Na Cava me Veirauti Kina na Ka Eda Cakava?

O JIOVA e ivakaraitaki uasivi ni kena veiraurautaki na veika me caka. “Sa sega ni cala na nona cakacaka.” E sega gona ni kaukaua na nona vakatauca na nona lewadodonu, ni dau lako vata kei na nona yalololoma. (Vakarua 32:4) E taucoko vakaoti na nona loloma baleta na veika e cakava e salavata kei na lawa uasivi. (Same 89:14; 103:13, 14) O rau na vuda erau a buli me veiraurau vinaka na nodrau bula. E vakarauta gona na veika kece erau cakava. Ia, ena gauna erau valavala ca kina, e sa votu e kea na malumalumu​—rau sa sega ni qai tamata uasivi​—sa yaco tale ga me sega ni veiraurau na veika erau cakava.​—Vakarua 32:5.

Me dua mada na kena ivakatautauvata: O sa bau vodoka e dua na motoka se basikeli e tiko na kena malumalumu, oya ni sega ni moumouta vinaka na kena taya, e dudu vakalevu toka e dua na yasana? Sega ni vakabekataki ni dudu ni taya oqori ena vakavuna me tavaladelade na ilakolako qai ririkotaki tale ga. Gadrevi gona me vakavinakataki na taya ni bera ni ca sara vakalevu se ni bera ni loru. Ena vakasama vata oqori, e tiko tale ga na noda malumalumu nida sa sega ni tamata uasivi, e sega gona ni na taucoko vakaoti na noda ivalavala. Ke da qai sega ni cakava e dua na ka ina veika e vakatauvatani kei na “dudu ni taya” ena noda bula, e rawa ni tavaladelade vakalevu na noda ilakolako qai ririkotaki tale ga.

So na gauna na ka eda kilai tani kina e rawa nida cakava tale vakasivia. Me kena ivakaraitaki, era vakaroti na Isireli ena Lawa i Mosese mera cula na wa pelu ena bele ni nodra isulu, ia ena nodra vinakata na Farisi ena gauna i Jisu mera duidui mai vei ira na vo ni lewenivanua, era mani “vakalevutaka [kina] na tutu ni nodrai sulu.” Na nodra inaki, oya mera rairai yalododonu cake mai vei ira na vo ni Isireli.​—Maciu 23:5; Tiko Voli mai na Lekutu 15:38-40.

Nikua e so na tamata era cakava na ka mera kauaitaki kina, veitalia ke mani vakasevoto vei ira na tani. Vakavuqa ni vu oqori ena nodra gadreva dina mera galeleti se mera bau kauaitaki, me kua nira raisiviti. Ia, na ka e gadreva dina e dua na lotu Vakarisito ena sega ni vakacegui mai na nona vakasiviataka na ka e vakacakava, se na nona isulusulu se me sega ni veiraurau na nona rai.

Me Veiraurau na Noda Rai me Baleta na Cakacaka

Se mani vakacava na ivakatagedegede ni noda bula, se vanua cava eda tiko kina, eda kila ni noda cakava na cakacaka yaga e vakainaki kina na noda bula. Eda a buli meda kunea na marau ena cakacaka vaka oqo. (Vakatekivu 2:15) E vakacala gona na iVolatabu na vucesa. Matata vinaka na ka e kaya na yapositolo o Paula: “Me kakua ni kana ko koya sa sega ni cakacaka.” (2 Cesalonaika 3:10) Io, nona vucesa e dua ena tini ena dravudravua qai sega ni marau kina, ena sega tale ga ni vakadonui koya na Kalou.

Ena dua tale na yasana, e so e sivia tale na gauna era vakayagataka ena nodra cakacaka, ra sa bobula sara ga kina. Era biubiu e vale ena matakalailai, ra qai suka bera sara, era kaya nira cakava tiko oqo ena vuku ni nodra vuvale. Ia, na nodra yalodina vakasivia ina nodra cakacaka ena rawa ni vakaleqa tale na nodra vuvale. E dua na radinivale e dau cakacaka tale tiko na watina ni sa suka na cakacaka, e kaya: “Au tu vakarau meu solia na iyaya kece ena noqu vale vinaka oqo me rawa ni bau tiko kina kei keitou na veitinani o tama i keitou.”  O ira era digia mera cakacaka vakasivia mera vakasamataka vakabibi na ka a vakila o Tui Solomoni, ena nona kaya: “Au a qai vakaraica na cakacaka kecega ka sa cakava na ligaqu, kei na ogaoga ka’u a vakaogai au kina: ka raica, sa ka wale kecega ka sa ka ni oca wale.”​—Dauvunau 2:11.

Io, ena veika e vauca na cakacaka, meda qarauna me veiraurau na ka eda cakava, oya meda kua ni vucesa se meda cakacaka tale vakasivia. Meda tamata dau mamakutu, ia ena gauna vata oya meda nanuma tiko ni kevaka eda bobula ina cakacaka e sega wale ga ni na seavu na noda marau, e rawa tale ga nida na vakayalia kina e levu tale na ka.​—Dauvunau 4:5, 6.

