‘Vakavulici Ira Mera Muria na Veika Kece ga Au sa Vakarota Vei Kemudou’

‘Dou lako yani ka qisi ira mera tisaipeli . . . , vakavulici ira mera muria na veika kece ga au sa vakarota vei kemudou.’​—MACIU 28:19, 20, VV.

1. Na cava erau veivosakitaka na tisaipeli o Filipi kei na turaga ni Iciopea?

E LOMANI Jiova, na Kalou, e dua na turaga ni Iciopea mani lako sara kina i Jerusalemi me lai sokalou kina. Macala tale ga ni a taleitaka na Vosa uqeti ni Kalou. Ni a vakawilika sara toka ga ena nona ilakolako lesu ena nona kareti e dua na ilavelave ni ivola ni parofita o Aisea, erau qai sota kei Filipi, na tisaipeli i Karisito. Tarogi koya sara na kai Iciopea o Filipi: “O sa kila na ka ko sa wilika, se segai?” Sauma mai na turaga oqo: “Au sa rawata vakaevei, kevaka sa sega e dua me tuberi au?” Mani vukea o Filipi na gonevuli ni iVolatabu lomadina oqo me tisaipeli tale ga i Karisito.​—Cakacaka 8:26-39.

2. (a) E vakavure vakasama vakacava na isaunitaro i koya na turaga ni Iciopea? (b) Na taro cava e vo meda na dikeva e votu me baleta na itavi ni veivakatisaipelitaki e lesia o Karisito?

² E vakavure vakasama dina na isaunitaro i koya na turaga ni Iciopea. A kaya: “Au na rawata vakaevei, kevaka e sega ni dua me tuberi au.” Io, a gadreva na turaga oqo me tuberi, me vakamacalataki vua na veika e wilika. Na ka e kaya oqo e rawa ni semati ina ivakaro a okata o Jisu me vakaraitaka na bibi ni itavi a lesia vei ira nona tisaipeli. Na ivakaro cava oya? Me kilai na kena isau, meda tomana mada ni vakadikeva na vosa i Jisu ena Maciu wase 28. Na ulutaga sa oti eda dikeva kina na taro, na vuna meda vunau kina? kei na vanua cava? Eda na vakarau dikeva oqo na vo ni rua na taro e votu ena ivakaro i Karisito me baleta na veivakatisaipelitaki​—oya na itukutuku cava? me yacova na gauna cava?

“Vakavulici Ira me Ra Muria na Veika Kece Ga”

3. (a) E rawa vakacava ni yaco e dua me tisaipeli i Jisu Karisito? (b) Na cava e vauci ena noda vakavulici ira e so mera tisaipeli?

³ Na itukutuku cava eda na vakavulica vua e dua me yaco kina me tisaipeli i Karisito? A vakaroti ira nona imuri o Jisu: “Dou lako yani ka qisi ira me ra noqu tisaipeli na lewe ni veivanua kece ga, ka papitaisotaki ira e na yaca ni Tamamudou kei na Luvena kei na Yalo Tabu; vakavulici ira me ra muria na veika kece ga au sa vakarota tu vei kemudou.” (Maciu 28:19, 20, VV) Dodonu gona meda vakavulica na ivakaro i Karisito. * Ia na cava ena vakadeitaka ni o koya e vakavulici ena ivakaro i Jisu, ena sega wale ga ni yaco me nona tisaipeli, ia ena dei tiko ga kina? E dua na tikina e laurai ena vosa a digia o Jisu me vakayagataka. Dikeva ni a sega ni kaya wale ga: ‘Vakavulici ira ena veika kece ga au vakaroti kemudou kina.’ Ia, a biuta vaka oqo: “Vakavulici ira mera muria na veika kece ga au sa vakarota tu vei kemudou.” (Maciu 19:17) Na cava e okati kina?

4. (a) Ni cavuti na muri ni ivakaro, na cava na kena ibalebale? (b) Vakatauvatana na sala eda vakavulica kina e dua me muria na ivakaro i Karisito.

