iVakaraitaki Vinaka ni Dau Dina

O NELMA e dua na lotu Vakarisito e dau veikoti ena korolevu o Cruzeiro do Sul, Brazil, a vakatovolei na nona yalodina ena dua na gauna wale tiko ga oqo. A waluvu na yasayasa e vakaitikotiko kina, mani cautaka yani e so na isulu e dua na marama e daukotivi koya o Nelma. Ni vakadeuca tiko na isulu o Nelma e kunea e rauta ni $1,000 na ilavo ni Mereke ena taga ni vica na tarausese.

Na ilavo e kunea o Nelma e rawa ni kena isau ena vitu na vula, qai gadreva dina sara tu ga na ilavo ena tikinigauna oya. Vakauasivi ni a vakacacani nona vale ena waluvu, a voleka tale ga ni rusa kece na veika e taukena o tamana kei ratou na tacina. E rawa gona ni a vakayagataka na ilavo oya me vakaotia kina na vakavinakataki ni nona vale, qai solia na kena vo ni ilavo me vukei iratou na wekana. Ia ena vuku ni nona lewaeloma e vakavulici ena iVolatabu a mani vakasuka na ilavo o Nelma.​—Iperiu 13:18.

Ena siga e tarava, a lako vakamataka i cakacaka o Nelma ni se bera ni dola na valeniveikoti. A veitaratara sara kei na marama daunibisinisi a cautaka yani na isulu me vakavinavinakataki koya, qai kaya tale ga vua o Nelma ni ka e kunea ena ibinibini isulu oya ena sega ni via maroroya. E marau vakalevu na marama daunibisinisi ni sa taura na ilavo. Oya na ilavo a vakarautaka tu me saumi ira kina na nona tamata cakacaka. “Na tamata dau dina, sa kunekune na yaloka ni dilio,” e kaya na marama daunibisinisi.

Io, e so era na rairai nanuma ni sega na betena meda dau dina. Ia, vei ira era saga mera vakamarautaka na Kalou o Jiova, era mareqeta na itovo oqo. (Efeso 4:25, 28) “Au na mocemoceica ena bogi kevaka meu a maroroya na ilavo oya,” e kaya o Nelma.