“Vakavinavinaka Tiko Ga”

“Me vakataulewa tiko e na lomamuni na vakacegu i Karisito . . . Ka mo ni vakavinavinaka tiko ga.”​—KOLOSA 3:​15, VV.

1. Na duidui cava e laurai ena ivavakoso vakarisito kei na vuravura e lewa tu o Setani?

E LAURAI ena 94,600 na ivavakoso ni iVakadinadina i Jiova e veiyasa i vuravura na yalo ni vakavinavinaka. Kune oqo ena nodra soqoni, ni dau tekivu qai vakacavari ena masu e okati kina na vosa ni vakavinavinaka vei Jiova. E dau rogoci wasoma na kena cavuti na “vinaka,” se so tale na vosa ni vakavinavinaka era cavuta na itabagone, itabaqase, o ira na ka vou kei ira sa iVakadinadina dede ena nodra veiqaravi ena yalovata. (Same 133:1) Ia oqo e veibasai sara kei na yalo ni dui nanumi koya ga e roka ni nodra bula o ira ‘era sega ni kilai Jiova, ra qai sega ni vakabauta na itukutuku vinaka’! (2 Cesalonaika 1:8) Io, eda bula tu ena vuravura e sega ni kune kina na vakavinavinaka. Sega tale ga ni kurabuitaki oqo, ni o koya na kalou ni vuravura​—o Setani na Tevoro​—e tokona vakaukaua na yalo ni dui ta kena, qai laurai na nona viavialevu kei na talaidredre ni sa curuma sara tu ga na bula ni kawatamata!​—Joni 8:​44; 2 Korinica 4:4; 1 Joni 5:19.

2. Na vakasama cava me nanumi tiko, kei na taro cava eda na dikeva?

² Nida bula tu gona ena vuravura i Setani, sa dodonu ga meda qaqarauni matua me kua ni vakacaraki keda na ivakarau ni rai ni vuravura oqo. Ena imatai ni senitiuri, a uqeti ira na lotu Vakarisito mai Efeso na yapositolo o Paula mera nanuma na tikina oqo: “Dou a muria tiko eliu me vaka nai valavala kei vuravura oqo, ni dou a muria tiko na nodra turaga era sa kaukauwa e na macawa, a yalo sa cakacaka tiko e lomadra era sa dautalaidredre; ko ira eda sai valavala vata kaya koi keda kece e na gauna eliu, e na gagadre ca ni yagoda, ni da sa muria tiko na dodomo ni yagoda kei na yaloda; ia na nodai tovo me da cudruvi kina, me vakataki ira na tani.” (Efeso 2:​2, 3) E dina oqo vei ira e levu nikua. O koya  gona, ena rawa vakacava me tiko vei keda na yalo ni vakavinavinaka? E vukei keda vakacava ena tikina oqo o Jiova? Na cava e so na sala eda rawa ni vakaraitaka kina na noda vakavinavinaka?

Vuna Meda Vakavinavinaka Kina

3. Na cava meda vakavinavinakataka vei Jiova?

³ Sa dodonu ga meda vakavinavinaka vua na noda Kalou o Jiova, ni a buli keda, e solia vei keda na bula, vakauasivi nida vakasamataka e so tale na nona isolisoli loloma e solia tu mai vakayauyau vei keda. (Jemesa 1:​17) E veisiga eda vakavinavinakataka vei Jiova na noda bula. (Same 36:9) Nida veiraiyaki, eda raica na binikasauru ni maweniliga i Jiova, e okati kina na matanisiga, vula, kei na kalokalo. Vutucoqa tu na noda vuravura ena veika mera bula kina na kabula, e maliwalala e veirauti na veicurumaki ni kasi, kei na matailalai ni veika e dau yaco veitarataravi ena veika buli me rawa kina na bula, e dusia nida dinau tu vua na Tamada vakalomalagi dauloloma. E lagata o Tui Tevita: “I Jiova na noqu Kalou, sa ka levu na nomuni cakacaka e veivakurabuitaki ko ni sa cakava, kei na nomuni nanuma vei keimami: e dredre me wiliki vakadodonu vei kemuni: kevaka ka’u via vakatusa ka tukuna, e dredre ni wili.”​—Same 40:5.

