1. Na cava eda kaya kina ni dei tu ga o Eparama ena ka e nuitaka?

 E YALATAKA o Jiova vua na nona itokani o Eparama, nira na vakalougatataki na matanitu kece e vuravura ena vuku ni nona kawa. (Vkte. 15:5; 22:18) Ni dei na vakabauta nei Eparama, e vakadeitaka kina ni na yaco dina na ka e yalataka na Kalou. Ni sa yabaki 100, e yabaki 90 o Sera, se bera tiko ga ni dua na luvedrau tagane na veiwatini yalodina qo. (Vkte. 21:1-7) Ia e kaya na iVolatabu: “E dei ga na nona vakanuinui [o Eparama] ena vuku ni nona vakabauta, me tamadra na veimatanitu, me vaka sa tukuni oti.” (Roma 4:18) Eda kila ni qai yaco dina na ka e nuitaka o Eparama. Oya me dua na luvena tagane e nuitaka tu mai vakadede, o Aisake. Na cava e nuidei kina o Eparama ni na yaco dina na ka e nuitaka?

2. Na cava e vakadeitaka kina o Eparama ni na yaco dina na ka e yalataka o Jiova?

² Ni veivolekati nona veitokani o Eparama kei Jiova, e “vakadeitaka” ni na vakayacora dina na Kalou na “nona vosa ni yalayala.” (Roma 4:21) E vakadonui Eparama o Jiova, e okati koya tale ga me yalododonu ena vuku ni nona vakabauta. (Jeme. 2:23) Me vaka e tukuni ena Roma 4:18, e veisemati na vakabauta nei Eparama kei na nona inuinui. Meda dikeva mada qo na ka e tukuna na yapositolo o Paula me baleta na inuinui, me vaka e volai ena Roma wase 5.

3. Na cava e tukuna o Paula me baleta na inuinui?

³ E tukuna o Paula na vuna meda vakadeitaka kina ni noda “inuinui ena sega ni veivakamaduataki.” (Roma 5:5) E vukei keda tale ga meda kila na sala e rawa ni dei tiko ga kina. Nida dikeva na veitaravi ni ka e tukuna o Paula ena Roma 5:1-5, vakasamataka na nomu inuinui. O na rawa ni  raica ni sa qai dei vinaka na ka o nuitaka ni toso na gauna. Eda na vulica ena noda veivosaki qo na ka mo cakava me dei kina na nomu inuinui ena gauna qo ni vakatauvatani kei na gauna sa oti. Meda dikeva sara e dua na inuinui totoka e tukuna o Paula ena sega ni veivakamaduataki.

4. Na cava e veivosakitaki ena Roma 5:1, 2?

⁴ Wilika Roma 5:1, 2. E vola na vosa qori o Paula ina ivavakoso e Roma. Era vulica na mataveitacini qori na veika me baleti Jiova kei Jisu, era vakaraitaka na nodra vakabauta, era mai lotu vaKarisito tale ga. O Jiova e “okati [ira mera] yalododonu ena vuku ni vakabauta” qai lumuti ira ena yalo tabu. Io, e totoka vakaoti na nodra inuinui, ena vakayacori tale ga.

5. Na cava na nodra inuinui na lumuti?

⁵ Dua na gauna e muri, e vola o Paula vei ira na lotu vaKarisito e Efeso na nodra inuinui. Na nuinui qori e okati kina “na ivotavota . . . mera taukena na yalosavasava.” (Efeso 1:18) E tukuna tale ga o Paula vei ira e Kolosa na vanua e tiko kina na nodra inuinui. E kaya ni nodra “inuinui e maroroi tu mai lomalagi.” (Kolo. 1:4, 5) Na nodra inuinui gona na lotu vaKarisito lumuti, oya nira na vakaturi mera bula tawamudu i lomalagi, na vanua era na veiliutaki kina kei Karisito.—1 Ces. 4:13-17; Vkta. 20:6.

6. Na cava e tukuna e dua na tacida lumuti me baleta na nona inuinui?

⁶ Era mareqeta vakalevu na lotu vaKarisito lumuti na inuinui qori. Dua vei ira o Brother Frederick Franz, e kaya: “E dei tu ga na neimami inuinui, ena vakayacori dina na inuinui qori vei keimami na le 144,000 na lewe ni qelenisipi lailai, na neimami inuinui e sega ni vakatauvatani rawa kei na dua na ka.” Oti e vica vata na yabaki nona qarava na Kalou ena yalodina o Brother Franz,  e vakadeitaka ena 1991: “E dei tu ga vei [keimami] na inuinui qori. . . . Na balavu ga ni neimami waraka tiko, na levu tale ga ni neimami vakavinavinakataka. Qo e dua na ka bibi me waraki, ke vica vata mada ga na milioni na yabaki na neimami waraka tiko. Sa qai talei ga vei au na inuinui qo.”

