Uasivi Duadua na iVakarau ni Veiliutaki i Jiova!
Uasivi Duadua na iVakarau ni Veiliutaki i Jiova!
“Ko Koya sa Cecere sara e na matanitu ni tamata.”—TANI. 4:17.
1, 2. Na cava eso na vuna e guce kina na veiliutaki vakatamata?
E GUCE na veiliutaki vakatamata qai sega ni lomalomaruataki na tikina qo. Na vuna, oya ni sega na vuku vua na tamata me vinaka kina nona veiliutaki. E vakadinadinataki nikua na guce ni nodra veiliutaki, qai levu era ‘daulomani ira ga, era lomana na ilavo, era dau tukutukuni ira, era qaciqacia, era sega ni yalodina, era sega ni via okati ena dua na veiyalayalati, era dau vakaucaca, era sega ni lewa vinaka na yalodra, era na voravora, era na sega ni vinakata na ka e dodonu, era dau veinakicataki ra qai dokadoka.’—2 Tim. 3:2-4.
2 Ena gauna makawa, rau cata na imatai ni noda itubutubu na ivakarau ni nona veiliutaki na Kalou, rau cakava qori ena nodrau nanuma ni rau na lewai rau ga. Ia na kena dina, rau tokona sara tiko ga na ivakarau ni veiliutaki i Setani. Rauta ni ono na udolu na yabaki nona veiliutaki tiko vakaca na tamata—qai veiuqeti tiko kina na “turaga ni vuravura” o Setani—vakavuna me ca duadua kina na ivakarau ni bula nikua ni vakatauvatani kei na veitabagauna sa oti. (Joni 12:31) E tukuna e dua na ivola na Oxford History of the Twentieth Century me baleta na ivakarau ni bula nikua, ni rui tawayaga meda “sasagataka na vuravura me uasivi.” E vakamacalataka tarava: “E sega ni dredre wale ga me rawati na bula uasivi, ia na sasaga e caka me rawati kina, e dau lai tini tale ena leqa, tini ena veileqaleqati vakapolitiki kei na ivalu vakadomobula.” E vakadeitaka qori, ni guce na veiliutaki vakatamata!
3. Ena vakacava sara mada na ivakarau ni veiliutaki ni Kalou ke rau sega ni ivalavala ca o Atama kei Ivi?
3 E rarawataki dina nodrau cata na imatai ni noda itubutubu na veiliutaki e uasivi duadua, ya na veiliutaki ni Kalou! Dina nida sega ni kila na sala ena liutaka kina na vuravura o Jiova, ke rau a yalodina o Atama kei Ivi. Ia eda vakadeitaka ke ra ciqoma na veiliutaki vaKalou na kawatamata kece ena gauna ya, ena vakilai na loloma qai sega na veivakaduiduitaki. (Caka. 10:34; 1 Joni 4:8) Ni tawavakaiyalayala na vuku ni Kalou, eda nuidei tale ga ni na sega ni yaco na leqa e vu mai na veiliutaki vakatamata, vakavo ke ra talairawarawa na kawatamata ena nona veiliutaki. A rawa sara ga vua na veiliutaki vaKalou me vakaceguya na tamata “kecega e na ka era gadreva.” (Same 145:16) Macala ga ni dodonu me dua na veiliutaki uasivi. (Vkru. 32:4) E rarawataki dina nodra cata na kawatamata na veiliutaki uasivi ya!
4. E vakacava sara mada na dede ni nona vakatarai me veiliutaki o Setani?
4 E vinaka me nanumi toka qo, dina ni vakatara o Jiova mera veiliutaki na tamata, a vakaraitaka tiko ga nona dodonu me liutaka nona ibulibuli. Na tui kaukaua mada ga e Papiloni e qai vakaukauataki me kila ni “Cecere sara e na matanitu ni tamata” o Jiova. (Tani. 4:17) Koya gona na Matanitu ni Kalou ena vakavuna na kena vakayacori na loma ni Kalou. (Maciu 6:10) E vakatara ga vakalekaleka o Jiova me veiliutaki o Setani “na kalou ni veika vakavuravura,” me vakalasui kina nona ile na dauveivorati qo. (2 Kor. 4:4; 1 Joni 5:19) Ia e vakaiyalayala ga na ka e vakatara o Jiova me cakava o Setani. (2 Vei. 20:6; vakatauvatana Jope 1:11, 12; 2:3-6.) E tiko tale ga eso era digia mera talairawarawa tiko ga ina veiliutaki ni Kalou, dina nira bula tiko ena vuravura e veiliutaki kina na Meca levu ni Kalou.