4. Na cava e dodonu meda vakavinavinakataka kina vei Jiova na veimaliwai totoka eda marautaka ena noda dui ivavakoso?

⁴ E dina nira sega ni tiko na tamata i Jiova nikua ena vuravura parataisi dina, ia era marautaka ga nodra bula ena parataisi vakayalo. Ena soqoni ena Kingdom Hall, ena soqo ni tikina, kei na soqo ni tabacakacaka, eda raica na cakacaka ni vua ni yalo tabu ni Kalou vei ira noda itokani ena vakabauta. Dau vakawasoma mera vakayagataka sara ga e so na iVakadinadina na vakasama oqo me nodra iucu, nira vunau vei ira era tuberi vakalailai se sega sara ga ni tuberi ena lotu, ra qai vakamua na veivosaki ina ka e tukuna o Paula ena nona ivola vei ira mai Kalatia. O ira na iVakadinadina oqo era na vakamacalataka taumada na “cakacaka ni tovo vakayago” ra qai taroga na nodra vakasama na vakarorogo. (Kalatia 5:​19-​23) Levu era duavata ni sa laurai sara tu ga oqo ena bula ni kawatamata nikua. Ni vakamacalataki gona vei ira na vua ni yalo tabu ni Kalou ra qai sureti ena Kingdom Hall ena nodra yasayasa mera raica na kena ivakadinadina, levu era kaya: “Sa dina sa  tiko vei kemudou na Kalou.” (1 Korinica 14:25) Qai sega ni yala ga oqo ena Kingdom Hall ena nomu yasayasa. Se mani vanua cava o lako kina, ni o sotava e dua vei ira na sivia e ononamilioni na iVakadinadina i Jiova, o na raica nira dau mamarau. Na veimaliwai veitaraicake gona vaka oqo e dodonu meda vakavinavinakataka vei Jiova, ni solia mai na yalona tabu me vakayacori rawa kina.​—Sefanaia 3:9; Efeso 3:​20, 21.

5, 6. Eda na vakavinavinakataka vakacava na isolisoli uasivi duadua i Jiova, na isoro ni veivoli?

⁵ Na isolisoli uasivi duadua i Jiova oya nona a solia mai na Luvena o Jisu, me isoro ni veivoli. A vola na yapositolo o Joni: “Kevaka sa lomani keda vakaoqo na Kalou, sa dodonu me da veilomani vakai keda.” (1 Joni 4:​11) Io, eda vakavinavinakataka na isoro, sega wale ga ena noda lomani Jiova da qai vakavinavinakataki koya, ia eda na vakaraitaka tale ga ena noda bula nida lomani ira na tani.​—Maciu 22:​37-​39.

⁶ Eda rawa ni vulica e levu na ka me baleta na vakavinavinaka nida dikeva na sala e veitaratara kina o Jiova kei ira na Isireli ena gauna makawa. Ena vuku ni Lawa a solia vei Mosese me baleti ira, e levu na ka ni vuli a vakavulici ira kina o Jiova. E levu gona na ka eda rawa ni vuli kina ke da vakadeuca na “ka kece sara me kilai kei na dina e na Lawa i Mosese,” meda muria vinaka sara kina na ivakasala oqo i Paula: “Mo ni vakavinavinaka tiko ga.”​—Roma 2:​20, VV; Kolosa 3:15, VV.

