E Dodonu Beka Mo Vakadikeva E So Tale na Lotu?

“VOLEKA ni dua na yabaki oqo na noqu dau tiko ena soqoni vakarisito. Au dau taleitaka meu tukuna vei ira na tani na ka e baleta na Matanitu ni Kalou,” e kaya o Miguel, e dua sa iVakadinadina i Jiova tiko mai Sauca Amerika ena gauna oqo. “Sa tekivu meu vakarorogo ena porokaramu ni lotu ena retio kei na noqu saravi ira na dauvunau ena retioyaloyalo. Au nanuma ni porokaramu vaka oqo ena vukei au meu kilai ira vinaka kina ena so tale na lotu. Au mai kila kina ni sega ni salavata kei na iVolatabu na nodra ivakavuvuli, ia au se lomatarotarotaka tiko ga.”

Ena vanua tale ga oqo, a dau gumatua sara o Jorge ni vakavulica vei ira na tani na sokalou dina. Ni toso na gauna, sa tekivu me vakarorogo tale ga ena porokaramu ni lotu ena retio kei na retioyaloyalo. E dau matau me kaya: “E vinaka meda kila na ka era vakabauta na tani.” Ke dua a kauta cake mai na ca ni vakarorogo ena ivakavuvuli lasu vaka oya, e dau sauma: “E sega ni dua na ka e rawa ni vakamalumalumutaka nona vakabauta o koya e kila na ka dina mai na iVolatabu.” Na ivakaraitaki e rua oqo e vakavurea e dua na taro bibi, E ka vakavuku beka meda rogoca na nodra vakabauta na tani?

Kilai ni Lotu Vakarisito Dina

Ni ratou sa mate oti na yapositolo, e vagagai na ivakavuvuli ni sokalou dina ena nodra tubu mai e levu na lotu era viavia vakarisito. Ni kila o Jisu ni na yaco na ka oqo, e vakaraitaka sara na sala e rawa nira kilai kina na lotu era viavia vakarisito kei na lotu Vakarisito dina. Na kena imatai, e vakasalataki keda: “Ia dou qarauni kemudou vinaka maivei ira nai vakavuvuli vakailasu, era sa lako mai vei kemudou ka vakaisulu vaka na sipi, a ra sa wolifa daukata e lomadra.” E qai kuria: “Dou na kilai ira e na vuadra.” (Maciu 7:​15-23) O ira na imuri dina i Jisu era muria na ka  e vakatavuvulitaka o Jisu ra qai kilai rawarawa ena vuadra vinaka. Me vaka ga a vakayacora o Jisu, era sikovi ira na tamata ra qai vakamacalataka vei ira na Matanitu ni Kalou mai na iVolatabu. Nira muria na ivakaraitaki i Jisu, era vagalalataki ira mai na veileti vakapolitiki kei na veileti tale e so. Era ciqoma na iVolatabu me Vosa ni Kalou ra qai rokova me vosa dina. Era kacivaka na yaca ni Kalou. Nira saga mera vakatovotovotaka na loloma e vakavuvulitaka na Kalou, era sega kina ni vakaitavi ena ivalu. Era raici ira mera veitacini.​—Luke 4:43; 10:​1-9; Joni 13:​34, 35; 17:​16, 17, 26.

E kaya na iVolatabu, nida rawa ni “kunea sara ni sa dua tani na yalododonu ka dua tani na tamata ca, ni sa dua tani ko koya sa qarava na Kalou ka dua tani ko koya sa sega ni qaravi koya.” (Malakai 3:18) Me vakataki ira na lotu Vakarisito ena imatai ni senitiuri, o ira na dau sokalou dina nikua era duavata ena vakasama kei na itovo. (Efeso 4:​4-6) Ni o sa kunea rawa na isoqosoqo ni lotu Vakarisito dina, na cava e dodonu mo vaqaqa tale kina se vakilakila na nodra vakabauta na tani?

