1. Na loloma cava e cecere na kena ivakatagedegede, na vuna? (Raica na imatai ni iyaloyalo.)

E ISOLISOLI nei Jiova na loloma e yavutaki ena ivakavuvuli dodonu (a·gaʹpe). O koya sara ga na iVurevure ni loloma. (1 Joni 4:7) Qo na mataqali loloma e cecere duadua na kena ivakatagedegede. E okati kina na veilomani kei na veidredreti, e laurai ga vakalevu ena nodra vakuai ira eso mera veivuke. E vakamacalataki ena dua na ivola ni “rawa ni kilai ga” na a·gaʹpe “mai na ka e vakavotukanataki.” Nida vakuai keda ena noda dau veinanumi, eda na bulabula vinaka, mamarau, ena vakainaki tale ga noda bula.

2, 3. E vakaraitaka vakacava o Jiova nona lomana na kawatamata?

² A lomani keda o Jiova ni bera mada ga ni buli Atama kei Ivi. E bulia na vuravura me noda itikotiko tudei, meda marautaka tale ga na bula. E cakava qori o Jiova me yaga vei keda, e sega ni cakava me rawaka kina. E vakaraitaka tale ga na dei ni nona loloma ni vakalougatataki ira na luvena e vuravura me rawa nira bula tawamudu ena Parataisi e vakarautaka.

³ Ni rau valavala ca o Atama kei Ivi, e vakaraitaka sara o Jiova nona loloma levu. E vakarautaka na kedra ivoli  na nodrau kawa na veiwatini talaidredre qori, ni vakadeitaka nira na taleitaka eso na nona loloma. (Vkte. 3:15; 1 Joni 4:10) Na gauna tale ga e yalataka kina o Jiova me dua na iVakabula, ena nona rai, sa saumi oti na ivoli. Ia sivi tale e rauta ni 4,000 na yabaki, sa qai cabora o Luvena na nona bula ena vukuda, e vakaraitaka kina o Jiova na nona vakuai koya. (Joni 3:16) Dua na ka noda marau ni lomani keda na Kalou, e sega ni nanumi koya ga!

4. Na ivakaraitaki cava e dusia ni rawa tale ga nida dau loloma?

⁴ A buli keda na Kalou meda ucui koya, oya na vuna eda dau loloma kina. Nida sucu ivalavala ca, e ka ni sasaga meda dau loloma, ia eda se rawa tiko ga ni vakaraitaka na itovo qori. Kena ivakaraitaki, e cabora na isoro vinaka duadua o Epeli ni lomana na Kalou. (Vkte. 4:3, 4) E lomani ira na wekana o Noa ni vunautaka na itukutuku ni Kalou me vicasagavulu na yabaki, ia era sega ni muria. (2 Pita 2:5) E vakaraitaka o Eparama ni bibi duadua nona lomana na Kalou ena nona cabora na luvena o Aisake, a sega ni nanumi koya ga. (Jeme. 2:21) Eda na vakatotomuri ratou na turaga yalodina qori nida vakaraitaka na loloma ena gauna dredre mada ga.

5. Eda na vakaraitaka vakacava na loloma e sega ni veivakaisini?

⁵ E kaya na iVolatabu ni loloma e sega ni veivakaisini oya “meda kua ni loloma ga e gusu se na vosa, me vakavotukana, me dina na noda loloma.” (1 Joni 3:18) Vakacava e kena ibalebale qori meda sa kua sara ga ni kaya se cavuta nida lomana e dua? Sega! (1 Ces. 4:18) E tukuni tiko ga e keri meda kua ni cavuta wale ga nida lomani ira eso, vakauasivi ke yaco eso na ituvaki eda rawa ni yavala kina meda vakaraitaka noda loloma. Kena ivakaraitaki, ke dua na tacida e sega vua na ka me rawa ni bula kina, ena sega ni yaga na noda tukuna tu ga vua me lako ena vakacegu. (Jeme. 2:15, 16) E va tale ga qori noda lomani Jiova kei ira na wekada. Eda na sega wale ga ni kerea na Kalou me ‘tala mai eso na tamata cakacaka ena tatamusuki,’ ia eda na vakaitavi vakalevu ena cakacaka vakavunau.—Maciu 9:38.