Tolu na Ka e Vulici Mai na Lawa i Mosese

7. Ena ituvatuva ni duanaikatini, e rawa vakacava nira vakaraitaka kina na Isireli na nodra vakavinavinaka vei Jiova?

⁷ Ena Lawa i Mosese, a vakarautaka o Jiova e tolu na sala vei ira na Isireli mera vakavinavinakataka kina na nona caka vinaka. Kena imatai, na soli ni duanaikatini. Na ikatini ni vuata ni vanua kei “na kenai katini ni qele ni pulumokau, se na qele ni sipi,” ena “tabu me nei Jiova.” (Vunau ni Soro 27:​30-​32) Nira cakava oya na Isireli, a vakalougatataki ira vakalevu o Jiova. “Dou kauta kece mai nai sigana ki na lololo, me so kina na kakana e na noqu vale, ka vakatovolei au mada kina, sa kaya ko Jiova ni lewe vuqa, se’u na dolava, se segai, na katuba ni lomalagi, ka sovaraka vei kemudou na ka ni veivakalougatataki, me na sautu dina sara.”​—Malakai 3:10.

8. Na cava na kedrau duidui na cau kei na duanaikatini?

⁸ Kena ikarua, a tuvanaka tale ga o Jiova vei ira na Isireli mera dau cau. A vakaroti Mosese me kaya vei ira na Isireli: “Ni dou sa yacova na vanua ka’u sa kauti kemudou kina, ena qai yaco, ni dou sa kania na kakana ni vanua, dou na vakacabora e dua nai soro e lavelaveti vei Jiova.” E so na isevu ni kedra “keki” ena vakacabori “mei soro e lavelaveti” vei Jiova ena nodra veitabatamata. Dikeva ni sega ni lavaki na levu ni nodra isevu mera cautaka. (Tiko Voli mai na Lekutu 15:​18-​21) Ia nira cabora na cau ni vakavinavinaka na Isireli, e vakadeitaka ni na vakalougatataki ira o Jiova. E vakatale ga oqo na ituvatuva me baleta na valenisoro e raivotutaka o Isikeli. Eda wilika: “Ia me  nodra talega na bete na vetana kece ni sevu kece kei na ka kecega, kei nai madrali kece ni vuata kece e na nomudoui madrali kecega: kei na veta ni nomudou madrai droka kece mo dou solia ga vua na bete, me vatonaka ko koya na nomu vale me vakalougatataki kina.”​—Isikeli 44:30.

9. Na cava a vakavulica o Jiova ni tuvanaka vei ira na Isireli mera kua ni tamusuka kece nodra vuaniqele?

⁹ Kena ikatolu, a tuvanaka tale ga o Jiova mera kua ni tamusuka se tomika kece nodra vuaniqele ena gauna ni nodra tatamusuki. A vakarota na Kalou: “Ia ni dou sa tamusuka na vuata ni nomudou vanua, ni kakua ni tamusuka kece sara na tutu ni nomu veiwere, ka kakua ni tomitomika na ka sa vo e na nomu vuata. Ia mo kakua ni tomitomika na nomu veivaini, se tauca na vua ni vaini kecega e na nomu veivaini: mo laiva ga me nodra na dravudravua kei na vulagi: Koi au ko Jiova na nomudou Kalou.” (Vunau ni Soro 19:​9, 10) A sega tale ga ni lavaki na kena levu mera vakavoca. E dui vakatau sara ga vei ira na Isireli yadua na levu ni vuaniqele mera laiva tu vei ira na dravudravua. E vakamacalataka vakadodonu na tui vuku o Solomoni: “Sa ia na soli ka vei Jiova ko koya sa lomani ira na dravudravua; ia na ka sa solia ko koya ena saumi tale vua.” (Vosa Vakaibalebale 19:17) O koya gona, a vakavulica o Jiova mera lomani ra qai nanumi na vakaloloma.

10. Na cava era sotava na Isireli nira sega ni vakaraitaka na nodra vakavinavinaka?

¹⁰ A vakalougatataki ira na Isireli o Jiova nira solia nodra duanaikatini, nira cau, kei na nodra soli ka vei ira na dravudravua. Ia ena gauna era sega ni vakaraitaka kina na Isireli na nodra vakavinavinaka, a sega ni vakadonui ira o Jiova. Era sotava na leqa me yacova nodra kau vakabobula. (2 Veigauna 36:​17-​21) Na cava gona eda vulica?

