Sa Noqu iVukevuke Beka na Yalo Tabu?

E LEVU na veimataqali ivakamacala e tu vei ira na daunicioloji me baleta na yalo tabu ni Kalou. Ia, e sega sara ni gadrevi meda lai vakatitiqa tu vaka oya. Na iVolatabu e vakamatatataka se cava na yalo tabu. E sega ni tamata me vaka era nanuma e so, ia e igu kaukaua ga ni Kalou e vakayacori kina na nona inaki.​—Same 104:30; Cakacaka 2:33; 4:31; 2 Pita 1:21.

Ni salavata kei na vakayacori ni inaki ni Kalou na yalo tabu, e dodonu meda vagolea tale ga na ivakarau ni noda bula me salavata kei na igu kaukaua oqo. Me noda gagadre mada ga me noda ivukevuke.

Na Cava me Dua Kina na Dauveivuke?

Ni se bera ni biuti vuravura o Jisu, e vakayaloqaqataki iratou nona tisaipeli: “Au na qai masuti Tamaqu, me na solia vei kemudou e dua tale na Dauveivuke, me tiko vata kei kemudou ka tawa mudu.” E kaya tale: “Ia e dina na ka sa tukuna oqo vei kemudou: e na vinaka vei kemudou me’u lako tani, ni na sega ni lako mai vei kemudou na Dauveivuke kevaka au sega ni lako tani. Ia ke’u sa na lako, au na talai koya mai ki vei kemudou.”​—Joni 14:​16, 17, VV; 16:​7, VV.

Na ilesilesi bibi e lesia o Jisu vei iratou na nona tisaipeli ni a vakarota: “O koya mo dou qai lako, ka vakalotutaki ira na lewe ni veivanua kecega, ka papitaisotaki ira e na yaca ni Tamamudou, kei na Luvena, kei na Yalo Tabu; vakavulici ira me ra vakabauta na ka kece ka’u a vosa kina vei kemudou.” (Maciu 28:​19, 20) Ena sega ni cakacaka rawarawa oqo, baleta ni na tiko o ira na dau veitusaqati.​—Maciu 10:​22, 23.

Ena sega wale ga ni yaco na veitusaqati mai taudaku, ena vakilai tale ga na duiyaloyalo ena loma ni ivavakoso. E vola o Paula vei ira na lotu Vakarisito mai Roma ena rauta na 56 S.K. “Au sa vakamasuti kemuni na veiwekani mo ni qarauni kemuni mai vei ira era dau vakavuna na veisei ka vakacacana na nodra vakabauta na tamata; ko ira era dau saqata na i vakavuvuli ko ni sa ciqoma oti. Ni tawasei kemuni tani mai vei ira.” (Roma 16:​17, 18, VV) Ena ca sara na ituvaki oqo nira mate na yapositolo. E veivakasalataki o Paula: “Ni’u sa kila oqo, ni’u sa lako tani eke ena qai curu mai vei kemudou eso na wolifa ca sara; era na sega ni lomani ira na qele-ni-sipi. Ena tubu cake talega eso na tamata vei kemudou, era na vosataka na ka e veivakacalai, me mari ira kina era sa lotu me ra muri ira.”​—Cakacaka 20:​29, 30.

E gadrevi na veivuke ni Kalou me vorati kina na leqa vaka oqo. E qai vakayagataki Jisu me vakayacora na ka e gadreva. Ni vakaturi oti ena siga ni Penitiko 33 S.K., “a ra sa vakasinaiti kecega e na Yalo Tabu” na le 120 na nona imuri.​—Cakacaka 1:15; 2:4.

Era kila na nona tisaipeli ni veivuke sara ga a yalataka tu o Jisu oya na kena sovaraki na yalo tabu ena siga oya. Era sega tale ni qai vakatitiqataka, era kila vinaka na ibalebale ni ka a vakaraitaka o Jisu: “E na qai vakatavulici kemudou e na ka kece ga na Dauveivuke, na Yalo Tabu, o koya e na tala mai ko Tamaqu e na yacaqu, ka na vakananuma lesu tale ga vei kemudou ko koya na veika kece ga au sa dau tukuna vei kemudou.” (Joni 14:​26, VV, neitou na matanivola kala.) E vakatoka tale ga o Jisu me ‘dauveivuke o koya a mai vakatakila na veika dina.’​—Joni 15:​26, VV.

E Dauveivuke Vakacava na Yalo Tabu?

E dodonu me veivuke na yalo tabu ena vuqa na sala. Kena imatai, e yalataka o Jisu ni na kauta lesu mai ena nodra vakasama na nona tisaipeli na veika sa kaya oti. E vakaibalebaletaka o koya ni na levu cake sara na veika era na kila mai na  nodra nanuma wale ga na ka e kaya. Ena vukei ira na yalo tabu mera kila vinaka na ibalebale kei na yaga ni ka e vakatavulica. (Joni 16:​12-14) E kena ibalebale ga oqo me tuberi ira na nona tisaipeli mera kila vinaka na ka dina. E qai vola e muri na yapositolo o Paula: “Ia vei keda ga sa vakatakila mai na Kalou e na Yalo Tabu; ni sa dikeva na ka kecega na Yalo Tabu, io, na veika titobu ni Kalou.” (1 Korinica 2:10) E dodonu me yavutaki vinaka na nodra kila na imuri lumuti i Jisu, ni bera nira vakadewa na ka dina vei ira na tani.

