1. Na cava “na vakacegu ni Kalou”? E yaga vakacava vei keda? (Filipai 4:6, 7)

 E TIKO e dua na mataqali vakacegu era sega ni kila tu e levu e vuravura. Qori “na vakacegu ni Kalou,” na vakacegu eda vakila nida veiwekani voleka kei na Tamada vakalomalagi. Eda na nuidei nida vakila na vakacegu ni Kalou. (Wilika Filipai 4:6, 7.) Eda marautaka na veitokani voleka kei ira na lomani koya. Eda marautaka tale ga na noda veiwekani voleka kei na “Kalou e dau veivakacegui.” (1 Ces. 5:23) Nida kila na Tamada, eda nuitaki koya qai talairawarawa vua, ena yaga vei keda na nona vakacegu meda kua ni lomaleqataka na ituvaki dredre eda sotava.

2. Eda kila vakacava ni rawa nida vakila na vakacegu ni Kalou ena gauna dredre?

² Vakacava eda rawa ni vakila na vakacegu ni Kalou ena gauna dredre, me vaka ena gauna ni matedewa, leqa tubukoso, tikoyavavala, se veivakacacani? Na leqa va qori e dau vakavuna noda rere. Ia e vakasalataki ira nona imuri o Jisu: “Dou kua ni lomaleqa, dou kua tale ga ni rere.” (Joni 14:27) Ka ni marau nira muria na ivakasala qori na tacida vakayalo. Ena veivuke i Jiova, era vakila kina na vakacegu nira vosota tiko na veika dredre.

3. Ena vakaleqa vakacava noda bula vakacegu na matedewa?

³ Na matedewa e rawa sara ga ni veisautaka vakatotolo na nodra bula e levu. Vakasamataka na ka e yaco ena vuku ni matedewa na COVID-19. E laurai ena dua na vakadidike, e sivia ni veimama na lewenivanua era kaya nira sega ni moce vinaka. Na tete ni mate qori, e tubu kina na kedra iwiliwili o ira era lomaleqa, lomabibi, era gunu vakalevu se vakayagataka  na wainimate gaga, e kaukaua na nodra itovo e vale, era via vakamatei ira ga. Ke dewa na mate va qori ena nomu itikotiko, na cava mo cakava mo kua kina ni lomaleqa vakalevu, ia mo marautaka tiko ga na vakacegu ni Kalou?

4. E veivakacegui vakacava noda kila na parofisai i Jisu me baleta na iotioti ni veisiga?

⁴ E parofisaitaka o Jisu ni na tete na matedewa “ena levu na vanua” ena iotioti ni veisiga. (Luke 21:11) E veivakacegui vakacava noda kila qori? Eda na sega ni kidroataka na matedewa. Eda kila ni na yaco me vaka e tukuna o Jisu. Qori na vuna eda muria kina na nona ivakasala vei keda na bula tiko ena gauna ni icavacava: “Dou kua ni domobula.”—Maciu 24:6.

5. (a) Me salavata kei na Filipai 4:8, 9, na cava meda masulaka ni tete na matedewa? (b) Ena yaga vakacava nomu rogoca na katokatoni ni iVolatabu?

⁵ Na tete ni matedewa e rawa sara ga ni vakavu veilecayaki, se taqaya. Qori na ka e vakadinadinataka e dua na tacida yalewa o Lesi. b E mate nona tata lailai, o luvei tamana levu, kei na nona vuniwai ena COVID-19, e taqaya de na tauvi koya qai vakadewa vei tinana sa itabaqase. Kena ikuri, e lomaleqataka ke sa na sega ni cakacaka, ena qai vakacava na isau ni kakana kei na vale. Ni vakasamataka vakalevu qori, e sega kina ni moce vinaka ena bogi. Ia e qai vakila tale o Lesi na vakacegu. Cava e cakava? E masuti Jiova, e kerea me vukei koya me kua ni lomaleqa, me vakasamataka ga na veika vinaka. (Wilika Filipai 4:8, 9.) E vakarorogo vei Jiova ni “vosa” vua ena katokatoni ni iVolatabu. E kaya, “E vakacegui au na domodra na wiliwili tiko, au kila kina na levu ni nona lomani au o Jiova.”—Same 94:19.

