Vakadeitaka Mo iMuri Dina i Karisito

“Ena vuataka ga na vua vinaka na kau vinaka, ena vuataka na vua ca na kau ca.”​—MACIU 7:17.

1, 2. Era duatani vakacava na imuri dina i Karisito vei ira na lotu vaKarisito vakailasu?

E TUKUNA o Jisu ni na kilai o ira na nona imuri dina kei ira na imuri vakailasu ena ka era vuataka​—qo ena nodra ivakavuvuli kei na nodra itovo. (Maciu 7:​15-17, 20) Era kauaitaka vakalevu na tamata na ka era vakasamataka kei na ka e tu e lomadra. (Maciu 15:​18, 19) O ira era vakavulici ena ka lasu, era na “vuataka na vua ca,” ia era na “vuataka ga na vua vinaka” o ira na vakavulici ena ivakavuvuli dina vakayalo.

² Sa qai vakavotui vinaka na rua na kau qo ena icavacava ni ituvaki qo. (Wilika Taniela 12:​3, 10.) O ira na lotu vaKarisito vakailasu e dau veiveisau nodra vakabauta na Kalou, qai veivakaisini nodra veiqaravi. Ena yasana adua, o ira na matua vakayalo era ‘sokalou vakayalo, e yavutaki tale ga ena dina nodra sokalou.’ (Joni 4:24; 2 Tim. 3:​1-5) Era saga vagumatua mera vakaraitaka na itovo i Karisito. Ia vakacava o keda yadudua? Ni o dikeva oti e lima na ivakatakilakila ni lotu vaKarisito dina, tarogi iko: ‘E salasalavata beka kei na Vosa ni Kalou na noqu itovo kei na noqu ivakavuvuli? Au dau vakaraitaka niu vakamareqeta na ka dina vei ira na vakasaqaqara tiko?’

Bulataka na Vosa ni Kalou

3. Na cava e taleitaka o Jiova? Na cava e kena ibalebale qo vei ira na lotu vaKarisito dina?

³ E tukuna o Jisu: “Era na sega ni curu kece ina matanitu vakalomalagi o ira era tukuna vei au, ‘Turaga, Turaga’ o koya ga e cakava na loma i Tamaqu mai lomalagi.” (Maciu 7:21) Io, e sega ni taleitaka o Jiova noda tukuna tiko ga nida lotu vaKarisito, e kauai sara ga ena kena bulataki na ka eda kilai kina. Ena vinakati vei ira na imuri dina i Karisito mera cakava qo ena nodra bula kece, nodra rai me baleta na ilavo, cakacaka, ka ni veivakamarautaki, ivakarau vakavanua kei na soqo tale eso, na vakamau kei na nodra veimaliwai. Era vakaraitaka na lotu vaKarisito vakailasu na ivakarau ni rai kei na bula e sega ni vaKalou, e takalevu tu e vuravura ena iotioti ni veisiga qo.​—Same 92:7.

4, 5. Eda na bulataka vakacava na vosa i Jiova e tukuni ena Malakai 3:18?

⁴ A vola na parofita o Malakai: “Dou na qai kunea sara ni sa dua tani na yalododonu ka dua tani na tamata ca, ni sa dua tani ko koya sa qarava na Kalou ka dua tani ko koya sa sega ni qaravi koya.” (Mala. 3:18) Ni o vakasamataka na vosa ya, tarogi iko mada: ‘Au tautauvata kei ira na tamata ni vuravura qo seu duatani? Au dau saga beka meu vakamuri ira voleka noqu itokani e koronivuli kei na vanua ni cakacaka? Seu na muria dei na ivakavuvuli vakaivolatabu, de dua ena gadrevi sara meu vosa vakadodonu ena gauna veiganiti?’ (Wilika 1 Pita 3:16.) Eda sega ni vinakata meda yalododonu vakasivia, ia eda na duatani vei ira na sega ni lomani Jiova, ra sega ni qaravi koya tale ga.

