1. Na cava me dei tiko ga kina noda veiwekani kei Jiova?

O SA yalataki iko qai papitaiso mo dua na iVakadinadina i Jiova? Ke vaka kina, sa tiko vei iko e dua na iyau talei, oya na nomu veiwekani sara ga kei na Kalou. E rawa ni vakaleqa na veiwekani qori na vuravura e lewa tu o Setani kei na noda malumalumu vakayago. Eda sotava kece na dredre qo na lotu vaKarisito. O koya gona e bibi me dei tiko ga noda veiwekani kei Jiova.

2. (a) Na cava na ibalebale ni veiwekani? (Raica na ivakamacala e ra.) (b) Eda na vaqaqacotaka vakacava noda veiwekani kei Jiova?

² O raica vakabibi na nomu veiwekani kei Jiova? O vinakata mo vaqaqacotaka? E tukuna vei keda na Jemesa 4:8 na sala meda cakava kina qori: “Toro voleka vua na Kalou ena qai toro voleka mai vei kemuni o koya.” E vinakati na cakacaka vata. * Nida sasaga meda toro voleka vua na Kalou,  ena toro voleka tale ga mai o koya. Na levu ni noda cakava qo, na kena dei na noda veiwekani kei Jiova. Eda na raica me ka bibi na veiwekani qori. Eda na lomadei me vakataki Jisu, ni kaya: “E bula dina o koya e talai au mai, . . . au kilai koya.” (Joni 7:28, 29) Ia na cava mo cakava mo volekati Jiova kina?

3. Eda veivosaki vakacava kei Jiova?

³ Dua na ka e bibi ena nomu volekati Jiova oya na nomu veivosaki vakawasoma kei koya. O na veivosaki vakacava kei na Kalou? O dau veivosaki vakacava kei na nomu itokani e tu vakayawa? De dua o volavola vakawasoma, se vosa vua ena talevoni. O vosa vei Jiova ni o masuti koya vakawasoma. (Wilika Same 142:2.) Ena vosa vei iko o Jiova ni o wilika vakawasoma na nona Vosa volai qai vakananuma vakatitobu. (Wilika Aisea 30:20, 21.) Meda dikeva mada na sala e vaqaqacotaka kina noda veiwekani kei Jiova na ivakarau ni veivosaki qo, me dei kina noda veiwekani kei koya.

4, 5. E vosa vakacava vei iko o Jiova ni vakayagataka nona Vosa volai? Tukuna e dua na ivakaraitaki.

⁴ E macala ga nida duavata ni tiko ena iVolatabu na itukutuku ni Kalou vua na kawatamata. Ia vakacava, e vakaraitaka na iVolatabu na sala mo volekati Jiova kina? Io. Ni o wilika vakawasoma na iVolatabu o qai vulica, vakasamataka mada nomu rai me baleta na ka o wilika. Mo vakasamataka na sala mo bulataka kina. Ni o cakava qori, e vosa kina vei iko o Jiova ena nona Vosa. Qo e vakavuna mo drau veiwekani vakavoleka.—Iper. 4:12; Jeme. 1:23-25.

⁵ Me kena ivakaraitaki, wilika qai vakananuma vakatitobu na vosa i Jisu mo “kua ni kumuna e vuravura na nomu iyau.” Ke o vakila ni o vakaliuca tiko na Matanitu ni Kalou, o kila sara ni marautaki iko o Jiova. Ena yasana adua, ke o nanuma mo bula rawarawa ga mo vakaliuca kina na Matanitu ni Kalou, qori sa uqeti iko tiko o Jiova ena tikina mo cakacaka kina mo rawa ni volekati koya.—Maciu 6:19, 20.

6, 7. (a) E yaga vakacava na vuli iVolatabu ena noda lomani Jiova kei na nona lomani keda? (b) Na cava me inaki ni noda vuli vakataki keda?

⁶ E vakavinakataka na noda bula  vakayalo na noda vulica na iVolatabu. Eda taleitaka tale ga vakalevu na itovo i Jiova, eda lomani koya kina vakalevu. Nida lomana vakalevu na Kalou, ena lomani keda tale ga vakalevu o koya, ena vaqaqacotaka kina noda veiwekani.—Wilika 1 Korinica 8:3.