6. Ena yaga vakacava nomu vuli vakataki iko kei na nomu tiko ena soqoni?

⁶ E macala ni na vakaleqa eso na nomu ituvatuva dei na matedewa, ia me kua ni vakalatilati qori ena nomu vuli vakataki iko se nomu tiko ena soqoni. Eda na kila ena kedra italanoa na tacida ena noda ivola kei na vidio ni tautauvata na leqa eda sotava, ia era yalodina tiko ga. (1 Pita 5:9) Nomu tiko ena soqoni o na vakasamataka kina na ivakavuvuli vakaivolatabu. E gauna vinaka tale ga meda veivakayaloqaqataki kina. (Roma 1:11, 12) Ni o vakasamataka nona tokoni ira nona dausokalou o Jiova nira tauvimate, rere, se galili, ena vakadeitaka nomu vakabauta, o nuidei tale ga ni na tokoni iko.

7. Na cava o vulica vua na yapositolo o Joni?

⁷ Mo dau kauaitaki ira na tacimu vakayalo. Ni tete na matedewa ena rairai vinakati meda veiyawaki ena gauna  mada ga eda tiko kina kei ira na tacida. Ena gauna va qori o na rawa sara ga ni vaka na yapositolo o Joni. Dua na ka nona via raici Keio na nona itokani. (3 Joni 13, 14) Ia e kila ni na dua toka na gauna ena sega ni raica na nona itokani. Na cava e cakava o Joni? E volavola vei Keio. Na cava o vulica? Ke o sega ni rawa ni sikovi ira na tacimu, o rawa ni qiriti ira, veivosaki ena vidio, se vakau itukutuku vei ira ena nomu talevoni. Ni o veivosaki kei ira na tacimu vakayalo, o na nuidei, o lomavakacegu tale ga. Mo dau torovi ira na qase ni ivavakoso ke o lomaleqa, rogoca tale ga nodra veivakayaloqaqataki.—Aisea 32:1, 2.

8. Ena rawa ni vakaleqa vakacava noda vakacegu na ituvaki dredre?

⁸ Ke o donuya e dua na waluvu, uneune, se kama, o na rairai nuiqawaqawa vakalevu ni oti qori. Ke takali e dua na wekamu voleka se vakacacani na ka o taukena, de dua o na lolosi, o sega ni cakava rawa e dua na ka, se o cudru. Kena ibalebale qori ni o domodomoiyau se lailai nomu vakabauta? Sega. E dredre na ka o vakatovolei kina, era namaka eso ni na cala na nomu rai. (Jope 1:11) Ia ke dredre sara na ituvaki, o se rawa tiko ga ni vakila na vakacegu. Ena sala cava?

9. Na cava e tukuna o Jisu me vakarautaki keda ena leqa lelevu?

⁹ Vakasamataka mada na veika e parofisaitaka o Jisu. Era nanuma eso e vuravura ni na sega ni vakaleqai ira na leqa tubukoso. Ia meda namaka ni na levu tiko ga, eda rawa tale ga nida vakaleqai kina. E kaya o Jisu vei ira nona imuri ni na yaco na “uneune kaukaua” kei na so tale na leqa ni bera na icavacava. (Luke 21:11) E parofisaitaka tale ga ni na tubu na “ivalavala tawadodonu,” e vakadinadinataki qori ena basulawa, na itovo voravora kei na vakacaca ni batikadi. (Maciu 24:12) E sega ni tukuna o Jisu nira na vakila ga na veika dredre o ira e vakanadakuya o Jiova. Ia e dau yaco tale ga na ituvaki dredre va qori vei ira e levu na dauveiqaravi i Jiova era yalodina. (Aisea 57:1; 2 Kor. 11:25) Ena rairai sega ni taqomaki keda vakacakamana o Jiova ena leqa kece. Ia ena vakarautaka na ka meda lomavakacegu tiko ga kina, meda kua ni rere.

