Na Sala Mo Toro Voleka Kina Vua na Kalou

“Toro voleka vua na Kalou, ka na toro voleka yani vei kemuni ko koya,” e kaya na Jemesa 4:​8, (VV). Me vakaraitaka nona vinakata dina na Kalou o Jiova me veiwekani voleka kei na tamata, e solia kina na Luvena ena vukudra.

MANI vola kina na yapositolo o Joni ena vuku ni loloma e vakaliuliutaka mai oya na Kalou: “Eda sa lomani koya [na Kalou], e na vuku ni sa taumada na nona loloma vei keda.” (1 Joni 4:​19) Nida via toro voleka vua na Kalou, e tiko na ka meda cakava. Oqo e tautauvata ga ena noda toro voleka vua e dua na noda itokani me vaka e vakamacalataki ena ulutaga taumada. Meda vakadikeva mada.

Vakadikeva na iTovo Qoroi ni Kalou

E vuqa sara na itovo qoroi ni Kalou, ia e so era vakasakiti, oqo na loloma, vuku, lewadodonu, kei na kaukaua. E laurai votu na nona kaukaua ena lomalagi kei na vuravura eda tu kina oqo, ena isoso kalokalo vakaiyanaqa kei na atomi somidi. E vola na daunisame: “Sa tukuna na lagilagi ni Kalou ko lomalagi; ka sa vakatakila na cakacaka ni ligana na maliwa levu.”​—Same 19:1; Roma 1:​20.

Na veika buli tale ga e vakaraitaka na loloma ni Kalou. Na keda ibulicaki sara mada ga e vakaraitaka ni vinakata na Kalou meda marautaka na bula. E buli keda meda raica rawa na veimataqali roka, meda tovolea meda boica tale ga na ka, meda taleitaka na ivakatagi, meda dredre, meda marautaka na rairaivinaka ni ka, kei na vuqa tale na isolisoli vinaka vaka oya e dina nira sega soti ni bibi ena noda bula. Sa dua dina na Kalou lomasavu, qai yalovinaka, e dau loloma tale ga, e sega ni vakabekataki ni itovo kece oqori e vakavuna me “Kalou mamarau.”​—1 Timoci 1:​11, NW; Cakacaka 20:35.

Dau sakitaka o Jiova ni loloma ga e yavu ni nona veiliutaki cecere kei na vuna era tokona kina nona veiliutaki nona ibulibuli lomavuku. (1 Joni 4:8) Dina ni Turaga Sau ni lomalagi kei vuravura o Jiova, ia na nona itovo e vaka e dua na tama e daulomani ira na luvena, e vakaraitaka sara ga na veitovo oqori vei ira na tamata, vakauasivi vei ira nona dauveiqaravi yalodina. (Maciu 5:​45) E sega ni bureitaka vei ira e dua na ka mera vinaka kina. (Roma 8:​38, 39) Me vaka ga sa tukuni oti, ni a solia na bula i Luvena e duabau ga sa vakatubura ena vukuda. Io na loloma ga ni Kalou eda bula tu kina, eda na rawata tale ga kina na bula tawamudu.​—Joni 3:​16.

E titobu noda kila na itovo ni Kalou mai na ivakaraitaki i Jisu, baleta ni a vakamurimuri tamana vinaka. (Joni 14:​9-​11) E sega ni dau vakaliuci koya ga, e dau kauai, qai veinanumi. Dua na gauna a sotava o Jisu e dua na turaga e didivara qai galu. Me vaka ga eda kila, ni na rairai sega ni tikotiko vinaka na turaga oqo ni maliwai ira tu na lewe vuqa. E vakavure vakasama dina ni a kauti koya o Jisu ena dua na vanua lala qai vakabulai koya. (Marika 7:​32-​35) O sega beka ni taleitaki ira na tamata era vakaraitaka nodra nanumi iko, ra qai dokai iko? Ke vaka kina, ena sega ni daro ni o na toro voleka dina ga vei Jiova kei Jisu ni toso nomu kilai rau.

