KEIRAU vulica na danisi ni keirau se yabaki lima. Keirau se bera ni sota. Keirau vakadeitaka me neirau isausau me keirau kenadau ena danisi titeqe (ballet). Ni keirau sa voleka sara ga ni dua na kenadau, keirau mani vakanadakuya. Na cava e veisautaka neirau vakatulewa?

David: Au sucu i Shropshire mai Igiladi ena 1945. E vakaiteitei o Tamaqu ena taudaku ni tauni. Niu suka na vuli, au dau taleitaka na vakana toa qai soqona na kedra yaloka, qarava na bulumakau kei na sipi. Au dau veivuke ena tatamusuki ni sereki na vuli, so na gauna au dau draivataka na trekta.

E dua tale na ka au dau taleitaka vakalevu. Niu se gone e siqema o tamaqu niu dau taleitaka na danisi niu rogoca na ivakatagi. Niu yabaki lima e tukuna vei tinaqu meu lai vulica na danisi cacaqouqou (tap dancing) ena dua na koronivuli ni danisi ena vanua ya. E vakavulici au tale ga noqu qasenivuli ena danisi titeqe ni raica o koya niu rawa ni kenadau kina. Niu yabaki 15 au rawata na sikolasivi meu lai vuli ena koronivuli rogo i Lodoni na Royal Ballet School. Qori na vanua au sotavi Gwen kina, na noqu isa ni danisi.

Gwen: Au sucu ena 1944 ena korolevu o Lodoni. Au vakabauta na Kalou niu se goneyalewa lailai. Au dau wilika na iVolatabu, ia e dredre meu kila. Au vuli danisi niu se yabaki lima. Ni oti e ono na yabaki, au rawata e dua na veisisivi danisi era vakaitavi kina na daudanisi kece e Igiladi, na kena icocovi meu lai vuli ena nodra iwasewase na gone ena koronivuli The Royal Ballet School. Na koronivuli qo e tiko ena vale vakaitamera e vakatokai na White Lodge, e Richmond Park ena taudaku kei Lodoni. Qori na vanua au vuli kina, au vulica tale ga kina na danisi titeqe era qasenivuli kina eso na dauveivakavulici rogo. Niu yabaki 16, au lai vuli ena nodra iwasewase na qase ena Royal Ballet School ena loma ni korolevu o Lodoni, au sotavi David kina. Ni oti e vica na vula, keirau danisi vata ena kedra maliwa na daulagasere ena Royal Opera House ena Covent Garden e Lodoni.

David: Me vaka e tukuna o Gwen, keirau danisi ena vale rogo na Royal Opera House kei na London Festival Ballet (e vakatokai ena gauna qo na English National Ballet). E dolava e dua na dauveivakavulici e Royal Ballet nona kabani ena korolevu o Wuppertal mai Jamani, qai kauti keirau kina. Ena gauna kece qori, keirau dau danisi ena valenisarasara e veiyasa i vuravura, keirau bau vakaitavi kei ira na daudanisi rogo me vakataki Dame Margot Fonteyn kei Rudolf Nureyev. Na ivakarau ni veisisivi va qo e dau  vakavuna na dokadoka, keirau solia sara ga kina neirau dina.

Gwen: Sa tiki sara tu ga ni noqu bula na danisi. Keirau saga ruarua me keirau yacova na kena iyacoyaco. Au dau taleitaka na saini, me soli vei au na senikau, kei na nodra dau vakasausau na sarasara. Au dau veimaliwai kei ira na cakava tu na itovo vakasisila, vakatavako kei na gunu. Me vakataki ira ga na dauvakatasuasua, au dau vakanuinui vakalevu ena so na ka au nanuma ni solia vei au na kaukaua.

David: Ni oti e vica vata na yabaki ena cakacaka qo, au sa vakila na oca ni veitosoyaki. Me vaka niu susu ena vanua ni teitei, au sa tekivu galeleta na bula rawarawa ena vanua qori. Ena 1967, au biuta na danisi, au sa tekivu cakacaka ena dua na vanua ni susu manumanu levu volekata nodrau vale noqu itubutubu. Na itaukei ni vanua ni susu manumanu e solia vei au e dua na vale meu rede kina. Au qiriti Gwen ena valenisarasara qai kerei koya me watiqu. E dredre toka vua me vakadonuya ni sa toso sara tiko ga ena cakacaka ya. Ia e ciqoma noqu kerekere, keirau lai tiko ena vanua ni susu manumanu. Qo na ivakarau ni bula e sega ni matau kina.

