Taro na Dauwiliwili

Na cava e vakatayaloyalotaka na yabaki ni Jupeli e cavuti ena ika25 ni wase ni Vunau ni Soro?

E vakaroti ena Lawa i Mosese ni “kenai kavitu ni yabaki me sa gauna ni vakacecegu me vakacegu kina na vanua.” Me baleta na yabaki oqori, era vakaroti kina na Isireli: “Mo kakua ni kaburaka na sila e na nomu veiwere, se samaka na nomu veivaini. A ka sa tubu mai na nomu sila ka lutu e na yabaki sa oti, mo kakua ni tamusuka, se vetia nai soso mai na nomu vaini sa sega ni samaki: sa yabaki me vakacegu kina na vanua.” (Vunau ni Soro 25:​4, 5) O koya gona e dau vakacegu na vanua ena ikavitu ni yabaki. Ia, ena veiya50 ni yabaki, ni oti na ikavitu ni yabaki e vakacegu kina na qele, me qai yabaki ni Jupeli. Na cava ena yaco ena yabaki oya?

E tukuna o Jiova vei ira na Isireli ena gusu i Mosese: “Dou vakatabuya na kenai kalimasagavulu ni yabaki, ka kacivaka yani na veisereki kivei ira kecega na lewe ni vanua: ena yabaki ni jupeli vei kemudou; ia dou na vakalesuya na tamata yadua ki na yasana sai taukei kina eliu, dou na vakalesuya na tamata yadua talega ki na nona mataqali. Ena yabaki ni jupeli vei kemudou na kenai kalimasagavulu ni yabaki ko ya: dou kakua ni kaburaka na sila, se tamusuka na ka sa tubu kina mai na sila sa lutu, se vetia nai soso mai na vaini sa sega ni samaki kina.” (Vunau ni Soro 25:​10, 11) Ena yabaki ni Jupeli ena cegu tale na vanua me dua na yabaki, me rua kina na yabaki veitaravi e vakacegu kina na vanua. Era dau sereki tale ga kina na lewenivanua. Era sereki kina na Jiu kece era volitaki mera bobula. O koya a vakasaurarataki me volitaka nona ivotavota vanua ena vakasukai tale vua nodratou qele vakavuvale. Na Jupeli e yabaki ni vakacoko kei na veisereki vei ira na Isireli makawa. Na cava e vakatayaloyalotaka vei ira na lotu Vakarisito?

Nona talaidredre na imatai ni tamata, o Atama, e vakavuna mera bobula kina ina ivalavala ca na  kawatamata. Na ka e vakarautaka na Kalou mera vagalalataki kina na kawatamata mai na ivalavala ca oya na isoro ni ivoli i Jisu Karisito. * (Maciu 20:28; Joni 3:​16; 1 Joni 2:​1, 2) Gauna cava era sereki kina na lotu Vakarisito mai na lawa ni ivalavala ca? A kaya vei ira na lotu Vakarisito lumuti o Paula: ‘Sa sereki kemuni mai na lawa ni ivalavala ca kei na mate na lawa ni yalo tabu, o koya sa kauta mai vei kemuni na bula ena nomuni tu vata kei Karisito Jisu.’ (Roma 8:​2, VV) Era ciqoma na veisereki oqo o ira na nuitaka na bula i lomalagi ena nodra lumuti ena yalo tabu. Dina nira yago vakatamata ra qai sega ni uasivi, ia e vakadonui ira na Kalou mera yalododonu qai okati ira mera luvena vakayalo. (Roma 3:​24; 8:​16, 17) E tekivu na nodra Jupeli na lotu Vakarisito ilawalawa lumuti ena Penitiko 33 S.K.

Vakacava o ira na ‘so tani tale na sipi,’ o ira na vakanamata tu ina bula tawamudu ena vuravura? (Joni 10:16) Vei ira na so tani tale na sipi, na duanaudolu na yabaki ni veiliutaki i Karisito ena gauna tiko ni vakacoko kei na veisereki vei ira. Donuya na Jupeli ni veiliutaki me duanaudolu na yabaki oqo ena vakayagataka kina o Jisu na talei ni nona isoro ni veivoli vei ira na kawatamata era vakabauta, ena qai veisautaka kina na itotogi ni ivalavala ca. (Vakatakila 21:​3, 4) Ni sa cava na duanaudolu na yabaki ni veiliutaki i Karisito, era sa na bula uasivi na kawatamata, sa na bokoci vakadua na ivalavala ca era sucukaya qai vakaoti tale ga na mate. (Roma 8:​21) Ni sa vakayacori oti oqori, sa na qai cava kina na nodra Jupeli na lotu Vakarisito.

[iVakamacala e ra]

[iYaloyalo ena tabana e 26]

Na Jupeli ni veiliutaki me duanaudolu na yabaki​—e gauna ni vakacoko kei na veisereki vei ira na ‘so tani tale na sipi’