7-8. Na cava na nodra inuinui e levu vei keda? (Roma 8:20, 21)

⁷ Levu era qaravi Jiova tiko nikua e duidui na nodra inuinui. Qori na inuinui vata ga e vakanamata kina o Eparama, ya na bula tawamudu e vuravura ena veiliutaki ni Matanitu ni Kalou. (Iper. 11:8-10, 13) E vola o Paula nira nuitaka tu e levu na inuinui totoka qori. (Wilika Roma 8:20, 21.) Na cava o taleitaka ena imatai ni gauna o vulica kina na ka e yalataka na iVolatabu ena gauna se bera mai? Vacava e baleta na nomu sa na bula uasivi, sa na sega tale nomu ivalavala ca? Se nomu marautaka nodra sa na vakabulai tale na wekamu lomani ena parataisi e vuravura? Eda vakanamata sara tu ga ena ‘inuinui’ totoka qori.

⁸ Ke noda inuinui na bula tawamudu i lomalagi se vuravura, e macala nida marautaka na noda inuinui. E rawa ni dei vinaka tale ga. E vakamacalataka tarava o Paula na sala ena rawati kina qori. Meda dikeva mada qo na ka e vola me baleta na noda inuinui. Eda nuidei ni na dei tiko ga, ena yaco dina tale ga.

9-10. Me vaka e laurai ena ivakaraitaki nei Paula, na cava meda namaka na lotu vaKarisito? (Roma 5:3) (Raica tale ga na iyaloyalo.)

⁹ Wilika Roma 5:3. Nida sotava na ka rarawa, ena rawa ni dei vinaka kina na noda inuinui. Eda na rairai kurabuitaka qori. Ia mera namaka na imuri kece i Karisito nira na sotava na veika rarawa se na veika dredre. Dikeva mada na ivakaraitaki nei Paula. E tukuna vei ira mai Cesalonaika: “Ni keitou tiko  vata kei kemuni, keitou dau tukuna vei kemuni nida na vakararawataki . . . qori sara ga na ka a yaco.” (1 Ces. 3:4) E vola tale ga vei ira e Korinica: “Ni keitou sega ni vinakata raveitacini moni lecava na veivakararawataki keitou sotava . . . Keitou sega mada ga ni kila se keitou na bula se sega.”-2 Kor. 1:8; 11:23-27.

¹⁰ Mera namaka tale ga na lotu vaKarisito ena gauna qo eso na veika dredre. (2 Tim. 3:12) Vacava o iko? Ni o vakabauti Jisu qai muri koya, o sotava kina na veika rarawa? De dua era vakalialiai iko na nomu itokani kei ira na wekamu. Ena rawa ni voravora na nodra itovo vei iko. Ni o saga mo dau dina ena ka kece e vanua ni cakacaka, vakacava o vakacacani kina? (Iper. 13:18) Era dau tusaqati iko na vakailesilesi ni matanitu ni o vunau? Ia se mani dredre vakacava na ituvaki, e kaya o Paula meda marau. Na vuna?

11. Na cava meda gumatua kina ni vosota na veika dredre?

¹¹ Eda rawa ni marau nida vakararawataki ni tiko na kena yaga. E kaya na Roma 5:3: “Ni na vulici na vosota ena ka rarawa e sotavi.” Eda na vakararawataki kece na lotu vaKarisito, e bibi gona meda vosota. Meda gumatua sara meda vosota na veika dredre qori. Nida vosota ena yalodina, eda na raica na kena vakayacori na ka eda nuitaka. Eda sega ni via vakataki ira e tukuna o Jisu nira vaka na sorenikau e lutu ena vanua veivatu. Era taleitaka na vosa ni Kalou ena imatai ni gauna era rogoca kina, ia nira “vakararawataki se vakacacani,” era tarabe sara. (Maciu 13:5, 6, 20, 21) E sega ni rawarawa nida tusaqati se sotava na veika dredre, ia e yaga vakalevu nida vosota. Ena sala cava?

12. E yaga vakacava noda vosota na veika rarawa?

¹² E vakamacalataka na tisaipeli o Jemesa na yaga ni noda vosota na ka rarawa. E vola: “Me tini vinaka na cakacaka ni vosota moni taucoko kina, moni vinaka ena ka kece, me kua ni dua na ka e yali vei kemuni.” (Jeme. 1:2-4) Kena ibalebale, e tukuna o Jemesa ni tiko na itavi se na inaki ni vosota. Na cava ya? E kena inaki sara ga mo vakaraitaka vakalevu na vosovoso, vakabauta, kei na nuitaki Jiova. Ia e dua tale na sala e yaga kina na noda vosota.

13-14. Na cava na yaga ni noda vosota? E veisemati vakacava qori kei na noda inuinui? (Roma 5:4)

¹³ Wilika Roma 5:4. E tukuna o Paula na vosota ena rawati kina “na veivakadonui.” Na nomu vosota ena vakadonui iko kina o Jiova. Sega ni kena ibalebale qori ni marautaka o Jiova nomu sotava tiko na veika dredre se na leqa. Ia e vakadonui iko sara ga. Na nomu vosota o na vakadonui kina. Dua na veivakalougatataki totoka qori!—Same 5:12.

