Na Yavu Dodonu ni Qaravi Kalou

E TUKUNA na ivola vakorea na 31 Reasons Why Young People Leave the Church ni levu era sa sega ni dau lai lotu baleta era sega ni kunea kina na isau dodonu ni nodra taro. Me kena ivakaraitaki, era taroga, ‘Cava e sotava kina na rarawa o ira era qarava na Kalou?’ kei ‘Na cava meda vakabauta kina na veika kece e vakavuvulitaka na lotu, ni levu mada ga nodra ivakavuvuli e veicoqacoqa qai veilecayaki?’

E vuqa era rarawataka na nodra isaunitaro na iliuliu ni lotu ena tikina oqo, era lai vakadeitaka kina ni sega ni tiko na kena isau ena iVolatabu. Ni yavutaka e dua na iliuliu ni lotu na nona ivakamacala mai na nona vakasama ga, e dau basika kina vakavuqa na rai cala, se na kena cakitaki sara mada ga na Kalou kei na iVolatabu.

Oqori na ka a sotava o Abel, mai Sauca Aferika, a susu ena vakabauta ni lotu Lutheran. A nanuma lesu: “E vakavuvulitaka na lotu ni o ira kece era mate e dau kauti ira na Kalou. Ia au sega ni kila se rawa vakacava vua na Kalou dauloloma me kauti ira na itubutubu qai biu tu mai na luvedra. Ena colo kei Aferika na vanua au a susu kina, keimami dau sega ni vakamatea na tinanitoa me yacova nira sa lelevu na luvena. Ke bukete li e dua na tinanibulumakau, keimami na sega ni vakamatea me yacova na gauna sa sucu qai kali kina na luvena. Au sega gona ni kila se cava e sega kina ni rawa vua na Kalou e dauloloma me vakaraitaka na loloma vata oya vua na tamata.”

O Aram, e dua na kai Canada, e via vaka tale ga oya na nona vakatitiqa. “A mate o tamaqu niu se qai yabaki 13,” a kaya. “Ena vunau ni veibulu, a vakamacalataka e dua na iliuliu levu ni lotu ni vinakata na Kalou me mate o tamaqu me rawa ni rau veivolekati kina mai lomalagi. ‘E dau kauti ira na tamata vinaka na Kalou,’ e kaya, ‘ni Kalou  e dau lomana na tamata yalododonu.’ Au sega ni kila se rawa vakacava vua na Kalou me nanumi koya ga ena ituvaki oqo.”

A yaco na gauna, me rau veitaratara kina o Abel kei Aram kei ira na iVakadinadina i Jiova, rau mani vulica sara na iVolatabu, rau qai kunea kina na isau ni nodrau taro. Rau bucina me rau lomana na Kalou qai qaqaco tale ga na nodrau vakabauti koya. Yaco sara me rau yalataka nodrau bula vei Jiova rau qai dua tale ga na nona dauveiqaravi yalodina.

Kilaka Dodonu​—Na Usutu ni Nona Vakabauti na Kalou

Na cava eda vulica mai na rua na ivakaraitaki oqo? Ni bibi dina na kilaka dodonu me rawa ni qai vakabauti kina na Kalou. A tukuna na yapositolo o Paula vei ira na lotu Vakarisito ena koro makawa mai Filipai: “Na ka oqo ka’u sa kerea, me tubu cake vakalevu sara na nomudou loloma e na vuku kei na lewa vinaka kecega.” (Filipai 1:9) E semata vata e ke o Paula na noda lomana na Kalou kei ira na noda itokani vakabauta kei na kilaka dodonu me baleta na Kalou kei na nona inaki.

