Vukei Luvemu me Vosota na iTuvaki Dredre

ERA sotava tiko na luveda e levu na ituvaki dredre. Era bula tu ena vuravura ca i Setani qai dodonu mera valuta na “gagadre vakaitabagone.” (2 Tim. 2:22; 1 Joni 5:19) Kena ikuri, nira saga mera ‘nanumi koya e Buli ira,’ era vosota kina na veivakalialiai​—okati kina qo nodra veivakasewasewani na dauveitusaqati. (Dauv. 12:1) O Vincent, e dua na tacida tagane, e nanuma lesu na gauna a se gone kina, e kaya: “Niu dua na iVakadinadina, ena tiko ga e dua ena dau vakasewasewani au, vakasagai au, se dua ena dau vakavu veivala. Vuqa na gauna e ca sara na ka au sotava, vakavuna meu bese ni lai vuli.” *

Me ikuri ni ituvaki dredre ni vuravura qo, era saga tale ga na luveda mera valuta na idre ni veimurimuri. E kaya e dua na tacida goneyalewa o Cathleen: “E sega ni rawarawa nida raici nida duatani.” E vakadinadinataka e dua  na tacida gonetagane o Alan: “Era dau sureti au vakalevu na noqu lewe ni kalasi me keimami gade ena mua ni macawa, au dau via lako dina sara ga.” Na kaukaua tale ga ni nodra via qito e koronivuli, e rawa nira vakailala ca kina na itabagone. “Au dau taleitaka na qito,” e kaya e dua na tacida goneyalewa o Tanya. “Era dau saga na dauveivakavulici mai koronivuli meu qito ena timi. E dau dredre sara ga meu vakasuka.”

O na vukei luvemu vakacava me vosota na veika dredre e dau sotava? E lesi ira na itubutubu o Jiova mera dusimaki luvedra. (Vkai. 22:6; Efeso 6:4) Nodra isausau na itubutubu dau rerevaka na Kalou mera bucina vei luvedra na yalo ni talairawarawa vei Jiova. (Vkai. 6:​20-23) Ena sala qo era na uqeti kina na gone mera vorata na ituvaki dredre e vuravura, ena gauna e yali kina nodra itubutubu.

E ka toka ni sasaga vei ira na itubutubu mera qarava na bula ni veisiga, vuvale, kei na itavi ena ivavakoso. Eso era cakava tiko qo nira itubutubu le dua se tusaqati ira tiko o watidra era sega ni vakabauta. Ia e namaka tiko ga o Jiova vei ira na itubutubu mera vakatikitikitaka eso na gauna mera vakavulici luvedra kina. Ia o rawa ni taqomaki luvemu vakacava mai na idre ni veimurimuri, veitemaki, kei na veivakacacani era dau sotava e veisiga?

Veiwekani Voleka kei Jiova

Kena imatai, e dodonu mera kila na gone ni bula dina tiko o Jiova. Mera vakavulici mera “raici koya tiko e tawarairai.” (Iper. 11:27) O Vincent, a cavuti mai liu, a nanuma lesu nona dau vukei koya o rau nona itubutubu me bucina e dua na veiwekani voleka kei Jiova. E tukuna: “Rau vakavulica vei au na bibi ni masu. Ena gauna au se gone kina, au nanuma vinaka tu ga noqu dau masu ena veibogi vei Jiova ni bera niu moce. Au kila ni bula dina tiko o Jiova.” O dau masu kei luvemu? Vakacava mo rogoca na ka e dau cavuta ena gauna e masu kina? E dau cavuta tiko ga e dua na vosa? Se dau vakaraitaka sara ga ena nona qaqanimasu na nona rai me baleti Jiova? Nomu vakarogoca nona masu o rawa ni kila kina nona matua vakayalo.

 Dua tale na tiki bibi ni nodra volekati Jiova na itabagone, oya nodra wilika na Vosa ni Kalou. O Cathleen, sa tukuni oti mai, e kaya: “E vukei au sara ga noqu wilika tasevu na iVolatabu ena gauna au se gone kina. Ena gauna au saqati kina, au yalodei niu kila ni tokoni au tiko o Jiova.” E tiko beka nodra ituvatuva ni wili iVolatabu na luvemu?​—Same 1:​1-3; 77:12.

E dau duidui nodra ciqoma na gone na veidusimaki ni nodra itubutubu. Kuria qori, ni nodra matua vakayalo ena vakatau ena nodra yabaki ni bula. Ia nira sega ni dusimaki, ena dredre vei ira na gone mera kila ni o Jiova e bula dina tiko. Mera vakavulici luvedra gona na itubutubu ena vosa ni Kalou, mera kila kina ni vaka ga e rogoci ira tiko o Jiova, e vosa tiko vei ira ena vanua cava ga era tu kina. (Vkru. 6:​6-9) E dodonu mera vakabauta na luvemu ni kauaitaki ira dina o Jiova.

