1, 2. (a) Na cava e tukuna o Jisu me baleta na iotioti ni veisiga? (b) Na taro cava eda na veivosakitaka?

VAKASAMATAKA mada ni dabe toka o Jisu ena Ulunivanua ni Veiolive, e tadrava toka yani na valenisoro e Jerusalemi. Ratou tiko tale ga e va na nona yapositolo, o Pita, Adriu, Jemesa, kei Joni. Ratou vakadirorogo ni parofisaitaka o Jisu na veigauna se bera mai. E levu na ka e vakamacalataka me baleta na iotioti ni veisiga ni ituvaki ca qo, na gauna ena veiliutaki tiko kina o koya ena Matanitu ni Kalou. E tukuna vei ratou ni gauna dredre oya ena matataki koya e vuravura na nona “dauveiqaravi e yalodina e vuku,” ena vakarautaka vei ira nona imuri na kakana vakayalo era gadreva ena kena gauna.—Maciu 24:45-47.

² E tukuna tarava o Jisu ena parofisai vata ga qori na vosa vakatautauvata ni tini na goneyalewa. (Wilika Maciu 25:1-13.) Meda veivosakitaka mada e tolu na taro: (1) Na cava e vakabibitaki ena vosa vakatautauvata qori? (2) Era muria vakacava na lumuti na ka e vulici ena vosa vakatautauvata qori, na cava e laurai  kina? (3) E yaga vakacava vei keda kece ena gauna qo na vosa vakatautauvata i Jisu?

3. Ena veigauna sa oti, e dau vakamacalataka vakacava na noda ivola na vosa vakatautauvata ni tini na goneyalewa? Na cava e laurai kina?

³ Eda vulica ena ulutaga sa oti ni sa veisau nona vakamacalataka na dauveiqaravi yalodina eso na itukutuku vakaivolatabu. Sa sega ni vakabibitaka na kena ibalebale vakaparofisai, e vakabibitaka ga na lesoni e vulici kina. Ena veigauna sa oti e dau vakamacalataka vakamatailalai na noda ivola na vosa vakatautauvata i Jisu ni tini na goneyalewa, na ka e vakatakarakarataka na cina, waiwai, tavaya waiwai, kei na so tale. Vakacava, sa lai buawa kina na itukutuku rawarawa qai bibi ena vosa vakatautauvata qo? Eda na dikeva qo ni bibi na isau ni taro qo.

4. (a) O cei na taganevou ena vosa vakatautauvata? (b) O cei o ratou na goneyalewa?

⁴ Meda dikeva mada qo na ka e vulici ena vosa vakatautauvata i Jisu. iMatai, vakasamataki ira na talanoataki kina. O cei na taganevou ena vosa vakatautauvata? Matata ni cavuti koya tiko ga o Jisu. Ena dua tale na gauna, e okati koya mada ga me taganevou! (Luke 5:34, 35) Vakacava o ratou na goneyalewa? E tukuna o Jisu ena vosa vakatautauvata ni dodonu me ratou vakarau tu, me waqa tale tu ga na nodratou cina ni sa yaco mai na taganevou. E via tautauvata qori kei na ka e dusimaki ira kina na nona “qelenisipi lailai” lumuti: “Dou vauca na tolomudou, me caudre tiko ga na nomudou cina. Mo dou vakataki ira era waraka na lesu mai ni nodra turaga mai na soqo ni vakamau.” (Luke 12:32, 35, 36) Kena ikuri, e uqeti na yapositolo o Paula kei Joni me rau vakatauvatani ira na nona imuri lumuti na Karisito mera goneyalewa savasava. (2 Kor. 11:2; Vkta. 14:4) E macala gona ni inaki ni vosa vakatautauvata i Jisu ena Maciu 25:1-13 mera vakasalataki qai vakadreti kina na nona imuri lumuti.

5. E vakaraitaka vakacava o Jisu na gauna ena vakayacori kina na nona vosa vakatautauvata?

⁵ Na gauna cava me muri kina na ivakasala i Jisu? E sauma o Jisu ena icavacava ni nona vosa vakatautauvata: “Sa yaco mai na taganevou.” (Maciu 25:10) Eda vulica ena Vale ni Vakatawa ni 15 Julai, 2013, ni cavuti vakawalu ena parofisai i Jisu ena Maciu wase 24 kei na 25 na nona “yaco mai.” Ena walu na ivakaraitaki qori, e taurivaki e dua ga na vosa vaKirisi. E vakaibalebaletaka kina o Jisu na gauna e vakacagau tiko kina na veivakararawataki levu ena lako mai kina me veilewai qai vakarusa na ituvaki ni vuravura qo. Macala gona ni vosa vakatautauvata qo ena vakayacori ena iotioti ni veisiga, e tini ena veivakararawataki levu.

