Lako Tani Mai na Lotu Lasu!

“Dou qai lako tani maivei ira, ia dou tawasei tu, sa kaya na Turaga [o Jiova], ka dou kakua ni tara na ka sa sega ni savasava.”​—2 KORINICA 6:17.

1. E vakacava tu na nodra ituvaki vakayalo e so na tamata lomadina?

E LEVU na tamata lomadina era sega ni kila na veika dina me baleta na Kalou kei na inuinui ni kawatamata. Nira sega ni kila na veika bibi oqori, e lai vakavuna sara mera veilecayaki ra qai nuiqawaqawa. Vica vata na milioni era bobula tu ina rere vakalialia, ena ivakarau vakalotu, kei na veisoqo e so e vakacudruya na Kalou. Era na rairai tu beka na wekada kei ira eda tiko veitikivi era vakabauta na kama mai eli, na Letoluvakalou, na tawamate rawa ni yalo, se so tale na ivakavuvuli lasu.

2. Na cava era cakava na iliuliu ni lotu lasu, na cava e yaco kina?

² O cei e vakavuna tiko na butobuto vakayalo oqo? E kurabuitaki ni vakavuna sara tiko ga na lotu, vakauasivi o ira na iliuliu ni lotu era vakavuvulitaka tiko na ivakavuvuli e sega ni vakadonuya na Kalou. (Marika 7:​7, 8) Oqo e vakavuna mera vakacalai e levu na tamata mera vakabauta nira qarava tiko na Kalou dina, ia e kena dina ga nira vakacudrui koya tiko. E bale sara ga vei ira na lotu lasu na ituvaki rarawataki oqo.

3. O cei e vakabulabulataka tiko na lotu lasu, e vakamacalataki vakacava ena iVolatabu?

³ E tokona tiko mai na lotu lasu e dua na ibulibuli tawarairai. Ni vakamacalataki koya, e kaya na yapositolo o Paula: “Sa vakamatabokotaka na nodra vakasama na tamata tawa vakabauta na kalou ni vuravura oqo, me ra kakua kina ni raica na rarama ni i Tukutuku Vinaka ni lagilagi i Karisito, o koya na i yaloyalo uasivi duadua ni Kalou.” (2 Korinica 4:​4, VV) O Setani na Tevoro e “kalou ni vuravura oqo.” E vakabulabulataka tiko na lotu lasu. O “Setani sara mada ga e rawa me vukici koya me vaka e dua na agilosi ni rarama,” e vola o Paula. “Sa sega kina ni ka veivakurabuitaki ke ra vukici ira na nona dauveiqaravi me ra vaka na i talatala ni i valavala dodonu.” (2 Korinica 11:​14, 15, VV) O Setani e dau vukica na veika ca me rairai vinaka qai dau vakacalai ira na tamata mera vakabauta na veika lasu.

4. Na cava e kaya na Lawa ni Kalou vei Isireli makawa me baleti ira na parofita vakailasu?

⁴ Sa rauta me vakacala vakaukaua na lotu lasu na iVolatabu! Me kena ivakaraitaki, na Lawa e soli vei Mosese e vakasalataki ira na tamata ni Kalou mera qarauni ira mai vei ira na parofita vakailasu. Ke dua e tokona na ivakavuvuli lasu kei na qaravi ni kalou lasu ena ‘vakamatei baleta ni vukitani mai vei Jiova.’ Era vakaroti na Isireli ‘mera vakaotia laivi na ca mai na kedra maliwa.’ (Vakarua 13:​1-5) Io, o Jiova e raica na lotu lasu me ca.​​—⁠Isikeli 13:⁠3.

