Veiqaravi ena iVavakoso e Duatani na Kena Vosa

E VOLA na yapositolo o Joni: “Au sa qai raica e dua tale na agilosi, ni sa vuka tu e macawa, ka sa tu vua e dua na i Tukutuku Vinaka tawa mudu, me kacivaka vei ira era tiko e vuravura, ki vei ira kece ga na veimatanitu kei na veiyavusa, kei na veimataqali vosa kei na veimataqali tamata.” (Vakatakila 14:​6, VV) E vakayacori na raivotu vakaparofisai oqo ena kena vunautaki na itukutuku vinaka ni Matanitu ni Kalou ena veiyasa i vuravura kece, ena veimataqali vosa. Levu na veimataqali vosa oqo era vosataka o ira era sa biuta na nodra vanua dina mera sa lai vakaitikotiko e vanua tani. O ira oqo era sa rogoca na itukutuku vinaka ena nodra vosa sara ga, vei ira na iVakadinadina i Jiova gugumatua era sa vulica na vosa oqori.

O dua beka vei ira na iVakadinadina era veiqaravi ena ivavakoso e duatani na kena vosa? Se o sa nanuma tiko mo na qai cakava? Mo rawata na ka o sa nanuma tiko oqori, e dodonu me vinaka na nomu inaki qai dei na yalomu. Me nomu inaki mo vukei ira tale e so mera vulica na ka dina ena Vosa ni Kalou, oqo na sala vinaka mo vakaraitaka kina nomu lomani ira na tamata kecega vakauasivi nomu lomana na Kalou. (Maciu 22:​37-​39; 1 Korinica 13:⁠1) Oqo sara ga e dodonu me uqeti iko mo via vukei ira kina e so tale mera kila na Kalou. Me kua ni vu ena nomu taleitaka wale ga na veimaliwai, na kakana, kei na nodra itovo e dua tale na matatamata se ilawalawa. O nanuma beka ni sa rui dredre nomu vulica e duatani tale na vosa? De dua ena yaga sara ke tiko vei iko na rai dodonu. “Me kua ni vakayalolailaitaki iko nomu saga mo vulica na vosa vou,” e kaya o James, a vulica na vosa vakajapani. Nomu kila ni levu era a vulica na vosa vou era sa rawa ni vosataka ena gauna oqo, ena uqeti iko mo vosota tiko ga, mo kua tale ga ni yalolailai. Ia o na vulica vakacava e dua na vosa vou? Na cava ena gadrevi vei iko me rawarawa kina nomu veisau ina ivavakoso vou o sa lai lewena? Cava mo na cakava mo kaukaua tiko ga kina vakayalo?

Dredre ni Vuli Vosa

Levu na sala e rawa ni vulici kina e dua na vosa. O ira na gonevuli e duidui na iwalewale ni nodra vuli, vaka kina o ira na qasenivuli e duidui na sala era veivakavulici kina. Ia e levu vei ira na gonevuli e rawarawa qai totolo na nodra vuli ke vakavulici ira e dua na qasenivuli e vakaivola. O na kila e levu na vosa vou ke o dau wilika na iVolatabu, ivola vakaivolatabu, kei na nomu dau rogoca na kaseti ena vosa vou o sa vulica tiko. Oqo ena rabailevu kina na vosa o kila, matata tale ga kina vei iko e so na vosa e dau vakayagataki ena ivavakoso. Ena yaga tale ga ena tikina oqo na nomu dau rogoca na porokaramu veiganiti ena retio, TV, kei na vidio. E dau yaga na vuli leleka e caka e veisiga, mai na vuli balavu e veivakaocai, qai caka vakavudua.

Na vulici ni dua na vosa e vaka na vuli qalo. O na sega ni kila na qalo ke o wilika ga na kena ivola. Mo na lako sara ga i wai mo lai tovolea kina. E vaka tale ga kina na vulici ni dua na vosa. Ena dredre mo kila ke o vuli ga. Ena vinakati mo veivosaki kei ira era vosataka na vosa o vulica tiko ena kena levu ga e rawa​​—⁠vakarogoca na nodra veivosaki, veimaliwai kei ira, qai kena  ilutua mo vosa sara ga! Na sala vinaka duadua me vakayacori kina oqo na cakacaka vakavunau. Rawa mo dau vakayagataka ena cakacaka vakavunau na veivosa o se qai vulica ga. “De dua o na taqaya,” e kaya o Midori, e vulica tiko na vosa vakajaina, “ia o ira na itaukeinivale era na marautaka na noda sasaga na iVakadinadina. Oqo na ka ena uqeti ira mera rogoca na ka eda tukuna. Nida tukuna ena nodra vosa, ‘Ni bula vinaka,’ o na raica sara ga na nodra marau ra qai taleitaka mera vosa vei iko!”

