Na iVola Vei Noa

“I NOA, au sa wilika vakavica vata na kemu italanoa ena iVolatabu, kei na nomu taya e dua na waqa dou a bula kina vakavuvale ena Waluvu.”

Oqori na itekitekivu ni ivola a vakauta o Minnamaria e dua na goneyalewa yabaki 15 ena veisisivi volaivola era vakaitavi kina na gonevuli yabaki 14 ina 21. Na veisisivi oqo a tuvanaka na tabana ni vakau meli e Finiladi, na Federation for Finnish Mother Tongue Teachers, kei na Finnish Literature Society. Na veika era vola na curu ena veisisivi me yavutaki ena dua na ivola. Me vakau na ivola vei koya e vola na ivola oya, se dua e talanoataki kina. Ra sa qai digitaka na qasenivuli e sivia na 1,400 na nodra ivola na gonevuli qai vakauti vei ratou na turaganilewa ni veisisivi. Ratou sa qai digia na italanoa e vinaka duadua me taura na imatai ni icovi, le tini mera taura na ikarua ni icovi, kei na le tini tale na ikatolu ni icovi. A marau o Minnamaria ni a dua vei ira na taura na ikatolu ni icovi.

Cava na vuna e volavola kina o Minnamaria vei Noa, e dua na turaga a bula ena rauta na 5,000 na yabaki sa oti? E kaya: “Na imatai ni ka e votu ena noqu vakasama na iVolatabu. Au kilai ira vinaka na talanoataki tu kina. Au sa wilika vakalevu na veika baleti ira, vei au e vaka sara ga era se bula tiko. Au digitaki Noa baleta ni totoka na ivakarau ni nona bula qai duidui sara vei au.”

E tinia o Minnamaria na nona ivola vei Noa ena veivosa oqo: “Oni se ivakaraitaki tiko ga ena vakabauta kei na talairawarawa. Na ivakarau ni nomuni bula e vakaukauataki ira kece era wilika na iVolatabu mera cakacakataka nodra vakabauta.”

Na nona ivola na gone dau wili iVolatabu oqo e vakaraitaka ni iVolatabu e ‘bula qai kaukaua,’ e rawa ni cakayaco vei ira na qase kei na gone.​—Iperiu 4:​12.