Eso na mataveitacini e dau lako vakaca vei ira na ivakaboi vinaka. E sega ni dua na ka era na cakava rawa nira veimaliwai e veisiga kei ira tale eso. Eso era taroga gona ke rawa nira kerei na mataveitacini mera kua ni vakayagataka na sede se kaloni ena soqoni vaKarisito, soqo ni tabacakacaka, kei na soqo ni veiwasewase.

E macala ni sega ni dua na lotu vaKarisito ena via vakadredretaka nona tiko e dua ena soqoni vaKarisito. Bibi vei keda kece meda vakayaloqaqataki ena soqoni. (Iper. 10:24, 25) Ena vinaka me veitalanoa kei ratou na qase o koya e dau lako vakaca vua na ivakaboi vinaka, ni vakavuna me sega ni dau tiko ena soqoni. E sega ni vakaivolatabu se kilikili me caka eso na lawa me baleta na vakayagataki ni ivakaboi vinaka vei ira na tiko ena soqoni, ena vinaka mera vakarautaka na qase eso na itukutuku me yaga vei ira na lewe ni ivavakoso mera kila na ka e vauci ena leqa qo. Ena vakatau ena ituvaki, ratou na rairai vakatulewataka na qase me veivosakitaki eso na itukutuku sa tabaki oti me baleta na leqa qo ena itavi ni veika e gadrevi ena ivavakoso, se me kacivaki vakamatau na leqa qo ena Soqoni ni Cakacaka. Ia ena sega ni rawa ni kacivaki vakawasoma na tikina qo. Ena noda soqoni era na dau tiko o ira na tataleitaki kei ira na vulagi era sega ni kila na leqa qo, eda vinakata mera marautaka nodra tiko. Me kua ni tikotiko vakaca e dua ni vakayagataka vakarauta na ivakaboi vinaka.

Ke ra tiko eso ena ivavakoso era sotava tiko na leqa qo, e rawa ni tuvanaka na ilawalawa qase mera dabe ena dua na vanua vakatikitiki ena Vale ni Soqoni. Kena ivakaraitaki, e rawa nira lai dabe ena rumu ni bose e rawa ni rogoci kina na soqoni. Ena sala qo ena yaga tiko ga vei ira nodra tiko ena soqoni. Ia ke sega ni wali vakamatau na leqa qo ra qai vakaleqai tiko ga kina, sa rawa ni katoni na soqoni se mera qiri mai mera vakarorogo e nodra vale, me vaka e dau caka vei ira na sega ni veitosoyaki rawa.

Ena vica tiko ga na yabaki qo era uqeti na mataveitacini ena Noda Cakacaka Vakaitalatala mera vakasamataka vakabibi na tikina qo nira lai tiko ena soqo ni veiwasewase. Ni vakayacori na soqo ni veiwasewase ena lomanivale e cagina vinaka, era kerei na dauveiqaravi mera kua ni vakayagataka vakalevu na ivakaboi vinaka. Me vakasamataki vinaka na tikina qo ena soqo ni veiwasewase, ni sega ni rawa me vakarautaki e dua na vanua e sega ni vakatarai kina na ivakaboi vinaka. Ia e sega ni inaki ni idusidusi qori me vakayagataki ena soqoni ni ivavakoso.

Nida bula tu ena ituvaki ni vuravura qo, eda na vakila na revurevu ni bula ivalavala ca. Eda vakavinavinakataka nodra sasaga eso mera vakamamadataka na ituvaki dredre eda tu kina! Ena rairai dredre vei ira eso mera kua ni vakayagataka na sede se kaloni me vakarawarawataka kina nodra tiko ena soqoni na mataveitacini. Ia na loloma ena uqeti keda meda cakava qori.

Era kilai Ponitio Pailato na dau wili iVolatabu ni a vakaitavi ena nona lewai o Jisu kei na nona vakamatei. (Maciu 27:1, 2, 24-26) Ia e laurai tale ga vakavica na yacana ena so na ivola ni itukutuku makawa me baleta na gauna oya. E tukuni ena dua na ivolavosa ni iVolatabu (The Anchor Bible Dictionary) ni kena ivolatukutuku “e levu duadua qai matailalai ni vakatauvatani kei na so tale na kovana ni Jutia kai Roma.”

Laurai vakalevu na yaca i Pailato ena nona volavola o Josephus e daunitukutuku makawa e Jiu, e vola e tolu na itukutuku me baleta na dredre e donuya o Pailato ena gauna e kovana tu kina e Juta. Na ikava ni itukutuku e vola o Philo e daunitukutuku makawa e Jiu. Na dauvolavola kai Roma o Tacitus, e vola na kedra itukutuku na empara ni Roma, e vakadeitaka ni vakarota o Ponitio Pailato na nona vakamatei o Jisu ena gauna e veiliutaki kina o Tiperiu.

Ena 1961 era kunea na daukelikeli era cakacaka tiko ena nodra valenisarasara makawa na kai Roma mai Sisaria, e Isireli, e dua na vatu rabaraba e ceuti tu kina na yaca i Pailato ena vosa vakaLatina. E laurai ga eso na vosa (vakaraitaki tu qo) e ceuti ena vatu, ia e nanumi ni volai kina: “E vakatabuya vei ira na kalou dokai na Tiperiu (qo) o Ponitio Pailato, na iLiuliu Levu kei Jutia.” Na vale e tukuni tiko qo e rairai dua na valenisoro e vakalagilagi kina na Empara ni Roma o Tiperiu.

E tukuni ena “Taro na Dauwiliwili” e tabaki ena Vale ni Vakatawa 15 Julai, 2002, me ubia na yalewa na uluna ke veivakavulici tiko ena iVolatabu ni tiko e dua na tagane dautukutuku e papitaiso se sega. Ni dikevi tale na ulutaga qo, e bibi me vakadodonutaki na kena idusidusi.

Ke salavata kei na yalewa e dua na dautukutuku tagane sa papitaiso ena dua na vuli iVolatabu, ena vinakati me ubia o yalewa na uluna. E vakaraitaka nona doka na ituvatuva i Jiova me baleta na veiliutaki ena loma ni ivavakoso, ni vakayacora na itavi e dau lesi ga vei ira na tagane. (1 Kor. 11:​5, 6, 10) Ena yasana adua, e rawa ni kerei tagane me caka vuli ke rawata na kena ivakatagedegede.

Ia ke salavata kei na dua na yalewa e dua na tagane e dautukutuku bera ni papitaiso e sega ni watina ena dua na vuli iVolatabu, ena sega ni gadrevi vakaivolatabu me ubia na uluna. Ena yasana adua, na nodra lewaeloma eso na yalewa ena uqeti ira mera ubia na uludra ena ituvaki mada ga va qo.