Sala me Yaga Kina na Veivosaki

Dua tale na sala bibi o rawa ni vukei luvemu kina oya na veivosaki. E dina ni veivosaki kei ira na luvemu e okati kina e levu tale na ka, me vaka na veitarotarogi kei na vakarorogo vinaka​—dina ke mani duidui na isaunitaro o namaka. E kaya kina o Anne e dua na tina e rua na luvena tagane: “Au dau vakatarogi rau na luvequ, yacova sara na gauna au sa kila kina na ka rau vakasamataka tiko kei na ka rau sotava tiko. Era vakila beka na luvemu ni o dau vakarogoci ira? O Tanya a cavuti e liu, e kaya: “O rau noqu itubutubu erau dau vakarogoci au matua qai rau dau nanuma tale ga na ka keitou veitalanoataka. Erau kila na yacadra noqu lewe ni kalasi. Rau dau vakatarogi ira, veitalanoataka tale ga na ituvaki keitou sa dau veitalanoataka oti.” Me yaga na veivosaki, e bibi duadua na vakarorogo kei na nanumi ni ka e veitalanoataki.

Era raica e levu na matavuvale ni gauna  vinaka e dau yaga kina na veivosaki, oya na gauna ni kana. “E bibi ena neitou matavuvale na neitou dau kana vata,” e vakamacalataka o Vincent. “E tiko na gauna e namaki kina vei keitou me keitou dabe vata vakamatavuvale. E sega ni vakatarai na sara tivi, rogo retio, se wilivola ena gauna ni kana. Ni keitou veitalanoa tu ga, e vakavuna qo meu lomavakacegu mai na veilecayaki kei na veika dredre au sotava e koronivuli.” E kuria: “Na noqu dau veivosaki vakawasoma kei rau noqu itubutubu ena gauna ni kana, e vukei au vakalevu meu veivosakitaka kina kei rau eso na ulutaga bibi e vinakati kina na veivuke.”

Tarogi iko mada, ‘Vakavica ena veimacawa keitou dau kana vata kina vakamatavuvale?’ Ni caka na veiveisau, ena rawa beka ni levu qai vinaka cake nomu veivosaki kei ratou na luvemu?

Vuna e Bibi Kina na Vakatovotovo

Na Sokalou Vakavuvale e dau caka ena yakavi ni veimacawa, ena uqeti ira kina na lewe ni matavuvale me rawarawa nodra veitalanoa, ena walia tale ga nodra leqa na itabagone. E kaya o Alan, a cavuti mai liu: “Erau dau vakayagataka na noqu itubutubu na gauna ni Sokalou Vakavuvale me rau kila kina na ka keitou vakasamataka tiko. Erau dau digia na ulutaga ena salasalavata kei na ka keitou sotava tiko.” E kaya o tinai Alan: “Keirau dau vakayagataka na gauna ni sokalou me caka kina na vakatovotovo. Na vakatovotovo va qo e dau uqeti ratou na luvei keirau me ratou vakamacalataka kina na nodratou vakabauta, kei na nodratou vakadinadinataka tale ga na dina ni nodratou vakabauta. Qo e vakaukauataki ratou me ratou walia kina na ituvaki dredre ratou dau sotava.”

Ena gauna era sotava kina na ituvaki dredre na itabagone, era dau via cakava tale eso na ka, mai na nodra va sega wale tu ga. E dodonu mera tu vakarau mera sauma na taro me vaka na baleta kei na cava na vuna. E dodonu tale ga mera dei ena ka era cakava, vakabibi nira vakalialiai ena vuku ni nodra vakabauta. Ke ra sega ni vakamacalataka rawa nodra  vakabauta, ena dredre mera dei ena sokalou dina. Na gauna ni vakatovotovo ena rawa ni vakadeitaki ira na gone.

Na  kato ena tabana e 18 e vakaraitaka eso na ituvaki e rawa ni dramataki ena Sokalou Vakavuvale. Me caka qo me vaka sara ga ni yaco dina tiko, oya nomu sauma vakaukaua na isaunitaro nei luvemu. Me ikuri ni vakatovotovo qori, rawa ni okati tale ga eso na ivakaraitaki yaga e tiko ena iVolatabu. Sega ni vakabekataki ni na vukei luvemu na veivakavulici va qo ena gauna e sotava kina na ituvaki dredre mai koronivuli se vanua cava ga.