E yaga tale ga vakalevu na soqoni vakarisito. Tovolea me bau dua na nomu ivakamacala ena veisoqoni. Sa macala tu ga ni o na taqaya, ia kua ni yalolailai. O ira na lewe ni vavakoso era tokona na nomu sasaga! E kaya o Monifa, e vulica tiko na vosa vakorea: “Au vakavinavinaka vua e dua na taciqu vakayalo ni dau mai dabe vata kei au ena veisoqoni, qai dau vola vei au na ibalebale ni so na vosa e cavuti. E vukei au sara ga na nona kauai kei na nona tokoni au.” Ni sa levu na vosa o kila, o sa na rawa ni vakasama sara ga ena vosa vou oya​​—⁠o na sega ni vakadewataka tale tiko ena nomu vakasama na vosa yadua.

Na imatai ni ka mo saga ena nomu vuli vosa, oya mo ‘cavuta na vosa e rawa ni kilai.’ (1 Korinica 14:​8-​11) Era na sega ni kauai na rogoci iko ke so ga na ka lalai o cavuta cala, ia ke sa sivia tale, cala tale ga vakalevu na itautau ni nomu vosa, lakolako era sa na sega ni kauaitaka na itukutuku o vakasavuya. Nomu kauaitaka ena kena itekivu na icavucavuti kei na ituvatuva dodonu ni vosa o na sega kina ni vakamatauna e dua na ivakarau ni vosa e cala, qai dredre mo veisautaka. E vakatura o Mark, a vulica na vosa vaka Swahili: “Kerei ira era madila ena vosa o vulica tiko mera dau rogoci iko, mera vakadodonutaki iko tale ga, qai vakavinavinakataki ira!” Ia kua ni namaka mera sa na vukei iko tiko ga e veigauna kece. Ni o vakarautaka tale ga na nomu vunau se ivakamacala vakayagataka mada ga na vosa o sa kila rawa se na kena o sa dikeva oti mai, dina ni o na qai kerea e dua me dikeva na veika o sa vakarautaka. Oqo ena vakatotolotaka na vuli qai rawa tale ga mo vosa ena nuidei.

Kua ni Soro

“Na vulici ni dua tale na vosa e bau cakacaka dredre dina,” e kaya o Monifa. “So na gauna au via soro sara ga. Ia, au qai nanuma na nodra dau taleitaka vakalevu na vuli iVolatabu mera rogoca na ka dina titobu vakayalo niu vakamacala ena vosa vakorea rawarawa ga, kei na nodra dau marautaka tale ga na mataveitacini na toso lailai au sa bau rawata.” Oqo na ka bibi: Kua ni dau soro vakarawarawa. Na nomu isausau mo vakavulica na ka dina mai na iVolatabu, na ka dina ena rawati kina na bula. (1 Korinica 2:​10) Ia, nomu vulica mo veivakavulici ena iVolatabu ena dua tale na vosa ena vinakati sara ga kina na sasaga. Kua ni vakatauvatana na nomu toso kei na dua tale. E duidui na ivakarau ni toso ni vulici na vosa vou. Bibi gona mo kauaitaka mada ga na nomu toso. (Kalatia 6:⁠4) “Na vulici ni dua na vosa e vaka na cabeti ni ikabakaba,” e kaya o Joon, a vulica na vosa vakajaina. “Na gauna sara ga o nanuma kina ni o sa tu vakadua o qai vakila ni nomu kila na vosa e sa toso cake tale ena dua na ivakatagedegede.”

Na vulici ni dua na vosa vou e sega ni taura ga e dua na gauna lekaleka, e ka ni bula taucoko. O koya gona marautaka na nomu vuli qai kua ni namaka vakasivia na ka. (Same 100:⁠2) Sega ni  na levei rawa na cala, ena basika ga baleta ni tiki ni vuli. Gauna e tekivu vunau kina ena vosa vakaitali e dua na lotu Vakarisito, a tarogi taukeinivale, “O kila na itataviraki ni noda bula?” A via taroga na “inaki ni noda bula.” E dua na iVakadinadina se qai tekivu vulica ga na vosa vakapoladi a sureti ira na lewe ni ivavakoso mera lagata na koli, a via tukuna mera lagata na sere. E kaya e dua e vulica tiko na vosa vakajaina vei ira na vakarorogo mera vakabauta na vatanivola i Jisu, e dina ni a via tukuna na isoro i Jisu. Na veisau ga vakalailai ni rorogo ni domona e veisautaka sara ga na ibalebale ni ka e tukuna. Dua na ka e vinaka kina na noda cavuta cala na vosa baleta nida vulica kina na kena icavucavuti dina.

