E va tale ga qori nodra rai eso na dauveiqaravi ni Kalou nikua nira vaqara e dua me watidra, e dina ni matata vinaka tu vei ira na ivakasala i Paula mera vakawati “ga ena Turaga”—na ivakasala e dodonu me lewa noda itovo na lotu vaKarisito. (1 Kor. 7:39) Na cava e va kina qori nodra rai?

E levu e dau va qo nodra rai nira nanuma ni sa rui veisivi na kedra iwiliwili na cauravou kei na goneyalewa ena ivavakoso e ganiti ira na vakawati. E vakilai qo ena levu sara na vanua. Dikeva e rua na kena ivakaraitaki: Mai Korea, ena rauta ni veiya100 na iVakadinadina era dawai, e 57 era goneyalewa, 43 era cauravou. Mai Colombia, e tukuni ni 66 na pasede na ivakadinadina era goneyalewa, 34 na pasede era cauravou.

Ena so na vanua e dau sivia na iduguci era lavaka na itubutubu era sega ni vakabauta. Qo e vakadredretaka nodra vakawati na tacida tagane era sega so ni rawati ira. E rawa ni nanuma kina e dua na tacida yalewa lotu vaKarisito ni na dredre toka me kunea e dua na watina “ena Turaga.” Ena vaqaqa, “E rawa niu kunea e dua na kequ isa veiganiti ena ivavakoso?” *

Ke dau va tale ga qo nomu vakasama, mo lomavakacegu ni kila vinaka o Jiova na kemu ituvaki. Io, e kila vinaka na ivakarau ni lomamu kei na nomu vakasama.—2 Vei. 6:29, 30.

Ia e vakamatatataka o Jiova ena nona Vosa  meda vakawati ga ena Turaga. Na vuna? E kila o koya na ka ena vinaka vei ira na nona dauveiqaravi. E via taqomaki keda meda kua ni vakila na mosi ni vakatulewa cala, e vinakata tale ga meda marau. Ena gauna i Niemaia e levu na Jiu era vakawatitaki ira na yalewa vulagi era sega ni qaravi Jiova, mani cavuta o Niemaia na ivakaraitaki ca i Solomoni. E kaya me baleti Solomoni ni ‘lomani koya na nona Kalou, . . . ia era vakacalai koya na watina vulagi.’ (Niem. 13:23-26) Mani dusimaki keda na Kalou meda vakawati ga ena Turaga, nida na vakila na kena vinaka. (Same 19:7-10; Aisea 48:17, 18) Era vakavinavinakataka na lotu vaKarisito dina na nona veikauaitaki na Kalou, era na vakararavi ga ena nona veidusimaki. Nira vakamalumalumu ena nona lewa, era sa vakaraitaka tiko kina ni o Jiova ga e Turaga Cecere ni Lomalagi kei na Vuravura.—Vkai. 1:5.

O na sega ni vinakata mo lai “vauci vata” kei na dua ena vakavuna mo yawaka na Kalou. (2 Kor. 6:14) Levu na lotu vaKarisito nikua era doka na veidusimaki ni Kalou ni sa vakadinadinataki na kena yaga. E muri, era dau marau nira kila ni a donu nodra vakatulewa. Ia ka ni rarawa ni so era digidigi cala.

E vakamacalataka o Maggy, * e dua na tacida yalewa mai Ositerelia, na ka e yaco ni veibuku kei na dua e sega ni vakabauta: “Au calata e levu na soqoni me rawa ni keirau sota. Au malumalumu sara kina vakayalo.” E vakalaiva o Ratana, e dua na goneyalewa mai Idia, me domona e dua nona lewe ni kalasi e vuli iVolatabu tiko. Ia ni toso na gauna, e laurai ni mai vuli iVolatabu ga ni vinakati Ratana. Tini sara me biuta na dina o Ratana, e veisautaka tale ga nona lotu me rau vakamau kina.

Dua tale o Ndenguè mai Cameroon. E vakawati ni yabaki 19. Ni bera ni rau vakamau, e yalataka vua o tagane ni na solia vua na galala ni sokalou. Ia ni oti e rua na macawa nodrau vakamau, sa vakatabui koya o watina me lako ina soqoni vaKarisito. E kaya: “Dua na ka noqu galili, au dau tagi. Au vakila niu sa sega ni qai lewa na noqu bula. Au dau yalolailai sara ga.”

E macala nira sega ni voravora se yalodredre kece na isa era sega ni tiko ena dina. Ia ke o sega mada ga ni vakila na rarawa ni o vakawatitaka e dua e sega ni vakabauta, vakacava na nomu veiwekani kei na Tamamu vakalomalagi dauloloma? Ena tarai iko vakacava nomu a sega ni muria nona ivakasala e vakarautaka mo vinaka kina? O koya e bibi duadua, e raica vakacava o koya na nomu vakatulewa?—Vkai. 1:33.