6, 7. (a) Na loloma vakacava e “sega ni veivakaisini”? (b) Cava eso na ivakaraitaki ni loloma e veivakaisini?

⁶ E kaya na yapositolo o Joni “me vakavotukana, me dina na noda loloma.” Na noda loloma gona e dodonu me “kua ni veivakaisini” se “sega ni veivakaisini.” (Roma 12:9; 2 Kor. 6:6) Kena ibalebale qo ena sega ni vakarairai tu ga na noda loloma me vaka nida vakamatavulo tiko. Eda na rairai taroga, ‘E tiko dina na loloma e veivakaisini?’ De dua. Ni sega sara ga ni laurai kina na loloma, e vakarairai wale tu ga.

⁷ Vakasamataka mada eso na ivakaraitaki ni loloma e veivakaisini. Na ka e cakava o Setani ena were o Iteni, e vaka sara ga me kauaitaki Ivi dina, ia e veivakaisini qai nanumi koya ga. (Vkte. 3:4, 5) Ena gauna i Tevita, a laurai ena ka e cakava o Etofeli ni vakarairai ga nona veitokani kei na tui. E liumuri o Etofeli ni vinakata me rawaka. (2 Sam. 15:31) Nikua tale ga era vakayagataka na vukitani kei ira na dau vakavuveisei ena ivavakoso na “vosa kamikamica . . . kei na nodra vosa ni veicavilaki” me nanumi nira dau loloma, ia e ca na inaki ni lomadra.—Roma 16:17, 18.

8. Na taro cava meda taroga?

⁸ E veivakamadualaki na loloma e veivakaisini ni sega ni laurai kina na itovo  vakalou na loloma e veinanumi. Eda sega ni vakaisini Jiova kina, eda vakaisini keda tiko ga. E kaya o Jisu nira na ‘totogitaki vakaca sara’ o ira na vakatotomuri ira na dauveivakaisini.’ (Maciu 24:51) Era sega sara ga ni vinakata na dauveiqaravi i Jiova mera vakaraitaka na loloma e veivakaisini. Ia eda rawa ni taroga, ‘Au dau loloma dina, se yavutaki tiko ena noqu nanumi au ga, se meu veivakacalai kina?’ Meda raica mada qo e ciwa na sala eda rawa ni vakaraitaka kina na loloma e “sega ni veivakaisini.”

9. Na cava meda cakava ni uqeti keda na loloma dina?

⁹ Marau ni sega ni kilai na itavi eda qarava. Nida lomani ira na tacida e dodonu ‘me kua ni laurai’ se kilai levu na ka eda cakava. (Wilika Maciu 6:1-4.) Rau sega ni cakava qori o Ananaiasa kei Savaira. Dodonu me rau a lomavakacegu ga ni sega ni kilai na nodrau cau, ia rau qai uvudavuitaka. Na nodrau veivakaisini e vakavuna ga nodrau leqa. (Caka. 5:1-10) Kena veibasai, na loloma dina ena uqeti keda meda qaravi ira na tacida, ia meda kua ni dokai se kilai kina. Kena ivakaraitaki, o ira na tacida era dau vukei ratou na iLawalawa Dauvakatulewa ena vakarautaki ni kakana vakayalo, era sega ni vinakata mera kilai, se tukutukuni ira, se veitukuniyaka na itavi dokai era lesi kina.

10. Eda na liu vakacava ena veirokorokovi?

¹⁰ Meda liu ena veirokorokovi. (Wilika Roma 12:10.) E ivakaraitaki vinaka o Jisu ni dau veirokovi ena nona qarava na itavi lolovira. (Joni 13:3-5, 12-15) De dua eda na cakacaka vakaukaua meda bucina na yalomalumalumu meda veirokovi kina. Eratou sega mada ga ni kila vinaka na yapositolo na ka e dau cakava o Jisu me yacova ni sa sobuti ratou na yalo tabu. (Joni 13:7) Eda rawa ni veirokorokovi nida sega ni nanumi keda vakasivia ena noda rawaka vakavuli, iyau, se itavi dokai eda qarava vei Jiova. (Roma 12:3) Meda kua tale ga ni vuvutaki ira era vakacaucautaki, eda rawa ga ni marau ni noda vata na veivakacaucautaki qori ena vuku ni ka e caka.