E veiganiti dina oqo, baleta na imatai ni ikalawa me nuitaki kina e dua oya na nomu kilai koya​—o na rawa ga ni nuitaki koya ke drau veikilai vinaka qai drau veivolekati. E vaka tale ga kina e ke, ena dodonu me tiko vei iko na kilaka dodonu ena qai uqeti iko mo vakabauta na Kalou. “Ia na vakabauta sa vaka ni sa vakayacori na veika sa vakanuinuitaki, e vaka ni sa vakaraitaki na veika sa tawa kune,” e kaya o Paula. (Iperiu 11:1) O koya gona, ke sega ni yavutaki ena kilaka dodonu mai na iVolatabu na noda vakabauta na Kalou, e rawa ni vakatauvatani oqo ina vale e tara ena imau veva. Ni yavalati ga vakalailai ena kasura.

Ni o vulica gona na iVolatabu ena vukei iko mo kunea na isaunitaro erau a lomatarotarotaka voli mai o Abel kei Aram, Na cava era mate kina na tamata? Na iVolatabu e vakamacalataka ni “sa curu ki vuravura nai valavala ca e na vuku ni tamata e lewe dua, kei na mate e na vuku ni valavala ca; a sa yaco vakakina na mate ki na tamata kecega, ni sa cala na tamata kecega.” (Roma 5:​12) Ena vuku ni ivalavala ca i Atama era qase kina na tamata ra qai mate, e sega ni kauti ira na Kalou mera lai tiko kei koya. (Vakatekivu 2:​16, 17; 3:​6, 17-​19) Kuria oya, e vakamacalataka na iVolatabu na inuinui dina e dulaka tu na Kalou o Jiova. Ena vuku i Luvena, o Jisu Karisito, e vakarautaka kina o koya na inuinui ni veivakaturi vua na kawatamata ivalavala ca.​—Joni 5:​28, 29; Cakacaka 24:15.

Me vukea noda kila na ka dina me baleta na veivakaturi, e koto ena iVolatabu na kedra ivolatukutuku e so a vakaturi ira o Jisu. (Luke 7:​11-​17; 8:​40-​56; Joni 11:​17-​45) Ni o wilika na veivolatukutuku oqo, dikeva na levu ni nodra marau na wekadra kei ira na nodra itokani. Dikeva tale ga na nodra uqeti mera vakalagilagia na Kalou qai vakabauti Jisu.

Na kilaka dodonu me baleta na Kalou kei na nona inaki e rawa ni uqeti ira tale ga na tamata nikua. Levu vei ira oqo era veilecayaki, lomaocaoca ena dua na gauna, se ra tarabe sara mada ga nira sega ni kunea rawa na isau ni nodra veitaro bibi. Ia nira vulica na iVolatabu, era a kunea na kena isau, e veisautaka sara ga na nodra bula.

Lomana na Kalou​—Vuna Levu Duadua Meda Qaravi Koya Kina

Dina ni bibi na kena rawati na kilaka dodonu me qai vakabauti kina na Kalou, ia ena vinakati e dua na ka e bibi cake me rawa ni uqeta e dua me talairawarawa vua qai qaravi koya. Ni tarogi vei Jisu se cava na ivunau levu duadua mai vua na Kalou, a kaya: “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kece, kei na nomu kaukauwa kece.” (Marika 12:30) Ke dua e lomana na Kalou ena kena ivalavala e vakamacalataka e ke o Jisu, sega ni vakabekataki ni na vu sara ga mai e lomana me talairawarawa vua qai qaravi koya tale ga. E vakacava o iko?

O Rachel, e sa vica vata na yabaki na nona kaulotu tu mai Korea, e vakamacalataka vaka oqo nona vakabauta: “Au dau vakasamataka na nona lomasoli o Jiova vei ira na nona ibulibuli, nona dau vosoti ira na nona tamata, kei na nona vakatakila mai na lomana vei keda ena inaki meda vinaka kina. Na veika kece oqo e vakavuna meu  lomana vakalevu cake na Kalou. Na loloma gona oqo e uqeti au meu qaravi koya kina.”

O Martha, e dua na yada mai Jamani, e sa qaravi Jiova voli mai me 48 na yabaki. E kaya: “Na cava au qaravi Jiova kina? Baleta niu lomani koya. Au dau masu vei Jiova ena veibogi qai vakavinavinakataka vakalevu vua na nona veivakalougatataki kece, vakauasivi na isoro ni veivoli.”

