Kua ni Datuvu ni Vakavulici Luvemu ena Gauna Oqo

SA VAKARAU sogota na valenikana na kena itaukei me lesu i vale ena dua na bogi. A qai curu yani e rua na marama kei na dua na gone me ratou lai kana. E sa wawale tu o itaukei ni valenikana, qai via tukuna vei iratou ni sa vakarau sogosogo, ia a veisautaka tale na lomana, mani lai vakarautaka na kedratou. Ni rau kana tiko na marama qai salavata kei na nodrau veitalanoa, sa qai nona cakacaka toka o gone me veiciciyaki e loma ni valenikana, kolotaka yarayara na kena bisikete qai butubutulaka me kakavuruvuru. Ia, e sega ni bau cudruvi koya o tinana, e dredrevaka ga. Ni rau sa kana oti na marama, eratou lako yani sa qai biu tu mai na fuloa duka me qai samaka o kena itaukei e sa wawale tu.

A yaco dina na ituvaki e cavuti e cake, eda sega tale ga ni vulagitaka, ia e vakadinadinataka nira sega ni vakavulici vinaka na gone ena levu na matavuvale. E levu na vuna. E so na itubutubu era nanuma ni na vinaka na gone ke soli vei ira na galala, era vakalaiva kina na luvedra mera lewa ga na ka era cakava. E so tale era sa rui osooso, e sega kina na gauna mera kauaitaka na luvedra ra qai tuberi ira. So tale na itubutubu era nanuma ni ka bibi duadua ga na vuli i luvedra, era vakalaiva na gone me cakava ga na ka e vinakata ke rawata vinaka ga na nona veitarogi qai curu rawa ina dua na koronivuli rogo.

Ia, so tale era kaya ni gadrevi me veisau sara ga na nodra itovo ni rai na itubutubu, vaka kina na kawatamata raraba. Na vuna ni sa qai tubucake ga e veisiga na iwiliwili ni gone era vakaitavi ena veimataqali basulawa, kei na itovo kaukaua e koronivuli. E mani vakadreta na qasenivuli liu ni dua na paraimari e Seoul, mai na Republic of Korea, na bibi ni kena vakaliuci ena nona susu e dua na gone na bucini ni itovo savasava. E kaya: “Taumada, mo bucina vua na gone na itovo vinaka qai muri na kilaka ena veika tale e so.”

Ia, e vuqa na itubutubu era sega ni via kauaitaka na ivakasala oqori nira vinakata ga na luvedra mera curu ena koronivuli torocake, ra qai rawati ira. Ke oni dua na itubutubu, o na vinakata me tamata vakacava na luvemu? Me na dua beka na tamata uabula e nuitaki qai vakaitovo? E dua beka e dauveinanumi, yalorawarawa ni dau veisau, qai dodonu nona rai? Ke vaka kina, dikeva mada na ulutaga e tarava.