Me Vanua ni Vakacegu e Vale

Ni ratou suka na vuli ena veisiga na gone, ratou dau vakanamata beka me ratou gole i vale? Ke vakilai kina na vakacegu, ena vukei luvemu ena ituvaki dredre e dau sotava e veisiga. E kaya e dua na tacida yalewa e lewe tiko ni vuvale ena dua na Peceli na gauna qo: “Ena gauna au tubu cake tiko mai kina, e dau vukei au dina noqu kila ni neitou vale e vanua e vakilai kina na vakacegu. Se mani vakacava na leqa e sotavi e koronivuli, au kila ga ni na vinaka kece tu na ka ena gauna au yaco kina i vale.” Na cava e kilai ena bula mai nomudou? E kilai ni levu kina na “cudru, duiyaloyalo, [kei na] veisei” se dau kilai kina na “loloma, marau [kei na] vakacegu”? (Kala. 5:​19-23) Ke yali tiko kina na vakacegu, o dau saga mo kila na veiveisau e gadrevi me rawa kina ni vanua ni vakacegu vei ratou na luvemu?

Dua tale na sala o rawa ni vukei luvemu kina ena veika dredre e sotava, oya nomu liutaka sara ga na veimaliwai e veitarai cake vakayalo. Kena ivakaraitaki, o rawa ni sureti ira na mataveitacini era matua vakayalo ena ivavakoso mera tiko ena nomudou gauna ni veivakamarautaki vakamatavuvale? Se o rawa ni vakarautaka e dua na kakana lailai vua na ivakatawa dauveilakoyaki se so tale era veiqaravi vakatabakidua? O kila beka eso na daukaulotu se o ira era veiqaravi tiko e Peceli era rawa nira veitokani kei luvemu, nodra veivolavolai, e-mail se nodra dau veiqiriti? Na veiwekani va qo e rawa ni uqeti luvemu me donu na sala e muria qai navuca tale ga kina na isausau vakayalo. Vakasamataka mada na veivakauqeti i Paula vei Timoci. (2 Tim. 1:13; 3:10) Nona veiwekani voleka o Paula, a vukei Timoci me dei ena nona isausau vakayalo.​—1 Kor. 4:17.

Dau Vakavinavinakataki Luvemu

E marautaka o Jiova nona raici ira na itabagone ena nodra dei ena ka e dodonu, dina nira sotava na idre ni vuravura i Setani. (Same 147:11; Vkai. 27:11) E sega ni vakabekataki ni o marautaka tale ga nodra digidigi vakavuku eso na itabagone. (Vkai. 10:1) Me kila o luvemu nomu rai me baleti koya qai vakacaucautaki koya vakayalololoma. E kotora e dua na ivakaraitaki vinaka o Jiova vei ira na itubutubu. Ena gauna a papitaiso kina o Jisu, a kaya kina o Jiova: “O iko na Luvequ lomani; au vakadonui iko.” (Mari. 1:11) E vakaukauataki Jisu sara ga na vosa ni veivakadeitaki i Tamana me vosota kina na veika dredre ena vakarau sotava! Me raica tale ga o luvemu ni o lomani koya, o qai vakavinavinakataka na ka e rawata.

O na sega ni taqomaki luvemu sara mai na idre, na veivakacacani, kei na veivakasesei. Ia, se levu ga na ka o rawa ni vukei luvemu kina. Ena sala cava? Vukei ira mera bucina e dua na veiwekani voleka kei Jiova. Uqeta na veivosaki e yaga. Me yaga na Sokalou Vakavuvale, me vakilai tale ga na vakacegu e vale. E sega ni vakabekataki nomu cakava qo ena vakarautaki luvemu ena levu na ituvaki dredre ena sotava.

[iVakamacala e ra]

[Kato/iYaloyalo ena tabana e 18]

 YAGA NA GAUNA NI VAKATOVOTOVO

Qo eso na ituvaki era dau sotava na luveda. Vakacava mo vakatovotovotaka eso vei ira na ituvaki qori ena yakavi ni nomudou Sokalou Vakavuvale?

▸ E kerei luvemu yalewa e dua na dauveivakavulici me lewe ni timi ni qito ni koronivuli.

▸ E soli vei luvemu tagane e dua na itibi tavako ni suka na vuli me gole i vale.

▸ Eso na gonetagane era vakarerei luvemu tagane, ke raici koya ni vunau tiko era na buturaki koya.

▸ Ena gauna e cakacaka vakavunau tiko kina o luvemu yalewa, a sotava e dua rau vuli vata.

▸ Ena matadra sara ga na lewe ni kalasi a qai tarogi o luvemu yalewa na vuna e sega ni dau vakarokorokotaka kina na kuila.

▸ E dua na gonetagane e vakawasoma nona vakalialiai luvemu tagane ni dua na iVakadinadina.

[iYaloyalo ena tabana e 17]

E tiko beka e dua nona ituvatuva ni wili iVolatabu o luvemu?

[iYaloyalo ena tabana e 19]

O dau okati ira beka na matua vakayalo ena nomu ka ni veivakamarautaki?