O bau wilika vinaka na itabataba ni Vale ni Vakatawa ni yabaki qo? Raica mada ke o rawa ni sauma e vica na taro qo:

Na cava e okati ena ‘vakavoui ni noda vakasama’? (Roma 12:2)

E sega ni vauci ga kina na noda cakava e levu na ka vinaka. E wili kina noda dikeva na lomada, meda qai cakava na veiveisau me rawa ni muri kina vakavoleka na ivakatagedegede i Jiova.—w23.01, t. 8-9.

Ena donu vakacava noda rai nida raica na veika e yaco tiko e vuravura?

Eda kauaitaka na kena vakayacori na parofisai nida raica na veika e yaco tiko e vuravura. Eda na qarauna meda kua ni vakilakila na ka, ni na rawa ni vakavuna na duiyaloyalo. E vinaka meda yavutaka na ka eda veivosakitaka ena itukutuku e tabaka na isoqosoqo i Jiova. (1 Kor. 1:10)—w23.02, t. 16.

E duidui vakacava nona papitaiso o Jisu vei ira na nona imuri?

E sega ni vinakati me yalataki koya o Jisu vei Jiova, ni a sucu ena matanitu e yalataki tu vua na Kalou. E uasivi o koya, e sega ni dua nona ivalavala ca me veivutunitaka.—w23.03, t. 5.

Na cava meda cakava mera saumitaro kina e levu ena soqoni?

Me lekaleka ga noda vakamacala, me rawa nira saumitaro eso tale. Kua ni vakamacalataka e levu na ka me rawa ni tiko na ka era vakamacala kina eso tale.—w23.04, t. 23.

Na cava e vakaibalebaletaka na “Sala Savasava” e tukuni ena Aisea 35:8?

Na sala vakaivakatakarakara qori e vakaibalebaletaki taumada vei ira na Jiu era biuti Papiloni mera lesu ina nodra vanua. Vakacava noda gauna? Ena vica vata na senitiuri me yacova na 1919, e vakayacori kina eso na cakacaka, dua vei ira na kena vakadewataki qai tabaki na iVolatabu. Era muria tiko na tamata ni Kalou na “Sala Savasava” ina parataisi vakayalo, era na vakalougatataki kina ena Matanitu ni Kalou.—w23.05, t. 15-19.

E tiko ena Vosa Vakaibalebale wase 9 na nodrau ivakasala e rua na yalewa cava?

Na nona veisureti na “yalewa lialia” ena Vosa Vakaibalebale e tini ena “iBulubulu,” ia na nona veisureti na yalewa “vuku dina,” e tini ina “sala ni yalomatua” kei na bula. (Vkai. 9:1, 6, 13, 18)—w23.06, t. 22-24.

E laurai vakacava na yalomalumalumu ni Kalou kei na nona yalorawarawa ena ka e cakava vei Loti?

E vakaroti Loti o Jiova me biuti Sotoma me dro ina veiulunivanua. Ni kerea o Loti me dro i Soa, e vakadonuya na Kalou na nona kerekere.—w23.07, t. 21.

Na cava me cakava o yalewa vakawati ke dau sara iyaloyalo vakasisila o watina?

Me nanuma tiko o yalewa ni sega ni bale vua na ka e cakava o tagane. Me kauaitaka ga na nona veiwekani kei na Kalou qai vakasamataka vakatitobu na kedra itukutuku na yalewa era sotava na leqa, ia e vakacegui ira na Kalou. E rawa tale ga ni vukei watina me kua ni vakaleqai vakalevu.—w23.08, t. 14-17.

Ni tarogi na noda vakabauta, ena yaga vakacava na yalomatua meda yalomalua kina?

Meda raica na taro qori se na vakalelewa meda kila kina na ka e vakasamataka tiko se kauaitaka o koya e taro. Eda na rawa gona ni sauma ena yalomalua.—w23.09, t. 17.

Na cava eda vulica ena nona sasaga o Meri me vakayaloqaqataki?

Ni kila o Meri ni na tina ni Mesaia, era vakayaloqaqataki koya eso tale. Erau vakayaloqaqataki koya vakayalo o Keperieli kei Ilisapeci. E rawa tale ga nira vakayaloqaqataki keda na tacida.—w23.10, t. 15.

Sala cava ena rairai sauma kina o Jiova noda masu?

E yalataka o Jiova me rogoca noda masu, e vakasamataka tale ga ke salavata kei na nona inaki. (Jere. 29:12) Ena rairai sega ni tautauvata na sala e sauma kina noda masu, ia ena dau tokoni keda tu ga.—w23.11, t. 21-22.

E tukuni ena Roma 5:2 na ‘inuinui,’ na cava tale e tukuni kina ena tikina e 4?

Ni rogoca na itukutuku vinaka e dua, e rawa ni nuitaka na bula tawamudu ena parataisi e vuravura. Ia ni sotava na veika rarawa, ena vosota tiko qai kila ni vakadonui koya na Kalou, ena rawa ni dei vinaka sara na nona inuinui, ena sega tale ni vakatitiqataka.—w23.12, t. 12-13.