O se Nanuma Tiko?

O taleitaka na ka o wilika ena itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:

• Na cava eda rawa ni vakabauta kina ni dua dina na vanua na were o Iteni?

E tukuna na iVolatabu ni dua dina na were o Iteni, qai tukuna na ka matailalai me baleta na vanua e tiko kina. E se drodro tu ga nikua e rua na uciwai e cavuti na kena ivolatukutuku ena iVolatabu. E sega ni dau matata na italanoa buli me baleta eso na vanua e dau talanoataki. O Jisu na ivakadinadina nuitaki duadua a tukuna ni rau bula dina o Atama kei Ivi.​—1/1, tabana e 5-6, 9.

• A kila na Kalou ni rau na valavala ca o Atama kei Ivi?

Sega. A solia vei rau o Jiova na vuku kei na galala ni vakatulewa, e rawa gona ni rau digia me rau talairawarawa se kua. E kila na Kalou na ka e se bera ni yaco, ia e digia vakavuku na gauna me vakayagataka kina na veika sa kila rawa tu.​—1/1, tabana e 13-​15.

• Era vakayagataka beka na lotu vaKarisito dina na yaca ni Kalou e nanumi ni mana?

Eso era nanuma ni mana na iyaya se ivakatakilakila qai rawa ni taqomaki ira vakacakamana, ia e sega ni va qori na nodra rai na tamata ni Kalou me baleta na yacana. Era nuitaki Jiova ga ra qai saga mera cakava na lomana, era sa lai vakaruru tiko ena yacana nira cakava qori. (Sefa. 3:​12, 13)​—15/1, tabana e 5-6.

• E yaga vei cei e Isireli na lawa ni vakatotomi?

E yaga vei ira kece. Na vakatotomi e vukei ira na dravudravua mera kua ni vucesa. E uqeti ira tale ga na kena vo mera lomasoli ra qai nuitaka na veivakalougatataki ni Kalou.​—1/2, tabana e 15.

• Na cava e vakanadakui Tui Saula kina o Jiova?

A dodonu me waraka o Saula me vakacaboisoro na parofita ni Kalou, ia a talaidredre na tui ni a cabora sara ga na isoro. A talaidredre ena dua tale na gauna e muri ena ivakaro me vakawabokotaki ira na meca.​—15/2, tabana e 22-​23.

• Eda rawa ni vakaraitaka vakacava nida cata na ivalavala e beci kina na lawa?

Eda na sega ni gunu sivia, eda na cata na vakatevoro, eda na muria tale ga na ivakasala i Jisu me baleta na itovo dukadukali. Kena ivakaraitaki, eda na cata na iyaloyalo ca kei na gagano e rawa ni vakavurea. (Maciu 5:​27, 28) Eda na sega tale ga ni veimaliwai kei ira era vakasivoi.​—15/2, tabana e 29-​32.

• Na cava e talei kina na nodra kunea na daunivakekeli e dua na bure ni oni makawa e Isireli nikua?

Era kunea na dauvakekeli e 30 vakacaca na bure ni oni ra qai vakatautauvatataka na vuku ni rauta e veimama na tani na denioni e rawati kina e veiyabaki. Qori e vakadeitaka ni a vakayacori na susu oni ena vanua a tukuna na Kalou ni na ‘dave kina na sucu kei na oni.’ (Lako 3:8)​—1/3, tabana e 15.

• E rawa vakacava ni tukuni ni o Jeremaia e vaka na kau e “tei e na bati ni wai, ia sa vakateteva na wakana”? (Jere. 17:​7, 8)

A sega vakadua ni mudu na nona vua o Jeremaia; a sega tale ga ni rawai ena nodra veivakamuai na dauveivakalialiai. Ia a kabita tiko ga na ivurevure ni wai ni bula, qai rogoca na ka kece a tukuna vua na Kalou.​—15/3, tabana e 14.

• Na cava e tukuna kina o Jisu vei Marica ni vinakati e vica ga na ka se dua ga na ka? (Luke 10:​41, 42)

A sega ni tukuna tiko o Jisu ni domodomoiyau o Marica ena nona vakarautaka tiko e vica na mataqali kakana me ratou kania, se me tukuna tiko ni sega ni yaga na nona cakacaka. Ia e vakabibitaka tiko ga na ka me vakaliuci. A sega ni vakayagataka vinaka na gauna qori o Marica me vakalevutaka na nona vakabauta.​—1/4, tabana e 12-​13.

• Na cava soti e sega ni donu vakalawa ena nona veilewaitaki o Jisu?

E sega ni rogoci ena mataveilewai na talaci ni nona kisi. Era kau mai o ira na dauveibeitaki lasu. A rogoci ga ena bogi na nona kisi. E tekivu qai oti tale ga na veilewai ena dua ga na siga.​—1/4, tabana e 20.