Ni vakarota o Jiova me ‘vakasinaiti o vuravura, me vakamalumalumutaki,’ e vakaraitaka ni toso na gauna ena parataisi na vuravura taucoko. (Vkte. 1:28) O ira na bula tawamudu e vuravura era na muria na ivakaro vata ga qori. E sega ni parataisi na vuravura ni sa sega na were o Iteni. Ena levu sara na cakacaka ni tekivu vakavinakataki na veiyasa i vuravura e vakacacani tu. Ena cakacaka levu dina!

Eda lai nanuma kina na itavi era qarava na Isireli nira lesu mai Papiloni ni sega tu ni tawani nodra vanua me 70 na yabaki. Ia e parofisaitaka o Aisea nira na vakarairaivinakataka tale na vanua ena veivuke i Jiova. E parofisaitaka: “Ena vukica na nona vanua talasiga me vakataki Iteni kei na nona buca dravuisiga me vaka na were i Jiova.” (Aisea 51:3) Era qarava vinaka qori na Isireli. Ena veivuke tale ga i Jiova, o ira na taukena na vuravura era na vakamalumalumutaka.  O rawa sara ga ni vakaraitaka ena gauna qo ni o vinakata mo vakaitavi kina.

Dua na sala ya, mo raica me savasava na nomu vale kei na nomu itikotiko, me maqosa tu na kena irairai, ke ra sega mada ga ni dau sasamaki na tiko veitikivi. O rawa tale ga ni veivuke ena samaki ni Vale ni Soqoni kei na Vale ni Soqoni Lelevu, kei na kena vakavinakataki. Ke rawa, mo bole mo veivuke ena cakacaka ni vakacoko. Nomu cakava qori, e vakaraitaka ni o tu vakarau mo vukei ira na mataveitacini. Mo taroga, ‘Au rawa ni vulica eso na ka meu kenadau kina ke vakatara o Jiova meu bula tawamudu e vuravura?’

Ni vakatura oti ga o Jisu na luvena yalewa o Jairo, e tukuna me soli vua na gone e dua na ka me kania. (Mari. 5:42, 43) E sega ni cakacaka levu sara nona karoni na goneyalewa yabaki 12 qori. Ia vakasamataka mada na levu ni cakacaka meda cakava ni vakayacora o Jisu nona yalayala, nira na “rogoca . . . na domona o ira kece na tu ena ibulubulu nanumi mera tucake mai.” (Joni 5:28, 29) E sega ni tukuna vakamatailalai na iVolatabu e levu na ka, ia eda rawa ni vakasamataka na levu ni kakana me vakarautaki vei ira na vakaturi mai, nodra icili, kei na nodra isulu. Vakacava o rawa ni vakaraitaka ena gauna qo ni o tu vakarau mo veivuke? Qo eso na taro meda vakasamataka.

Ni kacivaki ena ivavakoso ni veisiko mai na ivakatawa ni tabacakacaka, vakacava o na tu vakarau mo veivakani? Ke ra lesi tale ena ivavakoso o ira na veiqaravi vakatabakidua e Peceli, se ni cegu na nona veiqaravi na ivakatawa ni tabacakacaka, vakacava o rawa ni veivuke ena vaqarai ni vanua mera tiko kina? Ke vakayacori ena nomu vanua na soqo ni veiwasewase se soqo lavotaki, o na bole cakacaka ni bera se ni oti na soqo, se o tu vakarau mo kidavaki ira na vulagi?

Me salavata kei na Cakacaka 24:15, meda namaka nira na vakaturi e le bilioni vakacaca. Levu vei ira qori era sega sara tu ga ni kilai Jiova ena gauna era mate kina. Era na mai vulici koya nira vakaturi mai. a O ira na dausokalou yalodina era na veivuke ena veivakavulici. (Aisea 11:9) E vakanamata ena gauna qori o Charlotte, sa vunau oti mai Urope, Sauca Amerika, kei Aferika. E kaya ena marau: “Au vakanamata ni vakavulici ira na vakaturi mai. Niu wilika me baleta e dua e bula ena gauna makawa, au dau vakasamataka: ‘Ke bau mai kilai Jiova mada ga o koya qo, ena veisau sara ga na nona bula.’ Au vakanamata meu tukuna vei ira na vakaturi mai na ka era sega tu ni kila.”

O ira mada ga na dausokalou yalodina i Jiova era bula ni bera ni gole mai vuravura o Jisu, era na vulica e levu na ka. Vakasamataka noda marau meda vakamacalataka vei Taniela na vakayacori ni parofisai e vola, ia e sega tu ni kila na kena ibalebale. (Tani. 12:8) Se noda vukei Ruci kei Neomai me rau kila ni basika ena nodrau iyatukawa na Mesaia. Eda na marau meda vakavulici ira e veiyasa i vuravura, ni sa sega na veivakatovolei se ka ni veivakawelei ena vuravura ca qo!

O na vakaraitaka vakacava ena gauna qo ni o vakarau tu mo vakaitavi ena veivakavulici qori? Dua na sala ya mo vakavinakataka tiko ga na iwalewale ni nomu veivakavulici, mo vakaitavi wasoma tale ga ena cakacaka vakavunau e vakayacori tiko e veiyasa i vuravura. (Maciu 24:14) Ke yalana nomu veiqaravi ena gauna qo na yabaki ni nomu bula se na kemu ituvaki, na nomu sasaga e vakaraitaka ni o vakarau tu mo vakavulici ira na vakaturi mai.

E vinaka meda taroga eso na taro bibi qo, O sa vakanamata dina tiko mo taukena na vuravura? O vakanamata mo vakamalumalumutaka na vuravura, mo vukei ira na vakaturi mai, mo vakavulici ira tale ga? O na vakaraitaka ni o sa tu vakarau mo bula tawamudu ena vuravura, ni o vakaitavi ena cakacaka e tautauvata kei na ka o na cakava ni o taukena na vuravura!