Vakasamataka na iTovo ni Kalou

E rawa ni o qoroya na nona itovo e dua na tamata, ia e vinaka meda vakasamataka vinaka na tamata oqori ke da via toro voleka vua. E vaka tale ga kina vei Jiova. Na ikarua ni ka bibi meda vakayacora nida via toro voleka vua, na noda vakananuma na nona itovo. E kaya o Tui Tevita e dua e lomani Jiova dina, na ‘tamata sa vaka na loma [i Jiova]’: “Au sa nanuma na gauna makawa; au sa vakanananu ki na nomuni cakacaka kecega; au sa vakanananu vakalevu ki na cakacaka ni ligamuni.”​—Cakacaka 13:22; Same 143:5.

 Ni o digova na totoka ni bulibuli se o wilika na Vosa ni Kalou, na iVolatabu, o dau vakananuma na ka o raica kei na ka o wilika me vaka e dau cakava o Tevita? Vakasamataka mada na gauna e taura kina e dua na gonetagane e dau lomani tamana vakalevu e dua na ivola i tamana. Ena raica vakacava na ivola? Ena sega ni wilika ga vakacaca qai biuta e loma ni droa. Ena wilika sara ga vakavinaka, ena vakadeuca vakamatailalai se vakamisika vinaka na lewe ni ivola. Me vaka tale ga oqori noda vakamareqeta na Vosa ni Kalou, me vaka nona vakamareqeta na daunisame, e lagata: “A ka vakaidina na noqu loloma ki na nomuni vunau! Au sa vakanananu kina e na siga taucoko ka bogi.”​—Same 119:97.

Me Vinaka Tiko ga na Veivosaki

Na veivosaki vinaka na ivakadei ni dua na veiwekani vinaka. E okati kina na vosa kei na vakarorogo, sega wale ga ni vauci kina noda vakasama, e vauci tale ga kina na lomada. Na masu e noda sala ni veivosaki kei koya na Dauveibuli, na noda vosa vakadodonu vua na Kalou ena vakarokoroko. E taleitaka o Jiova na nodra masu era lomani koya ra qai qaravi koya, era ciqoma tale ga na nona mata e liu duadua o Jisu Karisito.​—Same 65:2; Joni 14:​6, 14.

E dau vosa o Jiova vei ira na tamata ena gauna makawa ena vuqa na sala, okati kina na raivotu, kei na tadra, era bau vosa tale ga kina na agilosi. Edaidai e taurivaka na nona Vosa volai na iVolatabu. (2 Timoci 3:​16) Ia e vinaka cake sara na iVolatabu. E rawa nida raica ena gauna ga eda vinakata kina. Me vaka ga e dua na ivola ena rawa nida wilika se baci wilika. Ena sega tale ga ni rawa ni vakatanitaki, me vaka e dau yaco ni vakadewataki vakavuqa ena gusu. Mo vakasamataka na iVolatabu me vaka e dua na ibinibini ivola levu e vakauta mai vei iko na Tamamu vakalomalagi, rogoci koya me vosa vei iko mai na ibinibini ivola oqori.​—Maciu 4:4.

Me kena ivakaraitaki, e vakaraitaka na iVolatabu na rai i Jiova me baleta na cava e dodonu kei na cava e cala. E vakamacalataka na nona inaki me baleta na kawatamata kei na vuravura. E vakaraitaka tale ga na ka e cakava vei ira e vuqa na tamata kei na veivanua, vei ira na dau sokalou ena yalodina kei ira na kena meca ca sara. Ena nona maroroya vakaivola vaka oqo o Jiova na nona veitaratara kei na tamata, sa boroya kina e dua na iyaloyalo matata vinaka me baleta na nona itovo. E vakaraitaka tale ga o Jiova ena sala e rawa nira kila vinaka kina na tamata na nona loloma, na nona marau, na nona lomabibi, na nona vakanuinui cala, na nona cudru, na nona yalololoma, na nona nuiqawaqawa, na nona ivakarau ni vakasama kei na yalona.​—Same 78:​3-7.

Ni o wilika oti e dua na wase ni Vosa ni Kalou, ena yaga vakacava vei iko na ka o wilika? Vakabibi, ena rawa vakacava mo toro voleka vua na Kalou? Kena imatai sara ga, vakasamataka na ka o wilika kei na ka o vulica me baleta na Kalou, laiva me cakacaka e lomamu. Mo qai vakaraitaka vei Jiova ena nomu masu se tara vakacava nomu vakasama kei na yalomu na ka o sa wilika, kei na sala cava o na saga me yaga kina vei iko. Oqori sara ga na veivosaki. Ke tiko e so tale na ka o nanuma, mo qai vakacuruma tale ga ena nomu masu.

