Cakamana i Jisu​—Yaco Dina se iTukuni Ga?

“SA KAU mai vei . . . [Jisu Karisito] e lewe vuqa sa curumi ira na tevoro eso: a sa vakasevi ira na tevoro ko koya e na vosa, a sa vakabulai ira kecega sa tauvimate.” (Maciu 8:​16) “A sa tu cake ko koya [o Jisu], ka vunauca na cagi, a sa kaya ki na wasawasa, Mo cegu, mo maravu mai. A sa ruru na cagi, a sa maravu levu mai.” (Marika 4:​39) Na cava o nanuma ena veivosa oqo? O vakabauta beka ni a yaco dina na veika oqo ena gauna makawa, se ra vatavatairalago ga, e ucumaiduru?

E levu nikua era vakatitiqataka na itukutuku makawa ni cakamana i Jisu. De vu beka mai na ivakatagedegede ni kila sa tu nikua, na kena vakayagataki na ivakadodorairai, na iloilo ni vakalevutaki ka, dikevi ni veika era tu e maliwalala, kei na veisautaki ni sela ni veika bula ena kena icakacaka e vakatokai na genetic engineering, e sa sega kina ni vakabauti na veitukutuku ni cakamana kei na cakacaka veivakurabuitaki e so.

So era nanuma ni a sega ni yaco dina na veitukutuku ni cakamana oqori, era vatavatairalago ga. E dua na dauvolavola, e kainaki ni kovuta na nona ivola na “bula dina” i Jisu, e tukuna ni italanoa me baleta na cakamana i Karisito e dua ga na “iwalewale e dreta na tamata” me tete kina na lotu Vakarisito.

So tale era raica na cakamana i Jisu me ka ni veivakalaboci. So mada ga na gauna e beitaki o Jisu ni dau veivakacalai. E kaya o Justin Martyr ena ikarua ni senitiuri S.K., ni o ira mada ga na vakadiloi Jisu “era doudou na vakatokai koya me dua e daucakaiba qai lawakitaki ira na tamata.” So era beitaki Jisu ni a “sega ni cakamana me vaka e dua na nodra parofita na Jiu, ia e vaka ga e dua na  daucakaiba a vuli mai na nodra valenilotu na lotu butobuto.”

E Sega ni Rawa Nida Tukuna ni Dredre me Vakabauti

Na vakatitiqa vaka oqo, o na rairai vakasamataka ni tiko na vuna vinaka era sega ni vakabauta kina na tamata na cakamana. E dredre, se sega sara ga nira via vakabauta ni tu na kaukaua tani me rawa ni yaco kina na cakamana. “Sa macala tu ga​​—e sega ni rawa ni yaco na cakamana,” e kaya e dua na itabagone e vakatitiqataka ni bula tiko na Kalou. A cavuta tale ga o koya na veivosa a vola o David Hume, na vuku ni Sikoteladi ena ika18 ni senitiuri: “Na cakamana e veicoqacoqa kei na lawa ni bulibuli.”

Ia, e levu era tu suka na kaya ni sega ni rawa ni yaco na cakacaka vakatubuqoroqoro vaka oqo. E vakamacalataka na cakamana na World Book Encyclopedia me “dua na ka e yaco e sega ni vakamacalataki rawa ena lawa ni bulibuli.” Mai na ivakamacala oqori, eda rawa ni kaya kina nira na rairai okata e vuqa na tamata ena senitiuri ga sa oti na lako ena maliwalala, na vakauitukutuku ena walesi, kei na kena vakayagataki na satellite me idusidusi ni veilakoyaki, me ka ni “cakamana.” E sega gona ni ka vakayalomatua meda kaya ni sega ni rawa ni yaco na cakamana, baleta ga nida sega ni rawa ni vakamacalataka mai na ka eda kila ena gauna oqo.

Kevaka eda vakadeuca e so na ivakadinadina vakaivolatabu ni cakamana a tukuni ni cakava o Jisu Karisito, na cava eda na kunea kina? A yaco dina na cakamana i Jisu, se ra itukuni ga?