⁷ Meda toro voleka vei Jiova, e bibi me donu na inaki ni noda vuli. E kaya na Joni 17:3: “Ena rawata na bula tawamudu, o koya e vulica tiko ga na veika me baleti kemuni na Kalou dina duadua ga, kei Jisu Karisito oni tala mai.” E noda inaki gona meda vuli meda “kilai” Jiova vinaka.—Wilika Lako Yani 33:13; Same 25:4.

8. (a) Na cava eda na lomatarotaro kina ena ka e cakava o Jiova vei Tui Asaraia me vaka e volai ena 2 Tui 15:1-5? (b) E vakaseavutaka vakacava na noda lomatarotaro na noda kilai Jiova vinaka?

⁸ Nida sa kilai Jiova vinaka, eda na sega ni lomatarotarotaka kina eso na ka e cakava. Kena ivakaraitaki, o raica vakacava na ka e cakava o Jiova vei Tui Asaraia e Juta? (2 Tui 15:1-5) Era “cabora tiko ga na lewenivanua na isoro kei na isoro kubou ena vanua cecere,” ia o Asaraia “e vakayacora tiko ga na ka e donu ena mata i Jiova.” E mani “totogitaka na tui o Jiova, e vukavuka tiko ga me yacova na siga e mate kina.” Na vuna? E sega ni tukuni na vuna. Vakacava, e dodonu meda vaqaqa na vuna e totogitaki Asaraia kina o Jiova, ni sega na kena yavu vinaka? Ena sega ni va qori noda rai nida kila vinaka na sala i Jiova. Eda kila tale ga ni “vakarauta ga” nona dau veivakadodonutaki o Jiova. (Jere. 30:11) Ke da sega mada ga ni kila na vuna e totogitaki Asaraia kina o Jiova, eda kila deivaki ni dodonu tu ga na nona lewa.

9. Na cava eso na itukutuku e vakaraitaka na vuna e vukavuka kina o Asaraia?

⁹ Ia ena ituvaki qo, e laurai eso tale na itukutuku ena so tale na tikinivolatabu. E kilai tale ga o Tui Asaraia me o Tui Usaia. (2 Tui 15:7, 32) Dua tale na kena itukutuku e laurai ena 2 Veigauna 26:3-5, 16-21, eda raica ni a dodonu na nona ivalavala o Usaia ena mata i Jiova, ni toso na gauna e “qaciqacia mai na lomana me leqa kina.” E saga ena yaloqaciqacia me siova na nodra itavi na bete. Era saqati koya e 81 na bete, ra qai saga mera vakadodonutaki koya. E raica vakacava qo o Usaia? E vakaraitaka o koya na nona dokadoka. E ‘cudruvi ira vakalevu’ na bete. Sa rauta me totogitaki koya o Jiova ena vukavuka!

10. Na cava meda kua ni lomatarotarotaka kina na ka e dau cakava o Jiova? Na cava meda cakava meda nuitaka tiko ga kina na sala dodonu i Jiova?

¹⁰ Meda kua ni lecava na tikina bibi e vulici e ke. Vakacava ke sega ni tiko eso tale na itukutuku ena Vosa ni Kalou, me vaka e laurai ena so na italanoa leleka vakaivolatabu? O na lomatarotarotaka tiko ga na yalododonu ni Kalou? Se o raica ni sa tiko ena iVolatabu na itukutuku e vinakati meda vakadeitaka kina ni o Jiova e dau caka dodonu, e kotora tale ga na ivakatagedegede ni ka e dodonu kei na ka e cala? (Vkru. 32:4) Nida kilai Jiova vinaka, eda na lomana tale ga vakalevu na nona sala da qai vakavinavinakataka, eda na sega kina ni via vakataroga na ka kece e cakava. Ena toso tiko ga noda vakavinavinaka nida vulica qai vakananuma vakatitobu na ka e tukuna na Kalou ena nona Vosa volai. (Same 77:12, 13) Qo ena vaqaqacotaka ga na noda veiwekani kei Jiova, ena dei tiko ga.

11-13. O kila vakacava ni dau rogo masu o Jiova? (Raica na imatai ni iyaloyalo.)

¹¹ Eda na volekati Jiova nida masu. Eda vakacaucautaki koya, eda vakavinavinakataki koya, eda kerea nona veidusimaki. (Same 32:8) Me dei noda veiwekani kei Jiova, meda nuidei ni dau rogo masu o koya.