Veiliutaki e Isireli na Kalou
5. Na cava era yalataka vei Jiova na Isireli?
5 Me tekivu mai na gauna i Epeli yaco sara ina nodra gauna na peteriaki, e levu era yalodina nira qaravi Jiova ra qai talairawarawa ina nona ivunau. (Iper. 11:4-22) Donuya na gauna i Mosese, a veiyalayalati o Jiova kei ira na kawa i Jekope na peteriaki, ra qai yaco mera matanitu o Isireli. Ena 1513 B.S.K., era yalataka na Isireli kei na nodra kawa, nira na ciqomi Jiova me nodra iLiuliu, ya nodra kaya: “A ka kecega sa kaya ko Jiova keimami na cakava.”—Lako 19:8.
6, 7. E vakacava na ivakarau ni nona veiliutaki na Kalou e Isireli?
6 E tiko na vuna e digitaki ira kina na Isireli o Jiova mera nona tamata. (Wilika Vakarua 7:7, 8.) Na digidigi qo e sega ni baleta wale ga nodra taqomaki na Isireli. E vauci tale ga kina na yaca ni Kalou kei na nona veiliutaki, rau qai bibi dina qo. Koya gona e nona itavi o Isireli me vakadinadinataka ni Kalou dina duadua ga o Jiova. (Aisea 43:10; 44:6-8) E tukuna vei ira o Jiova: “Ni kemuni sa matanitu savasava vei Jiova na nomuni Kalou, a sa digitaki kemuni ko Jiova maivei ira na matanitu kecega sa tiko e dela i vuravura, mo ni nona matanitu talei.”—Vkru. 14:2.
7 Na ivakarau ni nona veiliutaki na Kalou e sega kina ni guilecava nira sega ni uasivi na Isireli. Ena gauna vata ga qori, e uasivi nona lawa qai tukuni koya vakavinaka. Na ivakaro tale ga i Jiova a soli vei Mosese e dusia vakamatata nona savasava, nona taleitaka na lewadodonu, nona tu vakarau me veivosoti, kei na nona yalovosovoso. Ena gauna i Josua kei ira nona kawa, era talairawarawa ina ivakaro i Jiova qai marautaka na bula vakacegu kei na veivakalougatataki vakayalo. (Josua 24:21, 22, 31) E vakadinadinataki ena nodra gauna na Isireli na uasivi ni veiliutaki i Jiova.
Yaco na Leqa ena Veiliutaki Vakatamata
8, 9. Na vakatulewa cala cava era cakava na Isireli, cava e qai yaco?
8 Era dau vukitani ena levu na gauna na Isireli mai na veiliutaki ni Kalou, vakavuna me sega ni taqomaki ira kina o Jiova. Yaco na gauna era tukuna na Isireli vua na parofita o Samuela nira vinakata e dua na nodra tui. A tukuna o Jiova vei Samuela me rogoca nodra kerekere. E tukuna tarava o Jiova vei Samuela: “Ra sa sega ga ni beci iko, sai au ga era sa beca, me’u kakua ni nodra tui koi au.” (1 Sam. 8:7) Dina ni vakatara o Jiova me dua nodra tui, a vakasalataki ira ni na yaco na leqa ke ra veiliutaki na tamata.—Wilika 1 Samuela 8:9-18.
9 E vakaraitaka na ivolatukutuku makawa ni dina na ivakasala i Jiova. E yaco na leqa lelevu nira veiliutaki na tamata e Isireli, vakabibi na nodra tawayalodina sara ga na veiliutaki. Nida vakasamataka tiko na ivakaraitaki ya, eda sega kina ni kurabuitaka nodra guce na veiliutaki vakatamata era sega ni kilai Jiova, mera walia na leqa ena veitabagauna sa oti. Eso mada ga na daunipolitiki era kerea na veivakalougatataki ni Kalou me rawati kina na bula veiyaloni kei na tiko nuidei nira veiliutaki, ia e rawa vakacava vua na Kalou me vakalougatataki ira na sega ni vakamalumalumu ina nona veiliutaki?—Same 2:10-12.
Matanitu Vou e Liutaka na Kalou
10. Na cava e sega ni okati tale kina o Isireli me matanitu digitaki ni Kalou?
10 Era sega ni yalodina na Isireli ena nodra qaravi Jiova. Yaco na gauna mera cakitaka na Mesaia digitaki ni Kalou, vakavuna me biuti ira o Jiova qai vakaisosomitaki ira ena dua na ilawalawa era lewe ni matanitu vou. A mani tauyavutaki gona na imatai ni ivavakoso vaKarisito lumuti ena 33 S.K. Na ivavakoso qori e matanitu vou e liutaka na Kalou o Jiova. E tukuna o Paula nira “Isireli ni Kalou.”—Kala. 6:16.
