‘Lesu mo Vakaukauataki Ira na Tacimu’
E TAGI sara ga o Pita ni oti ga nona cakitaki Jisu. Dina ni na gadrevi vei Pita me vakavinakataka tale nona bula vakayalo, ia a vinakata o Jisu me vakayagataki koya me vukei ira kina eso tale. E tukuna vua o Jisu: ‘Ni o sa lesu, mo qai vakaukauataki ira na tacimu.’ (Luke 22:32, 54-62) E yaco o Pita me duru ni ivavakoso vaKarisito ena imatai ni senitiuri. (Kala. 2:9) Nikua tale ga, e rawa ni qarava tale na itavi vaqase e dua, qai marautaka me vakaukauataki ira na tacina vakayalo.
Eso era na rarawataka se beci ira ena nodra sa vakacegui mai na itavi ni ivakatawa. O Julio, * a veiqaravi tu vaqase ni ivavakoso mai Sauca Merika me sivia e 20 na yabaki, e kaya: “Noqu dau vakarautaka na ivunau, sikovi ira na mataveitacini, kei na nodra vakatawani na lewe ni ivavakoso era tiki sara tu ga ni noqu bula! Ia au qai vakayalia na itavi bibi qori, e vaka ga e sega ni vakainaki na noqu bula. E gauna mosimosi dina qori.” Nikua, sa qase tale tiko ni ivavakoso o Julio.
“MONI MARAU”
E vola na tisaipeli o Jemesa: “Moni marau o kemuni na taciqu ena gauna oni sotava kina na veimataqali veivakatovolei.” (Jeme. 1:2) E vakaibalebaletaka tiko e keri o Jemesa na veivakatovolei e vu mai na noda vakacacani kei na noda sega ni uasivi. E cavuta o Jemesa na gagadre ca, veivakaduiduitaki, kei na so tale. (Jeme. 1:14; 2:1; 4:1, 2, 11) E rawa ni mosimosi dina ni vakadodonutaki keda o Jiova. (Iper. 12:11) Ia me kua ni kauta laivi na noda marau na veivakatovolei va qori.
Ke da mani vakacegui mai na noda itavi ena ivavakoso, e se rawa tiko ga nida dikeva na ivakarau ni noda vakabauta qai vakaraitaka na noda lomani Jiova. Eda rawa tale ga nida vakasamataka na vuna eda veiqaravi kina. Vakacava eda sauva na isausau qori me yaga ga vei keda? Se da cakava qori nida lomani Jiova ena noda kila ni nona na ivavakoso, e vinakata tale ga me qaravi vinaka? (Caka. 20:28-30) O ira era qase ni ivavakoso tu e liu era tomana tiko ga ena marau na nodra veiqaravi vakayalo, era vakaraitaka vei ira e levu, vaka kina vei Setani nira lomani Jiova dina.
A vakadodonutaki o Tui Tevita ena cala bibi a cakava, ia e ciqoma qai vosoti koya o Jiova. E lagata: “Sa kalougata ko koya sa bokoci na nonai valavala ca, ka sa buluti na nona caka cala. Sa kalougata na tamata sa sega ni wilika vua ko Jiova nai valavala ca; ka sa sega na dauveivakaisini e na yalona.” (Same 32:1, 2) E veisautaki Tevita na veivakadodonutaki, a qai yaco kina me dua na ivakatawa vinaka.
O ira na qase ni ivavakoso era veiqaravi tu ena dua na gauna, e dau yaco vakalevu mera dua na ivakatawa maqosa ni vakatauvatani e liu. E tukuna e dua na qase ni ivavakoso: “Au sa qai kila vinaka qo meu qaravi ira vakacava era caka cala.” E tukuna tale ga e dua na qase: “Au sa qai raica vakabibi qo na nodra qaravi na mataveitacini.”
O RAWA NI VEIQARAVI TALE?
