O bau wilika vinaka na itabataba ni Vale ni Vakatawa ni yabaki qo? Raica mada ke o rawa ni sauma e vica na taro qo:

Na cava nona rai o Jiova me baleti ira na yalewa?

E sega ni vakaduiduitaki ira na yalewa vei ira na tagane. E dau vakarogoci ira na yalewa, e kauaitaka nodra rai kei na lomadra. E nuitaki ira tale ga mera cakava nona inaki.​—w24.01, t. 15-16.

Eda na muria vakacava na ka e kaya na Efeso 5:7: “Ni kua gona ni tomani ira”?

E vakasalataki keda o Paula meda kua ni vakailala kei ira era vakadredretaka noda muria na ivakatagedegede ni Kalou. Na ilala qori era okati kina o ira eda veimaliwai vata ena veisiga kei ira eda dau veivosaki ena sala ni veikilai ena Internet.​—w24.03, t. 22-23.

Eda na qarauni keda vakacava mai na itukutuku lasu?

E bibi meda qarauna na itukutuku e sega ni vakadeitaki na kena dina era tukuna na tacida, na imeli e vakauta mai e dua eda sega ni kila, kei ira na vukitani era vakalecaleca nira taleitaka na ka dina.​—w24.04, t. 12.

Na cava eda kila kei na ka eda sega ni kila ena vakataulewa i Jiova vei Tui Solomoni, o ira na mate e Sotoma kei Komora, kei na Waluvu?

Eda sega ni vakadeitaka ni na vakarusai ira vakadua o Jiova. Ia na ka ga eda vakadeitaka ni kila vinaka o koya na dina ni ka kece, e levu tale ga nona yalololoma.​—w24.05, t. 3-4.

Na cava eda nuidei kina ni noda “Uluvatu” na Kalou? (Vkru. 32:4)

O Jiova e noda ivakaruru. E nuitaki, e dau vakayacora na ka e yalataka. E sega ni veisau, e dei tu ga nona itovo kei na nona inaki.​—w24.06, t. 26-28.

Na cava mo cakava mo matau ena ivavakoso vou?

Mo nuitaki Jiova me na vukei iko me vaka ga nona vukei ira nona dauveiqaravi ena gauna sa oti. Kua ni vakatauvatana nomu ivavakoso vou kei na nomu ivavakoso makawa. Mo veimaliwai kei ira na lewe ni nomu ivavakoso vou, saga me so tale ga nomu itokani.​—w24.07, t. 26-28.

Na cava eda vulica ena vosa vakatautauvata ena Maciu wase 25?

E vakabibitaki ena vosa vakatautauvata ni sipi kei na me na yalodina. Na vosa vakatautauvata ni yalewa lialia kei na yalewa vuku e vakabibitaki kina na vakavakarau kei na yadrayadravaki. Na vosa vakatautauvata ni taledi e vakabibitaki kina na gumatua kei na mamakutu.​—w24.09, t. 20-24.

E vakacava na cere ni varada nei Solomoni?

E kaya eso na ivolavivigi ena 2 Veigauna 3:​4, ni 120 na kiupiti se 53 na mita na cere ni varada. E tukuni ena so tale na ilavelave, ni 20 na kiupiti se ciwa na mita. Na kena qo e via salavata kei na vavaku ni lalaga ni valenisoro.​—w24.10, t. 31.

Na cava na kena ibalebale “me dua ga na watina” na dauveiqaravi ni ivavakoso? (1 Tim. 3:12)

E kena ibalebale me dua ga na watina, me kua tale ga ni veiyacovi tawadodonu. Kena ikuri, me kua ni wedeva e dua tale na yalewa.​—w24.11, t. 19.

Na cava eda kaya kina nida na sega ni muria ena iVakayakavi ni Turaga na Joni 6:53?

E kaya na Joni 6:53 meda kania na lewe i Jisu, meda gunuva tale ga nona dra. E tukuna na vosa qo o Jisu e Kalili ena 32 G.V., vei ira na Jiu era sega ni vakaraitaka nodra vakabauti koya. Ia e qai tauyavu ena yabaki tarava na iVakayakavi ni Turaga e Jerusalemi. E vosa kina o Jisu vei ira era na veiliutaki vata kei koya i lomalagi.​—w24.12, t. 10-11.