11, 12. Na cava eso na ka rau tautauvata kina o ira na ivakatawa ena gauna e Isireli kei na “Isireli ni Kalou”?
11 E tiko na duidui kei na ka e tautauvata kina na Isireli makawa kei ira na “Isireli ni Kalou.” E duidui na ivavakoso vaKarisito vei Isireli makawa baleta ni sega na kena tui, sega tale ga ni gadrevi na isoro manumanu me cabori ena vuku ni ivalavala ca. Dua na ka rau tautauvata kina oya, ni tiko na ituvatuva me baleti ira na tagane matua se qase ni ivavakoso. (Lako 19:3-8) O ira na qase ni ivavakoso qo era sega ni lewai ira na qelenisipi, era vakatawani ira ga na ivavakoso qai liutaka na cakacaka vaKarisito. Era lomani ira na lewe ni ivavakoso yadua, ra cakava qo ena veinanumi kei na veidokai.—2 Kor. 1:24; 1 Pita 5:2, 3.
12 Nira vakasamataka vakatitobu na lewe ni “Isireli ni Kalou” kei na ‘so tale na sipi’ na ka e dau cakava o Jiova vei ira na Isireli makawa, e uqeti ira kina mera vakavinavinakataki Jiova vakalevu kei na ivakarau ni nona veiliutaki. (Joni 10:16) Kena ivakaraitaki, e dusia na itukutuku makawa ni rawa ni vakamuai ira na lewenivanua ena ka vinaka se ca o ira na veiliutaki e Isireli. Mai na ivakaraitaki qo, era vulica kina o ira na ivakatawa lotu vaKarisito nira sega ni veiliutaki me vakataki ira na tui ena gauna makawa, e dodonu gona mera ivakaraitaki vinaka ena vakabauta.—Iper. 13:7.
Sala e Veiliutaki Kina o Jiova Nikua
13. Na ka vakasakiti cava a yaco ena 1914?
13 Era vunautaka tiko nikua na lotu vaKarisito ni sa vakarau vakacavari na veiliutaki vakatamata. Ena 1914, a tauyavutaka kina o Jiova nona Matanitu e lomalagi ena veiliutaki ni nona Tui digitaki, o Jisu Karisito. Ena gauna vata qori, a soli kina vei Jisu na lewa “me ravuravu, me vakaotia sara nona ravuravu.” (Vkta. 6:2) A tukuni vua na Tui digitaki vou qo: “Mo ni lewa e na kedra maliwa na nomuni meca.” (Same 110:2) E ka ni rarawa nira sega ni vakamalumalumu na veimatanitu ina veiliutaki i Jiova. Nodra ivalavala e vaka sara ga ni “sega na Kalou [o Jiova].”—Same 14:1.
14, 15. (a) E liutaki keda vakacava ena gauna qo na Matanitu ni Kalou? Na taro cava meda tarogi keda kina? (b) E kilai vakacava nikua na uasivi ni veiliutaki vaKalou?
14 Era se vo tiko e vica na lumuti era lewe ni “Isireli ni Kalou.” O koya gona, nira taci Jisu era tomana tiko ga nodra “matataki Karisito.” (2 Kor. 5:20) Era lesi me dua na dauveiqaravi yalodina e vuku, me qarava qai vakarautaka na kakana vakayalo vei ira na lumuti kei na isoqosoqo levu e tubu tiko ga na kedra iwiliwili, qo o ira na lotu vaKarisito era le vica vata na milioni qai nodra inuinui mera bula tawamudu e vuravura. (Maciu 24:45-47; Vkta. 7:9-15) E vakadinadinataki ni vakalougatataka tiko o Jiova na ituvatuva qori ena nodra marautaka tiko na dausokalou dina na rawaka vakayalo.
15 Meda tarogi keda yadudua: ‘Au raica vakabibi na noqu itavi ena ivavakoso vaKarisito? Au sa tokona tiko na ivakarau ni veiliutaki i Jiova? Au marautaka me liutaki au o Jiova? Au sa vakadeitaka tiko beka meu na vunautaka tiko ga na Matanitu ni Kalou vei ira eso tale ena kena levu au rawata?’ Koya gona, vakailawalawa, ena vu mai lomada noda talairawarawa ena nona veidusimaki na iLawalawa Dauvakatulewa qai tokoni ira tale ga na qase ni ivavakoso. Nida cakava qori eda sa ciqoma tiko na ivakarau ni nona veiliutaki na Kalou. (Wilika Iperiu 13:17.) Noda yalorawarawa meda vakamalumalumu ina veiliutaki qori, ena rawati kina na duavata vakamataveitacini e vuravura, qai talei dina qori ena vuravura tatawasewase qo. Ena rawati tale ga kina na veiyaloni, cakadodonu qai vakalagilagi kina o Jiova. E vakadinadinataka qori ni uasivi duadua na ivakarau ni nona veiliutaki.