5. Na ivakasala cava meda muria nikua?

⁵ E tokona o Jisu Karisito kei ira na nona yapositolo na nona cata kaukaua o Jiova na lotu lasu. E vakasalataki ira na nona tisaipeli o Jisu: “Dou qarauni kemudou vinaka maivei ira nai vakavuvuli vakailasu, era sa lako mai vei kemudou ka vakaisulu vaka na sipi, a ra sa wolifa daukata e lomadra.” (Maciu 7:​15; Marika 13:​22, 23) E vola o Paula ni “vakaraitaki mai lomalagi na cudru ni Kalou me baleta na nodra i valavala ca kei na nodra i tovo dukadukali kece ga na tamata era sa dau tarova na  kena kilai na i vakavuvuli dodonu.” (Roma 1:​18, VV) E dodonu mera muria na lotu Vakarisito dina na ivakasala oqori ena nodra lako tani mai vei ira era tarova na kilai ni ka dina ni Vosa ni Kalou se o ira na vakadewa tiko na ivakavuvuli lasu.​​—⁠1 Joni 4:⁠1.

Lako Tani Vei “Papiloni na Ka Levu”

6. E vakamacalataki vakacava o “Papiloni na Ka Levu” ena iVolatabu?

⁶ Dikeva mada na kena vakamacalataki na lotu lasu ena ivola ena iVolatabu na Vakatakila. E vakatauvatani lotu lasu kei na dua na yalewa dautagane e lewai ira tiko e levu na matanitu kei na kedra tamata. Na yalewa ivakatakarakara oqo e veibutakoci kei ira e levu na tui qai mateni voli ena nodra dra na tamata ni Kalou. (Vakatakila 17:​1, 2, 6, 18) E volai koto e yadrena e dua na yaca e veiganiti kei na nona itovo dukadukali qai vakasisila. Na yaca oya na “Papiloni na Ka Levu, a tinadra na dautagane kei na veika vakasisila kei vuravura.”​​—⁠Vakatakila 17:⁠5.

7, 8. E veibutakoci vakacava na lotu lasu, na cava e yaco kina?

⁷ Na ivakamacala oqo kei Papiloni na Ka Levu e ganiti ira vinaka sara na veilotu lasu kece e vuravura. Dina ga nira sega ni duavata na vica na udolu na isoqosoqo ni lotu e vuravura, ia era duavata ga ena inaki kei na ka era cakava. Me vaka e vakatakarakarataka na yalewa dukadukali oya ena Vakatakila, e kaukaua sara na nona lewai ira na veimatanitu na lotu lasu. Me vaka e dua na yalewa e sega ni yalodina ina nona vosa ni yalayala vei watina, sa veibutakoci voli na lotu lasu kei ira e levu sara na matanitu vakapolitiki. “Oi kemudou na dauyalewa kei na dautagane, dou sa sega beka ni kila, ni sa veicati kei na Kalou na veivinakati kei vuravura?” e vola na tisaipeli o Jemesa. “Sa veimecaki kei na Kalou ko koya sa viaveiwekani kei vuravura.”​​—⁠Jemesa 4:⁠4.

⁸ E vakavuna vakalevu na leqa na kena bosoki vata na lotu lasu kei na veika vakamatanitu. E kaya na turaga ni Aferika e daudikeva na veika vakapolitiki o Doketa Xolela Mangcu ni “levu na veivakamatei e volatukutukutaki tu e vu ga mai na nodrau cakacaka vata na lotu kei na veiliutaki vakapolitiki.” E se qai vola ga oqo e dua na niusiveva: “Na veicati e rerevaki vakalevu qai dave vakalevu kina na dra ena gauna oqo . . . e vakavuna na lotu.” Era sa vakamatei e vica vata na milioni ena veivala e tokona na lotu. E bau vakacacani ira qai vakamatei ira tale ga na dauveiqaravi dina ni Kalou o Papiloni na Ka Levu, me lai vaka e sa mateni tu ena nodra dra.​​—⁠Vakatakila 18:⁠24.

9. E vakaraitaki vakacava ena ivola na Vakatakila na nona cata o Jiova na lotu lasu?

⁹ Na ka e yaco vei Papiloni na Ka Levu e vakaraitaka na nona cata o Jiova na lotu lasu. E kaya na Vakatakila 17:​16, (VV): “Na tini na i leu ko a raica, ko ira oqori kei na manumanu, era na  cata na yalewa dautagane. Era na kauta laivi na veika kece sa tu vua ka laivi koya me luvawale tu. Era na kania na lewena ka vakamai koya e na bukawaqa.” Ena basuraki koya taumada e dua na manumanu vakaitamera me mate qai kania tale ga na lewena. Sa na qai vakamai na veitikina e vo. Oqori sara ga na ka era na cakava na veimatanitu e vuravura vua na lotu lasu. Ena uqeti ira na Kalou mera cakava na ka oya. (Vakatakila 17:17) Sa vakarau vakarusai o Papiloni na Ka Levu, se na lotu lasu kece e vuravura. Ena “sega sara ni kune tale.”​​—⁠Vakatakila 18:⁠21.