Gwen: E sega ni rawarawa na bula ena vanua ni susu manumanu. Au sega ni matau ena loba sucu ni bulumakau, vakana vuaka kei na toa, salavata kei na duidui draki e basika. E vuli tale o David me ciwa na vula ena koronivuli ni iteitei me vulica kina na iwalewale vou ni teitei, au dau galili tu me yacova nona suka mai ena bogi. Sa sucu ena gauna qori na neirau ulumatua yalewa o Gilly. E vakatututaka o David meu vuli draiva, dua na siga niu draiva i tauni au raici Gael. Keirau se veikilai sara ni se cakacaka tiko ena dua na sitoa.

E sureti au o Gael me keirau lai gunu ti ena nona vale. Ni keirau sarava tiko na nodrau itaba ni vakamau, au raica sara ni ratou taba tiko kina eso ena tautuba ni dua na vanua e vakatokai na Vale ni Soqoni. Au tarogi koya sara na vale ni lotu cava ya. Au marau ni tukuna vei au ni rau iVakadinadina i Jiova vakaveiwatini. Au vakasamataka sara ni dua tale ga vei ratou noqu nei e iVakadinadina i Jiova. Au vakasamataka tale ga ni dau cati koya o tamaqu, e dau viritaka kece nona ivola ena kavanibenu. Au dau vakataroga se cava e va kina qori na itovo nei tamaqu ni turaga yalovinaka.

Au sa qai kila na vuna e duatani kina na vakabauta nei noqu nei mai na ivakavuvuli vakalotu. E vakaraitaka o Gael na ka e vakavulica na iVolatabu. Au kurabuitaka ni sega ni vakavuvulitaka na iVolatabu  na letoluvakalou kei na kena bula tiko e dua na ka ena gauna e mate kina e dua. (Dauv. 9:5, 10; Joni 14:28; 17:3) iMatai tale ga ni gauna meu raica ena iVolatabu na yaca ni Kalou o Jiova.—Lako 6:3.

David: E tukuna vei au o Gwen na ka sa vulica tiko. Au vakasamataka sara ni dau tukuna vei au o tamaqu niu se gone meu wilika na iVola Vinaka. Keirau vakadonuya vakaveiwatini me keirau vulica na iVolatabu kei rau na veiwatini o Gael kei Derrick. Oti e ono na vula, keitou toki i Oswestry e dua na tauni e Shropshire, ni keitou sa redetaka na neitou vanua lailai ni susu manumanu. O Deirdre e dua na tacida yalewa ena vanua qori e tomana neirau vuli iVolatabu. E berabera neirau toso. E vakaosoosotaki keirau nodra qaravi na manumanu. Ia sa tekivu kadre tiko vakamalua e lomai keirau na ka dina.

Gwen: E dredre dina vei au meu biuta na vakabauta vakatevoro. E vukei au na Aisea 65:11 meu kila na rai i Jiova vei ira na ‘vakarautaka na teveli me nona na kalou ni Kalougata.’ E taura na gauna kei na masu meu biuta tani na iyaya au vakabauta ni kauta mai na kalougata. Au vulica ni “o koya e vakalevulevui koya ena vakalolovirataki, o koya e vakalolovirataki koya ena vakalevulevui,” qo e vukei au meu kila na tamata e taleitaka o Jiova. (Maciu 23:12) Au vinakata meu qarava e dua na Kalou e kauaitaki keda vakalevu me solia na Luvena talei me keda ivoli. Ena gauna qori sa dua tale na luvei keirau yalewa, e ka marautaki tale ga meu vulica ni rawa me keitou bula vakavuvale ena parataisi e vuravura.

David: Noqu kila na kena vakayacori na parofisai ena iVolatabu, me vaka e laurai ena Maciu wase 24 kei na ivola i Taniela, au vakadeitaka ni qo ga na dina. Au kila tale ga ni talei cake noda veiwekani kei Jiova ni vakatauvatani kei na ka e solia na vuravura qo. Toso na gauna au sa sega ni via vaqara rogo. Au raica ni bibi vei au o ratou noqu veitinani. E vakadeitaka vei au na Filipai 2:4 ni sega ni vinaka meu nanumi au ga kei na noqu vinakata meu volia e dua na vanua levu ni susu manumanu. Ia e dodonu meu vakaliuca ena noqu bula meu qaravi Jiova. Au sa biuta na vakatavako. E ka ni sasaga toka me keitou vakavakarau me keitou lako ina soqoni ena veiyakavi ni Vakarauwai e rauta ni 10 na kilomita na kena yawa, ena gauna qori e dau loba kina na sucu ni bulumakau. Ia ena veitokoni nei Gwen e sega kina ni keitou calata na soqoni, se kauti rau na neirau goneyalewa ena cakacaka vakaitalatala ena veimataka ni Sigatabu ni dau loba oti na sucu.