⁴ Ni cavuti na kena muri e dua na ivakaro, e kena ibalebale na “veisautaki ni ivakarau ni  bula me salavata” kei na ivakaro oya. Eda na vakavulica gona vakacava e dua me muria na veika kece e vakarota o Karisito? De vinaka meda vakasamataka mada e dua e dauveivakavulici ena draiva, ena sala e vakavulici ira kina nona gonevuli mera muria na lawa ni gaunisala. Ena rairai veivakavulici tiko beka ena kena vale. Ia, me rawa nira taura vinaka sara na gonevuli na lawa ni gaunisala, e dodonu me tuberi ira ena gauna sara ga era draiva toka kina ra qai saga mera vakatovotovotaka na veika sa ra vulica. E vakatale ga oya nida vuli iVolatabu kei ira tale e so, eda vakavulici ira ena noda vakamacalataka na ivakaro i Karisito. Ia, e gadrevi tale ga meda tuberi ira na gonevuli ena nodra saga mera vakatovotovotaka na ivakaro i Karisito e veisiga vaka kina ena cakacaka vakaitalatala. (Joni 14:15; 1 Joni 2:3) Koya gona, me taucoko na noda vakayacora na ivakaro i Karisito ena veivakatisaipelitaki, e gadrevi ruarua kina meda dauveivakavulici da qai dauveituberi. Na sala oya, eda sa muria tiko kina na ivakaraitaki i Jisu kei Jiova.​—Same 48:14; Vakatakila 7:17.

5. Na cava e dua na ka e rawa ni dredre kina vua e dua eda vuli iVolatabu vata me muria na ivakaro i Karisito me veivakatisaipelitaki?

⁵ Na nodra vakavulici e so mera muria na ivakaro i Jisu e vauci kina nodra tuberi me rawa nira veivakatisaipelitaki tale ga. Ena via dredre toka oqo vei ira e so eda vuli iVolatabu vata. Dua na vuna, kevaka mada ga era a lewe tu ni lotu ni Veivanua Vakarisito, e macala ni sega ni a vakavulici ira nodra italatala ni lotu mera lai veivakatisaipelitaki. E so mada ga na iliuliu ni lotu ni Veivanua Vakarisito era vakatusa ni sega sara mada ga ni bau okati ena nodra veidusimaki na nodra vakavulici na lewenilotu mera lai veivakalotutaki. Ni vosa tiko me baleta na ivakaro i Jisu e vauca na noda lako meda veivakatisaipelitaki, e kaya kina na vuku ni iVolatabu o John R. W. Stott: “Na noda sega ni muria na vakasama e vauci koto ena ivakaro oqo, e noda malumalumu levu duadua na lotu Vakarisito ena vuravura ni veivakalotutaki.” E kuria: “E vaka ni kena ivakarau meda kacivaka tu ga vakararaba na noda itukutuku. So na gauna eda vakataki ira era kacivaka tiko mai matasawa na ka me cakava o koya sa luvu tiko. Eda sega ni qalo yani meda vukei koya, nida sega ni via suasua.”

6. (a) Eda na vakatotomuria vakacava na ivakaraitaki i Filipi nida vukea e dua na vuli iVolatabu? (b) Eda na kauaitaki ira vakacava eda vuli iVolatabu vata nira sa tekivu lako ena cakacaka vakavunau?