¹² Eso era vakabauta ni masu e vakavinakataka na ivakarau ni noda vakasama. Era kaya ni kevaka o nanuma ni sa saumi na nomu masu, kena ibalebale ga oya ni o vakaraitaka na lomamu, na nomu leqa, o qai qara na sala mo walia kina. Qori eso na ka vinaka e vu mai na masu, ia o kila vakacava ni rogoca dina o Jiova nomu masu mai vu ni lomamu?

¹³ Vakasamataka mada qo: Ni bera ni mai bula vakatamata o Jisu, e raica sara ga o koya na sala e dau sauma kina o Jiova na nodra masu na nona dauveiqaravi e vuravura. Ni cakacaka vakavunau e vuravura o Jisu, e dau masu me talaucaka na lomana vua na Tamana vakalomalagi. Ena sega ni cakava qori ke nanuma ni sega ni dau rogo masu o Jiova. Dua na gauna e masu ena bogi taucoko. (Luke 6:12; 22:40-46) Vakacava, ena vakavulici ratou na nona tisaipeli me ratou masu ke nanuma ni masu e vakavinakataka ga na vakasama? E macala ni kila o Jisu ni sala dina ni veivosaki kei Jiova na masu. E kaya ena dua na gauna o Jisu: “Tamaqu, au vakavinavinakataki kemuni ni oni rogoci au. Au kila ni oni dau rogoci au.” Eda nuidei tale ga ni o Jiova e “Daurogo masu.”—Joni 11:41, 42; Same 65:2.

14, 15. (a) E yaga vakacava noda tukuna vakamatata na ka eda vinakata nida masu? (b) Yaga vakacava nona masu e dua na tacida yalewa me vaqaqacotaka nona veiwekani kei Jiova?

¹⁴ Ni o tukuna vakamatata na ka o vinakata ena masu, o na vakadinadinataka na sala e dau rogo masu kina o Jiova, de dua ena sega ni laurai levu na kena saumi na masu. O na kila ni bula dina tiko o koya ni sa rogoci na nomu masu. Kena ikuri, na levu ga ni nomu  talaucaka na lomamu vei Jiova, na levu ni nona volekati iko.

¹⁵ Vakasamataka mada na ivakaraitaki nei Kata. * A dau vakaitavi vakalevu ena cakacaka vakaitalatala, ia e sega ni marautaka. E kaya: “Au sega ni taleitaka na vunau. Meu tukuna vakadodonu, au sega sara ga ni taleitaka. Niu sa cegu mai na cakacaka saumi, e uqeti au e dua na qase niu rawa ni painia tudei. A solia mada ga vei au na kena fomu. Au vakatulewataka sara meu painia, au masu tale ga e veisiga me uqeti au o Jiova meu taleitaka na vunau.” Vakacava, e rogoca o Jiova nona masu? E kaya: “Sa ikatolu ni yabaki ni noqu painia. Ni levu na gauna au cakacaka vakavunau kina kei na noqu vuli vei ira na taciqu, au raica ni sa vinaka mai na iwalewale ni noqu vunau. Nikua, au sega wale ga ni taleitaka, au marautaka dina. Koya e bibi sara, niu volekati Jiova vakalevu ni vakatauvatani kei na gauna e liu.” Macala ga ni nona dau masu o Kata e vakadeitaka na nona veiwekani kei Jiova.

¹⁶ Me tiki ni noda bula noda veiwekani vakavoleka kei Jiova. Meda cavuikalawa meda volekata na Kalou ke da vinakata me toro voleka mai vei keda. Meda veivosaki gona vakawasoma kei na Kalou nida vulica na iVolatabu kei na noda masu. Noda veiwekani vakavoleka tiko ga kei Jiova ena rawa kina nida vosota na dredre.

16, 17. (a) Na cava meda cakava meda veivolekati tiko ga kina kei Jiova? (b) Na ituvaki cava eda na veivosakitaka ena ulutaga tarava?

¹⁷ Ia ena dredre toka ke sega ni oti na leqa eda dau masulaka. Ena gauna va qori, e rawa ni luluqa noda nuitaki Jiova. Eda na rairai veinanuyaka se rogoca dina o Jiova na noda masu, se okata meda veiwekani tiko ga kei koya se sega. Eda na walia vakacava na ituvaki va qo da qai nuidei ni vinaka tiko ga noda veiwekani kei na Kalou? Ena veivosakitaki qori ena ulutaga tarava.