10. Meda raica vakacava na lotu lasu?

¹⁰ Mera raici Papiloni na Ka Levu vakacava o ira na sokalou dina tiko? E vakarota vakamatata na iVolatabu: “Ni lako tani mai vua, kemuni na noqu tamata! De ko ni na qai vakayacora tale ga na nona i valavala ca, ka ko ni na qai vaka i votavota e na veika rarawa e na yaco vua.” (Vakatakila 18:​4, VV) Mera se tei lako tani rawa oqo mai na lotu lasu o ira kece na vinakata mera vakabulai, de ra qai bera. A parofisaitaka o Jisu Karisito ena gauna e bula voli kina e vuravura nira na levu era kaya wale tiko ga nira nona imuri ena gauna ni ivakataotioti oqo. (Maciu 24:​3-5) Ena kaya vei ira oqori: “Au sega sara ni kilai kemudou; dou lako tani vei au ni dou sa tamata dau caka ca.” (Maciu 7:​23, VV) E sega ni bau vakadonuya na lotu lasu na Tui, o Jisu Karisito.

Lako Tani Vakacava?

11. Eda na lako tani vakacava mai na lotu lasu?

¹¹ Era na lako tani na lotu Vakarisito dina mai na lotu lasu ena nodra sega ni vakadonuya na kena ivakavuvuli vakalotu. E kena ibalebale oqo meda kua ni rogoca se sarava na porokaramu ni lotu ena retio se retioyaloyalo se wilika na ivola ni lotu e vakalasuya na Kalou kei na nona Vosa. (Same 119:37) E ka vakavuku tale ga meda kua ni tiko ena dua na soqo e vakarautaka e dua na isoqosoqo e okati vata kei na lotu lasu. Eda na sega ga ni tokona na lotu lasu. (1 Korinica 10:21) Nida cakava oqo eda na taqomaki keda kina mai na “vuku vakavuravura sa sega ni yaga ka lasu talega, e vaka nai tukuni vakatamata, e vaka nai vakavuvuli vakavuravura, ka sa sega ni vaka nai vakavuvuli i Karisito.”​​—⁠Kolosa 2:⁠8.

12. Ena vakaraitaka vakacava e dua ni sa sega ni vinakata me lewe ni dua na lotu lasu?

¹² Vakacava ke se lewe tiko ni dua na lotu lasu e dua sa vinakata me iVakadinadina i Jiova? E dau kena ivakarau me vola e dua na ivola ni kere vakacegu me ivakadinadina ni nona sa sega ni vinakata me okati me lewe ni  lotu lasu. E bibi me vakadeitaka sara ga o koya ni na sega ni ciqoma e dua tale na ivakavuvuli vakayalo mai na lotu lasu. Na ka e cakava o koya e vinakata me iVakadinadina sa na vakaraitaka kina ina isoqosoqo ni lotu oya, qai kilai raraba tale ga, ni sa sega ni lewenilotu.

13. Na ivakasala cava ena iVolatabu e vakaraitaka ni dodonu meda lako tani mai na lotu lasu?

¹³ “Dou kakua ni veitokani vata vakatani kei ira era sa sega ni vakabauta,” e vola na yapositolo o Paula. “Sa veitokani vakaevei na yalododonu kei na tawa-yalododonu? se rau sa veiwekani vakaevei na rarama kei na butobuto? se rau sa veivinakati vakaevei na Karisito kei Piliali? se rau sa vakaitavi vata vakaevei ko koya sa vakabauta kei koya sa sega ni vakabauta? se rau na to vata vakaevei na vale ni Kalou kei na veimatakau? . . . Mo dou qai lako tani maivei ira, ia dou tawasei tu, sa kaya na Turaga [o Jiova], ka dou kakua ni tara na ka sa sega ni savasava.” (2 Korinica 6:​14-​17) Eda muria na veivosa oqori nida lako tani mai na lotu lasu. E okati tale beka ga ena ivakasala i Paula oya meda kua ni veitokani kei ira era lewe ni lotu lasu?