Kena ikarua, e vakavulici ira na nona tisaipeli o Jisu mera dau masu vakawasoma. Kevaka era sega ni vakadeitaka e dua na ka mera masulaka, ena qai curu takoso mai na yalo tabu me vukei ira. “Sa vaka kina na nona lako mai na Yalo Tabu me vukei keda e na noda malumalumu. Ni da sa sega ni kila na i vakarau ni masu e kilikili me da vakayacora. Sa vakamamasu tiko ga na Yalo Tabu vua na Kalou e na vukuda e na vutugu e sega na vosa e vakamacalataki rawa kina.”​—Roma 8:​26, VV.

Kena ikatolu, na yalo tabu ena vukei ira na tisaipeli i Jisu mera tutaka na ka dina e matanalevu. E vakasalataki ira: “Ni ra na soli kemudou yani ki na mataveilewai, a ra na vakanakuitataki kemudou e na nodra veivale ni lotu; ia dou na kau ki na matadra na kovana kei na tui e na vukuqu, mei vakadinadina vei ira, vei ira talega na veimatanitu tani. Ia ni ra sa soli kemudou yani, kakua ni lomaocaoca se dou na vosa vakaevei se cava dou na kaya: ni na soli vei kemudou e na tiki-ni-siga ko ya na ka mo dou vosataka: ni dou na sega ni vosa koi kemudou, ia ena vosa ga na Yalo ni Tamamudou, e na lomamudou.”​—Maciu 10:​17-20.

Na yalo tabu tale ga ena veivuke ena kena vakatakilakilataki na ivavakoso vakarisito qai uqeti ira na lewena mera vakatulewa vakavuku. Meda dikeva mada vakavinaka na rua na basogana oqo, da qai raica se rawa ni yaga vakacava vei keda nikua.

Me iVakatakilakila

Ena vica vata na senitiuri, era vakarurugi na Jiu ena Lawa i Mosese mera tamata digitaki ni Kalou. Nira cati Jisu ni Mesaia, e kaya kina o koya nira na cati tale ga: “Dou sa sega beka ni wilika na i Vola Tabu? ‘Na vatu sara ga era sa cata na matai, sa qai yaco me kena i vakadei e na tutu ni vale. Oqo sa cakacaka ga ni Turaga, ka sa veivakurabuitaki e matada.’ O koya gona au sa kaya kina vei kemudou ni na kau tani mai vei kemudou na matanitu ni Kalou, ka me soli ki na dua na matanitu e vuataka mai na vuana.” (Maciu 21:​42, 43, VV) Ni tauyavutaki na lotu Vakarisito ena Penitiko 33 S.K., era yaco kina na imuri i Karisito mera “matanitu e vuataka mai na vuana.” Me tekivu mai na gauna oya sa vakayagataka na Kalou na ivavakoso oqo me veitaratara kina kei ira nona tamata. Me kilai ni sa tokitaki na veivakadonui vakalou, e vakarautaka kina na Kalou e dua na ivakatakilakila tabucala.

Ena siga ni Penitiko, e vakavuna na yalo tabu mera vosataka na tisaipeli e vuqa na vosa era sega mada ga ni bau vulica, era kidroa kina na vakararai tu ra qai taroga: “E qai rawa vakacava me ra vosataka na noda dui vosa me vaka e da sa rogoca tiko qo?” (Cakacaka 2:​7, 8, VV) Na vosataki ni vosa tawa kilai, na “cakacaka mana kei na veika veivakurabuitaki e ratou cakava na i apositolo,” e vakavuna mera kila kina na le tolunaudolu ni sa cakacaka sara tiko ga na yalo tabu i Jiova.​—Cakacaka 2:​41, 43, VV.

Na vakarautaki tale ga ni “vua ni yalo tabu”​—na loloma, na reki, na vakacegu, na vosota vakadede, na yalomalua, na yalololoma, na vakabauta, yalomalumalumu, na ivalavala malua​—oqo era na vakatakilakilataki vinaka kina na tisaipeli i Karisito nira dauveiqaravi ni Kalou. (Kalatia 5:​22, 23) Na loloma, e ivakatakilakila levu duadua ni ivavakoso lotu Vakarisito dina. A parofisaitaka o Jisu: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.”​—Joni 13:​34, 35.

Era ciqoma na veituberi ni yalo tabu ni Kalou na lotu Vakarisito taumada ra qai vakararavi kina me vakaukauataki ira. Nira kila na lotu Vakarisito nikua ni sa sega tale ni qai vakaturi ira na mate se cakamana na Kalou me vaka ena imatai ni senitiuri, era bulataka ga na vua ni yalo tabu ni Kalou me rawa kina nira vakatakilakilataki nira tisaipeli dina i Jisu Karisito.​—1 Korinica 13:8.