Veiqaravi ena iVavakoso

Dua na ka e tawasea na tamata na duidui ni vosa e vosataka. Ia, sega ni o koya ga oya. Sa qai tawase ga vakalevu ena duidui ni itovo, duidui ni vanua e cavutu mai kina, kei na duidui ni matatamata e lewena. Ia e rawa ni ulabaleti na ilati kece oqori. E dua na turaga e vakadikeva tiko na veika e baleti ira na veimatalotu vosa vakajaina e Urope e kaya ni dua na ka era kilai tani kina na iVakadinadina i Jiova, oya na nodra sega ni veivakaduiduitaki. E raica rawa ena kedra maliwa na iVakadinadina “nira sega ni okata na duidui vakayavusa, kei na duidui vosa, me dua na ilati ena kedra maliwa. Era vakayagataka na vosa kece ga mera vulica kina na Vosa ni Kalou.” Io, e sega ni tawasei ira na lotu Vakarisito dina na duidui vakamatatamata se duidui cava tale, baleta nira muria ga na idusidusi ena iVolatabu. O ira era ‘vakaisulu ena tamata vou’ era na sega ni veivakaduiduitaki, veitalia se ra ‘kai Jutia se kai tani.’​​—⁠Kolosa 3:​10, 11, VV.

O ira kece ena ivavakoso e dodonu mera saga na duavata. Oqo ena vinakati kina meda tu vakarau meda ciqoma na rai kei na ivalavala e duidui mai na ka eda nanuma. Na dui dre nona mua ena sega ni kauta mai na duavata. (1 Korinica 1:​10; 9:​19-​23) E duidui na ka e dau divi kina na matatamata, saga mo kila na duidui oqo, mo taleitaka tale ga. Ia kua ni guilecava, na veimaliwai vinaka kei na duavata e rawati ga ena loloma dina.

Levu na ivavakoso e duatani na kena vosa era tekivu ga ena iwasewase lalai, qai vakalevu mera lewena taumada o ira era vulica na vosa vou kei ira era se qai vuli iVolatabu. O koya gona, e rawarawa sara ni basika na duiyaloyalo ena iwasewase lalai vaka oqo ni vakatauvatani kei na ivavakoso levu e sa cici makawa tu mai. Mera saga gona na lotu Vakarisito matua vakayalo na bula veiyaloni. Era na tubu vakayalo na ka vou kevaka era vakila na veikauaitaki kei na veilomani ena nodra veimaliwai ena ivavakoso.

O ira era bole mera veivuke ena ivavakoso e duatani na kena vosa e dodonu mera kua ni namaka vakasivia na ka. E dua na qase ena ivavakoso vaka oqori, o Rick, e vakamacalataka: “E so na lewe ni ivavakoso oqo era se vou ena dina, era sega sara ni maqosa ena cicivaki ni ivavakoso ni vakatauvatani kei ira ena ivavakoso sa cici dede tu mai. Ia na ka vinaka e dau laurai vei ira oya na veilomani kei na gugumatua. Yaco gona me levu na tataleitaki era lako mai ena dina.” E yaga vakalevu ena ivavakoso na nomu dau tiko ena soqoni kei na nomu dau tu vakarau mo veivuke, ena gauna sara mada ga o se vuli vosa tiko kina. Na toso vakayalo ni ivavakoso e vakatau vakalevu ena noda cakacaka vata.

Saga Mo Kaukaua Tiko ga Vakayalo

E dua na tacida tagane se qai vou ga ena dua na ivavakoso e duatani na kena vosa, a rogoca e dua na tina a vukei luvena tiko me dua nona ivakamacala ena soqoni. “Nau, vakacava me lekaleka ga?” e kerea o gone. “Sega luvequ,” e sauma o tinana. “Laiva na isaunitaro leleka vei ira era vulica tiko na noda vosa.”

Ni dua na uabula e se sega ga ni taladrodro nona vosa ni sa oti e vica na vula se yabaki nona vulica tiko na vosa oya, ena rawa ni veivakayalolailaitaki, vakamosiulu, qai vakamalumalumutaki koya tale ga vakayalo. “E dau totolo sara noqu yalolailai ni vakaiyalayala ga na ka au rawata,” e kaya o Janet, sa vosa vakasipeni ena gauna oqo. O Hiroko, a vulica na vosa vakavalagi e nanuma nona dau kaya lo e lomana: ‘Na  koli mada ga kei na pusi ena yalava era kila cake na vosa vakavalagi vei au.’ E kaya o Kathie: “Ni se bera niu toki ena ivavakoso vosa vakasipeni a vica toka na noqu vuli iVolatabu qai dau robo ga na noqu ivola ena levu ni veisikovi lesu ia oqo e se sega mada ga ni dua. E vaka me sega ni yaga tiko na noqu cakacaka.”