“Mo ni i Valavala Vakavuku”

14. Meda sa kua sara beka ga ni veimaliwai kei ira era lotu lasu? Vakamacalataka.

¹⁴ E dodonu beka vei ira na lotu dina mera sa kua sara ga ni veitaratara kei ira na lotu lasu? Meda sa kua sara ga ni veimaliwai kei ira eda sega ni vakabauta vata? Kena isau na sega. E kaya na ikarua ni ivunau levu: “Mo lomana na kai nomu me vaka ko lomani iko.” (Maciu 22:39) Eda vakaraitaka na noda lomani ira na kai noda ena noda kauta vei ira na itukutuku vinaka ni Matanitu ni Kalou. E laurai tale ga na noda lomani ira ena noda vakavulici ira ena iVolatabu kei na noda vakaraitaka vei ira mera lako tani tale ga mai na lotu lasu.

15. Na cava na ibalebale ni noda “sega ni vakavuravura”?

¹⁵ Dina ga nida vunautaka na itukutuku vinaka vei ira na kai noda, ia nida imuri i Jisu eda na “sega ni vakavuravura.” (Joni 15:19) E ke e vakaibalebaletaki na vuravura me ilala tamata era sega ni veiriti kei na Kalou. (Efeso 4:​17-​19; 1 Joni 5:​19) Eda sega ni vakavuravura baleta nida sega ni muria na kena itovo, ivosavosa, kei na kena ivakarau e vakacudruya na Kalou. (1 Joni 2:​15-​17) Me salavata tale ga kei na ivakavuvuli “sa dau vakarusa na i vakarau vinaka ko ira na i tokani ca,” eda na sega ni veitokani kei ira era sega ni bulataka na ivakarau ni bula vakarisito. (1 Korinica 15:​33, VV) E ibalebale ni noda sega ni vakavuravura na noda ‘qarauna meda kua ni vakadukadukalitaki ena veika vakavuravura.’ (Jemesa 1:​27) O koya gona e sega ni kena ibalebale ni noda sega ni vakavuravura na noda sega sara ga ni veitaratara kei ira na tamata tale e so.​​—⁠Joni 17:​15, 16; 1 Korinica 5:​9, 10.

16, 17. Na cava me cakava na lotu Vakarisito vei ira na sega ni kila na veika dina ena iVolatabu?

¹⁶ Ia meda raici ira vakacava na sega ni kila na ka dina ena iVolatabu? E vola o Paula vei ira na ivavakoso e Kolosa: “Mo ni i valavala vakavuku vei ira e taudaku, ka mo ni vakayagataka vakavinaka na gauna. Me dau tau vakayalovinaka na nomuni vosa ka dau vakatuituinataki, ka mo ni dau kila se cava e dodonu mo ni kaya vei ira yadua ko veivosaki kaya.” (Kolosa 4:​5, 6, VV) E vola na yapositolo o Pita: “Mo ni vakarokorokotaki Karisito ga e yalomuni me nomuni Turaga. Mo ni dau vakarau tu e na veigauna kece ga mo ni vakamacalataka vua na tamata yadua e via kila na i nuinui sa tu vei kemuni. Ia mo ni kitaka e  na yalo malumalumu kei na vakarokoroko.” (1 Pita 3:​15, 16, VV) A vakasalataki ira na lotu Vakarisito o Paula “me ra kakua ni vosavakacacataka e dua na tamata se dau veivala, ia me ra yalomalua ga ka vakarokorokotaki ira na tamata kece ga.”​​—⁠Taito 3:​2, VV.