10. Na cava e ivakaraitaki kina ni vakabauta noda vakarautaki keda rawa me baleta na leqa e dau yaco? (Vosa Vakaibalebale 22:3)

¹⁰ Ke yaco vakasauri na leqa, eda na sega ni taqaya ke da sa tuvanaka rawa tu na ka meda cakava. Ia kena ibalebale qori ni lailai noda vakabauti Jiova? Sega. Noda vakavakarau me baleta na leqa e dau yaco, e vakaraitaka nida vakabauta ni rawa ni vukei keda o Jiova. Ena sala cava? E veivakasalataki na Vosa ni Kalou meda dau vakarautaki keda tu ke yaco na leqa tubukoso. (Wilika Vosa Vakaibalebale 22:3.) E vakayagataka na isoqosoqo i Jiova na ulutaga ena mekesini, soqoni ni ivavakoso, kei na veivakadreti ena gauna donu, me uqeti keda wasoma ena bibi ni noda vakarautaki keda rawa tu ni yaco vakasauri na leqa. c Vakacava eda nuitaki Jiova? Ke da nuitaki koya, eda na muria sara ga qo na nona ivakasala ni bera ni yaco na leqa.

11. Na cava o vulica vei Margaret?

¹¹ Vakasamataka mada e dua na tacida yalewa o Margaret. E vakaroti me biuta nona vale ni sa kama yani na veikau ena nona yasayasa. Ni levu era biubiu ena  dua vata ga na gauna e oso kina na gaunisala, sa ra kele tu vakadua na motoka. E levu na kubou e maliwalala, sa sogo tu ga o Margaret ena loma ni nona motoka me dua toka na gauna. Ia e bula ni sa vakarautaki koya tu. E dau tawana tiko ena nona kato e dua na mape me raica kina na gaunisala me muria ke yaco vakasauri na leqa. Sa draiva oti tale ga ena gaunisala qori me vakarautaki koya ke yaco na leqa tubukoso. E yaga nona vakavakarau ni bula kina.

12. Na cava meda muria kina na veidusimaki?

¹² Me rawa nida taqomaki, era na rairai vakasalataki keda na vakailesilesi meda rokova na vakatatabu ni veitosoyaki, toki, se cakava eso tale na ka. Eso era na berabera ni muria, se lokuyara nira kauaitaka tiko ga na ka era taukena. Na cava era cakava na lotu vaKarisito? E kaya na iVolatabu: “Ena vuku ni Turaga, ni talairawarawa ina veika kece e bulia na tamata, se vua na tui me vaka ni cecere, se vei ira na kovana ni talai ira mai.” (1 Pita 2:13, 14) E dau dusimaki keda tale ga na isoqosoqo meda taqomaki kina. Eda vakasalataki wasoma meda tukuna vei ira na qase na vanua eda vakaitikotiko kina mera rawa nira qiriti keda mai ke yaco vakasauri na leqa. O sa cakava qori? Eda na rairai dusimaki tale ga meda tiko ga e vale, toki, vakarautaka na iyaya ni vakacoko, se na sala kei na gauna meda vukei ira kina eso tale. Ke da sega ni muria qori, eda rawa ni vakaleqai kina, vaka kina nodra bula na qase ni ivavakoso. Nanuma tiko o ira na tagane yalodina qori era yadravi keda tiko. (Iper. 13:17) E kaya o Margaret: “Au vakabauta dei ni vakabulai au noqu muria nodra veidusimaki na qase kei na isoqosoqo.”

13. Na cava era vakacegu kina na tacida era biuta nodra vale ra qai marau tiko ga?

¹³ E levu na tacida era sa biuta nodra vale ni yaco na leqa tubukoso, ivalu se nira kudru na lewenivanua. Era saga mera vakamatauni ira ena vanua era toki kina, e totolo nodra vakaitavi tale ena veika vakayalo. Me vakataki ira na lotu vaKarisito taumada era veiseyaki ena vuku ni veivakacacani, era tomana nodra “tukuna yani na itukutuku vinaka ni vosa ni Kalou.” (Caka. 8:4) Nira vunau era vakabibitaka ga na veika me baleta na Matanitu ni  Kalou, sega ni ituvaki dredre era sotava tiko. Qori na vuna era marau tiko ga kina ra qai lomavakacegu.

14. E vakaleqa vakacava noda vakacegu na veivakacacani?

¹⁴ Na veivakacacani ena vakaleqa e levu na ka e dau vu ni veivakacegui vei keda. Eda dau marau nida sota vata se vunau ena galala, eda cakava tale ga noda cakacaka e veisiga nida sega ni leqataka tiko nida na vesu. Ke kau tani na veika eda dau marautaka tu qori, eda rawa ni lomaleqa, eda rerevaka na veika ena yaco tarava. Ena dau va ga qori. Ia se bibi tiko ga meda qaqarauni. E kaya o Jisu ni rawa ni vakatarabetaki ira na nona imuri na veivakacacani. (Joni 16:1, 2) Koya gona, ena rawa vakacava nida vakila tiko ga na vakacegu nida vakacacani?

