E VAKACAVARA o Guy Hollis Pierce nona bula e vuravura ena Tusiti, 18 Maji, 2014. A lewe ni iLawalawa Dauvakatulewa ni iVakadinadina i Jiova. E nuitaka tu me vakaturi me dua na taci Karisito, a yaco qori ni sa yabaki 79.—Iper. 2:10-12; 1 Pita 3:18.

E sucu o Guy Pierce e Auburn, Kalifonia, Merika ena ika6 ni Noveba, 1934, e papitaiso ena 1955. A vakawatitaki Penny ena 1977, rau qai vakaluveni. E laurai vua na ivakarau vakatama ni vakavuvale. Erau painia vakaveiwatini ena 1982, ena 1986 a veiqaravi vakaivakatawa ni tabacakacaka e Merika me 11 na yabaki.

Erau lewena vakaveiwatini na vuvale e Peceli mai Merika ena 1997. A veiqaravi o Brother Pierce ena Tabana ni Cakacaka, a lesi ena 1998 me veivuke ena Komiti ni Lewe i Peceli ni iLawalawa Dauvakatulewa. E kacivaki ena ika2 ni Okotova, 1999 ena bose vakayabaki ni Watch Tower Bible and Tract Society of Pennsylvania na nona lesi o Brother Pierce me lewe ni iLawalawa Dauvakatulewa. Ena vica na yabaki sa oti, a veiqaravi tu ena Komiti ni Lewe i Peceli, Komiti ni Volavola, Komiti ni Taba iVola, kei na Komiti ni Kodineita.

Era torovi Brother Pierce na duikaikai baleta ni dau matadredredre qai dau veiwali. Ia na kena idivi ni dau loloma, e yalomalumalumu, e doka na lawa kei na ivakavuvuli dodonu, kei na nona nuitaki Jiova vakaoti. E vakabauta o Guy Pierce ni na vakayacori kece na veika e yalataka o Jiova me vaka ga na cabe ni matanisiga, qai vinakata me wasea na ka dina qori e veiyasa i vuravura.

E dau gumatuataka o Brother Pierce na nona qaravi Jiova ena nona dau yadra vakamataka qai levu na gauna e dau cakacaka me yaco sara na bogilevu. E dau gole ena veiyasa i vuravura me vakayaloqaqataki ira na mataveitacini, e dau vagalalataki koya tale ga me veimaliwai kei ira na lewe ni vuvale yadua e Peceli, o ira na via veitalanoa kei koya kei ira na vinakata nona ivakasala kei na nona veivuke. Ni oti mada ga e vica vata na yabaki, era se nanuma vinaka tu ga na mataveitacini na nona dauveikauaitaki, nona veitokani kei na nona veivakayaloqaqataki ena iVolatabu.

Se bula tiko na wati Brother Pierce, e ono na luvena, vica na makubuna kei na makubuna vakarua. E levu tale ga na luvena vakayalo. A caka na ivunau ni veibulu ena Peceli mai Brooklyn ena ika22 ni Maji, 2014. E vunau o Mark Sanderson, e lewe tale ga ni iLawalawa Dauvakatulewa. A vakamacalataka na inuinui i Brother Pierce me lai bula e lomalagi qai wilika na vosa qo i Jisu: “E levu tu na tikina ena vale nei Tamaqu. . . . Ia niu lako meu vakarautaka e dua na tikina me nomudou, au na lesu mai meu kauti kemudou, mo dou tiko tale ga ena vanua au tiko kina. Dou kila tale ga na sala ina vanua au lako kina.”—Joni 14:2-4.

Io, eda nanumi Brother Pierce sara vakalevu. Ia eda marautaka ni ‘kila o koya na sala’ ina nona “tikina” tudei.