⁶ Ke da vuli iVolatabu vata kei dua a lewe tu ni lotu era sega ni dau veivakalotutaki, se rawa ni tukuni nira ‘sega ni via suasua,’ ena ka toka ni bolebole vua me muria na ivakaro i Karisito, me veivakatisaipelitaki. Macala ni na gadreva  na veivuke. Oya na vuna e vinakati kina vei keda na vosota nida vakavulici koya vakavinaka da qai tuberi koya me titobu nona kila, me rawa ni cakava kina e dua na ka. Me tauvata ga na kena matata vua na turaga ni Iciopea na veivakavulici i Filipi, yaco sara kina me papitaiso. (Joni 16:13; Cakacaka 8:35-38) Kuria, na noda kauai meda vakavulici ira eda vuli iVolatabu vata mera muria na ivakaro ni veivakatisaipelitaki, ena uqeti keda meda lako vata sara ga kei ira nira tekivu lako ena cakacaka vakavunau.​—Dauvunau 4:9, 10; Luke 6:40, VV.

“Na Veika Kece Ga”

7. Na ivakaro cava e okati ena noda vakavulici ira tale e so mera “muria na veika kece ga”?

⁷ Eda sega ni vakavulici ira wale ga na tisaipeli vou me rawa nira veivakatisaipelitaki. E vakauqeti keda o Jisu meda vakavulici ira mera “muria na veika kece ga” a vakarota. E okati kina e rua na ivakaro levu duadua​—meda lomana na Kalou kei ira na wekada. (Maciu 22:37-39) Ena vakavulici vakacava e dua na tisaipeli vou me muria na ivakaro oqo?

8. Vakatauvatana na sala e rawa ni vakavulici kina na tisaipeli vou me muria na ivakaro me dau loloma.

⁸ Vakasamataka tale mada na ivakatautauvata ni dua e vuli draiva. Ni sa draiva tiko qai toka tikivi koya nona dauveivakavulici, ena sega wale ga ni vakarogoca tiko na ka e kaya na dauveivakavulici me cakava, ena rai tale tiko ga ina so na ka era cakava e so tale na dau vakaulori. Kena ivakaraitaki, ena rairai dusia na dauveivakavulici vua na nona solia e dua na draiva na galala vua e dua tale me liu; se na nona vakalailaitaka na rama ni nona icina e dua na draiva me kua ni matacina na draiva e donui koya; se na draiva e vukea e dua e ca nona lori. Na ivakaraitaki vaka oqo e vakavulici koya e vuli draiva ena ka me na cakava ni sa taura nona laiseni. E vakatale ga oya vua na tisaipeli vou e lakova na sala e basika ina bula, e sega wale ga ni vuli vei koya nona dauveivakavulici, ia ena vuli tale ga ena ivakaraitaki vinaka e raica ena ivavakoso.​—Maciu 7:13, 14.

9. Ena vakavatukanataki vakacava vua na tisaipeli vou na ibalebale ni kena muri na ivakaro meda dau loloma?

⁹ Kena ivakaraitaki, o koya e vuli iVolatabu ena raica beka na itubutubu le dua e sasaga me kauti ratou mai na luvena lalai ena Kingdom Hall. Se, na raica beka e dua e lomabibi e saga ena nona igu me valuta na leqa oqo ia e yalodina me tiko ga ena soqoni, na yada sa kena marama e vakavodoki ira e so tale na itabaqase ina soqoni ni ivavakoso ena nona motoka se lori, se na itabagone e veivuke ena samaki ni Kingdom Hall. Ena rairai raica tale ga o koya e vuli iVolatabu e dua na qase ni ivavakoso e liutaka ena yalodina na cakacaka vakavunau, e dina ni levu nona itavi ena ivavakoso. Se na sotava tale beka ga na iVakadinadina e vakaleqai na yagona qai tu ga e vale, ia e dau vu ni veivakaukauataki vakayalo vei ira era sikovi koya yani. De dua ena raica tale ga na veiwatini erau veisautaka vakalevu na ivakarau ni nodrau bula me rau qarava rawa ga kina nodrau itubutubu qase. Na nona vakaraici ira na lotu Vakarisito yalovinaka, dau veivukei, qai nuitaki vaka oqo, ena vulica kina na tisaipeli vou na ibalebale ni kena muri na ivakaro i Karisito meda lomana na Kalou kei ira na wekada, vakauasivi o ira noda itokani ena vakabauta. (Vosa Vakaibalebale 24:32; Joni 13:35; Kalatia 6:10; 1 Timoci 5:4, 8; 1 Pita 5:2, 3) Oya na vuna, e rawa, se dodonu sara ga kina mera dauveivakavulici ra qai dauveituberi na lewe kece ni ivavakoso vakarisito.​—Maciu 5:16.