6. Na cava eda vulica ena vosa vakatautauvata ni laurai na veitikina wavolita?

⁶ Na cava eda vulica ena vosa vakatautauvata? Vakasamataka na veitikina wavolita. E vakamacalataka oti ga o Jisu na nona “dauveiqaravi e yalodina e vuku.” Na dauveiqaravi qori e dusia e dua na ilawalawa lailai ni tagane lumuti era liutaki ira na imuri i Karisito ena iotioti ni veisiga. E vakasalataki ira na tagane qori o Jisu mera yalodina tiko ga. Ena wase tarava, e vakayagataka na vosa vakatautauvata ni tini na goneyalewa me uqeti ira kece na nona imuri lumuti ena iotioti ni veisiga mera “yadra tiko,” de ra na sega ni rawata na nodra icocovi totoka. (Maciu 25:13) Meda veivosakitaka mada na vosa vakatautauvata qori kei na nodra  muria na lumuti na kena ivakasala.

7, 8. (a) Na cava e rua na ka e laurai vei ratou na goneyalewa vuku? (b) Era vakaraitaka vakacava na lumuti nira vakavakarau tu?

⁷ E vakabibitaki ena vosa vakatautauvata i Jisu ni ratou vakarau tu na goneyalewa vuku ena nona yaco mai na taganevou, ni vakatauvatani kei ratou na goneyalewa lialia. Na vuna? E rua na ka e laurai vei ratou: na vakavakarau kei na yadrayadravaki. Eratou lesi na goneyalewa qo me ratou yadrava nona lako mai na taganevou. E vinakati me waqa tiko ga na nodratou cina, me ratou yadra tiko me vica vata na aua me yacova nona yaco mai na taganevou. Ia e lima ga na goneyalewa ratou vakavakarau vinaka, eratou kauta tale tu ga yani eso na waiwai ena kena tavaya. Vakacava o ira na lumuti yalodina, era vakavakarau tale ga?

⁸ Io! Era vaka na goneyalewa vuku na lotu vaKarisito lumuti ena iotioti ni veisiga qo, era vakavakarau vinaka mera vakayacora na nodra itavi me yacova na icavacava. Era gumatua ni qaravi Jiova ena yalodina. Era kila na ka e vauci ena nodra itavi, oya mera vakanadakuya e levu na iyau e tu ena vuravura e lewa tu o Setani. Era sokaloutaki Jiova vakatabakidua qai qaravi koya nira lomani koya kei Luvena, e sega ni yavutaki qo ena kena voleka mai na icavacava. Era yalodina tiko ga nira sega ni vakatotomuria na rai ni vuravura qo me baleta na domodomoiyau, na ivalavala vakasisila, kei na tawaveinanumi. Era vakarau tu na lumuti nira rarama tiko ga me vaka na cina, era sega ni yalolailai ni se bera ni yaco yani na Taganevou, e kena irairai ni bera yani.—Fpai. 2:15.

9. (a) Na cava e vakasalataka o Jisu me baleta na sosovu? (b) Na cava era cakava na lumuti nira rogoca na kaci: “Sa yaco mai na taganevou”? (Raica na ivakamacala e ra.)

⁹ Na ikarua ni ka e laurai vei ratou na goneyalewa na yadrayadravaki. Era na via moce na lotu vaKarisito lumuti nikua nira waraka tiko nona yaco mai na Karisito? Io. E vakamacalataki ratou na tini na goneyalewa o Jisu ni ratou “sosovu kece, ratou moce sara” ni ratou waraka tiko na taganevou, e kena irairai ni bera yani. E kila vinaka o Jisu ni o koya mada ga e gugumatua e rawa ni vakaleqai koya na malumalumu vakayago. Era muria na ivakasala qori na lumuti yalodina nira cakacaka vakaukaua mera yadra tiko ga. Ena vosa vakatautauvata, era rogoca kece na goneyalewa na kaci: “Sa yaco mai na taganevou!” Ia o ratou ga na goneyalewa vuku ratou vakavakarau vinaka me yacova na icavacava. (Maciu 25:5, 6; 26:41) Vakacava o ira na lumuti yalodina ena gauna qo? Ena ivakataotioti ni veisiga qo, era rogoca na kaci, “Sa yaco mai na taganevou!” Era vakabauta na ivakadinadina matata ni sa voleka ni yaco mai o Jisu, era nanamaki tu ena nona yaco dina mai. * Meda raica mada na icavacava ni vosa vakatautauvata i Jisu, e dusia vakamatata e dua na gauna.

