E TUKUNI ena iVolatabu ni veikau eso na yasana ena Vanua Yalataki qai “levu” na kau. (1 Tui 10:27; Josua 17:15, 18) Ia era kaya eso na dauveivakadiloi ni sega ni dina qori nira raica ni dua na wase levu ni vanua ena gauna qo e sega kina na vunikau.

E kaya e dua na ivola me baleta na bula e Isireli ena gauna vakaivolatabu (Life in Biblical Israel) ni “levu sara na veikau e Isireli makawa ni vakatauvatani ena gauna qo.” E ubia tu na veiulunivanua na vunipaini e vakatokai na Alepo (Pinus halepensis), na vunioki drokadroka (Quercus calliprinos), kei na vunikau lalai na terebinth (Pistacia palaestina). E levu tale ga na vunilolo (Ficus sycomorus) ena Sefila, qo na vanua e okati kina na ruku ni veiulunivanua lelevu me yaco yani ina baravi na Mediterranean.

E kaya na ivola me baleta na vunikau e volai tu ena iVolatabu (Plants of the Bible) ni so na vanua e Isireli sa sega sara tu ga kina na vunikau. Na cava na vuna? E tomana na ivola qo: “Levu na ka e saga na tamata e vakaleqa na tubu ni vunikau, dua na vuna levu oya na vakarabailevutaki ni iteitei kei na vanua ni vakana manumanu, kena ikuri me rawa kina na iyaya ni taravale kei na buka.”