Ena Yaga Beka na Nomu Masu?

EDA kila kece ni tiko na gauna ena noda bula e dau tubu kina e so na ituvaki e sega sara ga nida cakava rawa kina e dua na ka ni sega ni yacova na noda kaukaua. Ia, e vakaraitaka na iVolatabu ni vakabauta na yapositolo o Paula ni rawa ni cakacaka e ke na kaukaua ni masu.

Ena nona a vesu tu vakatawadodonu mai Roma o Paula, e kerei ira na nona itokani ena vakabauta mera masulaki koya, ena nona kaya: “Au sa vakauqeti kemuni vagumatua sara mo ni masulaki au, me rawa ni’u vakasukai tale kina vakatotolo ki vei kemuni.” (Iperiu 13:18, 19, VV) Ena dua tale na gauna a vesu kina, a tukuna ena nuidei o Paula ni na sereki ena kaukaua ni masu a cabori ena vukuna. (Filimoni 22) Mani sereki dina o Paula, e tomana rawa kina na nona cakacaka vakaulotu.

Ia vakacava na nomu leqa, e kena ibalebale beka oya ni masu e rawa ni veisautaka me tini vinaka tale ga na ka o sotava? De dua ena rawa. Ia, me nanumi ni masu e sega ni dua ga na ivalavala ni qaravi Kalou. Nida masu, eda sa vosa sara tiko ga vua na Tamada vakalomalagi, e kaukaua duadua qai vutu ni loloma. Meda tukuna gona vakadodonu na lomada, da qai waraka meda raica se na sauma vakacava o Jiova na noda kerekere.

Ena so na gauna, e sega ni sauma na Kalou na noda masu ena gauna vata ga eda cabora kina, se ena sala se gauna eda namaka me saumi kina. Da tauri Paula tale mada me kena ivakaraitaki, a wasoma me qaqa ni nona masu na ‘votonikau e lauta tiko na lewena.’ Dina ni sega ni kilai se leqa cava sara mada oya, e kilai ga ni a sega ni kauta laivi na Kalou, ia e vakayaloqaqataki Paula ga ena veivosa oqo: “Sa rauti iko na noqu loloma: ni sa vakalevui na noqu kaukauwa, ni sa malumalumu e dua.”​—2 Korinica 12:7-9.

O koya gona, veitalia ke sega ni kauta laivi na Kalou na ituvaki ni leqa eda sotava tiko, meda nuidei, ‘ni na cakava na sala meda dro kina, meda vosota rawa’ tale ga. (1 Korinica 10:13) Io, sa roro mai na siga ena qai kauta laivi kece kina na Kalou na rarawa ni kawatamata. Ia me yacova na siga oya, ena yaga vei keda meda cabora tiko ga na noda masu vua “sa daurogoca na masu.”​—Same 65:2.