Cakacaka Vata Kei na Kalou

E tukuna na iVolatabu ni so na tamata yalodina ena gauna makawa era lako vata se ra lako voli ena mata ni Kalou. (Vakatekivu 6:9; 1 Tui 8:​25) Na cava e kena ibalebale? Na kena ibalebale ga ni vaka sara ga e tiko vata kei ira na Kalou ena nodra bula e veisiga. Era tamata ivalavala ca. Ia era  lomana na lawa ni Kalou kei na nona ivakavuvuli, ra qai bula me salavata kei na loma ni Kalou. E volekati ira na tamata vaka oqo o Jiova, e karoni ira tale ga me vaka e tukuna na Same 32:8: “Au na vakavulici iko ka vakatakila vei iko na sala mo lako kina: ka’u na rai tiko vei iko ka tuberi iko.”

O rawa tale ga ni rai vei Jiova me nomu itokani voleka mo drau lako vata kaya, ena qarauni iko, qai vakasalataki iko me vaka e dua na tama. E tukuna na parofita o Aisea ni o Jiova e ‘vakavulici iko mo vinaka kina, e tuberi iko ena sala mo lakova.’ (Aisea 48:17) Nida vakila na veika yaga oqo, e vaka sara ga e tu o Jiova “e na [ligada] i matau,” me vaka ga e vakila o Tevita.​—Same 16:8.

Na Yaca ni Kalou e Vakaraitaka Nona iTovo

E vuqa na lotu kei na vakadewa ni iVolatabu era sega ni dau vakayagataka se vakatakila na yaca ni Kalou. (Same 83:18) Ena ilavelave taumada ni iVolatabu Vakaiperiu, e rauta ni 7,000 na gauna e kune kina na yaca i Jiova! (E sega ni vinaka na nodra cakacaka na dauvakadewa nira kauta laivi  na yaca ni Kalou ia era maroroya na yacadra e vuqa na Kalou lasu era cavuti ena vakadewa makawa me vakataki Peali, o Bel, o Merotaki, kei Setani sara mada ga!)

So era nanuma ni sega ni ka bibi na kena bokoci na yaca ni Kalou. Ia vakasamataka mada ke o tovolea mo drau veiwekani kei na dua e sega na yacana, ena dredre beka se rawarawa? Na vosa Kalou kei na Turaga (e taurivaki tale ga vei ira na kalou lasu) ena dusia beka na kaukaua i Jiova, na nona lewa, se na nona itutu, ia na yacana duadua ga ena tukuni koya. (Lako Yani 3:​15; 1 Korinica 8:​5, 6) E vauci ena yaca ni Kalou dina na nona itovo kei na nona ivalavala. E kaya sara ga vakadodonu na daunicioloji o Walter Lowrie: “Na tamata e sega ni kila na yaca ni Kalou, ena dredre sara me kilai koya dina.”

Vakasamataki Maria e dua na lotu Katolika yalodina e vakaitikotiko e Ositerelia. Nira se qai sotavi koya ena imatai ni gauna na iVakadinadina i Jiova, e vakatara o Maria mera vakaraitaka vua ena iVolatabu na iVakadinadina na yaca ni Kalou. Na cava e qai cakava? “Au tagi sara ga niu se qai raica vakadua na yaca ni Kalou ena iVolatabu. E uqeti au sara ga na noqu sa taura rawa ni rawa vei au meu kila qai vakayagataka na yaca ni Kalou.” Ni toso nona vulica na iVolatabu o Maria, sa qai kila o koya ni Kalou e vaka e dua na tamata, ena rawa kina vua me rau na veiwekani voleka.

Io e rawa nida “toro voleka vua na Kalou” dina ga nida sega ni rawa ni raici koya ena matada dina. E rawa nida “raica” na nona itovo vakasakiti ena noda vakasama kei na lomada, me rawa kina nida lomani koya. Na loloma oqori e “i vau vinaka sara.”​—Kolosa 3:​14.

[iYaloyalo ena tabana e 7]

E dua na sala eda na toro voleka kina vei Jiova na noda vakananuma na nona ibulibuli