11. Na cava me vu dina kina mai lomada na noda veivakacaucautaki?

¹¹ Vakacaucautaki ira na tacimu mai vu ni lomamu. Meda dau qara na sala meda veivakacaucautaki kina ni “vinaka qai veivakayaloqaqataki.” (Efeso 4:29) Ia me vu dina mai lomada. Ke sega, eda na veicavilaki tiko ga se sega ni cakava noda itavi meda veivakasalataki. (Vkai. 29:5) Dua tale ga na ivakaraitaki ni veivakaisini oya na noda vakacaucautaka e dua, oti da qai kaseti koya tale. E qarauna na yapositolo o Paula me kua ni rawai ena veitemaki qori, e ivakaraitaki vinaka tale ga ena nona dau loloma mai vu ni lomana me veivakacaucautaki. Kena ivakaraitaki, e vu mai lomana na nona vakacaucautaki ira na lotu vaKarisito mai Korinica ni vinaka nodra itovo. (1 Kor. 11:2) Ia nira cakava na ka e sega ni veiganiti mera vakacaucautaki kina, ena vakamacalataka vakamatata na vuna, ena vosa tale ga vakayalovinaka.—1 Kor. 11:20-22.

12. Eda na vakaraitaka vakacava na loloma dina nida veikauaitaki?

¹² Dau veikauaitaki. E vakaroti keda o Jiova meda lomasavu vei ira na tacida. (Wilika 1 Joni 3:17.) Ia meda cakava ena inaki vinaka, meda kua ni via rawaka kina. Eda rawa ni taroga: ‘Au dau kauaitaki ira ga na noqu itokani voleka, ira na vakaitutu, se o ira na rawa ni dolea na ka  au cakava? Seu qara na sala meu kauaitaki ira kina na mataveitacini au sega ni kilai ira vinaka, se sega tu vei ira na ka mera na sauma lesu kina?’ (Luke 14:12-14) Kaya mada ke dravudravua e dua na tacida ni sega ga ni lalawataka vinaka nona bula, se sega ni vakavinavinakataka noda kauaitaki koya. Ni yaco qori ena vinaka meda muria na ivakasala qo: “Moni dau veikauaitaki, ia me kua ni caka ena vosakudrukudru.” (1 Pita 4:9) Ke o muria qori, o na marau ni solia na ka ena inaki vinaka.—Caka. 20:35.

13. (a) Na gauna cava ena vakatovolei kina noda vukei ira na malumalumu? (b) Eda rawa ni vukei ira vakacava?

¹³ Vukei ira na malumalumu. Na dina ni noda loloma e rawa ni vakatovolei ena ivakaro vakaivolatabu meda “vukei ira na malumalumu, vosoti ira na tamata kece.” (1 Ces. 5:14) Eso era malumalumu tu ena dua na gauna, e qai dei tale nodra vakabauta, so tale era vinakata meda dau vosovoso da qai tokoni ira tiko ga. E rawa ni okati kina noda veitalanoataka e dua na tikinivolatabu e veiuqeti, sureti ira ena cakacaka vakaitalatala, se vakarogoci ira. Kena ikuri, me kua ni tiko ena noda rai ni so na tacida e “kaukaua” so e “malumalumu.” Meda nanuma tiko, ni o keda kece e tu na ka eda kaukaua kina kei na ka eda malumalumu kina. Na yapositolo mada ga o Paula e sega ni cakitaka na nona malumalumu. (2 Kor. 12:9, 10) E rawa gona ni yaga vei keda kece na nodra veitokoni na itokani lotu vaKarisito.

