‘Vakarau Tu ena Cakacaka Vinaka Kece Ga’

“TUKUNA tiko ga vei ira na tamata lotu me ra dau talairawarawa ki na matanitu kei ira na veiliutaki; me ra talairawarawa vei ira ka vakarau tu me ra cakava na veicakacaka vinaka kece ga.” (Taito 3:​1, VV) Na cakacaka vinaka cava e tukuna tiko e ke na yapositolo o Paula vei ira nona itokani vakabauta? E vakamacalataka kina e dua na dauvakadidike ni iVolatabu o E. F. Scott: “Era sega wale ga ni talairawarawa ena veiliutaki na lotu Vakarisito, era tu vakarau tale ga mera dau caka vinaka. . . . Dodonu mera liu duadua na lotu Vakarisito ni vakaraitaka na yalo ni veitokoni ena ituvaki cava ga e gadrevi kina oqori ena vanua era vakaitikotiko kina. Ke mani yaco na kama, matetaka, se leqa cava ga, o ira kece na lewenivanua vinaka era na via veivuke kina.”

Era vakaitavi na lotu Vakarisito ena so na cakacaka e yaga raraba ena vanua era vakaitikotiko kina, ia me kua ga ni veisaqasaqa oqori kei na lawa ni Kalou. (Cakacaka 5:​29) Kena ivakaraitaki, nodra rogoca na veidusimaki ni tabana ni bokobuka ena nodra itikotiko na valenitabana ni iVakadinadina i Jiova e Ebina, mai Japani, era vakavulici sara ga kina ena veiyabaki ena ka me caka ena gauna ni kama. Era dau tiko kece na lewenivuvale e Peceli ni veivakavulici na mata mai na tabana ni bokobuka.

Kuria oya, sa sivi e tini na yabaki nona dau veitokoni tiko na valenivolavola ni tabana ena soqo e vakarautaka na matanitu mera vakavulici kina na tamata ena ka me caka ena gauna ni kama. Era vakaitavi kina na kabani mera vakaraitaka na sala era sa vakavakarau tiko kina ena kena valuti na kama se na kena bokoci. Dau vakavinavinakataki ena vuqa na gauna na valenitabana ena kila e tu vei ira kei na nodra dau veitokoni. E nodra gona kina na imatai ni icovi ena yabaki 2001 ena soqo oya. Era vakarautaki ira tu ena cakacaka vinaka e rawa ni veivakabulai ke mani yaco e dua na kama.

Na Veiqaravi Yaga

Ia, era kauai na iVakadinadina i Jiova ena dua na cakacaka vinaka e bibi cake, e veivakabulai tale ga. Oya na nodra vunautaka yani vakawasoma na itukutuku vinaka ni Matanitu ni Kalou vei ira na tamata. (Maciu 24:14) Era dau uqeti ira na tamata na iVakadinadina mera vulica na ivakavuvuli vakaivolatabu, mera bulataka me vakavinakataki kina nodra bula nikua, ra qai nuitaka tale ga na bula tawamudu ena vuravura ni vakacegu dina kei na sautu.

E so era sega ni taura rawa na yaga ni nodra cakacaka na iVakadinadina i Jiova, ra nanuma nira dau veivakasosataki. Ia, e duatani nona rai o turaganilewa Jean Crepeau ena Mataveilewai Levu e Quebec e Kenada. Era valataka na iVakadinadina i Jiova e kea e dua na lawa e soli me baleta na korolevu o Blainville, e Quebec. E vakaroti kina mera vakaivolatara ni bera nira lai cakacaka e veivale. E kaya o Turaganilewa Crepeau ena lewa e tau ena mataveilewai: “Nodra veisiko na iVakadinadina i Jiova e tiki ni cakacaka yaga Vakarisito ena noda itikotiko kei na . . . ivola tale ga era solia vei ira na lewenivanua era vakarorogo e bibi, ni veivosakitaka kina na ka me baleta  na lotu, na iVolatabu, na vakayagataki ni wainimate gaga, na mateni, na leqa ni bula vakawati, kei na veisere.” E tomana na turaganilewa oya: “E veivakacudrui, e ka lolovira, e mosimosi, qai veivakacalai nira vakatauvatani tu na iVakadinadina i Jiova kei ira na dau voliciri era vaqara ilavo.”

Era dau veivuke na iVakadinadina i Jiova ena vanua era vakaitikotiko kina ena nodra vukei ira na lewenivanua mera valuta na leqa era sotava e veisiga, kei na nodra tukuna vei ira na inuinui me baleta na gauna se bera mai. E vakarautaki ira na iVolatabu mera cakava kina na cakacaka oqo. “Sai koya na Kalou sa vakavuna nai Vola Tabu kecega, a sa yaga oqo mei vakavuvuli, me vunauca na ca, me ia kina na vakadodonutaki, me ia kina na vakatavuvuli e na ka e dodonu: me yaco kina na tamata ni Kalou me vakarau tu, ni sa vakarautaki ki nai valavala vinaka kecega.”​—2 Timoci 3:​16, 17.

Oni taleitaka mo ni kila na sala era dau ‘vakarau tu kina ena cakacaka vinaka kece ga na iVakadinadina i Jiova’? Keimami sureti kemuni mo ni vulica vata kei ira e levu tale na ka ena iVolatabu. Ena nomuni cakava oqori, sa na yaga kina vei kemuni na cakacaka era vakayacora tiko ena nomuni itikotiko e yaga raraba e vuravura taucoko.

[iYaloyalo ena tabana e 30, 31]

Era dau saga mera cakacaka vata kei ira na vakailesilesi ni matanitu na iVakadinadina i Jiova

[iYaloyalo ena tabana e 31]

Era kilai na iVakadinadina ena nodra dau veivukei