Io, nida lomana na Kalou eda na vinakata meda qaravi koya mai vu ni lomada. Ia ena bucina vakacava e dua na loloma vaka oqo? Ena vakaukauataka na noda bucina meda lomana na Kalou na noda vakamareqeta na loloma e vakaraitaka vei keda. Dikeva na vosa veivakauqeti oqo mai na iVolatabu: “O koya sa sega ni dauloloma sa sega ni kila na Kalou; ni sa loloma na Kalou. E na ka oqo sa vakaraitaki kina na loloma ni Kalou vei keda, ni sa tala ki vuravura na Luvena e dua bauga na Kalou, o koya ka vakatubura ko koya, me da bula e na vukuna. E na ka oqo sa rairai kina na loloma, sa segai ni da a lomani koya na Kalou, ia ni sa lomani keda ko koya, a sa tala na Luvena mei bulubulu ni nodai valavala ca.”​—1 Joni 4:​8-​10.

Sega li ni o vakavinavinakataka na loloma levu oqo? Taura mada ni o sa voleka ni luvu ena dua na uciwai e kaukaua na kena kui, qai bolemate e dua me vakabulai iko. O na guilecavi koya beka, se dua na ka na nomu na vakavinavinakataki koya? O na sega li ni bole mo cakava na cava ga e vinakati me caka ena vukuna? E sega ni vakatauvatani rawa na loloma levu e vakaraitaka na Kalou ena nona solia mai na Luvena, o Jisu Karisito, me isoro ni veivoli. (Joni 3:​16; Roma 8:​38, 39) O koya gona, ke tara na lomamu na loloma ni Kalou, ena uqeti iko mo lomani koya qai qaravi koya tale ga.

Vakalougatataki ena Gauna Oqo kei na Gauna sa Bera Mai

E dodonu me vuna levu duadua ni noda cakava na inaki ni Kalou oya na noda lomani koya, ia e ka marautaki nida kila ni Kalou e dau vakaicocovitaki ira era qaravi koya. E kaya na yapositolo o Paula: “Kevaka sa sega na vakabauta, sa dredre sara me da vinakati: o koya sa torova na  Kalou e dodonu me vakabauta ni sa bula ko koya, ni sa saumi ira talega era sa dauvakasaqarai koya.”​—Iperiu 11:6.

O ira era lomana na Kalou qai talairawarawa vua era na vakalougatataki dina. Levu era bulabula vinaka vakayago nira muria na ivakavuvuli mai na iVolatabu. (Vosa Vakaibalebale 23:​20, 21; 2 Korinica 7:1) So e nuitaki ira na itaukei ni nodra cakacaka qai dei kina na nodra cakacaka nira bulataka na ivakavuvuli vakaivolatabu ni dau dina kei na gugumatua. (Kolosa 3:​23) Nira vakararavi gona vei Jiova, era vakalougatataki kina na dauveiqaravi ni Kalou ena nodra vakila na bula vakacegu ena ituvaki dredre sara mada ga era sotava. (Vosa Vakaibalebale 28:25; Filipai 4:​6, 7) Kena ilutua, era vakanamata ena nuidei ina veivakalougatataki mera bula tawamudu ena parataisi e vuravura ena gauna sa bera mai.​—Same 37:​11, 29.

Vei ira na marautaka voli mai nona veivakalougatataki o Jiova, na cava era kaya me baleti koya? O Jacqueline, e dua na lotu Vakarisito mai Canada, e vakavinavinakataka na Kalou ena nona kaya: “E dau solia vei keda na isolisoli totoka, qai vakarautaka tale ga na inuinui dei ni bula tawamudu.” O Abel, e sa cavuti oti, e kaya: “Au se qai rogoca vakadua na inuinui ni bula tawamudu ena parataisi e vuravura, ia au vakanamata dina tu kina. Kevaka mada ga e sega na Parataisi, e ka ni marau ga vei au meu vakaraitaka noqu lomana na Kalou ena noqu qaravi koya.”