Sala e So Meda Vakavinavinaka Kina

11. Na cava na sala bibi eda rawa ni vakaraitaka kina na noda vakavinavinaka vei Jiova?

¹¹ Na sala bibi e rawa nida vakacaucautaki Jiova kina da qai vakavinavinaka vua, oya noda vakacabora na “isoro.” Nida lotu Vakarisito eda sega ni vauci ena Lawa i Mosese meda vakacabora na isoro manumanu se vuata. (Kolosa 2:​14) Ia a vakauqeti ira na Iperiu lotu Vakarisito na yapositolo o Paula: “Ia ko koya oqo me da qai vakacabora tikoga nai madrali ni vakavinavinaka vua na Kalou ena vukuna, oqori na vua ni tebenigusuda, ni da tusanaka na yacana.” (Iperiu 13:15) Nida vakayagataka na noda kaukaua kei na noda iyau ena cakacaka vakaitalatala se ‘ena soqoni’ ni lotu Vakarisito, eda sa cabora sara tiko ga na imadrali ni vakavinavinaka vei Jiova. Meda vakavinavinakataki koya gona mai vu ni lomada na Tamada vakalomalagi dauloloma, na Kalou o Jiova. (Same 26:12) Nida cakava oqo, na cava e rawa nida vulica mai na sala era vakaraitaka kina na nodra vakavinavinaka vei Jiova na Isireli?

12. Me baleta na noda itavi vakarisito, na cava eda rawa ni vulica mai na soli ni duanaikatini?

¹² Taumada, me vaka eda sa raica mai, a sega ni vakatau vua na tamata yadua nona solia se sega na duanaikatini; ni a lavaki sara ga vei ira na Isireli na veika mera solia. Nida lotu Vakarisito, e tiko na noda itavi, oya meda cakacaka vakaitalatala da qai tiko tale ga ena soqoni vakarisito. Na itavi oqo e sega ni dui vakatau ga vei keda na noda via cakava se sega. Ena parofisai vakasakiti i Jisu me baleta na gauna ni ivakataotioti, e kaya vakamatata: “Ena vunautaki mada e vuravura taucoko nai tukutuku-vinaka oqo kei na matanitu, mei vakadinadina ki na veivanua kecega; sa na qai yaco emuri nai vakataotioti.” (Maciu 24:14; 28:​19, 20) Ia, me baleta na soqoni vakarisito, a uqeti na yapositolo o Paula me vola: “Me da veivakananumi keda vakai keda me da veivakatakatai me dauloloma kai valavala vinaka: me da kakua ni biuta na vakasoqoni vata, me vaka nai valavala ni tamata eso; me da veivakamasuti tiko: ia me vakalevu, ni dou sa raica sa toro voleka mai na siga.” (Iperiu 10:​24, 25) Eda vakavinavinakataki Jiova nida ciqoma ena marau na noda itavi meda vunau kei na noda veivakavulici qai salavata kei na noda veimaliwai wasoma kei ira na tacida ena soqoni vakarisito, da qai raica oqo me itavi cecere qai dokai.