Era sega ni taleitaka na wekai keirau na neirau sa veisau. E galuvi Gwen tu o tamana me ono na yabaki. Rau saga tale ga noqu itubutubu me rau tarova neirau veimaliwai kei ira na mataveitacini.

Gwen: E tokoni keitou o Jiova ena ituvaki dredre kece qo. Toso na gauna, era sa vaka na vuvale vou na mataveitacini ena ivavakoso e Oswestry, era tokoni keitou vakayalololoma ena ituvaki kece qori. (Luke  18:29, 30) Keirau yalataki keirau vei Jiova qai papitaiso ena 1972. Au veiqaravi vakapainia niu vinakata meu cakacaka vagumatua meu vukei ira kina e levu mera kila na ka dina.

David: Sa bau veivakaocai dina neitou cakacaka tiko me vica na yabaki ena neitou vanua ni susu manumanu; keirau saga tale ga me keirau ivakaraitaki vinaka vei ratou na goneyalewa ena kena vakaliuci na veika vakayalo. Toso na gauna sa sega ni volivoli vakalevu na matanitu, keitou mani volitaka na neitou vanua ni susu manumanu. E sega neitou vale se cakacaka, se yabaki dua tale ga na ikatolu ni luvei keirau yalewa, keirau masuta na veivuke kei na veidusimaki nei Jiova. Keirau mani vakatulewataka me keirau vakayagataka neirau taledi me keirau dolava e dua na vale ni vuli danisi titeqe me vukei keitou vakailavo. E yaga sara vakalevu neitou sasaga me keitou vakaliuca tiko ga na veika vakayalo. Dua na ka neirau marau ni ratou painia kece na luvei keirau ni ratou vakaotia nodratou vuli. E painia tale ga o Gwen, qai tokoni ratou na goneyalewa e veisiga.

Keirau sogota na vale ni vuli danisi ni rau sa vakamau na luvei keirau qase o Gilly kei Denise. Keirau volavola ena valenivolavola ni tabana me keirau taroga na vanua e gadrevi tu kina na veivuke. E tukuni vei keirau me keirau lai veivuke ena vica na tauni ena cevaicake kei Igiladi. Au tekivu painia ni sa vo tiko neirau itini o Debbie. Ni oti e lima na yabaki, e kerei me keirau lai veivuke ena so tale na ivavakoso ena vualiku kei Igiladi. Ni sa vakawati o Debbie, e ka dokai me keirau lai veivuke me tini na yabaki ena tarataravaki e vanuatani me vakataki Zimbabwe, Moldova, Hungary kei Côte d’Ivoire. Keirau lesu tale i Igiladi me keirau lai veivuke ena kena tara na Peceli e Lodoni. Ena gauna oya se dau caka na susu manumanu e Peceli. Niu sega ni vulagi ena susu manumanu, au lesi meu veiqaravi e Peceli meu lai susu manumanu. Ena gauna qo, keirau painia tiko ena vuaira kei Igiladi.

Gwen: Na imatai ni neirau yalayala na danisi titeqe, e lekaleka ga na kena marautaki. Na ikarua ni neirau yalayala e bibi duadua, na neirau yalataki keirau vei Jiova, e marautaki qai tawamudu. Keirau se veitokani tiko ga, sega ena danisi ia ena cakacaka vakapainia. Keirau vakila na marau e tawavakaiyalayala ni keirau vukei ira e levu mera vulica na ka dina. Na “ivola ni veivakadonui” qo e uasivia na rogo ena vuravura qo. (2 Kor. 3:1, 2) Ke keirau sega ni kila na dina, ena ka ni vakanananu wale tu ga na itaba makawa kei na vakatasuasua ena valenisarasara keirau a vakaitavi tu kina.

David: E veisautaka neirau bula neirau qaravi Jiova. E vukei au meu dua na tama kei na tagane vakawati vinaka. E tukuna na iVolatabu ni o Miriama, Tui Tevita kei na so tale nira danisi mera vakaraitaka kina nodra marau. Keirau waraka tu kei na levu tale meda danisi ena marau ena vuravura vou i Jiova.—Lako 15:20; 2 Sam. 6:14.