‘Me Yacova na Gauna ni iVakataotioti kei Vuravura’

10. (a) Ena vakacava na dede ni gauna eda na veivakatisaipelitaki tiko kina? (b) Na ivakaraitaki cava a kotora o Jisu me baleta na colati ni noda ilesilesi?

¹⁰ Me yacova na gauna cava na noda veivakatisaipelitaki tiko? Ena loma kece ni gauna ni ivakataotioti. (Maciu 28:20, VV) Eda na vakacavara vinaka beka na ilesilesi oqo i Jisu? E noda inaki dei vakaivavakoso e vuravura raraba meda na vakayacora vaka kina. Ena veiyabaki sa sivi, eda solia vakayalololoma noda gauna, kaukaua, kei na noda iyau meda qarai ira kina “era sa vakarau tu me vinakata na bula tawa  mudu.” (Cakacaka 13:48) Ena gauna oqo, ke vakatautauvatataki, era vakayagataka na iVakadinadina i Jiova e vuravura raraba e sivia e tolunamilioni na aua e veisiga ena loma ni dua na yabaki ena cakacaka vakavunau kei na veivakatisaipelitaki. Eda cakava oqo nida muria na ivakaraitaki i Jisu. E kaya: “A qau kakana me’u kitaka na loma i koya sa talai au mai; ka me’u vakaotia na nona cakacaka.” (Joni 4:34) Oya sara tale ga na ka eda vinakata meda cakava. (Joni 20:21) Eda sega ni via tekivuna ga na cakacaka e vakacolati vei keda; ia eda via vakaotia sara.​—Maciu 24:13; Joni 17:4.

11. Na cava e yaco vei ira e so na tacida lotu Vakarisito, kei na cava meda dui taroga?

¹¹ Ia, eda rarawataka na noda raica na nodra malumu vakayalo e so noda itokani ena vakabauta, me vakavudua se sega sara ga kina nira muria na ivakaro i Karisito me baleta na veivakatisaipelitaki. E tiko beka na sala meda vukei ira mera sosoqoni tale kina ena ivavakoso, ra qai tomana nodra itavi ni veivakatisaipelitaki? (Roma 15:1, VV; Iperiu 12:12) Na ivakarau ni nona vukei ratou nona yapositolo o Jisu ni ratou sa malumu vakayalo e dusia na veika eda rawa tale ga ni cakava.

Dau Veikauaitaki

12. (a) Ni sa voleka ni mate o Jisu, na cava eratou qai cakava nona yapositolo? (b) E raici iratou vakacava nona tisaipeli o Jisu, e dina ni a cala sara na ka eratou cakava?

¹² Ni sa vakarau cava na cakacaka vakaitalatala i Jisu e vuravura, ena nona sa voleka ni mate, eratou “sa qai biuti koya . . . ka dro” na nona yapositolo. Me vaka sa tukuna oti o Jisu, eratou na “dui veiseyaki . . . ki nona vale.” (Marika 14:50; Joni 16:32) E raici iratou vakacava o Jisu nona itokani eratou sa malumu vakayalo? Ni oti ga vakalailai nona vakaturi, a kaya o Jisu vei rau e rua nona imuri: “Drau kakua ni rere; drau laki tukuna ga vei ira na wekaqu me ra lako ki Kalili; ia era na raici au maikea.” (Maciu 28:10) E dina ni a cala sara na ka eratou cakava na yapositolo, ia se kacivi iratou tiko ga o Jisu me ratou ‘tacina.’ (Maciu 12:49) A se nuitaki iratou tiko ga. E vakaraitaka e ke o Jisu na nona yalololoma kei na nona dauveivosoti me vakataki Jiova ga. (2 Tui 13:23) E rawa vakacava nida vakatotomuri Jisu?

