Lagita na Kalou ena Ka e Sarava ena Retioyaloyalo
Tukutuku Mai na Daukacivaka na Matanitu
Lagita na Kalou ena Ka e Sarava ena Retioyaloyalo
E KAYA na yapositolo o Paula ni “so era sa vunautaki Karisito ni ra sa dauvuvu ka dauveileti, eso talega ni ra sa lomavinaka.” (Filipai 1:15) Ena so na gauna, o ira sara mada ga na via vakacalai ira na tamata i Jiova era vakavuna tale na nodra mai kila na ka dina na tamata yalododonu.
Ena Noveba 1998, a saravi ena nodra retioyaloyalo na lewenivanua mai Varanise na Peceli se na nodra valenitabana na iVakadinadina i Jiova e tiko mai Louviers. Dina ga ni duidui na sala e ciqomi kina, ia e qai yaco e dua na ka totoka e tawanamaki.
E dua vei ira na sarava o Anna-Paula, e 60 ga na kilomita mai Peceli na vanua e vakaitikotiko kina. E sa veisere kei watina qai tiko vata ga kei na rua na luvedrau tagane, a vaqara cakacaka tale tiko ga ena gauna vata oqori. Ena mataka ga ni siga e tarava, a qiri sara e Peceli me taro cakacaka kina. E kaya: “Au nanuma mai na ka au raica ena retioyaloyalo ni oqo e dua na vanua vinaka qai yaga na cakacaka e qaravi kina.” E kurabuitaka ni tukuni vua ni o ira kece na veiqaravi tu e Peceli era italatala, era sega ni saumi kina! Oti toka na kena vakamacalataki vakalekaleka vua na nodra cakacaka na iVakadinadina i Jiova, e vakadonuya sara me sikovi.
A sikovi koya yani o Léna, e cakacaka tiko vakaitalatala vakatabakidua ena ivavakoso ga e kea. Rau mani veitalanoa balavu sara qai taura o Anna-Paula na ivola Na Ka Mo Kila Mo Bula Tawamudu Kina. * Ena veisiko e tarava, sa wilika tasevu kina o Anna-Paula na ivola qai levu nona taro. E taleitaka sara me vuli iVolatabu. E kaya: “Oqo e sala vinaka meu kila kina na Vosa ni Kalou. Au se sega vakadua ni bau raica na iVolatabu.”
E lai sarasara e Peceli o Anna-Paula ena Janueri, ena kena macawa ga e tarava sa gole sara ena soqoni Vakarisito. Sega ni dede, sa vakavulici rau tale ga na luvena ena iVolatabu, qai dau wasea na itukutuku vinaka vei ira nona itokani. E kaya: “Au sega ni rawa ni kubuta tiko ga na ka dina vakaivolatabu au sa vulica tiko. Au via wasea sara ga vei ira na tamata meu vakacegui ira kina.” Ni sa vorata rawa e vica na leqa e sotava tiko sa qai lakova wasoma na soqoni. Totolo sara nona toso vakayalo qai papitaiso ena 5 Me, 2002.
Me ikuri ni nona ivakaraitaki vinaka o Anna-Paula kei na nona gumatua ena vunau, a vuli iVolatabu tale ga o tinana qai papitaiso. E kaya o Anna-Paula: “E sega ni tukuni rawa na levu ni noqu marau. Au vakavinavinakataki Jiova ena veisiga ena noqu sa mai kilai koya vaka kina na veivakalougatataki kece au sotava.”
[iVakamacala e ra]
^ para. 6 Tabaka na iVakadinadina i Jiova.
[iYaloyalo ena tabana e 8]
E cake: O Anna-Paula
E ra: Na matamata ni valenivolavola ni tabana e Varanise