14. Me vakacava na rabailevu ni noda saga meda veiyaloni tiko ga kei ira na tacida?

¹⁴ Dau veiyaloni. Eda dau saga meda veiyaloni tiko ga kei ira na tacida ena gauna mada ga era raicalataki keda kina se nira cakava e dua na ka ca. (Wilika Roma 12:17, 18.) Ke da vakararawataka e dua, ena vinaka meda kere veivosoti mai vu ni lomada. Kena ivakaraitaki, kua ni kaya qo, “Vosoti au niu vakavuna me va qori nomu rai,” ia o rawa ni vakatusa nomu vakavuna na leqa ni o kaya, “Vosoti au ni vakararawataki iko na ka au kaya.” E bibi na veiyaloni ena vakawati. Me kua ni vakarairai tiko ga e matanalevu na nodrau veilomani e dua na veiwatini, oti rau qai veigaluvi, veivosataki se valavala kaukaua ena gauna rau tiko taurua ga kina.

15. Eda na vakaraitaka vakacava ni vu dina mai lomada na noda veivosoti?

¹⁵ Dau veivosoti. Eda veivosoti nida vosoti koya e vakacudrui keda, da qai kua ni katona tale tiko. Eda rawa ni vosoti ira na sega ni liaca nira vakacudrui keda ni ‘laurai ena noda ivalavala nida dauveivosoti. Eda gumatua ni maroroya na duavata e vakavuna na yalo tabu, eda veiyaloni tale ga.’ (Efeso 4:2, 3) Me laurai ni vu dina mai lomada na noda veivosoti, meda lewa matau na ivakarau ni noda vakasama meda kua kina ni “katona [tiko ga] na ca.” (1 Kor. 13:4, 5) Nida katona  tiko ga na ca e rawa sara ga ni vakaleqa noda veiwekani vakamataveitacini, vaka kina o Jiova. (Maciu 6:14, 15) Meda vakaraitaka tale ga noda veivosoti mai vu ni lomada nida masulaki ira na cala vei keda.—Luke 6:27, 28.

16. Meda raica vakacava na noda itavi ena veiqaravi vei Jiova?

¹⁶ Dau vakuai iko. Ke da lesi ena so na itavi bibi, eda rawa ni vakaraitaka mai vu ni lomada na noda loloma nida ‘sega ni qara na ka e yaga ga vei keda, meda qara tale ga na ka e yaga vei ira tale eso.’ (1 Kor. 10:24) Kena ivakaraitaki, ena noda soqo ni tabacakacaka kei na soqo ni veiwasewase, era dau duri tu na dauveivuke mera dusimaka na vanua meda dabe kina. Era na sega ni vakayagataka na gauna qori mera tawana rawa tu na nodra idabedabe vakavuvale, era na digia ga na idabedabe e voleka ena vanua era veiqaravi kina. Nira vakuai ira va qori, era vakaraitaka kina na loloma, era sega ni nanumi ira ga. O na muria vakacava na nodra ivakaraitaki vinaka?

17. Ni valavala ca bibi e dua, ena yaga vakacava vua na loloma dina?

¹⁷ Vakatusa, biuta na ivalavala ca e caka lo tiko. Era valavala ca bibi eso na lotu vaKarisito, ra qai saga mera vunitaka mera kua ni madua kina se vakararawataki ira eso tale. (Vkai. 28:13) E sega ni vakaraitaki ni loloma qori, ni na leqa kina o koya kei ira na so tale. Ena rawa ni tarova na cakacaka ni yalo tabu ni Kalou, vakaleqai tale ga kina na veiyaloni ena ivavakoso. (Efeso 4:30) Na loloma dina ena uqeta na lotu vaKarisito e valavala ca bibi me raici ratou na qase me rawa ni vukei.—Jeme. 5:14, 15.

18. E bibi vakacava na loloma dina?

¹⁸ Na loloma e itovo talei duadua. (1 Kor. 13:13) E vakatakilai keda nida imuri i Jisu, eda vakatotomuri koya tale ga na iVurevure levu ni itovo qori o Jiova. (Efeso 5:1, 2) E vola o Paula: “Ke . . . sega vei au na loloma, au sa sega ni dua na ka.” (1 Kor. 13:2) Bibi gona meda vakaraitaka tiko ga na loloma, sega ena noda “vosa” ga, ia “me vakavotukana, me dina” tale ga.