E bibi ena ituvaki vaka oqo me tiko vei keda na rai dodonu, meda kua tale ga ni yalolailai. Ena gauna e sotava kina na yalolailai o Hiroko, e kaya: “Ke sa rawa vei ira mera vulica e dua tale na vosa, ena rawa tale ga vei au.” E kaya o Kathie: “Au dau vakasamataki watiqu, o koya sa toso vinaka sara tiko qai levu na ka e qarava ena ivavakoso. E vukei au oya meu valuta na dredre meu qai toso tiko ga. Levu tale na ka meu vulica, ia na ka au sa bau kila au sa rawa kina ni vunau, meu veivakavulici tale ga. Oqo e vakamarautaki au dina.” E tomana o Jeff na wati Kathie: “E rawa ni na vakatubu rarawa nomu sega ni kila na veika kece e tukuni ena veika me kacivaki vaka kina ena bose ni qase. Au na kerea ga ena yalomalumalumu ke rawa ni vakamacalataki tale vei au, ra qai marau na mataveitacini mera veivuke.”

O rawa ni oca vakayalo ni o cakacaka voli ena ivavakoso e duatani na kena vosa, e bibi kina mo kua ni vakawaletaka nomu bula vakayalo. (Maciu 5:​3, NW) E kaya o Kazuyuki, a veiqaravi voli ena yalava vosa vakapotukali ena vica vata na yabaki: “E bibi meda kania na kakana bulabula vakayalo. Oya na vuna keitou dau vuli vakavuvale, keitou vakarautaka tale ga vakavuvale na soqoni ena neitou vosanisucu kei na vosa vakapotukali.” So na gauna era dau tuvanaka kina e so mera tiko mada ga ena soqoni e vakayacori ena nodra vosanisucu. Kena ikuri, e bibi tale ga meda dau vakacegu vakavinaka.​​—⁠Marika 6:​31.

Vakasamataka Vinaka

Ke o nanuma tiko mo na toki ina dua na ivavakoso e vakayagataki kina e dua tale na vosa, mo vakasamataka sara vakavinaka. (Luke 14:28) Ena vuku ni tikina oqo, e bibi duadua na nomu bula vakayalo kei na nomu veiwekani kei Jiova. Masulaka na kemu ituvaki. Nanumi kemu isa kei ira na luvemu. Rawa ni o taroga, ‘Vakacava na kequ ituvaki vakayalo, au na rawata beka na sasaga oqo, vakauasivi ni na taura e dua na gauna balavu?’ E ivakaraitaki ni yalomatua ke o cakava na ka ena yaga vakayalo vei iko kei ratou kece na nomu lewe ni vuvale. Levu tu na itavi e okati ena kacivaki ni Matanitu ni Kalou, vaka kina na marau o na vakila, veitalia se vanua cava o digia mo veiqaravi kina.

Vei ira e rawa nira veiqaravi ena ivavakoso e duatani na kena vosa, e levu sara na ka ni veivakalougatataki era na sotava. “Oqo e dua dina na ka marautaki au sotava ena noqu bula,” e kaya o Barbara, ena nodrau a toki vakaveiwatini ena ivavakoso vosa vakasipeni. “E vaka ga au se qai tekivu vulica tale na iVolatabu. Au vakavinavinaka ni rawa ni keirau cakava oqo, vakauasivi ni sega ni rawa me keirau cakacaka vakadaukaulotu ena dua tale na vanua.”

E vica vata na udolu nikua, e duidui nodra yabaki ni bula, era bole e veiyasa i vuravura mera vulica e dua tale na vosa mera vakatetea kina na itukutuku vinaka. Ke o dua vei ira oqo, me vinaka tiko ga na nomu inaki, me dodonu nomu rai, me dei tale ga na yalomu. Kena ilutua vakararavi vei Jiova, ena qai vakalougatataka na nomu sasaga.​​—⁠2 Korinica 4:⁠7.

[iYaloyalo ena tabana e 18]

E rawarawa qai totolo na vuli ke veivakavulici e dua na qasenivuli e vakaivola

[iYaloyalo ena tabana e 20]

Me kua ni vakawaletaki nomu bula vakayalo ni o vulica tiko e dua tale na vosa