Vakabauta na Kalou Eda Rairai Sega ni Kila

E LE rua mai na veiyatolu na lewenivanua mai Jamani era vakabauta na Kalou. Ia, nira tarogi e sivia e duanaudolu na tamata mera vakamacalataka na Kalou era vakabauta, e voleka ni duidui kece na nodra isaunitaro. E kaya na niusiveva na FOCUS: “E dau dui tu ga nodra nanuma na kai Jamani me baleta na Kalou nira sega ni tautauvata.” E dua dina na ka totoka na kena vakabauti na Kalou, ia ena ka vakalialia kevaka eda sa vakabauti koya da qai sega ni kila se Kalou vakacava.

E sega ni yala wale ga e Jamani na kena sega ni kilai se Kalou vakacava o koya; e tete tale ga yani ena yasayasa vakaurope. E laurai ena dua na vakadidike a vakayacori mai Austria, Peritania, kei Necaladi nira a duavata ena vakasama ni Kalou e “dua na kabula kaukaua kei na nona cecere e sega ni katumi rawa.” Vakabibi ena kedra maliwa na itabagone kei ira sara mada ga era vakabauta na Kalou, oya ni sega ni vakamacalataki rawa o koya.

O Kila Vinaka li na Kalou?

E tiko e dua na duidui levu ke da kaya nida kila e dua, kei na noda kila vinaka e dua. Nomu kila e dua​​—⁠na tui beka e dredre ni torovi, na dauqito, e dua e dau vakaraitaki ena iyaloyalo​​—⁠e kena ibalebale oya ni o kila ni bula tiko. Ia, ni o kilai koya vinaka, ena kena ibalebale oya na nomu na kila tale ga na nona itovo, lomana, veika e taleitaka kei na veika e sega ni taleitaka, kei na nona lalawa ena gauna sa bera mai. Nomu kila vinaka e dua ena dolava na sala ni nomudrau veiwekani voleka.

Era vakadeitaka e drau na udolu na tamata ni sega ni sa rauta wale ga na veika lailai era kila me baleta na Kalou​​—⁠oya na nodra kila ni bula tiko. E dua dina na ka totoka na nodra saga mera veikilai vinaka kei na Kalou. Era raica beka na kena yaga? O Paul e dua na turaga e vakaitikotiko ena vualiku kei Jamani, e dau matailelevu tu ga na ka e vakabauta me baleta na Kalou, a mani vakatulewataka me kila vakavoleka na Kalou. A vakamacalataka o Paul: “Dina ni na gadrevi na gauna kei na sasaga meda kila vakavoleka kina na Kalou, ia ena yaga sara ga vakalevu. Nida veivolekati kei koya na Dauveibuli ena vinaka kina na noda bula e veisiga.”

Ena yaga beka na gauna kei na sasaga e gadrevi meda kilai koya vakavoleka kina na Kalou? E kerei mo ni wilika na ulutaga e tarava.

[Tikina bibi ena tabana e 3]

E tiko e dua na duidui levu ke da kaya nida kila e dua, kei na noda kila vinaka e dua