Me Veiraurau na Noda Raica na Ka ni Veivakamarautaki

E sa parofisaitaka tu mai na iVolatabu ni o ira “na tamata” ena noda gauna era “na lomana vakalevu na marau a ra na lomani koya na Kalou vakalailai.” (2 Timoci 3:2, 4) Na qarai ni marau e dua na iyaragi e dau vakayagataka o Setani me vagolei ira tani na tamata mai vua na Kalou. Sa takalevu sara na kena okati me ka ni veivakalasai se ka ni veivakamarautaki na qito rerevaki. E toro cake tiko ga na levu ni qito vaka oqo qai levu sara era vakaitavi kina. Na cava e sa galeleti kina vakalevu? Baleta e levu era sa sega ni lomavakacegu ena nodra bula e veisiga, ra mani qara na sala e so mera marau kina. Ia nira qara tiko na marau vaka oqo era na lai cakava kina e so na ka e ririkotaki sara. Era qarauna na lotu Vakarisito matua mera kua ni vakaitavi ena qito e vakarerevaki baleta nodra doka na bula kei koya na kena ivurevure.​—Same 36:9.

E vei na vanua rau a biu kina na imatai ni tamata ni buli rau oti na Kalou? Ena were o Iteni, e kena ibalebale ena vosa taumada e volai kina na iVolatabu, “Marau,” se “Matalau.” (Vakatekivu 2:8) Matata vakasigalevu ni okati ena inaki ni Kalou me matalau na bula qai marautaki.

O Jisu na ivakaraitaki uasivi meda vakatotomuria ena noda veiraurautaka na ka ni veivakamarautaki. A taucoko nona yalodina me cakava na loma i Jiova, qai sega ni cegu nona muria na lawa ni Kalou kei na yavu ni lawa. E vukei ira na tamata ena gauna mada ga e dau wawale kina. (Maciu 14:13, 14) Ia, e dau ciqoma o Jisu na veisureti ena kanavata, tiko tale ga na gauna e dau vakacegu kina. E kila vinaka nira vakalewai koya na nona meca ena vuku ni tikina oqo. Era kaya me baleti koya: “Raica, a tamata daukana ka daugunu waini.” (Luke 7:34; 10:38; 11:37) Io, a sega ni vakabauta o Jisu ni dodonu meda vakuai keda mai na ka ni veivakamarautaki kece ena noda bula.

E macala gona ni ka vakavuku me tiko vei keda na rai dodonu me baleta na ka ni veivakalasai. Ena sega ni kauta mai vei keda na marau dina na noda vakabibitaka na ka ni veivakalasai se na ka ni veivakamarautaki. E rawa ni vakavuna meda weletaka na veika e bibi cake, okati kina noda veiwekani kei na Kalou. Ia, e sega ni tukuni meda vakuai keda mai na ka ni veivakalasai kece, se meda vakalewai ira tale e so e veiraurau na nodra vakaitavi ena ka ni veivakamarautaki.​—Dauvunau 2:24; 3:1-4.

Eda na Marau ke Veiraurau na Ka Eda Cakava ena Noda Bula

A vola na tisaipeli o Jemesa: “[E]da sa cala kecega e na ka e vuqa.” (Jemesa 3:2) O keda yadua eda rawa ni vakadinadinataka oqo nida tovolea tiko me veiraurau na ka eda cakava. Na cava ena vukei keda me veiraurau tiko ga na ka eda cakava? Ena vinaka meda kila na ka eda vinaka kina kei na ka eda malumalumu kina. Sega ni rawarawa noda cakava oqo. De dua eda sega ni kila ni sa sega ni veiraurau tiko na ka eda cakava. E ka vakavuku gona meda kabiti ira na lotu Vakarisito matua, da rogoca tale ga na nodra ivakasala veiganiti. (Kalatia 6:1) Eda rawa ni taro ivakasala vua e dua noda itokani nuitaki se vua e dua na qase ni ivavakoso sa qaseta na veiqaravi. Me salavata kei na Vosa ni Kalou, na ivakasala vakaivolatabu vaka oqo e vaka na “iloilo” meda raica kina se vakacava nona raici keda o Jiova.​—Jemesa 1:22-25.

O koya gona, e dua na ka totoka ni rawa nida veiraurautaka na ka eda cakava ena noda bula. Nida sasaga vakaukaua, salavata kei na veitokoni i Jiova, ena rawa kina ni veiraurau na ka eda cakava da qai marau tale ga. Ena vinaka kina noda veiwekani kei ira na tacida lotu Vakarisito, da qai ivakaraitaki vinaka vei ira eda vunau vei ira. Kena ilutua, eda na vakadamurimuria vakavoleka na noda Kalou o Jiova ena nona dauloloma dau qai veiraurau na ka kece e cakava.​—Efeso 5:1.

[iTaba ni Credit Line ena tabana e 28]

©Greg Epperson/age fotostock