“Me Vakarogoi ga Kina na Yaca i Jiova”

ENA vuravura raraba, e dau taleitaki vakalevu na ivoladraudrau Na Vale ni Vakatawa kei na Yadra!, ni koto kina na veika vakayalo kei na ivakavuvuli yaga. Na kena taleitaki gona, a vola mai kina oqo e dua na dauwiliwili mai Varanise:

“Au goneyalewa ni Aferika, ia au sega ni vuli vinaka. Wale tiko ga oqo au sa tekivu wilika na nomuni ivoladraudrau. E dreta na mataqu na veiulutaga era tabaki kina, yaco gona meu sa vakila na yaga ni wilivola. Ena noqu dau wilika na ivoladraudrau oqo sa mai rabailevu kina noqu kila na vosa au a sega soti ni kila vinaka e liu, qai rawa vei au meu vola e dua na ivola e lailai kina na cala.

“Au drukataka dina na nomuni tabaka na veiulutaga me baleta na kawatamata, na vuravura, kei koya na Dauveibuli. Na matata ni kena vakamacalataki na veiulutaga oqo, e vakavuna gona vua e dua me dau wilivola vakalevu. E sega tale ni dua e tu vua na kila me vakavulici ira na veimataqali tamata kece ena duavata ga na gauna.

“Au druka tale ga niu raica ni ka kece oqo e sega ni caka mo ni rawailavo kina, ia me vakarogoi ga kina na yaca i Jiova. Au kila ni vakadonuya o koya na nomuni cakacaka, vinaka vakalevu. Me vakaukauataki kemuni mada ga na Dauveibuli mo ni rawa ni veivakavulici tiko ga kina.”

Ena gauna oqo era sa vakayacora tiko na cakacaka ni veivakavulici ena iVolatabu na iVakadinadina i Jiova ena 235 na vanua. E sa tabaki tiko Na Vale ni Vakatawa ena 148 na vosa, kei na Yadra! ena 87. Na ivoladraudrau e rua oqo e sega ni tabaki me vakacerecerei kina e dua na tamata. Na ivakasala vakaivolatabu kei na itukutuku vovou e kune kina e vakarautaki me rokovi kina na Dauveibuli, e kaya: “Koi au ko Jiova, . . . ka’u sa vakavulici iko mo vinaka kina.” (Aisea 48:17) Me yaga mada ga vei iko na nomu wilika wasoma na iVolatabu kei na ivola ni vuli iVolatabu e rua oqo.