Era vakadinadinataka na tacida e veiyasa i vuravura ni vinaka duadua na vakawati “ga ena Turaga.” O ira na saga dina mera vakamarautaka na Kalou e bibi vei ira mera digia ga e dua na watidra era vakabauta vata. Mai Japani, era uqeti Michiko na wekana me vakawatitaka e dua e sega ni tiko ena dina. E raica tale ga nira kunea vakarawarawa na watidra ena ivavakoso nona itokani kei na nona veikilai. E kaya: “Au dau tukuna lo tiko ga ni ‘Kalou mamarau’ o Jiova, ena sega ni vakatau na marau ena noda vakawati se sega. Au vakadeitaka tale ga ni na vakaceguya o Jiova na gagadre ni lomada. Ke da via vakawati gona ia e dredre meda kunea e dua na watida, e vinaka cake meda se dawai tiko mada ga.” (1 Tim. 1:11) E muri sa qai dua na wati Michiko vinaka, e marau o koya ni wawa.

Era dau wawa tale ga eso na tacida tagane mera kunea e dua e veiganiti. Dua vei ira qori o Bill mai Ositerelia. E vakadinata o koya ni so na gauna e dau taleitaki ira na yalewa ni vuravura. Ia e dau qarauna me kua ni sivia tale nona volekati ira. Na vuna? Ni itekitekivu ya e rawa ni lai tini ena nona “vauci vata” kei na dua e sega ni vakabauta.” A taleitaka e vica na goneyalewa, ia e sega ni dua e taleitaki koya sara. Tolusagavulu na yabaki nona wawa voli o Bill, sa qai sotava e dua na tacida yalewa e ganiti koya vinaka. E kaya o Bill: “Au sega ni veivutunitaka e dua na ka.” E tomana: “Au kalougata dina ni keirau dau cakacaka vakavunau vata, vuli vata, sokalou vata tale ga. Au dau marau  niu veimaliwai kei ira na itokani i watiqu nira qaravi Jiova tale ga. E idusidusi ena neirau bula vakawati na ivakavuvuli vakaivolatabu.”

Na cava mo cakava tiko ena nomu waraki Jiova me rogoca nomu masu? Dau vakasamataka na vuna o se sega tiko kina ni vakawati. Ke vuna levu oya nomu muria na veidusimaki ena iVolatabu mo vakawati “ga ena Turaga,” o vakacaucautaki ena nomu doka na ivakaro vakalou qori. Nanuma tiko ni marautaka o Jiova na nomu vakatulewa ni o doka na nona Vosa. (1 Sam. 15:22; Vkai. 27:11) Mo ‘sova tiko ga yani na lomamu’ vua na Kalou ena masu. (Same 62:8) Ena vakaibalebale ga vakalevu na nomu masu ni o vakamamasu tiko ga vua ena yalodina. Ena dei na nomu veiwekani kei na Kalou ena veisiga ni o tudei se mani dredre vakacava na kemu ituvaki. Nanuma tiko ni o koya e Cecere Sara e dau kauaitaki ira yadua na nona dauveiqaravi, e okati iko tale ga mo ka talei e matana. E kauaitaka na ka e bibi ena nomu bula kei na ka o gadreva. E sega ni yalataka o koya e dua me watimu. Ia ke o vinakata dina me dua na watimu, e kila na Kalou na sala vinaka duadua me vakaceguya kina nomu gagadre. Same 145:16; Maciu 6:32.

Ena so na gauna o na vakataki koya na daunisame o Tevita, ni kaya: “Mo ni rogoci au vakusarawa Jiova; sa ciba na yaloqu: mo ni kakua ni vunia vei au na matamuni.” (Same 143:5-7, 10) Ena gauna va qori, solia na gauna vua na Tamamu vakalomalagi me vakaraitaka vei iko nona inaki. O na cakava qo ena nomu dau wilika na nona Vosa qai vakasamataka vakatitobu. Ena matata kina vei iko na nona ivakaro kei na sala e dau vukei ira kina nona dauveiqaravi ena gauna sa oti. Ni o vakarorogo vua, ena matata tiko ga vei iko ni ka vakayalomatua dina mo talairawarawa vua.

Na cava tale e rawa ni vakavuna me marautaki qai vuavuaivinaka na nomu bula vakadawai? Na gauna ni bula vakadawai e gauna vinaka mo saga kina mo matua vakayalo, mo dau lomasoli, daucakacaka, mo yalomalua, mo gumatua ena sokalou, me vinaka tale ga na kemu irogorogo. Qo na itovo ena yaga dina ena dua na vuvale mamarau. (Vkte. 24:16-21; Ruci 1:16, 17; 2:6, 7, 11; Vkai. 31:10-27) Vakaliuca tiko ga na Matanitu ni Kalou ena nomu solia nomu vinaka taucoko ena cakacaka vakavunau kei na so tale na itavi vaKarisito, nomu cakava qori e itataqomaki. O Bill, e sa vakamacalataki mai, e tukuna me baleta na vicavata na yabaki e wawa tu kina: “E vaka ga e siri na saku! Au vakayagataka na gauna qori vei Jiova meu painia kina.”

Io, se yaga tiko ga na ivakasala meda vakawati “ga ena Turaga.” O na dokai Jiova, o na lomavakacegu tale ga ni o talairawarawa ena veidusimaki qo. E tukuna na iVolatabu: “Sa kalougata na tamata sa rerevaki Jiova, o koya sa rekitaka vakalevu na nona vunau. Ai yaya kei na iyau ena tu ga e nona vale: ia na nona cakacaka dodonu ena sega ni oti.” (Same 112:1, 3) Mo dei tiko mada ga ena ivakaro vakalou mo vakawati “ga ena Turaga.”