O na Rawata Tale ga na Vakabauta Dina

“Koi kemuni, Jiova ni lewe vuqa, ka lewa vakadodonu, ka vakatovolea nai ivi kei na loma ni tamata,” e kaya na iVolatabu. (Jeremaia 11:20) Io, o Jiova e raica na veika vuni e tu e lomada. E dodonu gona meda dikeva yadua na inaki ni noda vakabauta na Kalou. E rawa ni vakavuna na kena muri na sala cala ena veigauna sa oti, na vakabauta kei na vakasama cala me baleta na Kalou. Ia na kilaka dodonu mai na iVolatabu ena rawa ni veivakamuai ina veiwekani vinaka kei koya a buli keda, na Kalou o Jiova.​—1 Timoci 2:​3, 4.

Nodra tuvanaka na vuli iVolatabu sega ni saumi na iVakadinadina i Jiova, era sa vukei ira tiko kina na tamata mera rawata na kilaka dodonu ni Kalou. (Maciu 28:20) Nodra ciqoma na veivuke oqo e levu era lomana kina na Kalou ra qai bucina tale ga na vakabauta dina me baleti koya. Nira vulica na iVolatabu, era sa rawata kina na “vuku dina kei na lewa vinaka,” ena vukei ira mera “lako vakavinaka” ena gauna rerevaki oqo. (Vosa Vakaibalebale 3:​21-​23) Kena ilutua, era na marautaka na inuinui e “dina ka kaukauwa” me baleta na gauna sa bera mai. (Iperiu 6:​19) E rawa tale ga ni o rawata na vakabauta dina qai marautaka na veivakalougatataki vaka oqo.

[Kato ena tabana e 6]

Saumi Nodra Lomatarotaro

“Au vulivuniwai, qai vulitara tiko e valenibula, au raica kina na mosi e yacovi ira na tamata vinaka ena vuku ni tauvimate kei na nodra sotava na leqa tubukoso. Ke tiko na Kalou, na cava e vakatara tu kina me yaco na veika oqo? Na inaki wale beka ga ni lotu me rawati kina na vakacegu ni vakasama?”​—Dua a lotu Presbyterian tu mai Korea.

“E dau gunu vakasivia o tamaqu ni se bula, ia oqo au dau vakasamataki koya vakalevu se sa lako i eli se i lomalagi. Au dau rerevaki ira na mate kei na vakasama ni kama i eli. Au sega ni kila se rawa vakacava vua na Kalou dauloloma me vakatara e dua me lai vakararawataki tawamudu tu i eli.”​—Dua a lotu Katolika tu mai Brazil.

“Na cava ena yaco ina vuravura kei ira na kawatamata ena gauna sa tu oqo e liu? Ena rawa vakacava me bula tawamudu na kawatamata? Ena rawata vakacava na kawatamata na bula vakacegu dina?”​—Dua a lotu Katolika tu mai Jamani.

“E veicalati vei au na ivakavuvuli ni bula me dewa ina dua tale na bula (reincarnation). Era sega ni qaravi Kalou na manumanu, o koya gona, ke o mate qai yaco mo veisau ina manumanu me isau ni nomu ivalavala ca, ena rawa vakacava mo kila se cala cava mo vakadodonutaka mo vakavinakataki iko kina?”​—Dua a lotu Idu tu mai Sauca Aferika.

“Au a susu mai na dua na vuvale eratou vakabauta na ivakavuvuli nei Confucius, au dau vakaitavi ena kena solevutaki na nodra mate na tukai keimami. Niu vakarautaka na teveli e tuvani kina na veika me cabori, au qai lolou ena vakarokoroko, au dau vakasamataka se ra na mai kania na tukai keimami sa mate na kakana sa cabo tu, mera qai raici keimami tale ga na vakarokorokotaki ira.”​—Dua a vakabauta tu na ivakavuvuli nei Confucius mai Korea.

Era a kunea kece o ira oqo na isau ni nodra taro nira vulica na iVolatabu kei ira na iVakadinadina i Jiova.