10. Na taro cava e basika ena nodratou veivosaki na goneyalewa vuku kei na goneyalewa lialia?

¹⁰ E dua na tikina e vakavu veilecayaki e laurai ni sa voleka ni oti na vosa  vakatautauvata, ena nodratou veivosaki na goneyalewa lialia kei na goneyalewa vuku. (Wilika Maciu 25:8, 9.) E basika kina e dua na taro: “Na gauna cava ena kedra ivolatukutuku na tamata ni Kalou era sega ni vukei ira na kere veivuke na dauveiqaravi yalodina ni Kalou?” E macala vei keda na tikina qo nida dikeva tale na gauna. Eda sa mai kila ni na yaco mai na Taganevou, o Jisu, me vakataulewa ni voleka na icavacava ni veivakararawataki levu. Kena irairai ni veivosaki qo e dusia tiko na ka ena yaco ni bera na icavacava ni veivakararawataki levu. Na vuna? Dua na ka era na sotava na lumuti ena gauna qori. Na cava ya?

11. (a) Na cava ena yaco ni bera ni tekivu na veivakararawataki levu? (b) Na cava eratou kaya kina na goneyalewa vuku me ratou lai volia nodratou waiwai na goneyalewa lialia?

¹¹ Ni bera ni tekivu na veivakararawataki levu, era na dregati ena iotioti ni gauna na lumuti yalodina kece e vuravura. (Vkta. 7:1-4) E vakadeitaka ena gauna qori nira sa kacivi mera bula i lomalagi. Ia vakasamataka mada na veiyabaki ni bera ni tekivu na veivakararawataki levu. Na cava ena yaco vei ira na lumuti era sega ni yadrayadravaki, era tawayalodina? Era na sega ni rawata na nodra icocovi ni bula i lomalagi. Macala nira na sega ni dregati ena iotioti ni gauna ena itekitekivu ni veivakararawataki levu. Ena gauna qori, era sa lumuti eso tale na lotu vaKarisito yalodina. Ni tekivu na veivakararawataki levu, era na kidacalataka o ira qori na rusa nei Papiloni na Ka Levu. Era na liaca ena gauna qori nira sega tu ni vakavakarau ena nona yaco mai na Taganevou. Na cava ena yaco ke ra kere veivuke ena gauna qori? E sauma vakadodonu na vosa vakatautauvata i Jisu. Eratou sega ni via solia nodratou waiwai na goneyalewa vuku vei ratou na goneyalewa lialia, eratou kaya ga me ratou lako vei ira na volitaki waiwai. Nanuma tiko ni yaco qori ena “bogilevu tutu.” Vakacava, eratou na sotava na dauvolitaki waiwai ena gauna qori? Sega, sa bera.

12. (a) Ena veivakararawataki levu, na cava era na sotava o ira na lumuti era tawayalodina ni bera nira dregati ena iotioti ni gauna? (b) Na cava na kedra itinitini o ira na vaka na goneyalewa lialia?

¹² Ena vaka kina ena gauna ni veivakararawataki levu, era na sega ni vukea rawa na lumuti yalodina e dua e tawayalodina. Sa na sega na veivuke. Sa bera. Na cava na kedra itinitini? E vakamacalataka o Jisu na ka e yaco vei iratou na goneyalewa lialia eratou lai vaqara waiwai: “Sa yaco mai na taganevou, ratou mani curu vata kei koya ina kana ni vakamau na goneyalewa eratou sa vakarau tu, qai sogo na katuba.” Ni lako mai na Karisito ena nona lagilagi ni voleka ni cava na veivakararawataki levu, ena kumuni ira vata na lumuti yalodina i lomalagi. (Maciu 24:31; 25:10; Joni 14:1-3; 1 Ces. 4:17) Sa na sogo tu na katuba vei ira na tawayalodina, era vaka na goneyalewa lialia. Era na rairai kaya ena domoilevu: “Kemuni, kemuni, ni dolava mada vei keitou na katuba!” Na ka era rogoca ena via tautauvata kei na ka e tukuni vei ira na vaka na me ena gauna ni veilewai qori: “Au tukuna vakadodonu, au sega sara ga ni kilai kemudou.” Ka ni rarawa dina!—Maciu 7:21-23; 25:11, 12.