13. Na cava na ikuri ni ka eda rawa ni vulica mai na tuvanaki ni cau kei na kena sega ni tamusuki kece na vuaniqele?

¹³ Kena ikuri, ena yaga tale ga vei keda na noda  dikeva na rua na ituvatuva sa cavuti oti era a vakaraitaka kina nodra vakavinavinaka na Isireli​—na nodra cau kei na nodra sega ni tamusuka kece nodra vuaniqele. Ena duanaikatini, e lavaki na levu ni ka me soli, ia ena ituvatuva ni cau kei na kena sega ni tamusuki kece na vuaniqele e sega ni lavaki na levu ni ka me soli se me vakavoci. E ke sa na qai vakatau sara ga ina levu ni nona vakavinavinaka na tamata i Jiova me uqeti koya me soli ka. Ena sala vata oya, eda kila ni itavi yadua ni tamata i Jiova me cakacaka vakavunau, me tiko tale ga ena soqoni vakarisito, ia eda dau cakava beka ena lomada taucoko, da qai vakayacora ena mamarau? Eda raica beka me sala eda rawa ni vakavinavinakataka kina na veika kece e cakava vei keda o Jiova? Eda vakaitavi beka ena cakacaka oqo ena kena levu eda rawata me salavata kei na keda ituvaki? Se, eda raica me itavi e dodonu ga meda vakayacora? Oqo e so na taro e dodonu meda sauma yadudua. E kaya kina vaka oqo na yapositolo o Paula: “Ia me lewa deivaka na nona cakacaka na tamata yadua, e na qai rekitaki koya e na vuku i koya ga ka segai e na vukuna na tani.”​—Kalatia 6:4.

14. Na veiqaravi vakacava e namaka vei keda o Jiova?

¹⁴ Na Kalou o Jiova e kila vinaka na keda ituvaki. E kila tale ga na veika eda rawata kei na veika eda sega ni rawata. E vakamareqeta nodra lomasoli nona tamata, ke mani levu se lailai. E sega ni namaka na Kalou me tautauvata na ka eda solia, me kua tale ga ni vaka oya na ka eda namaka. Me baleta na soli ka vakayago, e kaya na yapositolo o Paula vei ira na lotu Vakarisito mai Korinica: “Kevaka ko ni sa lomasoli mo ni soli ka, sa na ciqomi na ka e tu vei kemuni ko ni solia; ka sega ni ka e sega ni tu vei kemuni.” (2 Korinica 8:​12, VV) Na ivakavuvuli oqo e vauci tale ga kina noda qaravi Kalou. Me vakadonuya o Jiova noda veiqaravi ena sega ni vakatau ena levu ni ka e tu vei keda meda solia, ia ena sala ga eda vakayacora kina​—oya ena marau qai vu sara ga mai lomada.​—Same 100:​1-5; Kolosa 3:​23.

Bucina Qai Tomana Tiko ga na Yalo ni Cakacaka Vakapainia

15, 16. (a) Erau lako vata vakacava na cakacaka vakapainia kei na noda vakavinavinaka? (b) E rawa vakacava nira bucina na yalo ni cakacaka vakapainia o ira era sega ni rawa ni painia?

¹⁵ E dua na sala yaga e rawa nida vakavinavinaka  kina vei Jiova oya ena noda cakacaka vakaitalatala vakatabakidua. Ni uqeti ira e levu na tamata yalayala oti i Jiova na nodra lomani koya kei na nodra vakavinavinakataka nona yalololoma, era veiveisautaka kina nodra bula me levu na gauna era qaravi Jiova kina. E so era cakacaka vakapainia tudei, era vakayagataka e rauta ni 70 na aua e veivula ena vunautaki ni itukutuku vinaka kei na nodra vakavulici na tamata ena ka dina. E so tale, ni yalani ira na kedra ituvaki, era vakayagataka ena so na gauna e 50 na aua ena dua na vula mera vunau kina nira cakacaka vakapainia veivuke.

¹⁶ Ia vakacava e levu na tamata i Jiova era sega ni rawa ni cakacaka vakapainia tudei se painia veivuke? Se rawa ga nira vakaraitaka na nodra vakavinavinaka ena nodra bucina ra qai tomana tiko ga na yalo ni cakacaka vakapainia. E laurai vakacava oqo? Ena nodra vakayaloqaqataki ira na painia, ena nodra tugana e loma i luvedra mera tadolova na cakacaka vakatabakidua, kei na nodra gugumatua na vakaitavi ena vunau me salavata kei na kedra ituvaki. Na levu gona ni ka eda cakava ena cakacaka vakaitalatala e vakatau sara tiko ga ena levu ni noda vakavinavinakataka na veika sa cakava vei keda o Jiova, na ka sa cakava tiko, kei na veika ena qai vakayacora vei keda.