15. Na cava meda kua ni rerevaka kina na veivakacacani? (Joni 15:20; 16:33)

¹⁵ E kaya na Vosa ni Kalou: “O ira kece era via qarava na Kalou ena vuku i Karisito Jisu era na vakacacani.” (2 Tim. 3:12) Kena ivakaraitaki, e dredre me vakabauta e dua na tacida o Andrei ni sa vakatabui na cakacaka vakavunau ena nona vanua. E kaya: ‘Era levu tu eke na iVakadinadina i Jiova. E rawa vakacava nira vesuki keimami kece na vakailesilesi?’ E sega ni lomavakacegu rawa o Andrei, sa qai lomaleqa ga. Ia o ira na vo ni tacida era biuta e liga i Jiova na ituvaki qori me qai lewa, era kila nira na sega ni dro rawa. Era na vesu, era sega kina ni lomaleqa vakalevu me vakataki Andrei. Cava e qai cakava na tacida qori? E vakatulewataka me vakatotomuria nodra rai na vo ni tacida, me vakararavitaka nona bula vei Jiova. Sega ni dede sa lomavakacegu, e marau tale ga ni dredre na ituvaki. Eda rawa ni va tale ga qori. Ni tukuna o Jisu nida na vakacacani, e vakadeitaka tale ga nida rawa ni yalodina tiko ga.—Wilika Joni 15:20; 16:33.

16. Na veidusimaki cava meda muria nida vakacacani?

¹⁶ Ni vakatabui noda cakacaka se vakadredretaki vakalevu, ena rairai vakasalataki keda na valenivolavola ni tabana se o ira na qase ni ivavakoso. E kena inaki meda taqomaki, me taladrodro tiko ga mai na keda kakana vakayalo, meda rawa  ni vunau tiko ga ena kena levu eda rawata. Meda gumatua ni muria na veika eda dusimaki kina, kevaka mada ga eda sega ni kila vinaka na vuna e soli kina. (Jeme. 3:17) Kena ikuri, kua ni tukuna na kedra itukutuku na tacida se na ivavakoso vei ira na sega ni dodonu mera kila.—Dauv. 3:7.

17. Na cava meda gumatua ni cakava me vakataki ratou na yapositolo ena imatai ni senitiuri?

¹⁷ Dua na vuna levu e valuti ira kina na tamata ni Kalou o Setani, oya nira “vunautaka tiko na veika me baleti Jisu.” (Vkta. 12:17) Me kua ni vakarerei iko o Setani kei na nona vuravura. Nida tusaqati mada ga nida vakaitavi ena vunau kei na veivakavulici, eda na marau, eda lomavakacegu. Era vakarota na vakailesilesi Jiu ena imatai ni senitiuri, me ratou kua ni vunau na yapositolo. Ia eratou talairawarawa vua na Kalou ni ratou vunau tiko ga. Na cakacaka qori e vakavu marau vei ratou. (Caka. 5:27-29, 41, 42) Macala ga ni vinakati na qaqarauni nida vunau ena gauna e vakadredretaki kina noda cakacaka. (Maciu 10:16) Ia nida solia noda vinaka taucoko, eda na vakila na vakacegu e rawati ga ena noda vakamarautaki Jiova kei na noda tukuna yani na itukutuku e veivakabulai.

18. Na cava meda nanuma tiko me baleta na iVurevure ni noda vakacegu?

¹⁸ Meda nuidei ni rawa nida vakila na vakacegu ena gauna mada ga e dredre kina na ituvaki. E bibi meda nanuma tiko ni vinakati ena gauna qori na vakacegu ni Kalou, ena solia duadua ga o Jiova. Mo nuitaki koya ena gauna ni matedewa, leqa tubukoso, se ni o vakacacani. Kabita tiko ga na nona isoqosoqo. Mo vakanamata ina gauna totoka se bera mai. Ni o cakava qori, “ena qai tiko vata kei [iko] na Kalou ni vakacegu.” (Fpai. 4:9) Ena ulutaga tarava, eda na veivosakitaka na ka meda cakava meda vukei ira kina na tacida lotu vaKarisito era vakararawataki mera vakila na vakacegu ni Kalou.