¹⁷ Nida iVakadinadina i Jiova, eda na sega ni voravora se qaciqacia vei ira na tani. Eda na sega ni vosa beci ira na lotu tani. Ia, eda na dau lewai keda vakamatau, kevaka mada ga era sega ni lomani keda se ra vosavakacacataki keda na itaukeinivale, o ira eda vakaitikotiko vata, se o ira na noda itokani vakacakacaka.​​—⁠Kolosa 4:6; 2 Timoci 2:​24.

“Taura Matua Nai Vakarau ni Vosa Dina”

18. Na ivakarau ni bula vakayalo vakaloloma cava e yacovi koya e suka tale ina lotu lasu?

¹⁸ Ni sa kila na ka dina, ena bau ka vakaloloma dina me dua e suka tale ina lotu lasu! E vakamacalataka na iVolatabu na ca ni kena vakayacori oqori: “Kevaka era a sa dro bula mada mai na veika dukadukali ni vuravura oqo e na vuku ni nodra kila na noda Turaga ka i vakabula ko Jisu Karisito, ka ra sa baci tacori tale ka rawai e na veika ca oqo e na qai yaco me ca vakalevu cake na kedra i tinitini mai na kedra i tekitekivu. . . . E vakaraitaka ni dina na i vosavosa koya: ‘Sa lesu tale na koli ki na nona lua,’ ka, ‘Sa qiliraki koya tale e na soso na vuaka sa vakasilimi oti.’ ”​​—⁠2 Pita 2:​20-​22, VV.

19. Na cava e bibi kina meda qarauna na veika e rawa ni vakaleqa na noda bula vakayalo?

¹⁹ Meda qarauna na veika e rawa ni vakaleqa na noda bula vakayalo. E rawa ni vakaleqai dina na noda bula vakayalo. E vakarota na yapositolo o Paula: “Sa tukuna vakamacala na Yalo Tabu ni na vuki tani eso mai na vakabauta e na gauna emuri, ni ra vakarogoca eso na yalo e dauveivakacalai kei na nodrai vakavuvuli na tevoro.” (1 Timoci 4:⁠1) Eda sa bula tiko oqo ena “gauna emuri.” O ira na sega ni dro tani mai na lotu lasu e rawa nira “veikauyaki e na ua kei na cagi kece ga ni veivakavuvuli, e na i vadi qaseqase era bulia na tamata me ka ni veivakacalai.”​​—⁠Efeso 4:​13, 14, VV.

20. Eda na taqomaki keda vakacava mai na veivakaleqai ni lotu lasu?

²⁰ Eda na taqomaki keda vakacava mai na veivakaleqai ni lotu lasu? Raica mada na veika sa vakarautaka vei keda o Jiova. Sa tu vei keda na Vosa ni Kalou na iVolatabu. (2 Timoci 3:​16, 17) E vakarautaka tale ga vakalevu o Jiova na kakana vakayalo ena nona vakayagataka “na dauveiqaravi yalo dina ka vuku.” (Maciu 24:​45, VV) Nida toso tiko ena dina, eda na sega beka ni via tovolea na ‘kakana dina e yaga vei ira na sa matua’ da qai gumatua ena sosoqoni ena vanua eda vulica kina na veika vakayalo? (Iperiu 5:​13, 14; Same 26:⁠8) Meda vakayagataka vinaka na isolisoli kece i Jiova me rawa kina nida “taura matua nai vakarau ni vosa dina” eda sa mai rogoca. (2 Timoci 1:​13) Ena qai rawa kina meda lako tani mai na lotu lasu.

Na Cava O sa Vulica?

• Na cava o “Papiloni na Ka Levu”?

• Na cava meda cakava meda lako tani kina mai na lotu lasu?

• Na cava meda qarauna de vakaleqa na noda bula vakayalo?

[Questions]

[iYaloyalo ena tabana e 28]

O kila na vuna e vakatauvatani kina o “Papiloni na Ka Levu” me yalewa ivalavala dukadukali?

[iYaloyalo ena tabana e 29]

Sa vakarau vakarusai o “Papiloni na Ka Levu”

[iYaloyalo ena tabana e 31]

Eda vakaraitaka na “yalo malumalumu kei na vakarokoroko” nida veitaratara kei ira eda sega ni vakabauta vata