⁵ Ke o raica ni tu eso na ka me vakavinakataki, vakacava mo masulaka qai vakasaqara na veidusimaki vakayalo ena nomu vulica vakawasoma na iVolatabu, masu, kei na nomu tiko ena soqoni? Na levu ga ni nomu bulataka na Vosa ni Kalou, o na vuataka kina vakalevu na “vua vinaka” ya na ‘vua ni tebenigusuda nida tukuna raraba na yaca ni [Kalou].’​—Iper. 13:15.

Vunautaka na Matanitu ni Kalou

6, 7. Me baleta na itukutuku ni Matanitu ni Kalou, na duidui cava e laurai vei ira na lotu vaKarisito dina kei ira na lotu vaKarisito vakailasu?

⁶ A tukuna o Jisu: “E dodonu meu tukuna  tale ga na itukutuku vinaka ni matanitu ni Kalou ena veikoro tale eso, ni qo na ka au talai mai kina.” (Luke 4:43) Na cava e usutu bibi kina ni cakacaka vakaitalatala i Jisu na Matanitu ni Kalou? E kila o koya ni Tui ni Matanitu oya, kei na nodra veitokoni tale ga na tacina lumuti era vakaturi oti, ena vakaotia kina na ka kece e vakavuna na rarawa ni kawatamata​—qori na ivalavala ca kei na Tevoro. (Roma 5:12; Vkta. 20:10) A vakarota gona vei ira na nona imuri mera vunautaka na Matanitu ni Kalou me yacova na icavacava ni ituvaki qo. (Maciu 24:14) O ira na tukuna tiko ga nira imuri i Karisito era sega ni vakaitavi ena cakacaka qo​—macala ga nira sega ni cakava rawa. Na vuna? E tolu na vuna: iMatai, e sega ni rawa nira vunautaka na ka era sega ni kila. Kena ikarua, e sega vei ira na yalomalumalumu kei na doudou mera vosota kina na veivakalialiai kei na veivakacacani e sotavi ena cakacaka vakavunau vei ira na wekadra. (Maciu 24:9; 1 Pita 2:23) Kena ikatolu ni vuna, na yalotabu ni Kalou e sega ni cakacaka vei ira na lotu vaKarisito vakailasu.​—Joni 14:​16, 17.

⁷ Ena yasana adua, era kila vinaka na imuri dina i Karisito na Matanitu ni Kalou kei na ka ena cakava. Era vakaliuca ena nodra bula na Matanitu ni Kalou, nodra vunautaka e vuravura raraba ena veitokoni ni nona yalo tabu na Kalou. (Saka. 4:6) O sa vakaitavi wasoma tiko ena cakacaka qo? Ni o dua na dau kacivaka na Matanitu ni Kalou, o saga tiko me vinaka cake nomu vunau, de dua mo vakalevutaka nomu gauna ena cakacaka vakavunau se nomu saga me laulau? Eso era saga mera vakavinakataka na iwalewale ni nodra vunau nira vakayagataka vakavinaka na iVolatabu. E vola o Paula e dua a dau vakayagataka na iVolatabu: “E bula na vosa ni Kalou qai kaukaua.”​—Iper. 4:12; Caka. 17:​2, 3.

8, 9. (a) Na cava e vakabibitaki ena so na irogo me baleta na yaga ni kena vakayagataki na iVolatabu? (b) Eda na kenadau vakacava ena noda vakayagataka na Vosa ni Kalou?

⁸ Ena nona vunau e veivale, a wilika e dua na tacida na Taniela 2:44 vua e dua na turaga lotu Katolika qai vakamacalataka na sala ena kauta mai kina na bula sautu dina kei na tiko nuidei e vuravura na Matanitu ni Kalou. A tukuna na turaga ya: “Au taleitaka sara vakalevu nomu vakayagataka na iVolatabu mo vakaraitaka kina na tikinivolatabu, o sega ni cavuqaqataka wale tu ga.” Gauna e wilika kina na iVolatabu e dua na tacida vua e dua na marama lotu Greek Orthodox, a taroga e vica na taro na marama qo me vakaraitaka nona tataleitaki. A mani sauma vakaivolatabu na tacida kei na watina na nona vakatataro. A qai kaya na marama ya: “Drau kila na vuna au via vosa kina vei kemudrau? Drau a kauta tiko mai na iVolatabu, drau a qai wilika sara ga.”

