E Vakavuna Beka na Kalou na Noda Leqa?

GAUNA a mavoa vakaca kina na mona i luve i Marion yalewa, a cakava o koya na ka vata ga eda na cakava ke da a tu ena ituvaki oya. * A kere veivuke vua na Kalou ena masu. “Au sega ni nanuma rawa e dua tale na gauna au vakila kina niu sa sega ni kila na ka meu cakava, au qai galili,” e kaya o Marion. Sega ni dede, sa bibi sara na tauvimate i luvena, vakavuna kina me vakatitiqataka na Kalou ena nona taroga: “Na cava e yaco tiko kina na ituvaki oqo?” A vakasamataka ke tiko e dua na Kalou dau loloma qai dau veikauaitaki, na cava e sega ni vukei luvena kina?

Na ituvaki a sotava oqo o Marion e sega ni ka vou. E levu ena veiyasa i vuravura era nanuma ni sega ni kauaitaki ira na Kalou ena gauna era sotava tu kina na ituvaki dredre. “Au dau vakasamataka vakalevu se cava sara mada e vakatara kina na Kalou me yaco na veika ca,” e kaya o Lisa ena gauna a labati kina na makubuna. “Au se vakabauta tiko ga na Kalou, ia e sa sega ga ni kaukaua sara me vaka e liu.” E vaka tale ga oqori na ka a yaco vua e dua na marama a mate na luvena tagane lailai, a kaya: “A sega ni vakacegui au na Kalou ena gauna au sotava kina na leqa oya. A sega ni bau kauaitaki au se lomani au. Au na sega vakadua ni vosoti koya.”

So tale era cudruva na Kalou nira raica na veika e yaco yavoliti ira tu. Era raica nira sa sega ni taqea rawa na veivanua na bula dravudravua kei na viakana, o ira na isenivalu era bula vakaloloma, e sega ni kilai na kedra iwiliwili na gone era luveniyali ena vuku ni AIDS, kei na vica vata na milioni na tamata e tauvi ira e so tani tale na mate. Ni yaco na veika oqo kei na so tale na ituvaki vaka oya, e vuqa era beitaka na Kalou ni sega ni cakava kina e dua na ka.

Ia na kena dina, e sega ni dodonu me beitaki na Kalou ena levu ni leqa e sotava tu na kawatamata. E tiko e so na vuna vinaka e vakabauti kina ni na sega ni dede ena vakaotia na Kalou na veika ca e sotava tu na kawatamata. E kerei mo ni wilika na ulutaga e tarava mo ni vakadinadinataka kina ni dau kauaitaki keda dina na Kalou.

[iVakamacala e ra]