13. (a) Na cava me kua kina ni tukuni ni levu na imuri i Karisito lumuti era na tawayalodina? (b) Na cava eda rawa ni kaya kina ni vosa vakatautauvata i Jisu e vakaraitaka nona nuitaki ira na lotu vaKarisito lumuti? (Raica na imatai ni iyaloyalo.)

¹³ Na cava eda vulica ena ka eda veivosakitaka mai? E tukuna tiko o Jisu ni levu vei ira na nona imuri lumuti era na sega ni yalodina, qai vinakati mera sosomitaki?  Sega. Nanuma ni a vakasalataka na nona “dauveiqaravi e yalodina e vuku” me kua ni dauveiqaravi ca. Sega ni kena ibalebale qori ni na yaco dina. E dua na tikina eda vakadreti kina ena vosa vakatautauvata qo. E lima na goneyalewa lialia, e lima na goneyalewa vuku, kena ibalebale ni vakatau vei ira yadudua na lumuti mera vakavakarau qai yadrayadravaki se mera lialia qai tawayalodina. E via tautauvata na ka e vakadreta na yapositolo o Paula vei ira na lotu vaKarisito lumuti. (Wilika Iperiu 6:4-9; vakatauvatana Vakarua 30:19.) E kaukaua nona veivakadreti o Paula, ia e tinia ena nona kaya vakayalololoma ni nuitaka na veika “vinaka cake” e vakarautaki tu vei ira na tacina lotu vaKarisito. Na veivakadreti tale ga ena vosa vakatautauvata ni tini na goneyalewa e vakaraitaka nona nuitaki ira na lumuti o Jisu. E kila ni rawa nira yalodina tiko ga o ira kece na nona imuri lumuti, ra qai rawata na icovi totoka!

14. Na cava e yaga tale ga kina vei ira na ‘so tale na sipi’ na vosa vakatautauvata i Jisu?

¹⁴ Ni vagolei na vosa vakatautauvata ni tini na goneyalewa vei ira na imuri lumuti i Jisu, eda na kaya ni sega ni yaga qo vei ira na ‘so tale na sipi’ i Karisito? (Joni 10:16) Sega! Nanuma ni rawarawa sara na ka eda vulica ena vosa vakatautauvata qo: “Dou yadra tiko.” E vakaibalebale ga vei ira na lumuti? E kaya ena dua na gauna o Jisu: “Na ka au kaya vei kemudou au kaya vei ira kece, dou yadra tiko.” (Mari. 13:37) E namaka o Jisu mera vakarautaka na lomadra o ira kece na nona imuri mera yalodina ena nodra veiqaravi ra qai yadrayadravaki tale ga. Kena ibalebale mera muria na nodra ivakaraitaki na lumuti o ira kece na lotu vaKarisito, era ivakaraitaki vinaka ra qai vakaliuca na cakacaka vakaitalatala. Meda kua tale ga ni guilecava ni ratou tarogi ratou na goneyalewa vuku na goneyalewa lialia me ratou solia eso na nodratou waiwai. Eda lai vakasamataka kina ni sega ni dua e rawa ni yalodina ena vukuda, me tiko ena dina ena vukuda, se me yadrayadravaki ena vukuda. Eda na saumi taro vua na Turaganilewa yalododonu e lesia o Jiova. Meda vakarau tu. Sa voleka mai o koya!

15. Na cava e ka marautaki kina vei keda kece na lotu vaKarisito dina na vakamau nei Karisito?

¹⁵ Eda marautaka kece na lotu vaKarisito na vakamau e tukuni ena vosa vakatautauvata i Jisu. Ena dua na gauna sa tu qo e liu ni oti na ivalu na Amaketoni, era na wati Karisito na lotu vaKarisito lumuti. (Vkta. 19:7-9) Ena yaga vei ira kece e vuravura na vakamau qori mai lomalagi, ni vakadeitaka na matanitu vinaka me liutaki keda kece. Se da nuitaka na bula i lomalagi se vuravura, meda nakita dei meda vulica na lesoni bibi ena vosa vakatautauvata ni tini na goneyalewa. Meda vakarautaka na lomada meda yalodina da qai yadra tiko, meda marautaka kina na gauna vinaka e vakarautaka tu vei keda o Jiova!