Dauveivuke ni O Vakatulewa

Na iVolatabu e vua ni cakacaka ni yalo tabu. O koya gona, nida soli keda meda vulica na  iVolatabu, e vaka ga e vakavulici keda tiko na yalo tabu. (2 Timoci 3:​16, 17) E rawa ni vukei keda meda vakatulewa vakavuku. Ia eda dau vakamalumalumu beka kina?

Vakacava na noda digia na noda cakacaka? Ena vukei keda na yalo tabu meda digitaka na cakacaka vinaka mai na rai i Jiova. E dodonu me salavata kei na ivakavuvuli vakaivolatabu na noda cakacaka, me vukei keda tale ga ena noda kakavaka na isausau vakayalo. E sega ni bibi na isau, na irogorogo, se na itutu eda taura ena vanua ni cakacaka. E bibi ga me solia vei keda na ka meda bula kina kei na gauna meda vakayacora kina na noda itavi vakarisito.

Na gagadre me marautaki na bula e sega ni cala. (Dauvunau 2:24; 11:9) Na lotu Vakarisito e veiraurau nona bula, ena raica na veivakamarautaki me ka ni veivakabulabulataki. Ia me digitaka na veivakamarautaki e sega ni veicoqacoqa kei na vua ni yalo tabu, me kua ga ni kena e vakaraitaki kina na “cakacaka ni tovo vakayago.” E kaya o Paula: “Ia sa votu na cakacaka ni tovo vakayago, ka sa vakaoqo: A dauveibutakoci, na daudara, nai valavala tawa-savasava, na daugarogaro, na dausoro ki na veimatakau, na daucakaisausau, na dauveicati, na dauveileti, na veiqati, na daucudrucudru, na dauveiba, na veisei vakavuravura, na veisei ni lotu, na dauvuvu, na daumateni, na daumarau vakalialia, kei na veika sa vakakina.” Me biu laivi tale ga na “gadreva me da dokai walega, se veivakacudrui, se veivuvutaki.”​—Kalatia 5:​16-26.

E tautauvata tale ga kei na noda digia na noda itokani. E ka vakavuku meda digitaki ira ena kedra ituvaki vakayalo, sega ni kedra irairai e taudaku se ena veika era taukena. Na turaga o Tevita e a itokani ni Kalou, ni vakatokai koya na Kalou me “tamata sa vaka na lomaqu.” (Cakacaka 13:22) Ni sega ni dikeva na irairai e taudaku, e digitaki Tevita kina na Kalou me tui kei Isireli me salavata kei na muria na ivakavuvuli: “Ni sa sega ni raica ko Jiova me vaka sa raica ko ira na tamata; ni sa raica na ka esau ko ira na tamata, ia sa raica na yalo ko Jiova.”​—1 Samuela 16:7.

E vica vata na udolu na veitokani e sega ni tudei nira yavutaka ena irairai e taudaku kei na levu ni ka e taukena e dua. E dau tini botoilevu na veitokani e yavutaki ena veika vakaoqo. (Vosa Vakaibalebale 14:20) Na Vosa uqeti ena yalo ni Kalou e vakasalataki keda meda digia na itokani ena vukei keda meda qaravi Jiova. E kaya meda dau solika mai na noda taura na ka, ni na levu cake na marau kevaka eda dau solika. (Cakacaka 20:35) Na gauna kei na loloma erau ka talei duadua e rawa nida solia vei ira na noda itokani.

Na iVolatabu e vakarautaka na ivakasala uqeti ena yalo tabu vua e dua na lotu Vakarisito e vakasaqara tiko e dua me watina. E vaka me kaya tiko: ‘Kua ni raica wale ga na irairai ni matana kei na kena ibulicaki. Raica na yavana.’ Na cava me raici kina na yava? Io, e raici na yava ena vakasama oqo: E vakayagataki tiko beka me vakayacori kina na cakacaka i Jiova ena kacivaki ni itukutuku vinaka, kena ibalebale oya ni lagilagi e matana? E vakaivavataki beka ena itukutuku ni ka dina kei na itukutuku vinaka ni vakacegu? Eda wilika: “Na kena lagilagi e na ulu-ni-vanua na yava i koya sa kauta mai nai rogorogo vinaka, sa vakarogoya mai na sautu, sa kauta mai nai rogorogo vinaka ni ka vinaka, ka vakarogoya mai na veivakabulai, ka sa tukuna mai ki Saioni, Sa lewa na nomu Kalou!”​—Aisea 52:7; Efeso 6:15.

Nida bula tu ena “veigauna dredre,” eda gadreva na veivuke meda cakava tiko ga kina na loma ni Kalou. (2 Timoci 3:​1, VV) Na dauveivuke, na yalo tabu ni Kalou, e nodra dauveivuke yadudua qai tokona sara vakaukaua na nodra cakacaka na lotu Vakarisito ena imatai ni senitiuri. Na vulici vagumatua ni Vosa ni Kalou, na isolisoli ni yalo tabu, e dua na sala bibi me rawa ni noda dauveivuke tale ga kina na yalo tabu. Vakaevei, sa noda dauveivuke tiko na yalo tabu?

 [iYaloyalo ena tabana e 23]