, e yasana qo, se voleka e rawa ni kena ibalebale vei ira na tamata ni Kalou mera kua ni vakaleqa e dua era cakacaka vata ena mataveilewai se na veika vakabisinisi, se ka e vauca na vuvale, mera kua tale ga ni veivakacalai mera rawaka kina. Io e sega ni dodonu meda cakava na veika qori, ia e tiko e dua tale na sala dodonu meda kila kina na matavosa qori ena tikina e 16.

Vakasamataka na itekitekivu ni tikina qori. E vakaroti ira nona tamata o Jiova mera kua ni vakaucaca voli. Me nanumi tiko ni vakaucaca e sega ni veitalanoa wale tu ga, e rawa sara ga ni vakavu leqa vakalevu. (Vkai. 10:19; Dauv. 10:12-14; 1 Tim. 5:11-15; Jeme. 3:6) Na vakaucaca e kena inaki ga me vakarogorogocataki kina e dua. O koya e vakaucaca ena tukuna na ka lasutaki me baleta e dua tale, e rawa sara ga ni vakaleqai kina nona bula. Nanuma tiko ni o ira sara ga na dauvakaucaca era beitaki Nepoci, e lewai kina vakatawadodonu, lai tini vakaviriki sara ena vatu. (1 Tui 21:8-13) Io o koya e vakaucaca e rawa ni vakaleqa na nona bula e dua tale, me vaka e tukuni ena ikarua ni cegu ni Vunau ni Soro 19:16.

Kena ikuri, na nona vakaucaca e dua e rawa ni vakavotui kina nona cati wekana. Eda wilika ena 1 Joni 3:15: “O ira kece era cata na tacidra era daulaba, ia oni kila ni sega ni dua na daulaba ena rawata na bula tawamudu.” Eda dikeva tale ga ni cavuta oti ga na Kalou na matavosa qori ena tikina e 16 sa qai tukuna tarava: “Mo kua ni cata na tacimu e lomamu.”—Vunau 19:17.

O koya gona, na ikarua ni cegu ena Vunau ni Soro 19:16 e ivakaro bibi vei keda na lotu vaKarisito. Meda qarauna sara meda kua ni rawai ena vakanananu ca meda vakaucacataka kina e dua. Kena ivakamacala lekaleka ga qo, ke da sega ni taleitaka e dua se da vuvutaki koya, meda lai tini vakaucacataki koya sara, e rawa ni vakaraitaka qori nida cati koya tiko. Meda qarauna sara na lotu vaKarisito meda kua ni cata e dua.—Maciu 12:36, 37.