iSolisoli Talei Duadua ni iTubutubu Vei Luvedra

NI SA lai kala toka nona matanisiga na yapositolo o Joni, sa qai vola: “Sa ka levu na noqu reki e na vuku ni ka e dua bauga oqo, ni’u sa rogoca era muria na dina ko ira na luvequ.”​—3 Joni 4.

Na vosa e cavuta oqo na yapositolo yalodina e nanumi ira tiko kina na luvena vakayalo. Macala ni levu tale ga na itubutubu ena vaka oya na nodra vakanananu. Era sasaga vagumatua mera tuberi luvedra “ena ivakavuvuli kei na ivakarau ni vakasama i Jiova,” era marau kina nikua mera raica nira tubucake na gone ra qai “muria na dina.” (Efeso 6:4, NW) Na nodra vakavulici gona na gone ena sala mera rawata kina na bula tawamudu e isolisoli talei duadua. Baleta na qaravi Kalou, e okati kina na ivakarau ni bula e vinakata o Jiova mera bulataka na lotu Vakarisito, e “yalataki kina na ka ni bula oqo, kei na ka ni bula talega ena muri mai.”​—1 Timoci 4:8.

O Jiova na Tama uasivi, e dokai ira na itubutubu era qaravi koya mai vu ni lomadra ra qai saga vakaukaua mera vakavulici ira vakayalo na luvedra. Nira muria na luvedra na veivakavulici, era vakila kina na gone na marau nira sasagataka vata kei na nodra itubutubu na sokalou dina. Nira sa yalomatua cake na gone vaka oqo, era sega ni guilecava rawa na veigauna vinaka era sotava. E so era nanuma lesu na imatai ni gauna era vakaitavi kina ena Koronivuli ni Vuli Vunau. * Se ra na rairai nanuma na imatai ni gauna era wilika kina e dua na tikinivolatabu nira salavata kei na dua vei rau na itubutubu ena vunau e veivalevale. Era na sega tale ga ni guilecava na gone nodra wilika na itubutubu na ivola na iTalanoa mai na iVolatabu se na Vakarorogo Tiko ki Vua na Qasenivuli Levu. * E nanuma lesu o Gabriel na ka e dau taleitaka vakalevu: “Niu se yabaki va ga, e dau lagasere vei au o tinaqu e veisiga kece ena gauna ni nona vakasaqa. Au se nanuma vinaka tu ga e dua na sere ena noda ivolanisere. A qai vukei au na sere oqo meu raica na bibi ni veiqaravi vei Jiova.” De dua o kila tale ga na sere totoka e kaya tiko o Gabriel. Oqo na sere 157 ena ivolanisere Vakacaucautaki Jiova ena Sere, qai kena ulutaga “Qaravi Jiova ni O se Gone.”

E tekivu vaka oqo na sere: “Gusudra na gone a caucau tu;/Era a lave domo vei Jisu.” Era tiko  na gone era kalougata ni rawa nira veimaliwai kei Jisu, ra qai vakamarautaki koya ena nodra vosa dina mai vu ni lomadra. A vakayagataka sara mada ga o Jisu na nodra vakavulici rawarawa na gone me ivakaraitaki mera muria nona imuri. (Maciu 18:3, 4) Koya gona, e tiko tale ga nodra itavi na gone ena sokalou vei Jiova. Sa rauta me tomana na qaqanisere: “Rawa ni caucau vua nodra Kalou.”