E vola na daunisame: ‘O Jiova e sega ni dau vaqara cala.’ (Same 103:9) Meda kua ni nanuma ni o Jiova ena sega vakadua ni nuitaka e dua a cala bibi. E kaya o Ricardo a veiqaravi tu vaqase ni ivavakoso me vica vata na yabaki: “Au rarawataka sara ga vakalevu na noqu cala. Ena levu ni noqu beci au, dua na gauna balavu au sega kina ni via lesu meu qaravi ira tale na taciqu ena itavi vakaivakatawa. Au sega ni vakabauta niu na qai nuitaki tale. Ia me vaka niu dau taleitaka meu vukei ira eso tale, au rawa kina ni caka vuli iVolatabu, vakauqeti ira na mataveitacini ena ivavakoso, qai tomani ira ena cakacaka vakaitalatala. Qo e vukei au sara vakalevu meu nuidei. Nikua, au sa qase tale tiko ni ivavakoso.”
O Jiova e sa vukea e levu na tagane mera marautaka ra qai vinakata tale mera veiqaravi
Ena vakadredretaka nona veiqaravi tale vaqase e dua, ke levataka nona vakacegui. Ena vinaka me muria na ivakaraitaki i Tevita, ena nona drotaka na Tui vuvu o Saula! A bese ni sauma o Tevita na ka a cakava vua o Saula, ena gauna mada ga e dodonu me vakamatei koya kina. (1 Sam. 24:4-7; 26:8-12) Ni sa mate o Saula ena ivalu, e tagicaki koya o Tevita, e tukuna me baleti koya kei na luvena o Jonacani ni rau ‘dauloloma qai yalovinaka.’ (2 Sam. 1:21-23) E sega vakadua ni leva o Tevita.
Ke o nanuma ni cala na ka e caka vei iko se sega ni dodonu, mo kua vakadua ni leva. Kena ivakaraitaki, o William sa 30 na yabaki nona veiqaravi tu vaqase e Peritania. A mani vakacegui ena itavi qori, ia e levataka na ka eratou cakava eso na qase ni ivavakoso. Na cava e vukei William me donu tale nona rai? E kaya: “E vakayaloqaqataki au na noqu dau vakawilika na ivola i Jope. Ke sa vukei Jope o Jiova me veimaliwai vinaka tale kei na tolu na nona itokani, qai vakacava sara nona vukei au meu veimaliwai tale kei ratou na qase ni ivavakoso!”—Jope 42:7-9.
NA KALOU E VAKALOUGATATAKI IRA ERA VEIQARAVI TALE
Ke o vakatulewataka mo sa kua ni qarava na qelenisipi ni Kalou, ena vinaka mo vakasamataka na vuna o cakava kina qori. O rarawataka vakalevu na ka o sotava? E bibi ena nomu bula eso tale na ka? E vakayalolailaitaki iko na nodra malumalumu eso? Se mani cava na vuna, nanuma tiko ena gauna o veiqaravi tu kina vaqase, e levu sara na sala o vukei ira kina na mataveitacini. E vakaukauataki ira na ivunau o solia, e vakayaloqaqataki ira nomu ivakaraitaki, e vukei ira tale ga na nomu veivakatawani mera vosota kina na veivakatovolei. Me vaka ga na nomu marautaka nomu veiqaravi vaqase, e marautaka tale ga qori o Jiova.—Vkai. 27:11.
Vakaraitaka nomu lomani Jiova ni o marautaka na veiqaravi tabu
O Jiova sa vukei ira e levu na tagane mera marautaka ra qai vinakata tale mera veiqaravi ena ivavakoso. Ke o sa vakacegui se kerea mo cegu mai na itavi vaqase, o rawa tale ni “qarava na itavi vakaivakatawa.” (1 Tim. 3:1) O Paula a ‘sega ni cegu ena masu’ me rawa nira kila vinaka na loma ni Kalou na lotu vaKarisito e Kolosa, ‘me veiganiti kina na nodra bula kei na nodra vakatokai ena yaca i Jiova.’ (Kolo. 1:9, 10) Ke o sa veiqaravi tale tiko vaqase, rai vei Jiova me vakaukauataki iko, mo vosovoso qai marau tiko ga. Ena iotioti ni veisiga qo, era vinakata sara tu ga na tamata ni Kalou na nodra veitokoni vakayalo na ivakatawa dauloloma. Vakacava o rawa ni tu vakarau mo vakaukauataki ira na tacimu?
^ para. 3 Sa veisau eso na yaca.