Qarauni Ira na iVakavuvuli Lasu

E kaya na iVolatabu ni kevaka sara mada ga eda sa vulica oti na dina mai na iVolatabu, e se rawa tiko ga nida vagagai vakayalo ena ivakavuvuli lasu. E vakarota na yapositolo o Paula: “Dou raica vinaka de dua sa vakacacani kemudou e na vuku vakavuravura sa sega ni yaga ka lasu talega, e vaka nai tukuni vakatamata, e vaka nai vakavuvuli vakavuravura, ka sa sega ni vaka nai vakavuvuli i Karisito.” (Kolosa 2:8) Io, o ira na ivakavuvuli lasu e rawa nira veivakaleqai.

O Paula e dau kauaitaka na ka era vakabauta na tani. A tekivutaka e dua na nona ivakamacala: “Oi kemuni na kai Aceni, au sa kunea e na ka kecega ni kemuni sa dausoro vakalevu. Io, ni’u sa lako voli, ka raica na veika kemuni sa soro kina, au sa kunea talega e dua nai cabocabo-ni-soro sa volai kina, VUA NA KALOU E TAWA KILAI.” (Cakacaka 17:​22, 23) Ia o Paula a sega ni vakasinaita na nona vakasama ena vuku vakirisi.

Na nomu kila na ivurevure kei na vakabauta ni lotu lasu e duatani mai na nomu vakani iko ena kena ivakavuvuli. * O Jiova sa lesi koya “na dauveiqaravi yalo dina ka vuku” me vakarautaka na ivakavuvuli era yavutaki ena nona Vosa. (Maciu 4:4; 24:​45, VV) E vola o Paula: “E sega ni rawa mo ni vakaivotavota mai na teveli ni Turaga kei na teveli tale ga ni tevoro. Se eda via vakacudruya na Turaga [“o Jiova,” NW]?”​—1 Korinica 10:​20-22, VV.

E so na qasenivuli ni ivakavuvuli lasu era a lotu Vakarisito dina tu ena dua na gauna, ia era sa veisau mai na dina ina lasu. (Juta 4, 11) Na ka oqo e sega ni dodonu meda kurabui kina. Ni tukuna oti o Jisu na “dauveiqaravi yalo dina ka vuku” e matataki ira na ilawalawa lotu Vakarisito lumuti, sa qai tukuni koya na “dauveiqaravi ca,” na ilawalawa era kudruvaka, “E na yaco vakaberabera toka mai na noqu turaga,” ra qai tekivu yaviti ira na nodra itokani. (Maciu 24:​48, 49, VV) Levu na gauna, e sega tu mada ga ni matata vei ira oqo kei ira na nodra imuri na nodra ivakavuvuli; ia era taleitaka ga mera vakalewa vaka ca na nodra vakabauta na tani. O ira vaka oqo, e kaya kina na yapositolo o Joni: “Kevaka e dua sa lako kivei kemudou, a sa sega ni kauta nai vakavuvuli oqo, kakua ni kauti koya ki vale, se vosavakalougatataka.”​—2 Joni 10; 2 Korinica 11:​3, 4, 13-15.

Vei ira na vakasaqara tiko na lotu dina e vinaka mera vakadikeva vakavinaka na veika era rogoca mai na veimatalotu. Ena yaco na gauna ena qai vakalougatataki ira kina na tamata lomadina era vakasaqara na ka dina na Kalou. E kaya na iVolatabu me baleta na vuku vakalou: “Kevaka ko qara me vaka ko sa qara na siliva, ka vakasaqara me vaka sai yau vuni . . . [ko na] kunea na Kalou mo kilai koya.” (Vosa Vakaibalebale 2:​4, 5) Nira sa mai kunea na ivakavuvuli ni Kalou ena iVolatabu, ena veivuke tale ga ni ivavakoso vakarisito, kei na nodra raica na nona vakalougatataki ira na tuberi ena ivakavuvuli oya o Jiova, era sega gona kina ni vakarorogo tiko ga ena ivakavuvuli ni lotu lasu na lotu Vakarisito dina.​—2 Timoci 3:14.

[iVakamacala e ra]