Talai na Vuli Mai Kiliati Mera Dau Tatamusuki Gugumatua!

“SA LEVU dina tu na ka me tamusuki; ia, era sa lewe lailai ga na tamata cakacaka. O koya gona, mo dou masuti koya kina na i Taukei ni were, me talai ira yani na tamata cakacaka me ra la’ki tatamusuki e na nona were.” (Maciu 9:37, 38, VV) E vakaibalebale na vosa oqori vei ira na lewe ni ika116 ni kalasi ni Watchtower Bible School of Gilead ena nodra vakarautaki ira ena ilesilesi vakaulotu.

Ena Vakarauwai, 13 Maji, 2004, era lewe 6,684 era soqo yani ena Watchtower Educational Center e Patterson, Niu Yoka, wili tale ga kina o ira e kaburaki vei ira ena retioyaloyalo, mera rogoca na vosa ni tatau kei na veivakadreti vei ira na lewe ni kalasi. E yaga kece vei keda na ivakasala oya ena noda gumatuataka na cakacaka ni tatamusuki vakayalo.

E doladola o Theodore Jaracz, e lewe ni iLawalawa Dauvakatulewa, a vuli tale ga ena ikavitu ni kalasi e Kiliati, e vakabibitaka na vosa i Jisu: “Lako yani ka qisi ira me ra noqu tisaipeli na lewe ni veivanua kece ga.” (Maciu 28:19, 20, VV) E veiganiti dina na tikinivolatabu oqori nira lesi na lewenikalasi oqo ina 20 na vanua! E vakadreta vei ira na gonevuli ni sa vakarautaki ira na Vosa ni Kalou mera gugumatua ena cakacaka bibi oqo ni tatamusuki vakayalo.​—Maciu 5:16.

Sala me Vuavuaivinaka Kina na Tatamusuki

Na imatai ni vosa e kena ulutaga “Na iTovo Talei na Veinanumi” e vakaitavi kina o Robert Wallen, sa vakayabaki na nona veiqaravi voleka kei na Koronivuli e Kiliati. E kaya vei ira na gonevuli: “E vaka na vosa na veinanumi ni rawa sara mada ga nira rogoca na didivara, e rawa tale ga nira raica na mataboko.” E kila vinaka tu o Jisu na nodra leqa na tamata ena gauna oya, qai dau qara na sala me vakacegui ira kina. (Maciu 9:36) E levu tale ga na vanua e rawa nira vakaitovotaka kina na veinanumi na lewenikalasi—⁠ena cakacaka vakavunau, ena ivavakoso, vale ni kaulotu, kei na nodra bula vakawati. E uqeti ira o Brother Wallen: “Me laurai ena nomu bula na itovo talei ni veinanumi ni o qaravi ira na tani. Ia me kua ga ni luluqa na itovo oqori ena gauna o tiko kina ena vale ni kaulotu. O koya gona, mo vakaisulu ena dau loloma se veinanumi ena veigauna kece ga.”​—Kolosa 3:12.

E vosa e tarava o Gerrit Lösch, e lewe ni iLawalawa Dauvakatulewa, a vuli tale ga ena ika41 ni kalasi e Kiliati, e vosa ena ulutaga “Vakarogoya Yani na iTukutuku ni Veivakabulai.” (Aisea 52:7) Mera rawata na bula na tamata ena gauna sa na vakarusai kina na veika ca e yaco tu nikua, e bibi mera mai kila na ivakavuvuli dina ena Vosa ni Kalou, mera wasea yani na nodra vakabauta, ra qai papitaiso. (Roma 10:10; 2 Timoci 3:15; 1 Pita 3:21) Ia na inaki bibi ga ni noda wasea yani na itukutuku ni veivakabulai me  vakacaucautaki kina na Kalou, sega ni nodra mai vakabulai na tamata. A vakadreti ira gona kina na daukaulotu vou o Brother Lösch: “Kauta yani na itukutuku vinaka ni Matanitu ni Kalou ina iyalayala kei vuravura, gumatua ni vunautaka na itukutuku ni veivakabulai, ia me vakacaucautaki ga kina o Jiova.”​—Roma 10:18.

E taroga e dua na qasenivuli e Kiliati, o Lawrence Bowen: “E Laurai Beka ena Nomu Bula na Rarama Vakayalo?” E yavutaka nona vosa ena ka e tukuna o Jisu ena Maciu 6:22 (NW), qai uqeti ira na lewenikalasi mera bula rawarawa se ‘rawarawa ga na matadra,’ me rawa ni “laurai ena nodra bula na rarama vakayalo e vakalagilagi ga kina o Jiova, qai yaga tale ga vei ira na tamata.” E ivakaraitaki vinaka o Jisu ni se qai tekivu na nona cakacaka vakaitalatala, ena nona vakaliuca tiko ga na vakayacori ni loma ni Kalou. Na nona dau vakananuma vakatitobu na veika uasivi a vakavulici koya kina o Tamana e lomalagi, e tudei tiko ga kina me vorata na veitemaki i Setani ena vanualiwa. (Maciu 3:16; 4:1-11) E vakaraitaka o Jisu na nona vakararavi vakatabakidua vei Jiova ena nona vakayacora na veika a lesi koya kina na Kalou. E vaka tale ga oya o ira na daukaulotu, me rawa nira yalodina tiko ga ena nodra itavi, e bibi mera tomana tiko ga nodra vulica vakataki ira na iVolatabu, mera vakararavi tale ga vakatabakidua vei Jiova.