⁹ Dina ni bibi na kena veisoliyaki na noda ivola ena yalava ni vunau, ia eda na vakayagataka vakalevu na iVolatabu. Ke sega gona ni matau vei iko mo vakayagataka vakawasoma na iVolatabu ena cakacaka vakaitalatala, vakacava me nomu isausau mo vakayacora vaka kina? O rawa ni digia eso na tikinivolatabu e vakamacalataka na Matanitu ni Kalou kei na sala ena walia kina na leqa e tarai ira tu era vakaitikotiko ena nomu yalava. Mo qai vakayagataka ena nomu vunau e veivale.

 Marau ni o Vakadinadinataka na Yaca ni Kalou

10, 11. Me baleta na vakayagataki ni yaca ni Kalou, na duidui cava e laurai vei Jisu kei ira e levu era tukuna nira nona imuri?

¹⁰ “Sai kemudou na noqu dauvakadinadina,” e kaya o Jiova “ni sai au ko Koya.” (Aisea 43:10) O Jisu e nona iVakadinadina levu o Jiova, a raica me ka dokai duadua nona vakadinadinataka na yaca ni Kalou salavata kei na nona vakatakila yani. (Wilika Lako Yani 3:15; Joni 17:6; Iperiu 2:12.) Nona vunautaka gona na yaca i Tamana, a vakatokai kina o Jisu me “iVakadinadina Yalodina.”​—Vkta. 1:5; Maciu 6:9.

¹¹ Ena yasana adua, levu vei ira na tukuna tiko nira matataka na Kalou kei na Luvena, era beca na yaca ni Kalou ena nodra kauta tani na yaca qori mai na iVolatabu. Me tokona na vakasama qori, a soli e dua na ivakaro vei ira na bisovi ni lotu Katolika, a tukuni kina “me kua ni vakayagataki se cavuti na yaca ni Kalou e volai ena matuavosa vakaiperiu (YHWH) ena gauna ni sokalou. * Dua dina na vakasama lialia!

12. E qai mai kilai vakacava nira nei Jiova na nona dauveiqaravi ena 1931?

¹² E ka dokai vei ira na lotu vaKarisito dina mera vakayagataka na yaca ni Kalou nira vakatotomuri Karisito kei ira na “ivakadindina era vaka na o,” era a bula e liu vua. (Iper. 12:1) Ena 1931, era qai kilai na dauveiqaravi ni Kalou nira nei Jiova ena nodra ciqoma na yaca, iVakadinadina i Jiova. (Wilika Aisea 43:​10-12.) Dua dina na ka vakasakiti mera yaco na imuri dina i Karisito mera ‘vakatokai ena yaca ni [Kalou].’​—Caka. 15:​14, 17.

13. Eda na vakaraitaka tiko ga vakacava nida vakatokayacataki ena yaca ni Kalou?

¹³ Eda na vakaraitaka tiko ga vakacava nida vakatokayacataki ena yaca ni Kalou? Ena vinakati gona meda yalodina ena noda vakadinadinataki koya. E vola o Paula: “Nira na bula o ira kece era masuta na yaca i Jiova. Ia era na masuti koya vakacava ke ra sega ni vakabauti koya? Era na vakabauti koya vakacava ke ra sega ni rogoca? Era na rogoca vakacava ke sega ni dua e vunautaka vei ira? Era na vunau vakacava ke ra sega ni talai?” (Roma 10:​13-15) Dodonu tale ga meda vakavotuya vakamaqosa na lasu kece e beci kina na Dauveibuli, me vaka na ivakavuvuli me baleti eli, qo e vakavuna me vakabauti kina ni o koya na Kalou dauloloma e tu vua na itovo ca ni Tevoro.​—Jere. 7:31; 1 Joni 4:8; vakatauvatana Marika 9:​17-27.

