Vuna Era Lai Lotu Kina

“ENA gauna oqo mai na Republic of Korea, e sa voleka ni vakavataki na levu ni kedra iwiliwili era lotu Presbyterian ni vakatauvatani kei na kedra iwiliwili na lewenilotu oqo mai Mereke.” E levu era na rairai kurabuitaka na nodra wilika na itukutuku oqo e tabaka na Newsweek, ni levu era dau kilai Korea tu me vanua e qaravi kina o Confucius se o Buda. Ia nikua, ke dua e gade e kea, ena kunea ni sa levu na valenilotu “Vakarisito,” era vakatakilakilataki ena kauveilatai damudamu. Ena veisigatabu, sa kena ivakarau mera lako vata e le rua se le tolu, era tauri iVolatabu, mera lako i lotu. E laurai ena dua na vakatataro ena 1998, ni voleka ni 30 na pasede na lewe i Korea era lotu Katolika se ra lotu Tawase, e levu cake na kedra iwiliwili ni vakatauvatani kei ira era lotu Buda.

Ena so na yasa i vuravura edaidai, e vaka me sa sega ni matau na raica e dua na iwiliwili levu ni tamata mera lako wasoma i lotu. Ia oqori sara ga na ka sa yaco tiko mai Korea kei na veivanua vakaesia tale e so, vaka kina mai Aferika kei Sauca Amerika. Na cava era se kaya tiko ga kina e levu nira vakabauta na Kalou ni sa takalevu tu oqo e vuravura na kena sega ni kauaitaki na lotu qai vakawaleni? Na cava era lako kina i lotu?

E laurai ena dua na vakatataro e vakatokai na Gallup poll mai Korea ni sivia e veimama na kedra iwiliwili na dau lako i lotu era qara na vakacegu; dua na ikatolu era nuitaka na bula tawamudu nira mate; qai 1 mai vei ira na le 10 era qara na iyau, rogo, kei na bulabula vakayago.

Mai Jaina, e vuqa era lako i lotu ena nodra nuitaka mera kunea e dua na ka ena vakaceguya nodra gagadre vakayalo, e vu oqo mai na nodra veilecayaki ena kena sa mai sosomitaka vakamalua yani na nodra bula vakominisi na rai vou ni dui lewa vakataki koya na veika e taukena. Veiyabaki, e vica vata na milioni na ilavelave ni iVolatabu era tabaki qai veisoliyaki e Jaina, era taleitaka na lewenivanua na wilika me vaka ga nodra a taleitaka na ivola damudamu lailai a tabaka kina na nona ivakavuvuli o Mao, na nodra turaga iliuliu Kominisi.

So era lotu Katolika mai Brazil, vakauasivi o ira na itabagone, era sega ni lomavakacegu ena vosa ni yalayala ni na dua na bula marautaki ena veigauna se bera mai, era vinakata me vakavatukanataki nikua na vosa ni yalayala oqo. E kaya na ivola na Tudo: “Ena veiyabaki ni 1970, a uqeta na  loma kei na vakasama ni tamata na ivakavuvuli ni dodonu vua na lotu me sereka na tamata mai na veileqaleqa e sotava tu, ia nikua sa uqeti ira ga na tamata na vakasama ni via tikovinaka.” Nira vakatarogi na dau lako i lotu mai Peritania mera tukuna se cava e dua na ka era taleitaka kina nodra lotu, levu era kaya nira taleitaka vakalevu ga na veimaliwai.

Na ituvaki kece oqo e vakaraitaka ni levu era se qaravi Kalou tiko ga, ia e levu era kauaitaka ga vakalevu na ka era na rawata mai kina ena gauna oqo, sega ni veika era na rawata ena gauna sa bera mai, se sega mada ga nira kauai mera bau kilai koya na Kalou. Na cava e dodonu me yavu dina ni noda qarava na Kalou? Cava e kaya na iVolatabu me baleta na tikina oqo? O na kunea na kena isau ena ulutaga e tarava.