 E dua tale na qasenivuli e Kiliati o Mark Noumair, a vuli ena ika77 ni kalasi e Kiliati, e mai tinia na vosa ena ulutaga “Keimami sa Tiko ena Ligamuni.” (Josua 9:25) E uqeti ira na lewenikalasi mera vakatotomuria na itovo ni rai e tiko vei ira na kai Kipioni. Dina ga ni ‘korolevu sara o Kipioni’ ra qai ‘tamata qaqa’ na lewena, ia era sega ni vaqara itutu se namaka me caka ga na ka e donu vei ira nira bula maliwai ira na Isireli. (Josua 10:2) Era qarava ga ena yalodina na nodra ‘tabuka kei nodra dautaki wai’ vei ira na Livai, nira tokona na sokalou vei Jiova. (Josua 9:27) E vaka tale ga kina o ira na lewenikalasi oqo nira kaya vei Josua Levu o Jisu Karisito, “Keimami sa tiko e na ligamu.” Nira sa na lai veiqaravi ena vanua era lesi kina, e dodonu mera ciqoma na itavi cava ga e lesi ira kina o Josua Levu.

Vakasavuirogorogo kei na Veitarotarogi

“Serelaka na iVolatabu” e ulutaga ni itavi nei Wallace Liverance, a vuli oti ena ika61 ni kalasi e Kiliati, e qasenivuli tale tiko ga kina ena gauna oqo. E okati ena nona itavi nona veitalanoa kei na so na gonevuli. Era vakasavuya na ka era sotava ena cakacaka vakavunau ena gauna era se vuli tiko kina ra qai vakatasuasuataka tale ga. E laurai kina ni nodra vulica vagumatua na iVolatabu ena loma ni lima na vula era vuli tiko kina e tara sara ga na lomadra, qai uqeti ira kina mera wasea tale ga yani na ka era vulica. (Luke 24:32) Ena loma ni lima na vula era vuli tiko kina, e wasea kina e dua na gonevuli vua na tacina gone na ka e vulica tiko. Oqo e uqeti tacina me vaqara na ivavakoso e voleka kina, qai tekivu vulica na iVolatabu. Ena gauna oqo e sa dautukutuku bera ni papitaiso.

Ni oti oya, o Richard Ashe kei John Gibbard rau a vakatarogi ira e so sa dede na nodra qaravi Jiova tu ena yalodina, okati tale ga kina e so na ivakatawa dauveilakoyaki era vuli tiko ena Watchtower Educational Center. Era a vuli tale ga ena Koronivuli e Kiliati. E nanuma lesu e dua, na ka a tukuna o Brother Knorr ena gauna se vuli tiko kina: “E levu na ka e vulici e Kiliati. Ia e sega ni inaki ni vuli mo dua na ka se mo qaravi, e kena inaki ga ni o sa suka mai mo dauveiqaravi.” Era veiuqeti na vakatarogi oqo vei ira na lewenikalasi mera dau veikauaitaki, mera dau veinanumi me vakataki Karisito nira veimaliwai kei ira na so, mera ciqoma tale ga ena yalomalumalumu na itavi cava ga era lesi kina. Nodra muria na daukaulotu vou na ivakasala oqo ena vukei ira mera vuavuaivinaka ena nodra ilesilesi.

Mo ni Dau Tatamusuki Gugumatua!

O Stephen Lett e lewe ni iLawalawa Dauvakatulewa e vosa ena ulutaga levu ni porokaramu, “Mo ni Dau Tatamusuki Gugumatua!” (Maciu 9:38) Vei ira na dauteitei, e dau yalani ga na gauna ni tatamusuki. Ena gadrevi gona vei ira na dau tatamusuki mera cakacaka vagumatua. E sa qai bibi sara na cakacaka vagumatua ena gauna ni vakataotioti oqo! Na tatamusuki vakayalo oqo e bibi ni vakatau kina nodra vakabulai na tamata. (Maciu 13:39) E uqeti ira na lewenikalasi o Brother Lett mera kua ni “vucesa” ia mera ‘qaravi Jiova ga ena yalodina’ ni na sega ni tokaruataki tale na tatamusuki oqo. (Roma 12:11, VV) A qai cavuta tarava na vosa i Jisu: “Dou tacake ka rai yani ki na i teitei ka ra tu oqori; era sa matua mai ka ra sa waraka tu me ra tamusuki.” (Joni 4:35, VV) E uqeti ira na lewenikalasi mera gugumatua ena cakacaka ni tatamusuki ena nodra saga mera tarai ira na tamata ena vanua cava ga era tu kina, ra qai tu vakarau ena veigauna kece ga mera vunau tawalokuci kina. E kaya tale ni dau cakayaco na noda vunau nida tu vakarau se nida vakaliuliu ena vosa. E Kalou gugumatua o Jiova, e namaka tale ga meda vakadamurimuri koya, meda qai gumatua tale ga ena tatamusuki vakayalo oqo.​—2 Tui 19:31; Joni 5:17.

Sa qai mai tinia na porokaramu na jeameni, o Brother Jaracz, e wilika na vakanuinui vinaka mai na levu na valenivolavola ni tabana, qai solia nodra sitivikiti na lewenikalasi. E wilika e dua na gonevuli na nodra ivola na lewenikalasi ena nodra vakavinavinakataka na veivakavulici e caka vei ira. Na tuvaitutu ni ika116 ni kalasi oqo e uqeti ira kece na tiko kina mera gugumatua ena tatamusuki.

[Kato ena tabana e 25]

VEIKA ME BALETA NA KALASI

Vanua era cavutu mai kina: 6

Vanua era lesi kina: 20

Levu ni gonevuli: 46

iVakatautauvata ni nodra yabaki: 34.2

iVakatautauvata ni yabaki ena dina: 17.2

iVakatautauvata ni yabaki ena cakacaka vakaitalatala vakatabakidua: 13.9

[iYaloyalo ena tabana e 26]

Nodra Tuvaitutu na Kalasi 116 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.