14. Na cava era cakava eso nira kila na yaca ni Kalou?

¹⁴ O marautaka tiko nomu vakadinadinataka na yaca ni Kalou? O vukei ira tale ga na so mera kila na yaca tabu qori? E dua na marama e Parisi mai Varanise, a rogoca nira kila na yaca ni Kalou o ira na iVakadinadina i Jiova. A taroga sara e dua na iVakadinadina ke rawa ni vakaraitaka ena iVolatabu na yaca ni Kalou. E tarai koya na wiliki ni Same 83:18. A vulica sara na iVolatabu, ena gauna qo sa dua tiko na tacida yalodina qai veiqaravi tale tiko ga ena dua tale na vanua. Ena gauna a raica kina ena imatai ni gauna na yaca ni Kalou e dua na marama lotu Katolika e Ositerelia, a tagi ena levu ni nona marau. Sa vica na yabaki qo nona painia tudei voli. Ena dua na gauna ga qo, a vakaraitaka e dua na iVakadinadina mai Jamaica na yaca ni Kalou vua e dua na marama ena nona iVolatabu, a luluvu tale ga ena levu nona marau. Koya gona, mo marau tale ga ni o vakadinadinataka tiko na yaca ni Kalou kei na nomu muria na ivakaraitaki Jisu, ena kena vakatakilai na yaca talei qori vei ira na tamata kece.

“Ni Kua ni Lomani Vuravura”

15, 16. Era raica vakacava na vuravura na lotu vaKarisito dina, kei na taro cava meda tarogi keda kina?

¹⁵ “Ni kua ni lomani vuravura se na ka e tu e vuravura. O koya e lomani vuravura, ena sega ni lomani koya o Tamada.” (1 Joni 2:15) Na yalo ni vuravura kei na kena itovo e veimecaki kei Jiova kei na yalona tabu. Era sega wale ga ni yawaki ira na imuri dina i Karisito mai vuravura,  ia era cata sara ga mera lomani vuravura. Era duavata kei na ka e vola na tisaipeli o Jemesa oya ni “veitokani kei vuravura e veimecaki kei na Kalou.”​—Jeme. 4:4.

¹⁶ E sega ni ka rawarawa meda muria na vosa i Jemesa ena vuravura e vutucoqa kina na veitemaki. (2 Tim. 4:10) E masulaki ratou kina nona tisaipeli o Jisu ni kaya: “Au kerei kemuni moni kua ni kauti iratou tani e vuravura, moni vakatawai iratou tiko ena vuku i koya na Vunica. Eratou sega ni vakavuravura me vaka ga na noqu sega ni vakavuravura.” (Joni 17:​15, 16) Tarogi iko mada: ‘Au dau saga meu kua ni vakavuravura? Era kila beka na so na noqu rai me baleta na veisoqo ni marau e sega ni yavutaki vakaivolatabu kei na soqo tale eso e sega ni yavutaki ena ivakavuvuli ni lotu butobuto, ia e vakaraitaki kina na yalo ni vuravura?’​—2 Kor. 6:17; 1 Pita 4:​3, 4.

17. Na cava ena uqeti ira na yalomalumalumu mera qaravi Jiova?

¹⁷ E dina ni sega ni taleitaka o vuravura na noda dei ena ivakavuvuli vakaivolatabu, ia e rawa ni vakavu lomatarotaro vei ira na yalomalumalumu. Koya gona nira raica na dei ni noda vakabauta na iVolatabu kei na noda bulataka, e vaka sara ga era tukuna tiko vei ira na lumuti: “Keitou na lako vata kei kemudou: ni keitou sa rogoca sa tiko vata kei kemudou na Kalou.”​—Saka. 8:23.

