Taro na Dauwiliwili

Na cava e tukuni kina ni a “galu” o Isikeli ena gauna a kabai kina o Jerusalemi qai vakarusai?

Ni a sega tale ni dua na ka me tukuna o Isikeli me kuria kina na parofisai i Jiova e sa vakasavuya oti.

A tekivu veiqaravi na parofita o Isikeli me nodra ivakatawa yalodina na Isireli era tu vakavesu mai Papiloni e “nai kalima ni yabaki ni nona vakabobulataki ko Jioiakini na tui,” oya ena 613 B.S.K. (Isikeli 1:​2, 3) Ena ikatini ni siga ni ikatini ni vula ni 609 B.S.K., a vakatakila na Kalou vei Isikeli na nodra sa vakarau kabai Jerusalemi na kai Papiloni. (Isikeli 24:​1, 2) Na cava ena yaco ena kabakoro oqo? Ena bula rawa beka na koro o Jerusalemi kei ira na lewena talaidredre? Me vaka e dua na ivakatawa, e sa vakasavuya oti o Isikeli na itukutuku ni veivakarusai i Jiova, ena sega ni dua e tarova rawa. E sega tale ni gadrevi vei Isikeli me tomana na itukutuku oya me vakadeitaka kina. A galu ga o Isikeli ena nona sega ni tukuna e dua tale na ka me baleta na nona kabai o Jerusalemi.​—Isikeli 24:​25-​27.

Rauta ni ono na vula nona vakarusai oti o Jerusalemi ena 607 B.S.K., sa qai taura o Isikeli e Papiloni na itukutuku ni kena sa rusa na koro tabu, a kauta yani vua e dua a dro mai kina. Ena yakavi ni bera ni tadu o koya a dro bula yani, a vakavuna o Jiova me ‘dalaga na gusu i Isikeli, . . . , qai sega ni galu tiko.’ (Isikeli 33:22) E tini e kea na galu i Isikeli.

Ia, a galu dina beka o Isikeli ena loma ni gauna oya? Sega ni vaka kina, ni gauna mada ga e tukuni ni “galu” voli kina, a cavuta o koya na veiparofisai e baleti ira vakatabakidua na veimatanitu voleka era rekitaka na nona rusa o Jerusalemi. (Isikeli, wase 25-​32) Ni se qai tekivu parofisai o Isikeli, vaka kina nona cakacaka vakaivakatawa, a tukuna vua o Jiova: “Na yamemu ka’u na vakabita ki na loma ni gusumu ecake, mo galu kina, ka sega ni dauvunauci ira tiko: ni ra sa mataqali dautalaidredre. Ia ni’u sa vosa vei iko, ka’u na qai dalaga na gusumu.” (Isikeli 3:​26, 27) Ni sega na itukutuku i Jiova vei ira na Isireli, ena galu o Isikeli, ni sega na ka me kaya. Ena qai vosa ga ena gauna e vinakata kina o Jiova me tukuna vei ira e dua na ka. O koya gona, e galu o Isikeli ena vakasama ni sega na veivosa vakaparofisai me tukuna vei ira na Isireli.

Na ilawalawa e vaka e dua na ivakatawa, o ira na lotu Vakarisito lumuti, era veivakasalataki tiko nikua ena nona na rusa o lotu ni Veivanua Vakarisito, a vakatakarakarataka mai o Jerusalemi. Ni yaco na “veivakararawataki levu” qai vakarusai “o Papiloni na Ka Levu,” na isoqosoqo ni lotu lasu kece kei vuravura, ena sega tale ni gadrevi me tukuna e dua na ka na ilawalawa lumuti e vakataki Isikeli me baleta na nona rusa o lotu ni Veivanua Vakarisito, e iwase levu ni isoqosoqo oya.​—Maciu 24:​21, NW; Vakatakila 17:​1, 2, 5.

Io, ena yaco mai na siga era na galu na ivovo ni lumuti kei ira na nodra itokani, ni sa sega tale na ka mera na tukuna vei lotu ni Veivanua Vakarisito. Oqori na gauna ena vakarusai Papiloni na Ka Levu kina “nai leu e tini” kei “na manumanu,” qai vakaluvaiwaletaki koya tale ga. (Vakatakila 17:16) Ia, e sega ni kena ibalebale kina oqo nira na galu dina na lotu Vakarisito. Me vaka era cakava tiko nikua, era na seretaki Jiova qai cavuta ena veisiga na yacana “me nanumi e nai tabatamata kecega.”​—Same 45:17; 145:2.