Vakacerecerei na iVakarau ni Veiliutaki i Jiova
16. Na cava me vakatulewataki ena gauna sara ga qo?
16 Sa voleka sara na gauna me tinimaki kina na ile a vakavotui mai Iteni. Koya gona, qo sara ga na gauna mera vakatulewa kina na kawatamata. Mera vakatulewataka yadudua se ra na ciqoma na ivakarau ni veiliutaki i Jiova, se ra na dei tiko ga ena ivakarau ni veiliutaki vakatamata. E ka dokai gona meda vukei ira na yalomalumalumu mera vakatulewa vakayalomatua. Dua na gauna wale ga qo ena Amaketoni, na ivakarau ni veiliutaki i Jiova ena sosomitaka vakadua na veimatanitu vakatamata e liutaka tu o Setani. (Tani. 2:44; Vkta. 16:16) Ena sega tale na veiliutaki vakatamata, qai veiliutaki na Matanitu ni Kalou ena vuravura taucoko. Ena qai vakacerecerei na ivakarau ni veiliutaki i Jiova.—Wilika Vakatakila 21:3-5.
17. Na itukutuku cava ena vukei ira na yalomalumalumu mera vakatulewa kina vakayalomatua me baleta na veiliutaki?
17 O ira na se bera ni vakatulewataka mera to vei Jiova, e vinaka mera masulaka qai vakasamataka na ka vinaka ena kauta mai na ivakarau ni veiliutaki vaKalou. E sega ni walia rawa na veiliutaki vakatamata na leqa e vu mai na basulawa, okati kina na nodra vakacaca na batikadi. Ena cavuraka laivi na veiliutaki vaKalou na ca kece ena vuravura qo. (Same 37:1, 2, 9) Nira veiliutaki na tamata, e sega ni taqei rawa na levu ni veivaluvaluti, ia na veiliutaki vaKalou ena “vakaotia nai valu mai nai yalayala kei vuravura.” (Same 46:9) Ena vakalesuya mai na veiliutaki vaKalou na nodra bula veiyaloni na tamata kei na manumanu! (Aisea 11:6-9) E vakilai vakalevu na bula dravudravua kei na via kana ena nodra veiliutaki na tamata, ia ena vakaotia kece qori na veiliutaki vaKalou. (Aisea 65:21) O ira mada ga na veiliutaki vakatamata e vinaka nodra inaki ni veiliutaki, e sega ga ni rawa mera vakaotia na tauvimate kei na mate, ia ena veiliutaki vaKalou, era na marautaka na tauvimate kei ira sa qase mera bulabula tale me vaka na cauravou. (Jope 33:25; Aisea 35:5, 6) Ena yaco dina na vuravura me parataisi ra qai vakaturi tale ga na mate.—Luke 23:43; Caka. 24:15.
18. Eda na vakaraitaka vakacava ni uasivi duadua na ivakarau ni veiliutaki i Jiova?
18 Io, ena veisautaka na veiliutaki vaKalou na ca kece e vakavuna o Setani ena nona vakamuai rau na imatai ni tubutubu me rau vakanadakui koya na Dauveibuli. Vakasamataka mada, rauta ni 6,000 na yabaki nona vakavu ca tiko o Setani, ia na Kalou ena vakayagataki Jisu, me veisautaka na ca kece qori ena loma ga ni 1,000 na yabaki! Dua dina na ivakadinadina uasivi ni vinaka duadua na ivakarau ni veiliutaki ni Kalou! Nida nona iVakadinadina, eda ciqomi koya me noda iLiuliu. Koya gona, meda vakaraitaka tiko mada ga e veisiga, kei na veigauna nida dauveiqaravi i Jiova, nida vakamalumalumu ina nona Matanitu, kei na noda marautaka meda nona iVakadinadina. Meda vunautaka mada ga ena veigauna kece ni uasivi duadua na ivakarau ni veiliutaki i Jiova.
Me Baleta na Veiliutaki vaKalou, na Cava Eda Vulica Nida Wilika na . . .
• Iperiu 13:17?
[Taro]
[iYaloyalo ena tabana 29]
E sega ni veisau na veiliutaki i Jiova
[iYaloyalo ena tabana 31]
Vakilai na duavata vakamataveitacini e vuravura raraba nira talairawarawa ina ivakarau ni veiliutaki i Jiova