Vakaraitaka na Loloma Dina vaKarisito

18. Na cava e okati ena noda lomani Jiova kei ira na wekada?

¹⁸ E tukuna o Jisu: ‘Mo lomani Jiova na nomu Kalou ena lomamu taucoko, ena nomu bula taucoko kei na nomu vakasama taucoko” kei na “nomu lomana na kainomu me vaka nomu lomani iko.” (Maciu 22:​37, 39) Qo na loloma (ena vosa vaKirisi na a·gaʹpe) e yavutaki ena itavi, ivakavuvuli, kei na itovo, ia e vuqa na gauna e dau salavata kei na ivakarau ni lomada. E dau veinanumi qai titobu. (1 Pita 1:22) E veibasai sara kei na yalokocokoco, qo ena laurai na noda sega ni nanumi keda ga ena noda vosa kei na ka eda cakava.​—Wilika 1 Korinica 13:​4-7.

19, 20. Tukuna na ivakaraitaki e dusia na kaukaua ni loloma vaKarisito.

¹⁹ Me vaka ni loloma e vu mai ena yalo tabu ni Kalou, e rawa kina vei ira na lotu vaKarisito  dina mera cakava na ka era sega ni cakava rawa eso tale. Qori nodra sega ni veivakaduiduitaki vakamatatamata, vakayavusa kei na politiki. (Wilika Joni 13:​34, 35; Kala. 5:22.) Na loloma va qo e uqeti ira na vaka na sipi. Kena ivakaraitaki, nona tiko ena soqoni vaKarisito ena imatai ni gauna e dua na cauravou e Jiu mai Isireli, a kidroataka nona raica nodra sokaloutaki Jiova vata na mataveitacini era Jiu kei ira na Arapea. A tekivu sara me tiko ena soqoni kece qai vulica na iVolatabu. O dau lomani ira va qori na tacimu vakayalo? O dau sasagataka beka mo kidavaki ira na ka vou era gole mai ena Kingdom Hall, veitalia na duidui vanua era cavutu mai kina, roka ni yagodra, se nodra cakacaka?

²⁰ Nida lotu vaKarisito dina, eda na saga meda vakaraitaka tiko ga na loloma vei ira kece na tamata. Dua na tacida gone mai El Salvador, e vakavulica tiko ena iVolatabu e dua na marama e lotu Katolika kaukaua, qai yabaki 87. Dua gona na siga a tauvimate bibi na marama qo qai curu e valenibula. Ni suka mai e valenibula, era sikovi koya na iVakadinadina mera raica me veirauti tiko na kena kakana. A caka tiko qo me dua na vula. Sega sara ga nira mai sikovi koya o ira na lotu vata. Na cava e yaco kina? A vakarusa sara na matakau, vakacegu mai na nona lotu, qai tomana nona vuli iVolatabu. Io, e kaukaua dina na loloma vaKarisito! E rawa ni uqeta na loma ni tamata mai na noda vunau vei ira.

21. Na cava meda cakava me dei kina noda bula e se bera mai?

²¹ Sa voleka na gauna me tukuna kina o Jisu vei ira kece na imuri vakailasu: “Au na tukuna vei ira: au sega sara ga ni kilai kemuni! Ni lako tani, o kemuni na dau caka ca.” (Maciu 7:23) Meda vuataka gona na vua vinaka ena lagiti kina na Tamada kei na Luvena. E kaya o Jisu: “o koya e rogoca na noqu vosa qo qai cakava ena vaka na tamata vuku e tara nona vale ena delanivatu.” (Maciu 7:24) Io, nida vakaraitaka nida imuri dina i Karisito, ena vakadonui keda na Kalou, ena dei noda veisiga e se bera mai, me vaka ga ni yavutaki ena vatu!

[iVakamacala e ra]

O Se Nanuma Tiko?

• Era duatani vakacava na imuri dina i Karisito kei ira na imuri vakailasu?

• Tukuna eso na itovo era “vuataka” na lotu vaKarisito dina.

• Ni o vuataka tiko na itovo vaKarisito, na isausau cava tale o na rawa ni tadolova?

[Taro]

[iYaloyalo ena tabana e 13]

O dau vakayagataka vakawasoma na iVolatabu ena nomu cakacaka vakaitalatala?

[iYaloyalo ena tabana e 15]

Era kila beka na so na noqu rai me baleta veisoqo ni marau e sega ni yavutaki vakaivolatabu?