Ena nodra itovo vinaka—⁠e vale, e koronivuli, kei na so tale na vanua—⁠e levu na gone sa ra vakarogovinakataka kina na Kalou kei na nodra vuvale. Era vakalougatataki na gone vaka oqo ni nodra “[i]Tubutubu [era dau] lomana na dina.” (Vakarua 6:7) O ira na itubutubu dau qarava na Kalou oqo era dau muria na ka e kaya na Kalou. Me vaka ni Tama dauloloma, e dau vakavulici ira nona ibulibuli ena sala mera lakova. Era vakalougatataki dina kina na itubutubu! Sa ra qai vakadewa na veika era vulica vei ira na gone ena nodra vuvale, ra qai marau nira “muria ga” na luvedra! (Aisea 48:17, 18) O Angélica, e sa veiqaravi tiko nikua ena valenivolavola ni tabana ni iVakadinadina i Jiova mai Mexico, e kaya: “Erau dau saga noqu itubutubu me rau bulataka na ivakavuvuli ena iVolatabu. E taleitaki kina noqu gauna ni gone. Dua na ka noqu marau.”

Era duavata na lotu Vakarisito vaka oqo ni yaga dina mera vakamareqeta na gone nodra isolisoli vakayalo. De dua o itabagone o susugi ena vuvale e dau muria na ivakavuvuli vakarisito. Ke vaka kina, e vakauqeti iko na sere vata ga oya mo saga ni muria na sala savasava. E kaya na sere: “Gone mo saga na sala sava.” Ena yaco tale ga na gauna mo vakatulewa duadua kina, o koya gona, vulica me o “Jiova ga mo dau raviti koya./Mo lai rogo kua sara ni saga.”

Ke o mani vakaliuca na rogo se via taleitaki, e rawa ni maumau kece na veika o vulica qai vakaleqa tale ga nomu bula mai muri. Na gagadre tale ga ni via rogo se taleitaki o rawa ni sikalutu kina. E so sa ra lai veimaliwai kina kei ira na tamata vinaka, era rairai totoka, ia era sega ni taleitaka na ivakatagedegede vakarisito. E laurai vinaka oqo vei Tara, e vakaraitaki ena vidio Young People Ask—⁠How Can I Make Real Friends? Me vakataki Tara, na itabagone lotu Vakarisito cava ga e veimaliwai kei ira era sega ni doka na sokalou dina era na qai kila na ca ni nodra sega ni “dro tani mai na ilawalawa ca,” me vaka e cavuti ena sere. E taura e vica vata na yabaki ni sasaga me bucini kina na itovo vinaka, ia e rawa tale ga ni yali vakasauri.

 Io, na muri ni sala vakalou e sega ni rawarawa. Ia, me vaka e qai kaya na sere, ke o “nanumi Jiova ni o gone ga,/Qarava dina vakayalo ga,” o na taravaka na yavu dei me vinaka kina nomu bula. “Ni o qase mai mo reki kina.” Sa na qai matata vei iko ni nona veikauaitaki ga vakayalololoma o Jiova, ena sega kina ni dua na ka e tarovi iko mo cakava na ka e dodonu e matana. Oqo na sala o na yaco mo matua kina, mo dau qarava tale ga na Kalou. Kena ikuri, na nomu vakayagataka vinaka na veisusu vakarisito ena vakavuna me “caudre ena marau na yalo i Ja.” E dua dina na ka talei na noda rawa ni vakamarautaka na loma i Jiova.​—Vosa Vakaibalebale 27:11.

O koya gona, ra itabagone, ni kua ni guilecava na yaga ni nona veivakavulici o Jiova kei rau nomu itubutubu. Me uqeti iko mada ga na nodrau lomani iko mo cakava kina na veika e vakamarautaki Jiova. Me vakataki Jisu Karisito kei na cauravou yalodina o Timoci, o na vakamarautaka na Tamamu vakalomalagi vaka kina o rau nomu itubutubu. Ke o mani yaco mo dua na itubutubu, o na duavata kei Angélica, sa cavuti mai liu, ni kaya: “Keu vakaluveni, au na tovolea sara ga meu bucina vei luvequ ni se gonedramidrami me usutu ni nona bula na nona lomani Jiova.” Na sala dodonu gona e tini ena bula tawamudu e isolisoli talei duadua ni itubutubu vei luvedra!

[iVakamacala e ra]