Vakavinavinaka Nida Solia Noda ‘iYau’

17, 18. (a) Na sala cava eda na vakaraitaka kina noda vakavinavinaka nida solia noda ‘iyau’? (b) Na cava e kaya o Jisu me baleta nona cau na yada, kei na cava na vuna?

¹⁷ E kaya na Vosa Vakaibalebale 3:​9: “Mo dokai Jiova e na nomui yau, kei nai sevu ni nomu vuata kecega.” Sa sega ni gadrevi vei ira na tamata i Jiova mera solia na duanaikatini. Ia me vaka a vola o Paula ina ivavakoso mai Korinica: “Me ra dui solia me vaka na ka sa vinakata ko koya yadua e na yalona; me kakua e na voraki, se ni sa vakasaurarataki: ia ko koya sa solia e na marau sa vinakata na Kalou.” (2 Korinica 9:7) E ivakaraitaki tale ga ni noda vakavinavinaka na noda cau me tokona na vunautaki ni Matanitu ni Kalou e vuravura taucoko. Na vakavinavinaka e vu sara ga mai lomada ena uqeta meda cau vakawasoma, ena vinaka sara ke rawa nida biuta vakatikitiki toka e so na ilavo e veimacawa me vakataki ira na lotu Vakarisito taumada.​—1 Korinica 16:​1, 2.

¹⁸ E sega ni votu na noda vakavinavinaka vei Jiova ena levu ni ka eda solia, ia ena yalo ga eda solia kina. Laurai oqo ena ka e kaya o Jisu ni vakaraici ira tiko era biuta nodra isolisoli ena kato ni ilavo ena valenisoro. Ni raica na nona biuta e dua na yada dravudravua e “rua nai lavo lalai sara,” a kaya o Jisu: “Au sa kaya vakaidina vei kemudou, Na yada dravudravua oqo sa biuta vakalevu kina, ko ira kecega era biuta vakalailai ga: ni ra sa biuta eso ko ira kecega oqo, mai na nodra ka e vuqa, ki na kato ni soli: ia ko koya, sa dravudravua, sa biuta kecega kina na nona ka me bula kina.”​—Luke 21:​1-4.

19. Na cava e vinaka kina meda vakadeuca tale mada na sala e so e rawa nida vakaraitaka kina na noda vakavinavinaka?

¹⁹ Me vukei keda mada ga na vuli oqo meda vakadeuca tale kina na sala e so eda rawa ni vakaraitaka kina na noda vakavinavinaka. E rawa beka nida vakalevutaka noda imadrali ni vakavinavinaka vei Jiova, da qai tokona vakailavo na cakacaka vakavunau e vuravura raraba? Nida cakava na kena levu eda rawata, e rawa nida vakadeitaka ni Tamada dauloloma, o Jiova, ena marautaka na noda sa vakaraitaka tiko vua na noda vakavinavinaka.

O se Nanuma Tiko?

• Na cava na vuna meda vakavinavinaka kina vei Jiova?

• Na cava e vulici mai na duanaikatini, na cau, kei na kena sega ni tamusuki kece na vuaniqele?

• Eda na bucina vakacava na yalo ni cakacaka vakapainia?

• Eda na vakayagataka vakacava noda ‘iyau’ meda vakavinavinakataki Jiova kina?

[Taro]

[iYaloyalo ena tabana e 15]

“Sa lako maicake nai solisoli vinaka kecega kei nai solisoli kecega e yaga sara”

[iYaloyalo ena tabana e 16]

Na cava e tolu na ka e vulici mai na Lawa e vakaraitaki e ke?

[iYaloyalo ena tabana e 18]

Sala cava soti e rawa nida vakaraitaka kina noda vakavinavinaka?