13. Meda raici ira vakacava sa ra malumu vakayalo?

¹³ E dodonu meda kauaitaki ira vakalevu sa ra malumu se sa ra sega ni vakaitavi ena cakacaka vakaitalatala. Eda sega ni guilecava nodra dau loloma na noda itokani oqo ena vakabauta ena veigauna sa oti​—de dua e so vei ira oqo a vicasagavulu na yabaki na nodra a yalodina tu. (Iperiu 6:10) Eda nanuma tale ga na noda dau veimaliwai. (Luke 15:4-7; 1 Cesalonaika 2:17) Eda na kauaitaki ira vakacava?

14. Nida vakatotomuri Jisu, eda na vukea vakacava e dua e malumu vakayalo?

¹⁴ A kaya o Jisu vei ratou nona yapositolo eratou yalolailai me ratou na lai sota e Kalili. Rawa ni tukuni ni a sureti iratou o Jisu ena dua na soqo lavotaki. (Maciu 28:10) Vaka kina nikua, meda vakauqeti ira era malumu vakayalo mera lako mai ena soqoni vakarisito, ia meda kua ni sureti ira ga vakadua. A yaga sara vei ratou na yapositolo nodratou ciqoma na veisureti, me ratou “lako ki Kalili . . . na lewe tinikadua, ki na ulu-ni-vanua ka tukuna vei ira[tou] ko Jisu.” (Maciu 28:16) Eda marau tale ga nira ciqoma noda veisureti o ira na malumu tu vakayalo ra qai tekivu tiko tale ena soqoni vakarisito!​—Luke 15:6.

15. Eda na vakatotomuria vakacava na ivakaraitaki i Jisu nida raici ira na malumu vakayalo era lako mai ena vanua ni soqoni?

¹⁵ Na cava eda na cakava ni basika mai ena Kingdom Hall e dua sa malumu tu vakayalo? Na cava a cakava o Jisu vei ratou nona yapositolo sa malumu tu nodratou vakabauta, ni raici iratou ena vanua sa loku tu me ratou sota kina? “A sa lako mai ko Jisu ka vosa vei ira[tou].” (Maciu 28:18) A sega ni vakaraici iratou tu ga mai vakayawa, a lako sara ga vei ratou. Vakasamataka mada na nodratou marau na yapositolo ena nona vakayacora oya o Jisu! Me vakatale mada ga oya o keda nida vakaliuliu, da qai kidavaki ira na malumu vakayalo era saga mera lesu tale mai ena ivavakoso vakarisito.

16. (a) Na cava e rawa nida vulica mai na ka e cakava o Jisu vei ratou nona imuri? (b) Eda na muria vakacava na ivakarau ni nona raici ira na malumu vakayalo o Jisu? (Raica na ivakamacala e ra.)

¹⁶ Na cava tale a cakava o Jisu? Kena imatai, a tukuna: “Sa soli mai vei au na lewa kece ga.” Kena ikarua, a solia na ilesilesi: ‘Dou lako yani ka qisi ira mera tisaipeli.’ Kena ikatolu, a yalataka: “Au sa tiko vata kei kemudou e na veisiga kece ga.” O taura rawa se cava a sega ni cakava o Jisu? A sega ni cudruvi iratou nona tisaipeli ena ka eratou a lekata se na veika eratou vakatitiqataka. (Maciu 28:17) A yaga beka na iwalewale e vakayagataka oya? Io. Sega ni dede, sa tekivu tale me ratou “veivakatavulici” na yapositolo “ka vunautaka . . . na i Tukutuku Vinaka.” (Cakacaka 5:42, VV) Nida vakatotomuria na ivakaraitaki i Jisu ena ivakarau ni noda rai kei na ka meda cakava vei ira sa malumu tu vakayalo, me tini vinaka sara tale mada ga vaka oqo na ka eda na vakila ena noda dui ivavakoso. *​—Cakacaka 20:35.