¹⁴ Vakasamataka mada nona vosota o Eparama e levu na veika dredre, ia e qai vakadonui koya o Jiova. E raici koya o Jiova me nona itokani, e okati koya tale ga me yalododonu. (Vkte. 15:6; Roma 4:13, 22) E rawa ni tukuni tale ga qori me baleti keda. E sega ni yavutaka na Kalou na nona veivakadonui ena levu ni cakacaka eda cakava nida qaravi koya, se na levu ni itavi eda lesi kina. E vakadonui keda ga ena noda vosota ena yalodina. Eda rawa kece ni vosota ke duidui mada ga na noda yabaki, keda ituvaki, se  ka eda rawa ni cakava. Vakacava o vosota tiko ena yalodina e dua na ituvaki dredre ena gauna qo? Ke vaka kina, mo nuidei ni vakadonui iko na Kalou. E uqeti keda sara ga noda kila ni vakadonui keda na Kalou. Ena dei vinaka kina na noda inuinui.

15. Na cava e vakamacalataka tale o Paula? Cava era lomatarotarotaka eso?

¹⁵ Me vaka e tukuna o Paula, ena vakadonui keda o Jiova nida vosota ena yalodina na veika dredre. Dikeva mada nona tomana na ka e vakamacalataka: “Na veivakadonui ena rawati kina na inuinui, ia na inuinui ena sega ni veivakamaduataki.” (Roma 5:4, 5) Eso era lomatarotarotaka qori. Na vuna? Sa tukuna oti o Paula ena Roma 5:2 ni tiko na nodra inuinui e Roma, qori na nodra “nuitaka [mera] taukena na lagilagi ni Kalou.” Ena rairai taroga e dua, ‘Ke sa tiko na nodra inuinui na lotu vaKarisito, na cava e tukuna tale kina o Paula na inuinui ena tikinivolatabu qo?’

16. Ena dei vakacava na noda inuinui ni toso na gauna? (Raica tale ga na iyaloyalo.)

¹⁶ Eda rawa ni kila na ka e vakaibalebaletaka o Paula nida nanuma tiko ni na qai dei vinaka na noda inuinui ni toso na gauna. Kena ivakaraitaki: O se nanuma na imatai ni gauna o rogoca kina na inuinui totoka ena Vosa ni Kalou? De dua o na vakasamataka ena gauna qori ke na yaco dina na bula tawamudu ena parataisi e vuravura, se sega. Ia ni o kilai Jiova vinaka kei na nona vosa ni yalayala ena iVolatabu, o vakadeitaka sara ga ni na yaco dina.

17. O na vakadeitaka tiko ga vakacava na nomu inuinui ni oti nomu papitaiso?

¹⁷ Ni o yalataki iko oti mada ga qai papitaiso, sa na qai dei vinaka na nomu inuinui ni levu tale na ka o vulica mo matua vakayalo. (Iper. 5:13–6:1) O na rairai  vakadinadinataka na ka e tukuni ena Roma 5:2-4. E levu na ka rarawa o sotava, ia ni o vosota o na raica ni vakadonui iko na Kalou. Na nomu kila qori, o na vakadeitaka sara ga ni na vakayacora na veika e yalataka. Sa na qai dei vakalevu na nomu inuinui. O kila ni na yaco dina, o sega tale ni vakatitiqataka. Ena uqeti iko sara ga. Ena laurai ena ka kece o cakava, ena veisautaka nomu ivakarau ni veimaliwai kei na nomu vuvale, nomu vakatulewa, kei na sala o vakayagataka kina na nomu gauna.

18. Na veivakadeitaki cava e tukuna o Jiova?

¹⁸ E tukuna tale na yapositolo o Paula e dua na tikina bibi me baleta na nomu inuinui ni sa vakadonui iko na Kalou. E vakadeitaka ni na vakayacori dina na ka o nuitaka. Na cava mo nuidei kina? E tukuna o Paula na veivakadeitaki ni Kalou qori vei ira na lotu vaKarisito: “Na inuinui ena sega ni veivakamaduataki, ni sa solia vei keda na Kalou na yalona tabu me vakasinaita na lomada ena nona loloma.” (Roma 5:5) E sega ni dua na vuna vinaka mo vakatitiqataka kina na inuinui qori, na nomu inuinui.

19. Na cava o rawa ni vakadeitaka me baleta na nomu inuinui?

¹⁹ Vakasamataka na yalayala i Jiova vei Eparama, nona vakadonui koya, e okati koya tale ga me nona itokani. E vakayacori dina na ka e nuitaka o Eparama. E kaya na iVolatabu: “Ena nona vosovoso voli o Eparama, e qai rawata kina na vosa ni yalayala qo.” (Iper. 6:15; 11:9, 18; Roma 4:20-22) A sega sara ga ni madua kina. Mo nuidei tale ga ke o yalodina tiko ga, o na rawata na ka o nuitaka tiko. Ena yaco dina na nomu inuinui, o na marau, o na sega ni madua kina! (Roma 12:12) E vola o Paula: “Me vakasinaiti kemuni mada ga na Kalou o koya na vu ni noda inuinui, ena marau kece kei na vakacegu ena vuku ni nomuni vakabauti koya, me levu tiko ga kina na nomuni inuinui ena kaukaua ni yalo tabu.”—Roma 15:13.