“Au sa Tiko Vata kei Kemudou e na Veisiga Kece Ga”

17, 18. Na vakasama veivakayaloqaqataki cava e koto ena vosa i Jisu, “au sa tiko vata kei kemudou e na veisiga kece ga”?

¹⁷ Na itinitini ni vosa i Jisu ena nona ivakaro, “au sa tiko vata kei kemudou e na veisiga kece  ga,” e vakayaloqaqataki ira kece era saga mera vakayacora na ivakaro i Karisito mera veivakatisaipelitaki. Se mani vakacava na nodra tusaqata na meca na noda cakacaka vakavunau kei na itukutuku lasu era na via vakatetea me baleti keda, e sega ni dodonu meda taqaya. Na cava na vuna? O Jisu na noda iLiuliu, e tu vua “na lewa kece ga mai lomalagi kei vuravura” ena tokoni keda!

¹⁸ E vu tale ga ni vakacegu na vosa ni yalayala i Jisu “au sa tiko vata kei kemudou e na veisiga kece ga.” Nida saga meda vakayacora na ivakaro i Karisito meda veivakatisaipelitaki, eda na sega wale ga ni marau tiko, ia meda namaka nida na sotava tale ga na rarawa. (2 Veigauna 6:29) E so vei keda e vosovosota dredre na noda lolositaka na nona mate e dua na wekada lomani. (Vakatekivu 23:2; Joni 11:33-36) E so tale era vosota tiko na nodra sa qase, sa malumu mai nodra bula kei na nodra kaukaua. (Dauvunau 12:1-6) E so tale era yalolailai ena so na siga. (1 Cesalonaika 5:14) Sa qai levu tiko ga vei keda e tataqea dredre na leqa vakailavo. Ia, e dina ni ka toka ni bolebole na veika kece sa cavuti oti, eda gumatua ga ena noda cakacaka vakaitalatala ni tiko kei keda o Jisu e “veisiga kece ga,” okati kina na veisiga rarawataki duadua ena noda dui bula.​—Maciu 11:28-30.

19. (a) Na cava soti e vauci ena ivakaro i Jisu me baleta na noda veivakatisaipelitaki? (b) Na cava ena vukei keda meda vakayacora na ilesilesi i Karisito?

¹⁹ Me vaka eda raica ena ulutaga oqo kei na kena sa oti, na itavi e lesia o Jisu me baleta na veivakatisaipelitaki e taucoko vakaoti na veika e vauci kina. E kaya vei keda o Jisu na vuna kei na vanua cava meda vakayacora kina nona ivakaro. E kaya tale ga vei keda na itukutuku meda vakavulica qai yacova na gauna cava. E dina ni na ka ni bolebole na kena vakayacori na ilesilesi oqo, ia ena veivuke ni nona lewa na Karisito kei na nona veitokoni, eda na vakayacora rawa kina! Sega li ni o duavata kina?

[iVakamacala e ra]

 O na Sauma Vakacava?

• Eda na vukei ira vakacava e so tale mera muria na ivakaro i Jisu?

• Na cava soti e rawa ni vulica na tisaipeli vou mai vei ira tale e so ena ivavakoso?

• Na cava e rawa nida cakava meda vukei ira kina era sa malumu vakayalo?

• E veivakayaloqaqataki qai veivakacegui vakacava na vosa ni yalayala i Jisu, “au sa tiko vata kei kemudou e na veisiga kece ga”?

[Taro]

[iYaloyalo ena tabana e 15]

E dodonu meda dauveivakavulici da qai dauveituberi

[iYaloyalo ena tabana e 17]

E levu na veika bibi e vulica na tisaipeli vou mai na nodra ivakaraitaki e so tale